Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Юмор и сатира

ВОВ КОДАМА «БАБАСЬ»

—Пади, мезе-бди и чаподсть, сяс и тиемазь калекакс. Вов и тячивок ваймозе лиси кабинетть ваксса. Талонозе сявф кафкса частонди, а пингсь ни кемонти малаткшни.
—Калекакс тиедязь?!—шоворсь корхтамати од алясь.
—Тянкса судс максомат.
—А кивок пчкафтыхнень каршес сяськондсь тя судса? Тон вал, синь—кемонь. Стане шарфтсазь еттнень, што юкстасак шачема шиценьге, аф мяляфтсак местема сать.
—Зря тон тяфта. Адвокатт тянкса улихть.
 —А адвокаттненди коста ярмакне сявомат. Шокштядязь, кода эряви, сяльде ушедыхть васькафнемот: аппеляция макстама, пеняцятама, тяфтак тевть аф кадсаськ…
 —Тонь мархтот аф стане, аф тяфтане. Кда сембе лацот арьсельхть, судувок кивок афоль яка. А тяни суттне пяшксет, эрь шиня, кодама аньцек тефт аф ванондовихть.
—Мон видеть-правдать азондса. Шабравазень сярятькстсь пеец. Мольсь докторнянди. Ся и корхтай: «Тяса пчкафтомс аш мезе, таргама».
—«Таргама так таргама, тон докторат, сяда лац содасак». Сась куду, келептезе кургонц, таза  пеец аш. Ласькозь меки поликлиникав! «Доктор! Доктор! Тон шумбра пеезень таргайть». Акша халатсось ванозе, ктор-ктор-ктор рахай: «Тят ризна тяшкава, тяньге сичас таргасаськ».
—Ну и максомаль суду.
—Максозе. Пандсь адвокатонди. А судса няфтезь кафта сур еткса пяльхкаснон.
—Прощенья хуш докторсь анась?
—Докторсь мзярдовок аф лувсы эсь прянц муворукс. Шабравазтивок корхтай: «Еньдот куцю, а кяльцень мархта можна курня тяемс». Эряфкшу алясь кулхцондсь, кулхцондсь и корхтай:
—Видец авать. Мон монць районнай больницяса главврачелень. Тяфтама докторхнень инкса инголи ваймозень максолине. А тяни каендан.
—Поздна стрянендать.
—Улень колма докторонь ширеса. Колмоцьке сермадсть разнай диагност. Вов и аф содаса, кода улемс, кодама урмада пря пчкафтомс. Вов сань тячи тага. Аф содаса, мезе азы акша халатсось. Пяк ни валом примай, аф курок сувафтама. Фкя сярядись лиссь докторнять ширде.
 —Кие примайсь?—кизефнесазь очередьса ащихне.
—Бабась…
—Баб Ась?! Сяс и тарксесы пингть. Сиренясь, пади, машни эсь лангозонза. А тяса нинге минь эсь сярятьфоньконь, пичефксоньконь мархта.
—А кда машнефтьсаськ, катк кудса ащи. Ули пенсияц и пара.
Сяльде кабинету сувась пеняцяй аванясь. И тага пингсь таргавсь.
—Кяжиян, пяк кяжиян тяфтама бабатнень, атятнень лангс,—мярьгсь исяконь главврачсь.—Паньцайть, кяжияйхть, законць синь ширесост. Аф паньцайть, ломаттнень лангса наругайхть. Мезе можна тнярс тиендемс, кати.
—Сиренясь, пади, сяда лама содай, шарьхкоди. Виде диагноз путы.
 —Путы ни… Монь пчкафтыне и бабат, и атят ульсть. Кажнайсь эсь лацонза сермады, лияда енюкс путсы прянц. Архт, споряк мархтост. Мярьгихть, местема ина сать, кда тейнек аф верондат, миньдедонк лама содат. Тонць и пчкафтк пряцень.
Учевсь пеняцяй аваняське.
—Мезе азсь бабанясь?—кизефтезь ломаттне.
—Кле, пяк лама ярхцат, сяс и муцяй эсот пекурмась, тарксетянза лима-сюнокс. Сивольнясь аф ладяй, шапама лофцонять юкстак. Алхне вреднайхть. Салу калсь кизоти весть. Лапотть   эзембряв и учк, мзярда кхасак. Тяфтавок караул, станявок аф эряф.
—Бабати мезе-мезе азома, тяфтак  што ли нюрьксетяма пялень ши.
 —Ожу-ка, а кие мярьгсь, што примай эсонк баба. Ефси аф баба, од аля. Ломаттне эрекласть: —Од аля?! Тя пара. А то «баб Ась», «баб Ась». Но сяка мес-бди ламос кирнесыне ломаттнень.
—Мес? Мес? Да сяс, мес сон аф аньцек лекарстваса эсонк пчкафты, но и валса.
—Ся кода?
—Седикс-ваймокс корхни, азсыне эсь урманзон, сярятьфонзон. Лятфтасыне тядянц сембе урманзон. Шорясыне    еттнень, шаракофтсы пряцень. Озафат инголенза, аф стямс-аф прамс. Лисемс ба  вишконяста.
—А тон мярьголеть, што тонь урматнень колга тейне аф интересна  кулхцондомс,—тонафтсь эсонза ингольдень главврачсь.
—Азондыть рьвяцти, тядяцти. А мон лезксонкса сань.
—Мярьголень. Суват и мярьгат.
—И мярьган.
—И мярьк. Тон тонць докторнят. Пади, содасак, мезе мярьгомс, шарьхкоттяда фкя-фкянь. А монь койсон, «коса шарат—тоса комиссарат». А тя кабинетса комиссарсь аф тон, аф мон, а акша халатсось. Сави нинге пшкядемс.
Авась няфтезе каготканц, главврачсь ушедсь ванондомонза. Валхне, кодама ляпонят тяст уле, эздост аф пчкат. Кодама, шта, надобият докторнясь сермадсь? И келептезе кургонц. Вов кодама бабань колга мольсь корхтамась. «Бабась»—тя докторнять фамилияц. Валсь мокшень, а фамилиясь молдавскяй. А то «баб Ась» да «баб Ась». А сон вов кодама Бабась!
 
                                                                                                                                        Илья Вешкин.  
 

14.03.2019 №10
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин