Поиск по сайту: 
 
Наши мокшанские сыновья и дочери
Тема дня
Национальная тематика
Культура
Обратная связь (Газета - Читатель)
В Госсобрании РМ
В Правительстве РМ
Демография
Здоровье
Мокшане о мокшанах
Как жили и живут мокшане
Ветеранам о ветеранах
Молодежный клуб
Наша усадьба
Наука и жизнь
Спорт
Благотворительность
Указы Главы РМ
Религия
Люди и дела
Закон и порядок
АПК
Обо всем понемногу
Экономика
Мокшень правде-90!
Наша семья
Письма из села
Юмор и сатира

Архив
 март 
 2020 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 
Религия

Эняльдень Матронушкати максомс знак…

Аньцек кодама специалистонди ашень яка урмазень мархта, мезьса аньцек ашень  пчкафне пря…
Колма кизода инголе карязсон эвондась гриза—оцю, пцтай 3 сантиметрат. Улендсь, што сярятьфть сюнеда нльне ашень якав, ашень ащев озада. Весть кулень бабанянь колга, кона маштсь тяфтама урмань пчкафтома. Сонь сембе шназь. Кенярдень, срхкань теенза мирдезень мархта. Кудонц инголе ульсь кувака очередь, савсь учендомс несколька част. И вов мон лисень ни машинаста и срхкань сувамс кудозонза, тя пингть малазон лоткась автомобиль. Панжевсь кенкшсь, и эздонза прянц лихтезе православнай батюшка и мярьгсь: «Мезенди тон сать тя бабать шири? Сон вдь церькаву аф якай. Сяда пара, кда молят святой васттненди». Эста мон ашине кулхцонда. Кода тяфта? Вдь тяшка очередь ащень. Колавсь мялезе. Сембонь еткста, кие тоса ащесь, священниксь сюцемань аньцек монь. Да и бабаське ашезь лезда. Лядондсь аньцек фкя—тифтемс операция. Ламос ашень согласиндакшне, вдь монь шабазе нинге емланяль. Кода тяса оду пуроптомс вийхть? Вдь операцияда меле аф мярьгондеви кепсемс сталмот.
Муцсемане ашесть аделав. Но потмосон мезсь-бди фалу лоткафнесь эсон молемс  операцияс. Мзярда ашельхть ни вийне сяда тов кирнемс сярятьфть, мон сембе сяка тифтень магнитно-резонанснай томография и молень хирургти. Сявонь направления анализонди. Тевсь ульсь сентябрьста. А тяда инголе, августста, ошезонк пачфнезь святой Матрона Московскаять шкаень ликонянц. И монь пяк оцюволь мялезе сюконямс теенза. Мирдезе пачфтемань храму. Прань шкаень ликонять инголи и азондыне  мезсь пичефтьсамань. Эняльдень лездомс пчкамс или хуш тиемс стане, штоба операциясь еталь лац. Васенцеда эряфсон заказань шумбрашинкса сорокоуст, а меле кода-бди курокста юкстань тянь колга. А хирургти консультацияс молемда инголе лятфтань и эняльдень Матронушкати и сембе святойхненди максомс знак, лац-аф тиян, срхкамок операцияс.
 Сяка шиня, илять, лиссь стане, што аф ся режимса муськине пуховикозень и гастяйне сонь. Шобдава случайна колайне ваномать и кружкать, конань ерань сявомс мархтон больницяв. Но сембе сяка срхкань консультацияс. А веть няень он. Киза, перьфпяльсь панчф потмоса. Мон ащан кить лангса. Тротуарть лангса ащесь анциня. Максонь теенза мзярошка трешник, а сон венептезе тейне Матронушкать шкаень ликонянц. Меле няйса, бта ашкотфан кокон потмос и валомне-валомне тяряфнян лисемс эздонза.
Операциянь шись малаткшнесь. И вов весть аноклань ужнамс. Кода фалу, эсон муцсесь сярятьфсь. Тяса шарфтонь мяль пидефозень лангс, а меле, апак фатяк, шарьхкодине, што гризась лоткась пичефтемон. Мезезевок ашезь сяряде! Несколькаксть сярятьфсь тяряфнесь мрдамс, но меколи ефси сетьмось. И омбоце шиня маряйне прязень шумбраста. Больницяв ашень мада, операцияда атказань. Лама пинге киндивок ашень азонкшне тя чудать колга, пелень. Меле молень Москуву святой блаженнай матушкать мощанзонды и спасибань теенза.
Тяни фалу арьсекшнян: видецоль ся батюшкать! Верась афкукс аралай. Аньцек кажнайти эряви самс тянди эстеенза.
Ольга Н.

25.04.2019 №16
 
 
 

 
НОВОСТИ

ПЕРЯМС КИТЬ КОРОНАВИРУСНАЙ ИНФЕКЦИЯТИ

11 мартста Саранскяйса Мордовия Республикань Пресс-центраса ётась Мордовия Республикаса эпидемиологическяй обстановкати лемтьф пресс-конференция.            Журналисттнень мархта васедемаса примасть участия Мордовия Республикань здравоохранениянь министрсь О.В.Маркин, Мордовия Республикать эзга  потребительхнень праваснон и ломаттнень благополучияснон араламаснон сфераса надзорть коряс федеральнай службань Управлениять эпидемиологическяй надзоронь отделонц начальникоц Ю.В.Матвеева.

 

Кода азозе Мордовия Республикань здравоохранениянь министрсь О.В.Маркин, тячиень шити Мордовияса Республиканскяй инфекционнай больницяв госпитализировандафт 8 ломатть, конатнень улихть и ОРВИ-нь,  и коронавируснай инфекция лангс шарфты признаксна. Кафттне эздост састь Италияста, кототне—контактнайхть.
 

20.03.2020
 

СЕМБОТЬ КИРДЕМС МЯЛЬСА

Ёткшиста, 14 мартста, Республикань Кудса ётась Великай Отечественнай войнаса Сяськомать 75 кизонь топодеманцты анокламать и праздновандамать коряс «Победа» оргкомитетть заседанияц, конань вятезе Мордовиянь Оцюнясь В.Д.Волков.

 

Пуромксса  примасть участия МР-нь Государственнай Собраниять Председателец В.В.Чибиркин, Мордовиянь Правительствать Председателец В.Ф.Сушков, МР-нь Оцюнять Администрациянц вятиец А.А.Богатов, МР-ть эзга главнай федеральнай инспекторсь М.С.Сезганов, Мордовиянь Правительствать Председателенц заместителенза Г.А.Лотванова, Г.П.Комусов, министерствань и ведомствань вятихне, райононь оцюнятне.

20.03.2020
 

МОРДОВИЯНЬ ГОССОБРАНИЯНЬ ДЕПУТАТТНЕ ШНАЗЬ РФ-нь КОНСТИТУЦИЯТИ ПЕТЬКСНЕНЬ

12 мартста Саранскяйса ётась Мордовия Республикань Государственнай Собраниять 44-це сессияц.  Сонь шинь повесткасонза фкя инь важнай кизефксокс ульсь РФ-нь Конституцияти петькснень колга законть ванондомац. Законти основакс арасть тезисне, конат азфтольхть РФ-нь Президентть Владимир Путинонь мархта Федеральнай Собранияти эсь Посланиясонза. Президентскяй ушетксне сяда тов ульсть келептьфт предложениятнень мяльс сявозь, конат састь рабочай группати, кона пуроптф государстваньконь вятиенц мархта.
 

 

Кода азозе шинь повесткати лихтьф тя кизефксть коряс дискуссиять ушедомстонза МР-нь Госсобраниять Председателец, «Единая Россия» партиянь политсоветть Секретарец Владимир Чибиркин, РФ-нь Конституцияти полафтксне водендафт странаньконь суверенитетонц обеспечендаманцты, граждаттнень социальнай гарантияснон кемокстамаснонды, политическяй системать виияфтоманцты, вешфкснень  касфтомаснонды ломаттненди, конат занцихть государственнай пяк эрявикс должностть.

 

20.03.2020
 

МОРДОВИЯСА 7750 СЕМЬЯТИ МАКСФ РЕСПУБЛИКАНСКЯЙ ТЯДЯНЬ КАПИТАЛСЬ

Тяниень пингть, кода марнек странаса, стане и минь республикасонк оржаста ащихть демографиянь кизефксне. Мордовиянь Оцюнясь В.Д.Волков Государственнай Собранияти Посланиянц эса азозе: «Маластонь кота кизотнень тейнек эряви пяшкодемс афкукс историческяй задача—касфтомс республикань населениять одс шачфнень лувксснон касфтоманц вельде, мезсь  апак сатнеколь комсь ветие кизода ламос». Эряви азомс, мекольдень пингть Мордовияса аф кржа тиендеви од, лама идень семьятнень ширеснон кирдеманкса. Эряфс ётафневи программатне, примсеви мератне каннихть результатт. Тяфта, вете кизоста лама идень семьятнень лувкссна Мордовияса кассь 1,5 тёжяньда. Тяниень пингть республикаса эряй 6685 семья, коса касфтовихть колма и сяда лама шаба. Оцю лезксокс ащи семьятненди тядянь капиталсь, кона тя кизоста сявомок Россиянь Президентть В.В.Путинонь мярьгоманц коряс, кармай      макссевома васенце идень шачфтыхнендивок. Минь республикасонк 2012 кизоста сявомок тевс сувафтф республиканскяй тядянь капиталсь. Кинди сон максови, кодама лувксоц и мезень лангс ули кода карьхцямс сонь? Тянь колга корреспондентоньконь мархта корхнемста азондсь Мордовия Республикань социальнай защитань, трудть и населениять занятостенц коряс министрть заместителец С.И.Шувалова.
 

19.03.2020  № 10
 

ВАНОМС ИНГОЛИ И АРЬСЕМС САЙ ПИНГТЬ КОЛГА

3 мартста Саранскяйса ётась Мордовия Республикань котоце созывонь Государственнай Собраниять нильгемонь колмувоце сессияц. Сонь эсонза оцю мяльса кулхцонтфоль республикань  Госсобранияти Мордовия Республикань Оцюнять В.Д.Волковонь Посланияц

Культурань республиканскяй Дворецсь пяшксель ломаньда. Посланиять кулхцондома пуромкшнесь 1000-да лама ломань. Ётксост Мордовия Республикань котоце созывонь Государственнай Собраниянь депутаттне, Мордовиянь предприятиятнень и организациятнень руководительсна, министрхне, ошень и райононь оцюнятне, ламотне лиятне. Панжезе и вятезе сессиять Мордовия Республикань Государственнай Собраниять Председателец В.В.Чибиркин, кона вал макссь Мордовия Республикань Оцюняти В.Д.Волковонди.

 

05.03.2020  № 8
 

«СЕМБЕ МИНЬ—ФКЯ СЕМЬЯ!»

тяфтама лем ала Тольятти ошень Мокшэрзянь культурань центрась ётафтсь ила, кона лемтьфоль Великай Победать 75 кизонь топодеманцты

16 февральста Самарскяй областень Тольятти ошень Мокшэрзянь культурнай центрась ётафтсь «Сембе минь—фкя семья!» Мокшэрзянь культурань ши, кона лемтьфоль Великай Победать 75 кизонь топодеманцты.

Тольятти ошень ламоц эряйхне—ёмланек-оцюнек пуромкшнесть «Автоград» культурнай центрав, штоба ваномс Мокшэрзянь культурань шить и примамс эсонза участия. Ёфси курок васьфтьсаськ Победать 75 кизонь топодеманц. Улема, аш стама семья, кона афоль юмафта Великай Отечественнай войнаса хуш фкя ломань, сяс пелькс и толу-качаму ся кизотнень колга мялямсь седисонк кармай эряма фалу. И сяс 9 майть—Победань Шить—учендсаськ таколдозь.

20.02.2020  № 6
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 

ЛЕНИНГРАДОНЬ ЭРЯЙХНЕНЬ ПОДВИГСНА АФ ЮКСТАВИ

27 январьста топодсь 76 киза, кода нолдафоль воляс Ленинград ошсь, конань пцтай 900 ши и ве кирдезь кружафста фашисттне. Ломаттненди савсь няемс лама нужа, кирдемс вачаши. Но ошсь немецкяй захватчикненди сембе сяка апак макстоль. Ся пингсь мзярдовок аф юкстави, фалу карматама мяляфтома советскяй ломаттнень подвигснон колга.

 

 

30.01.2020  № 3
 

РЕСПУБЛИКАНЬ ОЦЮНЯСЬ В.Д.ВОЛКОВ ВАСЬФНЕСЬ «ЛИДЕРЫ РОССИИ» КОНКУРСТЬ ПОЛУФИНАЛИСТОНЗОН МАРХТА

23 январьста, Саранскяйса, Республикань Кудса Мордовия Республикань Оцюнясь В.Д.Волков васьфнесь «Лидеры России 2020» Всероссийскяй управленческяй конкурсть—«Россия—страна возможностей» президентскяй платформань флагманскяй проектть полуфиналистонзон мархта.

30.01.2020  № 3
 

РЕСПУБЛИКАНЬКЕ АСЬКОЛЯЙ КАСОМАНЬ-ВИИЯМАНЬ КИГЕ

24 январьста Культурань республиканскяй Дворецса ётась оцю пуромкс, кона лемтьфоль Мордовскяй автономиять 90 кизонь топодеманцты. Торжественнай мероприятияса примасть участия Мордовиянь Оцюнясь В.Д.Волков, Российскяй Федерациянь Федеральнай Собраниянь Федерациянь Советонь членць В.В.Литюшкин, РФ-нь Государственнай Думань депутаттне В.Б.Кидяев, В.Б.Ефимов, В.И.Пискарёв, ПФО-са РФ-нь Президентть полномочнай представителенц заместителец И.Ю.Буренков, МР-нь Государственнай Собраниять Председателец В.В.Чибиркин, аф кржаль инжида шабрань региоттнень эзда.

30.01.2020  № 3
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин