Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Национальная тематика

Пачфнихть Санкт—Петербургста

Корхтафоль финно-угорскяй кяльхнень ванфтомаснон колга
20-21 апрельста Санкт-Петербург ошса Финляндиянь институтса ётафтовсь «Финно-угорские проекты в области языка и культуры» семинар, коса примасть участия пцтай сембе финно-угорскяй нароттне, тяконь лувксса и мокшэрзятне.
«Живой язык» международнай проектсь, кона финно-угорскяй кяльхнень ванфнеманкса тевс нолнесыне комикснень, марса Финляндиянь институтть мархта 20 апрельста ётафтсть семинар сятненди, кит тядянь-алянь кяльхнень тонафнемста башка мяль шарфнихть художественнай ширети, тяконь   лувксса комиксненди. Семинарс пуромсть пцтай сембе финно-угорскяй народонь представительхть. Ульсть инжихть Финляндияста, Эстонияста, Карелия, Удмуртия, Коми, Марий-Эл, Мордовия республикатнень эзда, Ханты-Мансийскяй автономнай округста, Пермскяй крайста и лия вастста. Эрь субъектонь представительсь нюрьхкяняста содафтозень пуромфнень эсь тядянь-алянь кяленц мархта и азондозе, мезе тиендеви шачема ширесост кяльть ванфтоманкса-виияфтоманкса. Мордовияста пуромксса примасть участия Н.П.Огаревонь лемса МГУ-нь филологическяй факультетонь тонафнись К.Сайгутина и    М.Е.Евсевьевонь лемса  МГПИ-нь филологическяй факультетонь студентсь В.Антонов.
Семинарса башка мяль шарфтфоль сембода удалаф проекттнень лангс. Тяфта, Удмуртияста Георгий Грязев тиенди иттненди шра лангонь налхксемат, конат лездыхть сяда тёждяста тонадомс удмуртонь кяльть. Наталья Антонова азондсь Карелиянь Ведлозеро велеса панчф «Карельскяй кялень кудть» колга, коза, кода идень саду, макссесазь шабатнень, штоба сят тонадолезь карельскяй кяльть. Корхтамась кудса мольфтеви аньцек родной кяльса. Эстонияста режиссерсь Анти Наулайнен содафтозень пуромфнень «Фестиваль финно-угорских фильмов» проектть мархта, няфтезе вирень киношколать работанзон. Сембе видеороликне стане жа серматфт родной кяльса.
Арнау Бариос, Санкт-Петербургскяй госуниверситетонь лекторсь, тяфта жа примась участия семинарса. Сон азондсь мялень салай история, кода каталонецнень кяльснонды удалась получамс официальнай статус. Сембось ушедсь 60-це кизотнень, мзярда эвондасть каталонскяй кяльса васенце журналхне, ломаттне ушедсть пуромкшнема марс, штоба смекамс-арьсемс, мезе тиемс сяда тов родной кяльть ванфтоманкса. Ушедсть эвондакшнема рок-морайхть, конат морасть каталонскяй кяльса, а 80-це кизотнень лиссть васенце сериалхне и видео-урокне. 1990-2000 кизотнень мировой литературась кармась ётафневома каталонскяй кяльс.
Омбоце шиня, 21 апрельста, Финляндиянь институтса ётась комиксонь рисавамать коряс мастер-класс. Сонь вятиенза Санна Хукканен и Катри Силвонен макссть задания—рисавамс финно-угорскяй геройхть. Кажнайсь няезе эсь героенц-аралаенц эсь лацонза: кинь-бди тя ульсь «Супер-Олень», кинь—«Вийма» паця мархта герой, кона кази ломаттненди кельгома эсь тядянь-алянь кяльснонды.
Ня кафта шитнень семинаронь и мастер-классонь участникне ётафнезь ётка пингснон марса, бта фкя оцю семьяса. Содафтсть ошть мархта, ульсть Невскяй проспектса, ванозь кунардонь пингонь зданиятнень  и культурань памятникнень. Ламонцне лядсть фкя-фкянди цебярь ялгакс.
К.САЙГУТИНА.
 
ОЦЮ МЯЛЬСА ТЯШТСТЬ ДИКТАНТ
Финно-угорскяй народонь культурань Поволжскяй центрась Мордовия Республикань Культурань, национальнай политикань и архивнай тевонь министерствать лезксонц вельде ётафтсь «Мокшень и эрзянь кяльхнень коряс диктант». Всероссийскяй образовательнай акцияса участиянь примайхнень ёткса васенцетне ульсть и Петербургонь мокшэрзятне.
20 апрельста, ёткшиста, обед кучкать «Петровский» Спортивно-оздоровительнай комплексть кафта площадказонза пуромсть мокшет и эрзят и тяштсть диктант. Акциять целец—эреклафтомс мялень шарфтомать родной кяльти.
«Фонд поддержки и развития мордовской культуры в Санкт-Петербурге и Ленинградской области «Шумбрат» НО-ть президентоц Сергей Артемов азсь диктантонь сёрмадомань вастокс несколька площадка: Национальностень кудсь, Выборгскяй райононь школатнень эзда фкясь, и,  коса фалу мордовскяй землячествась ётафнесыне сембе мероприятиянзон—Никольская ульцясь, 13№ кудсь. Фкя вайгяльса кочказь сембе колмоце вастть.
Диктантть текстоц ульсь лемтьф Мордовскяй национальнай театрать 85 кизонь топодеманцты.
Диктантонь ламоц сёрмадыхне ульсть Мордовия Республикань Старошайговскяй районца шачфне-касфне. Нят В.А.Родькин, Елена и Александр Резаефне, Евгений Налдин, Юрий Чудаев и ня строчкатнень сёрмадысна В.Родькин.
Кафта ковда инголе Севернай столицав саф эряма Евгений Налдин мярьгсь: «Вестевок ашень арьсекшне, што самок Питеру, мон карман тяштема диктант мокшень кяльса». Азома сявок, Евгений мазыста тяшти, диктантть сёрмадозе кеме «колмос», хуш Шайговскяй школаса, «Сельхозтехника» районца, синь ашезь тонафне мокшень кяльть. Александр Резаев, образованияс коре юрист, тяштезе диктантть «нилес». Лямбе валса лятфнезе родной кялень учительницанц Ирина Леонидовна Ерусланкинать.
«Нилес» тяштезь диктантть Темниковскяй райононь мокшалясь Николай Артемов, Теньгушевскяй райононь мокшавась Людмила Калабкина (Хардина), Ковылкинскяй районца шачись Евгений Коротков и лиятне.
Азома сявок, диктантонь тяштихнень ёткса ульсть и сят, конат шачсть Ленинградскяй областьса и тядяснон-аляснон кяльснон аф сяшкава лац содасазь. Но синь мордовскяй диаспорань активнай участникт. Кода, кепотьксонди, Михаил Дьяков, конань «юронза» молихть Ельниковскяй райононь Мокшень Масканя велеста.
Азса видеста, текстть максыне теест, штоба синь одукс тяштелезь. Старандасть, тяштсть 260 вал. Тянксовок эрявихть шнамс.
Кудса ни, проверямок работатнень «Критерии оценивания диктанта» инструкциять коряс, путнень оценкат. Вов сявине фкя работать. Титульнай листса тяштьф: Александр Григорьевич Палаев, Мордовскяй АССР-нь, Инсарскяй райононь, Паева велесь. Эряй Ленинградса-Санкт-Петербургса 1978 кизоста сявомок. Работама вастоц: С.-Петербургскяй Горнай университетсь, техническяй наукань кандидат, «Транспорт и хранение нефти и газа» кафедрань доцент.
Лятфтайне, кода Александр Григорьевич кизефнемань, штоба мон азолине, кода тяштеви «двадцатое апреля» числась мокшекс: «комоСьце апрельста» или «комоЗьце апрельста». Теенза отвечань: «Звоняк Мордовияв и кизефтьк». Но сон тись ёнюста—валть вастс тяштсь цифра «20». Работанкса получась вете баллхт. Тяфтамот синь Паевскяйхне, грамотнайхть.
Минь, координаторхне, аф ламода, улема, эряскодоме, ётафтомок диктантть ёткшиста. Ёткшись ламотненди ульсь рабочай шикс. И ломаттненди ужяль, мес ашесть прима участия мялень салай тя мероприятияса. А главнайсь, мезсь пяк питни ня мероприятиятнень эса, землякнень мархта васедемста родной кяльса корхнемась.
В.РОДЬКИН.
Невскяй Дубровкась.

30.04.2019 №17
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин