Психологонь советт

—Улема, шачфтомать эзда пелькссь инь виись. Кода, шта, сонь сяськомс?
—Минь аваньке, молемок шачфтомань куду, сидеста арьсихть, што тяса синь учсесазь аф азовомшка сярятьф и пелькс. И тя пельксть колга синь сидеста кулендихть интернетть вельде ялгаснон эзда. Ков сяда пелькст азондыхть, тов сяда мялень шарфты. Минь кельгсаськ азондомс, конашкава сяряди шачфтомась. Но, кда авась инголькиге ушеды аноклама шачфтомати, сембось ётни аф сяшкава сярядиста, а главнайсь шарьхкодезь—кода и мезе тиемс. Курсне, конат улихть пцтай эрь ошса, тонафтыхть инь главнайти—шачфтомать пингста прянь вятемати, правильнайста ваймонь тарксемати и лекарствафтома сярятьфть ётафтоманцты. Ламоц содамошитне аф кондястихть, кда авась аф содасы, кода лафчептемс прянц схваткатнень пингста.
Шачфтыхнень инь оцю напряженияса улендихть кядьсна и шамасна. Но аф фалу. Аноклатада шачфтомс—лятфтасть, мезе мархтонт лисенди оцю стрессонь пингста. Ронгонь ся вастсь, кона ащи оцю напряженияса тя пингть, тяфта жа кармай и шачфтомать пингста, сяс инголькиге тиендеда упражненият ся оргаттнень лафчептомаснон коряс.
—Суват авань консультацияс, а тоса пеки авань очередь, вакссост аш фкявок аля. Мес тяфта?
—Улихть алят, конат мяль вельде якайхть рьваснон мархта сембе процедуратненди и васенцетне гинекологть ширеса отвечсихть сембе кизефкснень лангс. Но улихть тяфтама сай пингонь «папашат», конат афолезь няе больницятнень—тоса ащемась теест ёфсикс аф мяльс коре, и молихть рьваснон мархта бта байдекса панезь, вдь и атказамска визькс… обжави кельгомац. Тясть муцсе мирдентень—сонь аф молемац нинге аф корхтай сянь колга, што сон тонь аф кельктянза!
—А ламотнень мяльсна, штоба мирдьсна улельхть шачфтомать пингста—кле, катк ванцы, кода мон муцсян пря!
—Кда идть муцязь шачфтомац арси кяжень пандомакс мирдти мезенксовок—мирдть и рьвять ёткса мезсь-бди латцеви аф стане. Да, идти, кода тянь лувондсазь медикне, шачемстонза эряволь, штоба улельхть кафцьке родителенза. Но аньцек снярда, мзярда и тядясь, и алясь тянь вешсазь кафцьке. Алясь аф фалу анок тя стрессти, но сидеста уленди, сянь вастс, штоба лездомс авати, врачень бригадась ётафнесы пингонц аляти лезксонь максомаса. Азома сявок, аф сембе аватнень мяльсна, штоба вакссост ащель мирдьсна. Ламотне пелихть, што няйфть эзда мирдьсна аергоды эздонза.
Е.ИСТРАТОВА.