Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Юмор и сатира

МОНГА УЛЕНЬ ЗАОЧНИК

—Тят пичеде,—мярьгсь Андрей Дмитриевич.—Аде тячи илять Иван Петровичень пяли инжикс. И макссак теенза зачетцень.
—Пялонза молемс? Инжикс? Кода-бди аф пара. Мон вдь аф раднян теенза.
—Аф раднят, видеце. Но тон вдь студентат: а афкуксонь студентсь коза кельк моли и лац машты раднякс арама.
Мон ангоряйне касомозень, арьсезевонь. А мес аф молемс, а? И азонь мяль молемс. Андрей Дмитриевич указовась кой-мезе сявомс мархтонк. Ну, мезе-мезе путомс сумканяс или кяскавняс. Инжикс, кле, шавонь кятть аф якайхть.
Суваме магазину, и мон рамань кой-мезе, марайне сумкас, и туме.
Иван Петрович эрясь шуфтонь оцю кудса. Мзярда суваме пялонза, сон шранц вакссоль, мезе-бди сермадсь. Козк няемазь, стясь. Шумбракстоме мархтонза, сонга шумбракстсь. Андрей Дмитриевич азозе, местема саме, а нинге лятфтазе теенза—мон, заочник студентсь, поэтан, серматкшнян стихт, сяс литератураса зачетозти анокан сембе ширде.
—Сембе ширде, мярьгат?!—мзолдозь пшкядсь Иван Петрович.—Сянь ванцаськ!
Горькин чипордась тейне сельмот. Мон панжине сумказень и ушедонь тарксема «кой-мезе». Андрей Дмитриевич сявондезень кядьстон и путнезень Иван Петровичень шранц лангс.
Азорсь дивандазь ванць, мезе лихнетяма. Путоме сюлека «Столичнай», порембяль.
—О-о-о, да тинь пяк козятада!—шнамазь Иван Петрович и сияк серьгядезе рьванц:—Клавдя, ширезонк инжихть састь. А тон кати-косат. Малати сак, да кантта шра лангс танцти закусканя.
Малазонк сась эряфкшу ава, аф пяк мяль вельде варжакстсь лангозонк, меле тусь кухнязонза и аф ламос ащезь путсь шра лангс шаваняса капстат. Меле путозень тарелканяс кантф ярхцамбяленьконь и тусь маластонк.
Минь копордаме стопкань.
—Тинь шнасть Клавань… Шнасть! Эста сяда ляпоми,—тонафтомазь азорсь.
Мон аф прокс шарьхкодине, мезенкса шнама азоравась. Стопкада меле варжайне капстанзон, а синь сяшкава шапапт, кургценьге пувордасазь. Кода-аф кода порине. Тя пингть тага сась азоравась, пшкядень теенза:
—Клавдякай, эхи танцтихть капстатне! Кяльценьге нильсак поремстост.—Таргайне зепстон блокнотозень и ручказень, эняльгодонь:—Азонтка, пожалняста, рецептцень, кода аноклакшнесайть тяшкава танцти капстатнень!
Авать эстокиге валдомсь шамаликоц. Сон озась ваксозонк, валда валс лятфтазе тейне, кода аноклакшнемат тяфтама танцти капстатне—кода керсемат, мзяра сал каяма еткозост, а тяда башка, путомат шукштору лопат танцти шиненянди.
Мон семботь сермадыне блокнотозон, спасибань азоравати. Сон мзолгодсь, тусь кухнязонза и курок сась меки, путсь шра лангс тарелкаса керсеф эчке колбаса  печфт.
—Варжасть,—мярьгсь Клавдякась.—Тя колбасать тейнек радняньке кучезе Сибирьста. Тя колбасась офтонь сиволень…
Копордаме тага тифтень стопканя, варжаськ офтонь сиволень колбасатьке. Пара ярхцамбяльнясь. Андрей Дмитриевичень мархта сяшкава тусь мялезонк и стане шнаськ, Клавдякась сядонга весялгодсь, тусь кухнязонза и кандсь тоста сюлека Сибирень водка… Путозе инголенк, пшкядсь мирденцты:
—Иван, эрька панчка!
Иван Петрович сявозе сюлекать, ванозе этикетканц, лувозе—эсонза нильгемонь градус, дивандазь кизефтезе рьванц:
—И тнярс ванфнить?
—Ванфнине,—мярьгсь Клавдякась.—А тяни вов лихтине. Инжихненди фалу эряви кой-мезе ванфнемс…
Пара улендемс инжикс, мзярда лац васьфттядязь и каванятядязь. Литератураса зачетовок тейне путсь Иван Петрович, вузсонк содаф тонафтысь. Путомс путсь, но копорезевок ливоськодсь: сяшкава ласьконтьфтемань кемгафксувоце, кевейхксыеце и комозце векнень эзга. Шять, кда улельхть шиса Пушкин, Гоголь, Некрасов, Максим Горький, аралень теест ужялькс, мес Иван Петрович вельф лама азонтфтсь кядьстон синь колгаст и сянь колга, мезе сермадсть ня кельговикс писательхне.
М.БЫЧКОВ.

13.05.2019 №
 
 
 

 
НОВОСТИ
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин