Поиск по сайту: 
 

Архив
 август 
 2019 
пн вт ср чт пт сб вс
   1234
567891011
12131415161718
19202122232425
262728293031 

 
 

 

Наши мокшанские сыновья и дочери

ЭРЬ МОРОЦ ЭЖДИ ВАЙМЕ

—Корхнихть, сембе китне ушеткшнихть идькс пингста. Эрь лятфтак тонценнеть колга, Любовь Петровна.

 

—Торбеевскяй райононь Мокшень Ювня велесь монь  шачема-касома уженязе. Алязе, Петр Дмитриевич, и тядязе, Татьяна Ивановна Родионофне трясть пря соксезь-витцезь. Сембоц шачфтсть сисем итть, конатнень еткса мон котоцесь—самай емла сазорсь. Кафкса кизонятольхть тейне, мзярда тусь эряфста тядязе. Алязе касфтомазь ськамонза. Тядянь вастс, кудазоравань тевонь тиикс фкя-фкянь мельге ляткшнеме минь—сазорхне. Оцюфне лисендсть рьвакс, тушендсть ошу-коза тонафнема. Кудса азоравакс арсесть мельгаст касыхне. Семьяньке, эряви азомс, пяк дружнаель, тяфтамокс лядоме тячивок.

 

—Тячи тон содаф     артисткат. Шабакс арьсекшнеть сценать колга?

 

—Ёмластокиге мялезель арамс артисткакс. Курок тянь кармасть шарьхкотькшнема и мала ломанне. Шинь тевда меле, иласта пуромкшнельхть ширезонк радняньке и  морсельхть мокшень морот. Ванондонь прянь вятемаснон лангс, а сяльде няфнелине—кие кода кштий и морай. А меле синць кармасть эняльтькшнема няфтемс «концерт», нльне ярмаконявок тянкса венепнельхть. Лама аф лама, а шоколадканди сатнекшнель. Тядязень мазыель вайгялец, вярьгак вайгяльхть морсесь. Шять, эздонза и ётась тейне тя асусь. Сценаса морсема ушедонь колмоце класса тонафнемста. Кизонь каникуласта прважафолень Ковылкинскяй району идень лагери, коса тейне мярькфоль морамс «Чебурашка» мороть. Тяда меле мон кармань морсема школаса ётафневи сембе пуромкснень эса. Творческяй оцю кис лисемасон оцю путксоц учителезень, школань художественнай самодеятельностть вятиенц В.П.Покринать, кона аноклакшнемань илатненди.

 

Кафксоце класста меле ерань поступамс тонафнема Ардатовскяй культпросветучилищав. Тяка пингть, шарьхкотькшнине, мялезти аш кода пяшкодевомс, сяс мес сашендсь монь пингозе лядомс емла дуганозень мархта. И тяса кеняртьфтемань Ольга аказе, кона эста тонафнесь Рязанскяй техникумса. Срхкак, кле, тонафнема, а мон вели лядан. Валдонза меле поталакти комотнень, палсемонза ушедонь. Тунь тонафнема, виде аф Ардатовав, а Саранскяи—Л.П.Кирюковонь лемса музыкальнай училищав.

 

—Кода латцевсь тонафнемаце?

 

—Аф тёждяста. Васендакиге сяс, мес ашезь удала повомс вокальнай отделенияв. Туфталсь—народнай вокал ашель ся пингть. Мярьгсть кочкамс кодамовок лия отделения, тияк кизефтемазь, кодама инструментса ёралень ба тонафнемс морама. Велеса гармонияда башка мезевок ашень няенде, сяс кочкайне баянть. Штоба сатомс тя инструментса морама машты ялганень, тейне савсь пяк и пяк лама работамс. Пцтай ушеть варьхмодеманц мархта сашендонь училищав, а тушендонь тоста шоподемшовор. Кафта кизода меле ни морань баянца аф сяда кальдявста студент ялганень коряс. Пара мялезон, што эряфонь кизе вятемань тоза. Тя или тона пуромксса морамань техникать лангс надиямась аф оцю,  сяви, да апак фатяк «атказай». А монь кядялон баянозе, таргаса и монць моран эстейне. Оцю спасиба азондан тонафтыезти Н.И.Ручинонди, конань пяк оцюфтольхть вешфксонза тейне, коль сюцесь эсон, кошарясь, а мзярда сатыне ялганень, азозе, кле, васенце шистокиге шарьхкодине—кармай эздот толк, сяс и вешень тоньцтот.

 

—Тядде тонь ули нинге фкя эсь лацонь юбилейце—30 киза кода морсят Г.И.Сураев-Королевонь лемса «Келу» фольклорнай ансамбльса. Лятфтак, кода шовореть коллективти.

 

—Училищаса тонафнемста класснай руководителезе содафтомань «Келуть» эстонь вятиенц А.Я.Левинать мархта. Сон кулхцондомань, шарфнемань инголенза. Вайгяльце, кле, ару, ронгс-пондска ладят  тейнек, и примамань коллективу.

 

Тячи «Келусь»—монь омбоце семьязе. Тянемс мяльсонот Мордовиянь райоттнень  эзга васенце гастроленьке. Сяльде примаме участия «Голоса России» российскяй теле- и радиоконкурсса, коса «Келусь» арась II степенень лауреатокс. Мордовияв мрдаме «пацявста». Кепсесы мялезень, мес коллективоньке тячи содаф омба масторсовок. Улеме Эстонияса, Финляндияса, Швейцарияса, няфтеськ тостонь эряйхненди конашкава мазы мокшэрзянь лама вайгялень пентатоникась.

 

Мялезе тага весть азомс спасибамань валхт «Келуть» ингольдень вятиензонды А.Я.Левинати, Н.П.Спиркинонди, В.С.Родионовонди и тяниень руководителенцты И.В.Макейкинати, сяс мес кажнайсь эздост пяк ламоти тонафтомань. Тияк пара валса лятфтаса Мордовскяй государственнай филармониять ингольдень директоронц Н.Ф.Серкинонь, кона ульсь пара ялгакс филармониять видеса сембе морсихненди.

 

—Морат и кургса, и баянца. А нинге, кода содаф, варчсесайть вийхнень музыкань ладямаса.

 

—Виде. Пцтай анок ни «Праздник ши» альбомозе, коза пуроптфт мокшень   поэттнень стихотворенияснон лангс сёрматф мороне. Музыкань ладямаса примеркс тейне арсихть минцень мокшэрзянь композитороньке Г.И.Сураев-Королев, Н.В.Кошелева, Г.Г.Вдовин, А.Е.Пивкин, Н.П.Спиркин, В.С.Родионов.

 

—Ули сембода кельгома мороце?

 

—Инь пяк тушендыхть мялезон кельгомать колга моротне. Кельгомась уленди аф фкя лацонне: перьфпяльти, тядятненди-алятненди, иттненди и стак тов.

 

—Морамань тевсь, шарьхкотьф, аф тёждя, сявонди лама пингта. Но тя ашезь ара тейть перяфксокс тонафнемати.

 

—Содамошитне, койсон, эряфса мзярда аф мзярда да кондястихть. 1999-2005 кизотнень тонафнень Н.П.Огаревонь лемса МГУ-нь филологическяй факультетса. Пингта меле поступань аспирантурав МР-нь Правительствать видеса гуманитарнай наукань НИИ-в. 2011 кизоня Чебоксары ошса аралайне кандидатскяй диссертациять, кона лемтьфоль Мордовияса эряй мокшэрзятнень эряфса тевс ноляви касыксненди. Работать сёрмадомста и араламста тейне лездсть шачема-касома велесон ётафневи илатне. Тройцяста Мокшень Ювняса тянемс сязендихть тишет и ацсесазь мархтост кияксснон, вальмянь раматненди путнихть келувонь тараткат.

 

—Кода кельгсак ваймосемацень?

 

—Пара мяльса улендян дачаса. Пяк кельгса модать мархта возсемазень. Касфнян эрь кодама перень сёрот, лама заготовка аноклакшнян тялонди. Улихть сараскяньке. Оцю мяльса якан пангонь, иможень кочкама. Вов тя сембось и ваймафнесамань, максси вийхть-эрьгат.

 

—Любовь Петровна, цёратне эсь лацот тусть творческяй киге?

 

—Азолине тяфта: синь эряфсост морось стане жа занци башка васта. Максим армияда меле лядсь морама Москуса почетнай караулонь военно-образцовай оркестрав. Глеб тонафни Саранск ошень 18№ школаса, якай видесонза идень морамань школав-интернату. Сон морай саксофонца, аф весть ни примсесь участия межрегиональнай и всероссийскяй конкурснень эса и занци призовой вастт.

 

—Сяда товолдонди платтне кодамот?

 

—Мялезе сяда курокста нолдамс авторскяй музыка мархта дискозень. Сон кармай тейне нилеце альбомкс. Тяса, шарьхкотьф, ламось ащи ярмакнень эзда.

 

Мялезе, штоба «Келу» ансамбльсь сяда сиденяста лисендель сценать лангс, штоба минцень мокшень и эрзянь мороньке кайгольхть аф фкя лацонь илатнень, пуромкснень пингста, а артисттне эсь республикасонк марялезь пряснон аф инжи лаца.

 

—Спасиба! Любовь Петровна, «Мокшень правда» газетань коллективсь поздравляндатанза Тонь шачема шицень, юбилейцень мархта. Арьсетяма кеме шумбраши, паваз, оцю сатфкст творческяй кисот. Сяда тов кеняртьфнемасть од мороса! Пяшкодевост сембе мяльхне-арьсематне!

 

О.ЕВДОКИМОВА.

 


17.05.2019 №
 
 
 

 
НОВОСТИ
 

Новый благотворительный проект для пенсионеров Саранска!

В Саранске с 1 июля стартует новый благотворительный проект «От грёз к реальности». Проект был разработан Мордовским республиканским отделением Общероссийского благотворительного общественного фонда «Российский фонд милосердия и здоровья», его поддержка осуществлена в рамках конкурса социально­-значимых просветительских проектов для пожилых людей «Серебряный возраст» на средства, предоставленные АО «Райффайзенбанк».
Цель проекта—обучение пожилых людей оказанию психологической и педагогической самопомощи и взаимопомощи с целью сохранения благоприятного психологического самочувствия, развития и активизации их интеллектуальной деятельности и позитивной жизненной позиции.
В рамках проекта предполагается осуществить обучение 50 пожилых людей основам геронтопсихологической и педагогической самопомощи и взаимопомощи. Обучение будет проходить на базе ГБУ РМ «Комплексный центр социального обслуживания по г.о. Саранск» с июля по октябрь 2019 года. В качестве выездных мероприятий по проекту запланированы посещения Мордовского республиканского краеведческого музея им. И.Д.Воронина, библиотеки им. А.С.Пушкина, городского зо-опарка.
19.07.2019
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин