ПЕЕТЬКШНЕЗЬ

—Шяярьхне эрявихть цютьке... э-э...
—Сеендемс,—лятфтайне теенза эрявикс валть.
—Во-во, сеендемс.
Михаил Петрович, а тейть мокшекс нинге косонга сашендови корхнемс?—кизефтине.
—Пяк шуроста. Инголи, мзярда шисоль мамазе—(сон тядянцты мярьгондсь «мамай»)—и якалень Торбеевав васетькшнема, корхнелень мархтонза коль мокшекс. А тяни Торбееваса лятф радняневок сембе рузкс корхтайхть. Эсь кяльсон «шапан», мзярда аньцек повондан мокшень писательхнень шири али мокшень вели... Аф кунара улень Атерьса. Тоса ни эсь кяльса корхнень топодемс. Тостонь кой-кона мокшетне татаркска маштыхть корхтама, а татархне—мокшекс. Монга аф пяконе содаса татаронь кяльть.
—А вдь пара, Михаил Петрович, кда содат аф фкя кяль.
—Ся стане. Кялень содамась монь аф весть итцемань эряфса.
Михаил Петрович арьсезевсь цють, кати-мезе лятфнесь и тага корхтазевсь:
—Войнада инголе 1938 кизоня тонафнень Оренбургса авиационнай училищаса. Эста монь кучемазь складста столоваи ярхцамбялень усксикс. Кильдине алашать и айдяйне складть шири. Пачкодень. Кладовщикненди няфтине кагоднень, коза тяштьф мзяра-мезе эряви сявомс. Сят ушедсть путнема крандазозон продуктат. Пяшксе ящикт, кяскафт. Эсост сахар, лапшат, вай, колбаса. Монць ащан ширеняса и ванондан мельгаст. Эрьгафт алятне, кели пакарьхть. И вдруг кульса фкясь омбоцети пшкядсь мокшекс:
—Вай мархта тя ящикть путк сей, кержи шири, колбасатьке... мзярс тонац аф ваны.
(Тонац—сталботь, мон). Мон эстокиге смекайне, мезьса тевсь. «Мокша ялгатне—ворбетлят. Курсант ялганень ёрасазь кадомс пялес вачеда. А, пади, аф весть ни тяфта тиендсть?» Мзярда ни крандазсь марафоль и кагодти путыне кядезень, мокшетненди пшкядень эсь кяльса:
—А вай мархта ящикть, конань ёрасасть саламс, колбасатьке путость крандазу, а то азан латта.
Сят эводсть. Лихтсть и путсть крандазу аф фкя, а кафта ящикт, колбасань кафта ашкоткстка.
Курсант ялгане ся шиня ярхцасть топодемс. И аф аньцек ся шиня, а фалу, мзярда монь путнемазь продуктань усксикс. Кладовщикне оду ни ашемазь васькафне.
Михаил Петрович сетьмось, а сяльде тага корхтазевсь:
—Мон эсь национальностезень мзярдонга ашине кяшенде. Войнань кизотнень авиаполксонк сембе «мордвинкс» лемнемазь. Сонць Покрышкинга тейне тяфта мярьгондсь нльне маршалкс арамдонза мелевок. Да лиемста позывноезевок ульсь «Мордвин». Летчик ялганенди азонкшнень Торбеевать, мокшетнень, синь обуцяснон колга. 1983 кизоня Парижса лиссь «Саксо» книга, коса азондови мордвинть-геройть Девятаевонь колга.
1944 кизонь июльста, мзярда повонь пленц, гестапоса кизефтемазь:
—Кодама национальностце?
—Мордвин,—пшкядень.
—Тяфтама национальность аф содатама!
—Тинь лама мезе аф содатада Советскяй Союзоньконь колга.
Пленть лятфтамста Михаил Петровичень шамац тага сюнерьгодсь. А мон кизефтень:
—Пленца улемстот сашендовсь васьфнемс землякт?
—Кода мле! Эста мон улень Кляйнкенигсбергскяй лагерьса. Бараксонк сембе   военнопленнайхне летчиктольхть. Нинге тоса сашенкшнесь прязон мяль: ворьгодемс. Лисемс баракста—и вири.
Эста лагерень бараксонк юмась «Косойть»—стане лемнеськ эсь ёткованк Гитлеронь—портретоц. Нюрьгондсь, нюрьгондсь стенаса и вдруг... юмась. Эсэсовецне кеподсть жалф. «Коса фюрерсь?! Кие салазе? Кие валхтозе?! Расстрел!» Кепсезь-сюволязь матрасоньконь. А «Косойсь» бта ведьс ваясь. Мзярда обысконь тиихне тусть, минь ялгань келеса фкя-фкянь лангс ванондоме абонтфста. Ванан фкя узникть шамас, сонга ваны.
—Миша!—пшкядсь тейне.—Тон?
—Мон. А тон кият? Вай! Вася?!
Да, инголен ащесь идькс пингонь ялгазе Вася Грачев. Сонь тядянзон-алянзон шачема велесна Краснопольясь. Сят, няк, ётасть эряма районнай центрав—Торбеевав. Вася Грачевонь мархта фкя класса тонафнень сисем кизот. Сисем класснень аделамда меле мон тунь Казани. Тонафнень пароходонь капитанкс, сяльде—летчикокс. Васявок Торбееваста тушендсь лётнаи. Сон арась штурмовикокс. Прафтозь самолетонц, сявозь цёрать пленц. И васедеме. Видекс корхнихть: мирсь тесна. Кенярдезь корхнеме-лятфнеме. А меле ялгань келеса озаме картаса налхкома. Картатнень повширестонза таргазень Грачев. И мзярда явондозень, няине: картатне эсь тифт. Тейне повсь бубновай дамась. Эсонза равжа китькскат. Бта усанят. Да вдь нят афкукс усанят. Кармань шарьхкотькшнема: Гитлеронь усанза. Вона вдь мезьса тевсь. Тя землякозе, школаса мархтон фкя класса тонафни ялгазе, салазе и керсезе картанди «Косойть». Пара ни: эсэсовецне ашесть талакода.
Лагерьста срхксеме ворьгодемс марса. Ламоненк. Седялга шувомс варя и лисемс модать алга сялги проволокать омбокс. Тя эрявсь тиемс салава. Вень-вень шувоме-урафтоме. Мода варяса опаналь. Но сембода ламос тоса кирнесь Вася Грачев. Сон шувсь кенчса, куцюса. Весть сонь тоста таргаськ карьксса пялес опамфста. А мзярда цють сась ёжес, тага анась пря шувома—сяшкава оцюволь мялец ворьгодемс. Но минь эсь туннелезонк эцекшнеме полас-полас.
Ашезь сав эста ворьгодемс. Эсэсовецне шарьхкодсть. Музь мода варяньконь, конань педа-пес шувомс ляткшнесь ни аф лама. Монь и нинге кафта ялганень—Пацулань и Кравцовонь—ворьгодема тяряфтоманкса, тя тевти вожавандаманкса панемазь Заксенхаузен куломань концлагери. Явфтомазь идькс пингонь ялгазень Грачевонь эздонга.
Войнада меле ни, мзярда повондонь Урал шири, Свердловскяй областень Эрбит ошу, тостонь клубса фкя выступлениядон меле маладсь тейне аля.
—Михаил, шумбрат!
Ся ульсь идькс пингонь ялгазе Василий Грачев. Сон ся ошса работась строительнай трестонь оцюнякс.
А вдь мон афи арьсекшнень, што сон лядсь шиса. Мяневсь кяжи зверть кенжензон алда. Но сонга, бльшем, тоста ворьгодсь.
Тяни Грачевонь мархта кучсетяма фкя-фкянди сермат. Маластонь пингть мархтонза арьсетяма васедемс   Торбееваса—сонга сай васетькшнема.
Поездсь лоткась Торбеева станцияв.
—Аде пялон,—мярьгсь Михаил Петрович.
Мон содаса ни: Девятаевонь эряма вастоц Казаньца. А тяса кудоц-музеец. Кле, усконь од экспонатт. Кадомат синь Евдокия Максимовна Родинати—кудть-музейть оцюнянцты. Сияк, кле, ваномат, кода тусть касома од шуфтонятне.
Михаил Петрович тяда ингольдень кизотнень     Торбеевав усксесь лама од шуфтоня, кодапне нинге тя       васттнень эса инголи ашесть касонда: каштатт, пирамидальнай топольхть, сиянь тюсонь пиченят, туят. Ламотне эздост озафнефт и лац касыхть кудть-музейть перьф, партиянь райкомть зданиянц, школать инголе, Михаил Петровичень раднянзон кудснон маласа. Синь станяк и лемневихть: Девятаевонь шуфтонянза.
Кудса-музейса азорть таколгофтозе, тага токазе седиенц комнатась, кона тиф стане, кодамоль ведьгемонь-кодгемонь кизода инголе. Тяса сире пингонь кядьгонят, коцькаргат, мокшавань щапт—Михаил Петровичень тядянц Акулина Дмитриевнань панаронза, сапонянза.
—Суван сей и бта маряса мамазень вайгяленц,—пшкядсь Михаил Петрович.