Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Тема дня

ПЕРЯМС КИТЬ ИНТЕРНЕТТЬ ВЕЛЬДЕ ТИЕНДЕВИ ПРЕСТУПЛЕНИЯТНЕНДИ

4 июньцта А.С.Пушкинонь лемса Национальнай библиотекаса ётась «Безопаснай интернетсь—тяниень пингонь обществать пяльксоц» лем ала форум. Сонь работасонза примась участия Российскяй Федерациянь Государственнай Думань депутатсь, Безопасностть и коррупцияти каршек ащемать коряс комитетть председателец В.И.Пискарёв.
Форумсь работась дискуссионнай ниле площадкава, коса примасть участия министерствань и ведомствань, депутатскяй корпусонь, МР-нь Общественнай палатань, общественнай организациянь, тонафнемань заведениянь представительхть, «Единая Россия» партиянь члетт и сонь ширенц кирдиенза. Корхтамась мольфтевсь тячиень эряфса Интернетть вастонц колга.
Интернетсь панчси ломаттнень инголе оцю возможностть, тяста ули кода получамс эрь кодама информация. Тяка пингть интернетть виияфнеманц мархта касонды сятнень лувкссна, кит нолнесазь сонь возможностензон кальдяв тевонди. Кепотьксонди, аф шуроста интернетть вельде шабатне и аф совершеннолетняйхне водендакшневихть кальдяв тевс, нльне эсь прянь юмафтомати. Стане жа пуропневихть терроризмать ширенц кирни группат, коза тяфта жа сувафневихть од ломаттне. Тяда башка, пяк сидеста интернетть вельде мишендевихть-рамсевихть психоактивнай веществат—наркотикт. Тянь колга лама корхтафоль «Интернет-угрозы» площадкать эса, конань вятезе «Единая Россия» партиять Мордовскяй региональнай отделениянц секретаренц агитационно-пропагандистскяй работать коряс заместителец, МР-нь Оцюнять Администрациянц руководителенц васенце заместителец В.В.Маресьев.
Кода азфоль, республикасонк меля интернетть вельде тифоль 306 преступления. А тядде синь лувкссна пачкодсь ни кота сяттненди.
РФ-нь Госдумань депутатсь В.И.Пискарев азондсь ся работать колга, конань вятьсы Безопасностть и коррупцияти каршек ащемать коряс комитетсь интернетса преступлениятненди кить персеманкса. Тяфта, кемокстафоль ответственностсь «куломань группатненди» од ломаттнень водендакшнеманкса. Ня группатнень пуроптысна озафтовихть тюрьмав кеветие кизос. Тяддень апрель ковста примафоль законопроект, конань коряс аф мярьгондеви макссемс интернетса сведеният психоактивнай веществатнень анокламаснон и рамама вастснон колга информация. Мольфтеви оцю работа интернетса мошенничествати кить персеманкса.
Шить омбоце пялестонза ётафтфоль форумть пленарнай заседанияц, коса примафтольхть решеният кепотьф прябалать коряс. Тяфта, сафоль мяльс виияфтомс Мордовияса кибер-волонтерствать. Стане жа азфоль мяль сувафтомс образовательнай процессти дисциплинат, коса кармай пачфневома интернет-безопасностть колга. Региональнай СМИ-тненди, общественнай организациятненди, од ломанень объединениятненди, исполнительнай властень оргаттненди мярькфоль нолнемс тевс интернетть патриотическяй и духовно-нравственнай материалонь пачфнеманкса.
О.ЕВДОКИМОВА.

06.06.2019 №22
 
 
 

 
НОВОСТИ
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 
 
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин