Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

ТОЛЬЯТТИ ОШЕНЬ МОКШЭРЗЯНЬ КУЛЬТУРНАЙ ЦЕНТРАТИ—20 КИЗА!

Майста Самарскяй областень Тольятти ошень Мокшэрзянь культурнай центрати топодсь 20 киза. Ширеса эряй мокшетнень и эрзятнень эсь лацонь тя юбилейснон колга пачфтсть Самарань, Тольяттинь ламоц СМИ-тне. Оцю мяльса тянь колга азонттама газетаньконь тячиень номерсонза.
«Мокшэрзянь культурнай центра» автономнай аф коммерческяй организациясь панчфоль 1999 кизоня. Пуроптозь сонь В.С.Князькин, В.И.Истрашкин, В.Н.Семаев. Ломаттне ашесть ляда ширеса, тяконь лувксса и лия региононь мокшетне и эрзятне. 2007 кизонь декабрьста Тольяттиса етафтфоль Финно-угорскяй нароттнень шисна, конань эса примась участия комозьда лама художественнай коллектив Самарскяй областьста, Мордовияста, Марий Элста. «Раскень кудо» фестивальнай выставкать мяльса кирдезь, няфтьфтольхть кудъетконь, декоративно-прикладной творчествань паршихне, национальнай литературась и финно-угратнень ярхцамбяльсна.
Колма тёжяньда лама ломань 2008 кизоня пуромкшнесь Мокшэрзянь культурань областной кемонце фестивальти. Ётафтозь сонь Тольятти ошень Мокшэрзянь культурнай центрась и Самарань «Масторава» центрась.
1999 кизоста сявомок центрать представителенза примсихть участия Мокшэрзянь народть съездонзон, Всемирнай финно-угорскяй            конгрес-снень, Финно-угорскяй культурань Международнай фестивальхнень, ётафневи лия оцю  пуромкснень эса.
Тячиень эряфсь веши тевонь содай, шарьхкоди, сталмода аф пели, аньцек инголи моли ломатть. 2013 кизоть ушетксста Мокшэрзянь культурнай центрати председателькс кочкафоль Мордовиянь Атюрьевскяй райононь Атерь велеса шачф-касф мокшалясь, афкуксонь патриотсь Юрий Михайлович Дёмкин. Юрий Михайлович касфтозень центрань участникнень лувксснон, арьсезе, мезе сави тиемс сяда тов.
Пуромксста пуромксс, тевста тевс, праздникста праздникс касондсь-вииякшнесь Мокшэрзянь культурнай центрась. Бта национальнай мокшэрзянь культурань сюре кштирдсь, нолямок тевс етай пингть колга содамошитнень и эсь народонь кельги патриоттнень маштомошиснон. И тя лац няеви тевснон эзда.
Мокшэрзянь культурнай центрать ули пяк козя, мялень салай сайтоц (www.мордва-тольятти.рф), конань эзда ули кода лама мезе содамс Самарань мокшетнень и эрзятнень колга, ваномс, мезьса заняфт центрать участниконза тячи и, кда ули мяль, арамс участникокс эстейть, пяшкодемок максф анкетать. Няеви, што сайтсь козякофневи фото-, видео-, аудио-, морафтомань материалса сидеста, мезсь корхтай участникнень эрь шинь тевснон квалма.
«Лайме порась». Тяфтама лем канни центрать видеса фольклорнай мокшэрзянь ансамбльсь. Мазы вайгяль аватне, стирьхне, алятне кеняртьфнесазь пуромфнень рузонь, мокшень, эрзянь моротнень мархта. Синь—учсеф инжихть ламоц пуромкснень эса.
Мокшэрзянь культурнай центрать тевонзон квалма газетасонк пачфнетяма сидеста. Морафтыхнень седис удалась мумс киня пуромкснень етафтомаснон колга азондомать вельде. Аф весть  кядьстон кизефнезь центрать телефононь номеронзон, сайтснон и электроннай почтаснон адресснон. И вов аф кунара сон васьфтезе 20 кизонь юбилеенц. Председателенц Ю.М.Дёмкинонь и участникнень лемс сась аф кржа поздравляндамань вал, тяконь лувксса и мокшэрзянь масторста.
Комсь киза ётась ся пингста, кода Тольяттиса эвондась Мокшэрзянь культурнай центрась. Тя ошень мокшетнень и эрзятнень ули эсь кудсна, конань кенкшенза панжадот сембонди.
Майста «Тольятти» ДК-са келиста васьфтьфоль Мокшэрзянь культурнай центрать 20 кизонь юбилеец. Торжественнай тя пуромксса примасть участия Тольятти ошень Центральнай райононь оцюнясь А.В.Гончаров, Самарскяй Губернскяй Думань депутатсь В.И.Дуцев.
«Шумбрат, пара ломань!»—ня валхне сценаста васьфнезь юбилейс сайхнень.
Сембонди седиста моли лямбе валхт азсь Мокшэрзянь культурнай центрать председателец Ю.М.Дёмкин. Няфтьфоль аф оцю видеофильма, конань вельде ульсь кода содафтомс центрать тевонзон, эряфонц, видесонза ётафтф пуромкснень, васедематнень, акциятнень колга. Аш месть корхтамс, эздост комсь кизоста аф кржаль.
Тольятти ошень эряйхненди, конат сашендсть Мокшэрзянь культурнай центрать 20 кизонь топодеманцты лемтьф пуромксти цебярь казнекс арась Мордовия Республикань Государственнай премиянь лауреатть, Всероссийскяй и Международнай ламоц конкурсонь лауреатть, «Умарина» моронь и кштимань Мордовскяй государственнай ансамбльть концертоц.
Т.АЛЬШИНА.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022