«Эряфсь, аф ваномок стакатнень-сталмотнень лангс, козя кенярдемаса и павазса»—

Минь странасонк  ломанць лувови ламос эряйкс, кда сон васьфтезе 90 кизонц. Тячи мялезе азондомс Анна Федоровна Гераськинать колга, конанди тядде топодсь 91 киза. Сон шачсь 1928 кизоня Краснослободскяй райононь Зайця велеса мокшень оцю семьяса. Тяса касозе серенц, лиссь эсь велень цёранди рьвакс. Миртть-рьват 1951 кизоня, мзярда нинге ашесть шаченда идьсна, тушендсть Куйбышевань            ГЭС-ть строяма. Тоса покодсть фкя киза, мирдец—Иван Николаевич—шоферкс, а Анна Федоровна—разнорабочайкс. Меле мрдасть эряма эсь шачема велезост, работакшнесть колхозса.
 Гераськиттнень семьяса шачсть 7 итть. Шабаснон касфтозь трудонь кельгикс, пара ломанькс. Анна Федоровнанди ульсь 75 киза, мзярда кулось мирдец. Тяни Анна бабань 17 унокоц, уноконь 23 идец и уноконь фкя унокоц. Кизонда сон эряй велеса эсь кудсонза, полас-полас сашендыхть варжамонза иденза. А тялонда стиренза сявондьсазь эряма ошу, эсь ширезост. Эряви азомс, Анна Федоровна пяк цебярь  корхтай ялга, аф ваномок кизонзон лангс, сонь оржа енец, валда мялямоц. Сонь кельгсазь велеряйхне, кудоц фалу пяшксе инжида: пялонза корхнема пуромкшнихть баба ялганза. Вов кода Анна баба лятфнесы идькс пингонц:
—Кафкса кизоса ни ушедонь работама колхозса. Шабань келеса яксеме колхозонь паксяв табаконь валома. Эста колхозсь аньцек мезе ашезь озафне—куярхт, капстат, шурьхкат, сембе перень серотне кассть паксява. Ульсть нешке перет, кирдсть сараст, учат, тувот. Идькс пингозе весялаль, ялганень мархта налхксеме «буйса» (кода хоккей, аньцек конькафтома), «кофкаса» (топса), «кевняса», «котфонь кодайкс», «шееронь прянь порикс», «кончь-кончса». Эряме хуш ашуста, но сяка весялаль. А конашкава цебярьста етнельхть свадьбатне! Васенда молихть рьвянянь ладяма, меле—симомонза, а сяда меле аньцек етафневоль свадьбась. Гуляндакшнесть кудста-кудс. Пялешка кизонь етазь свадьбада меле рьвянять ширде раднятне якальхть цюкоронь кандома—тага ила. Етафнельхть «бабань кшит», «кстиндама илат». Сембе ня илатне етнесть гармониянь коряс кштизь-моразь. Хуш инголи ломаттне лама работакшнесть, сембе сяка маштсть весялготкшнемонга. Мокшаватне паксяв  шобдава молихть моразь, илять мрдамстост тага кулевихть морай вайгяльхть. Озайхть ярхцама-ваймама, тага ушедыхть мора. Эхи весяласта эряме инголи! Ужяль, тяни пяк шуроста кулят весяласта морай вайгяльхть. Ломаттне ков-бди эряскодыхть, аф маштыхть кеняртькшнема, прафтыхть ярмакнень мельге. Хуш народть пексна топодьстот, но ваймосна ламода казямготфт ингольценнеть коряс.
—Тяниень пингонь стирьхне-аватне пяк кельгсазь пряснон мазопнема, архнесазь трваснон и кенчснон. Азонтк, Анна баба, кода инголи стирьхне ванцть эсь мазышиснон мельге?
—Миньге стирькс пингста кельголеськ ваномава ванондоманьконь. Якалеме вири пупиня тишенкса, тя тишень сокса вадендеськ шаманьконь. Киськсь лопияй, кедь каяй. Тяда меле шаманьке акшелготкшнесь,  вадявготкшнесь. Тяфта тиендельхть сяда сидеста пзьгону стирьхне. А аватненди, конешна, ашель мзярда эсь мельгаст ванондомс—фкя-фкянь мельге шачфнесть шабат, якальхть паксяв работама, кудса пефтома кудъетконь тев. Но стирнек-аванек щакшнесть лац-ряц, аф кода  тяни—пцтай крхтапа якайхть ульцява. А инголи тутама паксяв кочкома, шись лаказь лакай, а минь пильгоньке карьсефт, лангсонк панархт, панархнень ланга сарафатт, сарафаттне карксефт сапоняса, прясонк кафтонь-крда руцят (кяль алгоня и кумаць руця). Вов тяфта инголи мокшаватне щашендсть.
—Тядде топодсь 74 киза кода аделавсь Великай Отечественнай  войнась. Кодамокс мяляфтсайть войнань кизотнень?
—Кемголмува кизозель, мзярда ушедсь войнась. Лац мяляфтса тя шить. Шобдава стяме, велень сембе ломаттне ульцясот, ащесть таяскотфста. Корхтамасост аньцек и кайгсь «война, война» валсь. Ушедсь стака и ризфу пингсь. Алятне и цератне тушендсть фронту. Минь кудстонк эстокиге кафта сявсть: алязень и брадозень. Алязе—Федор Сергеевич Середнев 1942 кизоня юмась куляфтома. Брадозе—Петр Федорович Середнев шавовсь эста, мзярда войнать аделамозонза ляткшнесь 11 ши. Сон калмаф Берлину. Тядязе лама сельмоведь пяярдсь инксост. Лятфтаса, яжай канцерхт пирьфса, шарфни яжам кефнень эса, а сонць сетьмоняста явсекшни шавф брадозень и алязень эса. А вов кода пачкодсь войнать аделавоманц колга кулясь велезонк. Шувихть аватне колхозонь паксять эса. Колхозса техникась ашезь сатне, ламоц тефне тиендевсть ломанень вийса. Ваныхть, ластя алашаса арды ломань. Тя ломанць ульсь Рыбкинаста, эста тосоль районнай центрась. Сон ичкоздекиге ушедсь юватькшнема: «Аделавсь войнась, войнась аделавсь!» Аватне ерязь каймоснон, ушедсть кштима, морама. А меле сязевсть вярьгак вайгяльхть явсемаса шавф мала ломанцьнон инкса. Тяфта явсезь, а пингонь-пингонь кштизь-моразь, сувасть синь вели. Народсь ульсь сизеф, вачеда. Аньцек 1950 кизотненди ломаттне лоткасть марожень кшида ярхцама. Войнань мельдень кизотне ульсть пяк стакат. Пицеме кшит тума лопаста, марожста. Кда марожсь ульсь кенерьф, ся пяк пара. А пиже марожень кшитненди ломаттне таргозькшнесть. Колхозонь паксяста тунда кочсеме эендаф модамарьхть, томбосеськ, пицеме эздост пачат. Пяк лама нужада няйф!
—Аннакай, коса ламос эрямань секретсь? Мезе азолеть лувиеньконди?
—Кодамовок секрет аш. Аньцек эряви кельгомс эряфть, кельгомс ломаттнень. Мезеньге лангс аф   пеняцякшнемс,      примамс семботь,     мезть           макссы Шкайсь. Арьсян сембонди шумбраши! Кеняртькшнеда! Вдь эряфсь, аф ваномок сембе стакатнень-сталмотнень лангс, козя кенярдемаса, павазса.
—Спасиба, Анна Федоровна, седикс-ваймокс корхнеманкса. Максоза Шкайсь эстейтьке нинге лама киза эрямс шумбрашиса.
Анна бабань мархта корхнемста шарьхкодень, мес эряфкшу ломаттне пара мяльса азонкшнесазь ингольдень эряфснон, кельгсазь лятфнемс одкс пингснон. Тя лисенди сяс, мес ламоц содаф ломаньцна, конатнень еткса кассть и инголи эрясть, ашет ни шиса, а лятфнемста синь бта сельминголет, мялямсь эреклафтсыне аф аньцек ломаттнень, но и марнек ся пингонь эряфть.
Т.Петрова.