Поиск по сайту: 
 

Архив
 июль 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Обо всем понемногу

Обо всем

Модамарьсь и лимонць
Пеельхнень или посудать лангста валхтомс шямонть ули кода модамарьть вельде. Керость сонь пачк и шовасть керф ширде коррозияса токаф васттнень. Кда шямонць пяк сувазе кшнить, эста пластинаса модамарьть путнесазь лангозонза и кадондсазь 10-15 минутас. Сяльде нарнесазь летьке, ляпе нуланяса.
Ули кода нолдамс тевс и лия способть. Шовасть модамарьть ёмла варяня мархта теркань пачк. Каяда модамарень шовафксти мясорубкань пачк нолдаф лимон и кафтошка куцю сал. Вадесть тя шоряфксса шямоню васттнень. Кадость мзярошкас, а сяльде штасть.
Лимононь сокть мархта шоряф уксуссь стане жа цебярь средства шямонть машфтоманкса. Мархтонза лац аруяфтови кранцта или трубаста, а стане жа посудаста и нльне кодама повсь детальста шямонць. Тяфтама шоряфксти ули кода машфтомс нльне пяк кунардонь шямонть, аньцек тиема тянь тяфта: фкя лацонь пропорцияса шорясть лимоннай сокть и столовай уксусть. Шоряфксть вадесть шямоню васттнень лангс помаланяса или поролоновай губкаса. Кадость кафтошка частс, а сяльде штасть ару ведьса.
Кда тя шоряфксти ашезь удала машфтомс шямонть педа-пес, лимоннай сокти каяда сал. Сяльде вадесть шямоню васттнень и шовасть пеень чистендама щеткаса. Нардасть летьке нуланяса.
 
Мрдась тона светста
Казахскяй велень эряйсь мрдась куду кафта ковда меле, мзярда радня ломаненза лувозь сонь кулофокс и калмазь.
Тя историясь лиссь аф оцю поселкаса, кона ащи Урал ляйть Атырау ляень  портть ваксса. Казахсь Айгали Супыгалиев мелянь июньцта тусь кудста и ашезь мрда меки. Аф лама пингонь етазь мусть аф ичкозе велеть эзда палф алянь ловажа. Лангс ванозь содамс сонь ашель кода. Сяс судмедэксперттне етафтсть         ДНК-тест и азозь, што тя 63 кизоса Айгались. Алять калмазь, традицияс коре поминандазь. И вов бта ризнафты историясь тянь мархта аделавсь, но тя ефсикс аф тяфта. Мзярда сентябрь ковста Айгались сувась брадонц кудс, сонь племянницац цють ашезь кула эводемать эзда. Кода содавсь, Айгали ашезь арьсекшне куломать колга. Сон мусь работа шабрань велеса, а мзярда работась аделавсь, мрдась шачема велезонза. А тяса сонь ни калмазь… Аляти савсь кочкамс документт, што сон шиса, и главнайсь, получамс пенсиянц, сяс мес кивок теенза ашезь эряскода сонь мрдафтомс. Но кода ина сембось тяфта лиссь? Кода шарьхкодевсь сяльде, ДНК-нь тестсь аф максси 100 процентонь гарантия. Тя случайста сон няфтсь 99,2 процент, што палф алясь тя Айгали Супыгалиев. Но мзярдовок аф эряви юкснемс 0,8     проценттнень колга. Айгалить мархта сотф случайста синь ульсть ся погрешносттне, конат тапарязь аф аньцек медработникнень, но и «покойникть» раднянзон…
Лисенди, што ломаттне, конат надияйхть ДНК-тестть лангс, аф страховандафт тяфтама эльбятькснень эзда? Мзяра ина тяфтама туфталонкса мирса колаф судьбада и седида.
 
Пеетькс пакшкат
Сргозсь алясь воротник алу лама сяпинянь каямда меле. Озась кроватти, фатязе кафта кядьса прянц и куфци:
—Исяк ульсь пяденця… Ванды ёткши… А мезе шта тячи?!
—Иван Петрович, а кода тон козякодоть?
—Азса ёфси нюрьхкяняста: салазь-колазь.

—Тядяй, тя монь женихозе, знакомондада. Петя аф сими, аф курендай, аф азонды визькс анекдотт.
—Вов тя фрукта! А тейть, стирняй, мархтонза аф скушна?

—Монь пинезе аф азовомшка пелихнень эзда. Кда кивок чакай кенкшти, сон эзкиге эци кроватть алу!
—Ну и катк эци.
—Минь вдь кафоненк тоза аф тяльктяма.
Рана шобдава. Автобуссь туй остановкаста, мельганза ласьки ава и пешкоды:
—Ялгат, лоткафтость, пожалняста, автобусть! Мон работама поздаса! Ардыхне тянь колга пачфтсть водительти и тонац лоткась. Авась сувась салону и кепотьф мяльса корхтай:
—Павазонди, кенерень, оцю спасиба! А тяни, ялгат, анокласть проверямс проездной билетонтень.

06.06.2019 №22
 
 
 

 
НОВОСТИ

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 
 
 
 
 
 
 
 

ЭРЯВИ ЭРЯСКОДОМС

Кельгома ялгат! Тага весть лятфтасаськ: стаки моли 2020 кизоть омбоце пяленцты минь тинь мархтонт «Мокшень правданьконди» сёрматфтомась. Кода няеви подпискань даннайхнень эзда, ламоц мокшетне нинге ашесть тяштьфте родной кяльса лисенди газета. Сембода кальдявста тянь пяльде ащи тевсь Торбеевскяй, Темниковскяй, Ельниковскяй, Зубово-Полянскяй райоттнень эса и Саранскяйса. А тя корхтай сянь колга, што тястонь ламоц эряйхне могут лядомс мокшень газетафтома. Тя пичефти и таколфты. Сяс эряви эряскодомс. Аф лама пинге нинге ули.

 

 
«Мокшень правда» можна сёрматфтомс и интернетть вельде. Тянкса эряви сувамс «Почта России» сайтти тяфтама адресс коре: PODPISKA POCНТA.RU. Сяльде кочкама «Мокшень правда» газетать лемоц. Тяда меле тиема инструкциять коряс.

 

Пяле кизонди сёрматфтомать питнец 340 цалковай, колма ковонди—170 цалковай. Газетать индексоц П4719. Эрьда ульхтяма марса!

 

25.05.2020
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин