Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Сон моразе мокшэрзянь крайть

Мордовия Республикань Заслуженнай поэтсь Иван Никитович Кудашкин шачсь 1936 кизонь 15 сентябрьста Ельниковскяй райононь Мокшень Мазканя велеса. Шачсь сёксенда и, улема, сяс пяк кельгозе тя пингть, сёрмадсь эсь колганза: «Улема, мес сёксенда мон шачень, сяс и кельгса сёксеть, тенькань тюсть: седишкава зарянза—кумацне, сетьме шинза мялезон пяк тусть, монцьке сетьман, сельмос аф пяк эцян, корхтамста аф лятфнян кайги валхт...»
Идькс пингоц ётась войнань стакадонга стака и войнада мелевок аф сяда тёждя кизотнень пингста.
1967 кизоня аделазе Мордовскяй государственнай университетть филологическяй факультетонц. Шачема-касома велесонза покодсь клубонь заведующайкс, эсь райононь «Трибуна колхозника» газетаса литературнай сотрудникокс, Мордовиянь телевидениянь и радиовещаниянь государственнай комитетса корреспондетокс, Мордовскяй книжнай издательстваса редакторкс, «Мокшень правда» газетаса отделонь вятикс.
И.Н.Кудашкин мокшень литературав аськолдась 50-це кизотнень кучкаста, мзярда «Мокша» журналса печатлафтольхть васенце стихотворениянза. Сон нолдась аф фкя поэтическяй сборник: «Китнень крайге келуфт» (1969), «Лихтибрятне шавихть пайкт» (1977), «Бславамака, тядяй, кис» (1982), «Нармоттне лиихть шинь стямав» (1985), «Аф сюконякшнихть варматненди пичетне» (1994), «Кульса эряфть версаннянц» (2008).
Поэтть пяк лирическяйхть стихонза, кой-конатнень лангс ладяфт морот.
Иван Никитович Кудашкин прозаса нолдась кафта книгат «Шудинясь- ляйнясь сятявня» и «Ломанти эряви кельгома». Сон тя жанрасонга няфтезе прянц кода лирик.
Минь тячи макссаськ И.Н.Кудашкинонь «Шнате крайнязе...» од поэтическяй сборникстонза кой-кона стихотворениятнень.
Шачем крайняй
ачем крайняй,
Атянь-авань мастор,
Седити петьф сетьме уженяй.
Пизепне тонь кепсихть
 Пиже кашторф,
Парьхциса щаф лаймотне
Перьф стяйхть.
Шачем крайняй,
Лажатфтыень васта,
Содатядязь аф стак
Сембе Тонь.
Ватт, мзяра стирь
И цёра касфтоть,
Анелять мзяра
Валда ёнь.
Ётксост синь поэтт
И композиторхт,
Сёронь касфнихть,
Воитт и артистт.
Атясна, сят содасазь
Крандаз читорфть,
Эрь, а нят—
Мянь ковти таргайхть кит.
Аф стак лемснон
Кунцесаськ минь кельгозь,
Няфнесаськ аф виздезь
Мезе тисть,
И аф сёпсаськ,
Касонттама вельдест,
Тифстост сембе
Ушетксоньке лисьфт.
Шачем крайняй,
Ару лихтибряняй,
Атянь-авань
Мазы уженяй,
Масторлангса
Тяконяй и фкяняй,
Лажатфкаса ваймозе
Тейть шяйф.
 
Монь велезе
Монь велезе 
Мокшень Мазканясь,
Шяйса и паксяса шарфсь,
Мекольдень кизотнень
 Мазолгодсь стане
И одолгодсь.
Яфоди нарф
Пичень кудонзон-пайгонзон эзда,
И кирпиценьге путфонза пархт.
И тя тевса
Колхозоньке лезды.
Мяльце—
Велезонк эряма сак!
Тустт сонь перьфканза
Пичень-гай вирьхне,
И келналонза—ситерьксу вастт.
Мазыхть,весялат Мазканянь
стирьхне
Да и цёратка тяфтамот касфтсь...
Нинге велезень цебярец тоса—
Сон аф ащи мзярдовок стак,
Сяс аф уленди эряфоц осал.
Так што эряма
Велезонк сак!
 
Ялганенди
Михаил Безбородовонди
Гайфнеть морот мокшень
кяльса-валса,
Да нюрьхкяняль эряфсот кинясь...
Сянкса тянемс туста келуналса
Эрь тунданя летняй кукунясь.
Тон удат, а вакссот Пиче велесь
Яла учи—меки сргозят;
Тонь пря песот жойняй паксяц
келемсь,
Пильге песот пиже лаймоц матф.
Сазор лаца Мокшесь мархтот
корхни,
Жоль волнанят канды тифтенянь.
Стаки учи апак морак морцень
Эрь тунданя сянгяря вирнясь.
Стяк, поэт, и паксяв минь листяма,
Коса росне тошказь
путыхть пилькст,
Валда ванфса нарфонди шинь
стямась,—
 Лафтубрязонк ёрдай лямбе цильфт,
Киньконь ланга вандол раса кайси,
Раса ведьса пиже панчфнень штай,
И кульсак тон, кодане вирь крайса
Ушетф морхнень цёфксне
шумордайхть.
 
 

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022