Поиск по сайту: 
 

Архив
 февраль 
 2021 
пн вт ср чт пт сб вс
1234567
891011121314
15161718192021
22232425262728

 
 

 

Рузаевский район: высокоскоростной интернет в каждую школу

СЯСЬКИТИ ПРИЗСЬ—ТРАКТОР!

Модань сокамать коряс Россиянь VIII Панжада чемпионатть рамкаса тяфта жа етафтовсть Мордовиянь велень хозяйствань  колледжса и техникумса тонафнихнень еткса сокамать коряс пялькстоматнень финалсна и тракторонь вятемань мастерствать коряс «Трактор-шоу» конкурссь.

 

Модань сокамать коряс Россиянь VIII Панжада чемпионатть инь питни и оцю призоц—«Кировец К-424» тракторсь, конатнень нолясыне Петербургскяй тракторнай заводсь. «Трактор-шоу» конкурсть призоц—«Agrolux 60» тракторсь, конатнень нолясыне «DEUTZ-FAHR» компаниясь.

 

Чемпионатть рамкаса тяфта жа етафтовсь велень хозяйствань техникань и оборудованиянь оцю выставка, коса эсь инь од продукцияснон няфтезь 50-да лама    машиностроительнай   предприятия—«Росагролизинг» АО-ть партнеронза. Стане жа етафтовсть экологическяй ару ярхцамбялень ярмарка-дегустация, коса няфтезь  эсь продукцияснон Мордовиянь  муниципальнай райоттне, Мордовиянь промышленнай предприятиятнень  экспозициясна, «Ретро-техника» выставкась, велень хозяйствань техникать тевса няфтемац, Мордовиянь пищевой и перерабатывающай предприятиятнень экспозициясна, а тяфта жа концертт, конатнень  чемпионатса пялькстыхненди и инжихненди няфтезь Мордовиянь инь содаф артисттне и ансамбльхне, «Браво» группась.

 

Мероприятияса примасть участия Мордовия Республикань Оцюнясь В.Д.Волков, Российскяй Федерациянь Государственнай Думань Аграрнай кизефкснень коряс комитетть председателец В.И.Кашин, Российскяй Федерациянь велень хозяйствань министрть васенце заместителец Д.Х.Хатуов, «Росагролизинг» Акционернай обществать генеральнай директороц П.Н.Косов, Всемирнай пахотнай организациять председателец Колин Миллер (Новая Зеландия), чемпионатть судейскяй коллегиянц председателец А.Э.Воронцова, «Петербургский тракторный завод» АО-ть директороц,  чемпионатть генеральнай партнероц С.А.Серебряков, «Самэ Дойц Фар Руссиа»  ООО-нь техникать мишендеманц коряс директорсь, чемпионатть официальнай партнероц А.Н.Потапов, а стане жа Россиянь федеральнай, региональнай исполнительнай и законодательнай властень представительхть, агропромышленнай предприятиянь руководительхть и ведущай специалистт.

 

Чемпионатть панжевоманц коряс Торжественнай церемониясь етась 28 июньцта 9 частста. Чемпионатонь флагть кеподемда меле, конань  тиемс честсь максфоль Ленинградскяй областень механизаторти Александр Дерюгинонди, участникнень и инжихнень приветствовандазень Мордовия Республикань Оцюнясь В.Д.Волков. Сон азсь оцюдонга оцю сюкпря механизаторхненди и велень лия сембе труженикненди, кит эсь трудснон вельде пяшкотькшнесазь задачатнень, конатнень путозень Россиянь Президентсь В.В.Путин—ванфтсазь странать ярхцамбялень безопасностенц. Мордовиянь труженикнень стане жа тя тевса оцю    путкссна. Мекольдень кота кизоста республикаса велень хозяйствань продукциять нолямац няевиста кассь. Мордовиясь тянь вельде пяшкодезень аф аньцек эсь вешфксонзон, но и  пачфнесы велень продукциянц Россиянь лия лама регионга, а тяфта жа масторонь 24 странас. Сяс тячи аф стак Мордовия Республикати максф оцюдонга оцю честь—етафтомс эсь пялонза Модань сокамать коряс Россиянь VIII Панжада чемпионатть!

 

Сяльде чемпионатонь участникнень и инжихнень приветствовандазь и макссть Мордовиять велень хозяйстваса сатфксонзонды оцю оценка В.И. Кашин, Д.Х.Хатуов, Приволжскяй федеральнай округса Президентть Полномочнай представителенц И.А.Комаровонь лемста Мордовиять эзга Главнай федеральнай инспекторсь М.С.Сезганов, П.Н.Косов и Колин Миллер.

 

Сяльде В.Д.Волков инжихнень мархта ванозень техникань выставкать, предприятиятнень экспозицияснон,  ярмаркать-дегустациять и примась участия «Обновление парка сельхозтехники: опыт, практика, перспективы» Пленарнай конференцияса, кона етафтовсь чемпионатть рамкаса.

 

Тяка шиня В.Д.Волков Кадошкинаса ванозе «Мир цветов» тепличнай предприятиять работанц и примась участия Государственнай Думань Аграрнай кизефкснень коряс комитетть «Сельские территории в пространственном развитии страны: потенциал, состояние, перспективы (на примере Республики Мордовия)» выездной заседанияса, кона етась чемпионатть рамкаса Ковылкинскяй райононь Кочелаево велеса. Заседанияса В.Д.Волков тись доклад, коса азондсь кода Мордовия Республикась сатсь няевикс сатфкст велень хозяйстваса, конатненди максф оцю оценка Россиянь  Велень хозяйствань министерстваса и Государственнай Думаса.

Аграрнай комитетть председателец В.И.Кашин и Государственнай Думань лия депутаттне эсь выступлениясост макссть оцю оценка Мордовиянь велень хозяйствать сатфксонзонды и сонь рабочай опытонцты, кона сувафтови «Комплексное развитие сельских территорий» федеральнай государственнай программас.

29 июньцта 15 частста Мордовия Республикань Оцюнясь В.Д.Волков, «Росагролизинг» Акционернай обществать генеральнай директороц П.Н.Косов и Россиянь Велень хозяйствань министерствать Департаментонц руководителец Р.В.Некрасов лямбоста поздравляндазь и казезь Дипломса и питни казнеса механизаторхнень, конат сяськсть Модань сокамать коряс Россиянь VIII Панжада чемпионатса и сонь рамкасонза етафтф лия пялькстомаса.

Мордовиянь аграрнай техникумонь и колледжень студенттнень еткса модань сокамать коряс пялькстомаса 3-це вастть сатозе А.М.Полежаевонь лемса Ардатовскяй аграрнай техникумса тонафнись Иван Удулин, 2-це вастть занязе Атяшевскяй аграрнай техникумса тонафнись Алексей Целовальников, а 1-це вастти кеподсь Краснослободскяй аграрнай техникумса тонафнись Юлия Энбухтина.

«Трактор-шоу» конкурсса 1-це вастть сатозе Крым Республикань механизаторсь Леонид Росс, 2-це вастть занязе Саратовскяй областень механизаторсь Сергей Сергейчев, а 3-це вастти кеподсь Мордовия Республикань механизаторсь Алексей Киреев. Леонид Россонди, лия казнеда башка, нинге казьфоль «Agrolux 60» колеснай трактор.

«Королева плуга» Чемпионатонь почетнай лемть сатозе Башкортостан Республикань Белебеевскяй райононь медицинскяй колледжса тонафнись Дарья Тураева.

Чемпионатть основной пялькстомаса призовой васт- тне ладявсть тяфта: 3-це вастть сатозе Ивановскяй областень механизатортсь Сергей Телегин, 2-це вастть занязе Орловскяй областень механизаторсь Виктор Устинов. А Модань сокамать коряс Россиянь VIII Панжада чемпионатонь чемпионкс азфоль Пензенскяй областень механизаторсь Сергей Захаров. Теенза, лия казнеда башка, казьфоль чемпионатонь инь оцю и питни призсь—«Кировец К-424» тракторсь!

Казнень явомать аделавомда меле Россиянь Велень хозяйствань министерствать Департаментонц руководителец Р.В.Некрасов пачфтезе чемпионатонь участникненди и инжихненди аньцек-аньцек примаф решениять: Модань сокамать коряс Миронь чемпионатсь 2020 кизоня етафтови Мордовия Республикаса!

Кулемок тя кеняртьфти кулять, Мордовия Республикань Оцюнясь В.Д.Волков мярьгсь: «Модань сокамать коряс Миронь чемпионатть 2020 кизоня Мордовиясь етафтсы  сядонга оцю уровеньца!»

В.Нестеров.


Мордовияса сокамать коряс ётафтф Россиянь чемпионатти максф пяк оцю оценка
04.07.2019 №26
 
 
 

 
НОВОСТИ

МР-нь Оцюнять аф лама пингс тевонзон тиендисна Артём Здунов Москуса васетькшнесь Россиянь культурань министрть Ольга Любимовать мархта

15 февральста Москуса ульсь РФ-нь культурань министрть Ольга Любимовать и
МР-нь Оцюнять аф лама пингс тевонзон тиендиснон Артём Здуновонь рабочай
васедемасна. Васедемаса главнай кизефксокс ульсть велень Культурань клубонь
строямась и уликснень петемасна, а стане жа региононь культурань
учреждениятнень эса кинозалхнень оборудованиясна.
«Велень Культурань клупне ломаттненди эрявихть. Минь фалу кирттяма соткст
региональнай власттнень мархта и ваттама ня объекттнень эса сяда тов тевонь
мольфтемать мельге. Тя тейнек эряви, сяс мес од площадкань панжемась и
уликснень петемасна панчсихть ки ломаттнень творческяй маштомошиснон
виияфтомаснонды и мушендомс асуфнень»,—мярьгсь Ольга Любимова.
Эсь ширденза Артём Здунов азсь благодарностень валхт Россиянь Культурань
министерствать лемс Культурань куттнень строямаса лезксонкса и отмечазе, што
Мордовияти велетнень эса Культурань кудонь строямась—тевонь вятемань важнай
направлениясь.
18.02.2021  № 6
 
 

Ванондовсь инвесторхнень мархта экотехнопаркть строяманц коряс кизефкссь

Мордовиянь Оцюнять аф лама пингс тевонзон тиендисна Артём Здунов 3 февральста васетькшнесь «Террикон» компаниянь, кона тиенди кархчнень-ляткснень обработкаснон коряс объектт,  группать руководстванц мархта. Компаниясь Мордовиянь руководительти макссь ваномс экотехнопарконь, конанди сувси единай межмуниципальнай полигон и кархчень сортировандамань комплекс, строямать коряс проект.
Лятфтасаськ, «Экология» национальнай проектть эряфс ётафтомань рамкаса путф задача кирьфтамс полиготтнень эса кархчнень калмамаснон лувксснон и кеподемс производственнай процесса вторичнай сырьять лувксонц тевс ноляманц. 2030 кизоти арьсекшневи пцтай сембе ляткснень кучсемс переработкас.
Артём Здунов педа-пес ванозе няфтьф проектть, конань эряфс ётафтомац арьсекшневи государственно-частнай партнерствань механизматнень вельде инвесторть эсь средстванзон лангс кредитнай ресурснень сувафтозь. Инвестициянь объёмсь лувондови 2,4 миллиард цалковайса, рабочай вастонь панжемась—250 ломаненди.
Артём Здунов шарфтсь башка мяль сянь лангс, штоба аф нолдамс тиф расчёттнень эса эльбятькст, проектть эряви няфтемс «Российский экологический оператор» компанияти, кона эряфс ётафнесы    ТКО-нень обработкаснон коряс государственнай программать.
11.02.2021  № 5
 

Тяфтама продукцияти ули вешфкс сембе вастова

Мордовия Республикань Оцюнять аф лама пингс тевонзон тиендисна Артём Здунов ульсь «Оптикэнерго» компаниятнень группаснон предприятиянзон эса, кона, 2020 кизонкса рейтинговай оценканзон результатонзон коряс, лувондови лидерхнень эзда фкясь республикань промышленнай предприятиятнень ёткса.
Сембоц компаниятнень группасост 22 предприятия, промышленнай направлениясь няфтьф «Сарансккабель-Оптика», «ЭМ-Кабель», «ЭМ-Кат», «ЭМ-Пласт», «Сармат» завоттнень мархта.
Мордовия Республикань Оцюнять аф лама пингс тевонзон тиендисна лац-ряц содафтсь предприятиятнень мощностьснон мархта, улемок компаниятнень группаснон производственнай сембе площадканзон лангса. Кода азондозе «Оптикэнерго»  ГК-ть директоронзон Советснон председателец Эвир Боксимер, предприятиятне обеспечендасазь потребительхненди кабельнай продукциять марнек производстванц комплексонц (катанка—пролоп—кабель—арматура подвесонди), тяка пингть 2020 кизоня инновационнай продукциять объёмоц ня предприятиятнень эса ульсь 80 процент ноляви изделиятнень марстонь объёмснон эзда. Холдингть кабельнай продукцияц пачфневи оцю госкорпорациятненди и ноляви тевс странань знаковай ламоц  объекттнень эса.
Республикать руководителенцты стане жа азондсь компаниятнень группаснон предприятиянзон эса корпоративнай культурать и работникненди дополнительнай социальнай гарантиятнень колга, конатненди сувафневихть работас и работаста служебнай транспортса питнефтома пачфнемась, пси ярхцамбяльса обеспечендамась, медосмотратне.
Сембоц компаниятнень группасост тяниень пингть работай 1700-та лама ломань, промышленнай направленностень предприятиятнень эса средняй заработнай платась 2020 кизоня ульсь 50 тёжянь цалковай.
Мордовия Республикань Оцюнять аф лама пингс тевонзон тиендисна стане жа ульсь «Оптикэнерго»  предприятиянь музейса, коса содафтсь компаниятнень группаснон историянц мархта и кадсь почётнай инжиень книгати тяштькс, арьсемок сяда тов лац-ряц работамс производственнай од платтнень ётафтомстост.
11.02.2021  № 5
 

Мордовияв рабочай визит мархта сашендсь Россиянь промышленностень и торговлянь министрсь Денис Мантуров

5 февральста Мордовияв рабочай поездка мархта сашендсь РФ-нь промышленностень и торговлянь министрсь Денис Мантуров. Ведомствань руководительсь, конань мархта сотрудничендамань сотксонь кирдемась пяк эряви республикати социально-экономическяй ширде виияфтоманкса, макссь питне республикать промышленнай потенциалонцты, панчсь од производственнай линия «Биохимик» заводса, содафтсь региононь инголи моли предприятиятнень продукцияснон мархта и ванозень МР-нь Оцюнять аф лама пингс тевонзон тиендиснон Артём Здуновонь мархта промышленностень и торговлянь сфераса марстонь  проекттнень эряфс ётафтомаснон коряс кизефкснень.
Мордовияса министрть рабочай программанц васенце пунктокс арась «ВКМ-Сталь» заводсь—Россиянь инголи моли металлургическяй комплексонзон  эзда фкясь, кона заняф машина кинь, автомобильнай и нефтегазовай отраслятненди, велень хозяйствати литьень нолдамаса. Предприятияса Денис Мантуров ванозень производственнай линиятнень.
Вагоннай литьянь производствать коряс «ВКМ-Стальсь» сувси Россияса инголи моли колмотнень ёткс. 2020 кизоня нолдаф 48 тёжянь тонна товарнай продукция, оцю вагоннай литьянь производствань объёмсь ульсь 10 тёжяньда лама вагонокомплект. Ноляви продукцияти лувкссь несколька кизоста кассь 30-ть эзда ушедомок 500-ти  молемс.
Холдингть Президентоц Константин Данилов азондсь литейнай производствать одкстоптомань васенце этапонц меля шумордаманц колга, нолдавсь тевс тяниень пингонь электродуговой сталеплавильнай пянакудсь, конань ёмкостец—16 тонна.
Азфоль, што модернизациянь программась сяда тов кармай мольфтевома мелкай и средняй литьянь нолямать коряс мощносттнень касфтоманкса. Тянь инкса  панжеви пцтай 500 рабочай од васта. Проектнай мощностьс лисемась арьсекшневи 2024 кизоня, инвестициянь объемсь—3,7 миллиард цалковай.
Тевс ноляви технологиятненди вийс коре цебярьгофтомс трудонь условиятнень, сяда касфтомс производствать экологическяй ширде  арукс улеманц. Кепотьксонди, 2020 кизоня путф 20 миллион питнеса кожфонь аруяфтомань системась аруяфнесы кожфть  тяфта лемневи «рдазу» металлургическяй производстваса.
Башка токсевсь производствать диверсификациянц и кадратнень коряс темась. Денис Мантуровонди азондозь, кле, профессиональнай металлургонь анокламань системась ладяф ни несколька киза и тяниень пингть вузса тонафнемать пингста кочксевихть асу цёратне  и аф аньцек минцень регионцтонк. 
«Ушеткшнеськ кадрань кочкамать несколька кизода инголе кафта профессиональнай металлургста, тяни ни анокламе 50 специалист, и нинге кемоттне аделасазь тонафнемаснон тядде»,—мярьгсь «ВКМ-Стальть» управляющай директороц Николай Чалов.
Предприятияса средняй зарплатась 42 тёжянь цалковай.  «ВКМ-Стальсь» сувси республиканскяй 10 предприятиятнень ёткс, коса пандови ломаттненди оцю зарплата.
11.02.2021  № 5
 

Евгений Алушкин: «ТЕЙНЕ АШ КОДА ЛЯДОМС ШИРЕСА»

Россияса коронавируснай инфекцияса васенце сярядись муфоль 2020 кизонь 31 январьста. Пцтай киза ни минь эрятама тя пелькс урмать мархта. Тяддень 20 январти ковидть мархта савсь васедемс Мордовиянь 15173 эряйти. Кода аф ужяль, 119 ломанць (стане жа 20 январти) ёткстост кулость урмать сюнеда.
Пандемиять пингста, шарьхкотьф, сембода стакаста сашендови медицинскяй работникненди. Ащемок, кода корхнихть, передовойса, синь шинек-венек эсь прянь аф ужяльдезь тюрихть урмать каршес. Сидеста врачне аф сатнихть, теест лездома сашендыхть    студенттне—сай пингонь докторхне. Фкясь синь ёткстост од цёрась, Н.П.Огаревонь лемса МГУ-нь Медицинскяй институтонь тонафнись Евгений Алушкин. Аф фкя ков ни сон работай 5№ Республиканскяй клиническяй больницяса, кона пандемиять ушетксста ётафтфоль ковиднай госпиталенди, лиякс мярьгомс, тяса тяни пчкафневихть коронавируснай инфекцияса сярядихне. Аф кунара Евгениень мархта удалась корхнемс минь корреспондентоньконди. Сон азондсь аф тёждя тевонц колга, кода ётни рабочай шиц, мезсь сембода стакась и кода вятьсазь пряснон сярядихне.
04.02.2021  № 4
 
 

Лезкс максови сембоса

Мордовия Республикань Оцюнять аф лама пингс тевонзон тиендисна 28 январьста васетькшнесь аф коммерческяй организациятнень—2021 кизонь президентскяй грантонь Фондть васенце этапонц сяськиензон мархта. Азомок васедемань участникненди приветствиянь валхт, республикань руководительсь мярьгсь, што марса, марстонь вийса ули кода решандамс важнай социальнай задачатнень.
«Мон ваныне аф коммерческяй организациятнень кодама работань направлениясна киртьфтольхть ширесна Президентть мархта: тя и культурась, и шумбра эряфонь койхне, религиознай ширде ладямась и ламоц лиясь. Сембе синь пяк важнайхть и вешихть ответственностень маряма, конань эряви тейнек кандомс марса»,—мярьгсь Артём Алексеевич.
Марнек президентскяй грантонь Фондонь конкурсть васенце этапонцты максфоль 100 заявка, 19 проектсь арась сяськикс. Ширень кирдемань марстонь суммась лувондови 20 миллион цалковайса.  Отмечафоль, што республикаса лувондови 1413 общественнай объединения, но аф сембе эздост тевснон мольфтьсазь эрязста. Но президентскяй грантонь конкурсса кизоста кизос примси участия коль сяда лама организация: кда 2017 кизоня максфоль 95 заявка, конатнень эзда 14 арась сяськикс, 2019 кизоня ни максфоль 215 заявка и сяськида ульсь 41. Ётай кизоня конкурсонь кафта этапнень итогснон коряс, сяськикс арась 43 проектсь, ширень кирдемань суммась лувондови 36,7 миллион цалковайса.
Васедемаса Артём Здунов мярьгсь, што анок кулхцондомс сембе предложениятнень, сяс мес властень оргаттненди и гражданскяй обществань институттненди эряви работамс марса. Общественнай организациятнень эзда кизефкста ульсь пяк лама, аф сяда кржаль социальнай эрявикс проектонь эряфс ётафтомать коряс мялень азомада. Тяконь лувксса кепсевсть помещениятнень льготнай арендаснон, микрокредитованиянь возможносттне, аф коммерческяй организациятнень ширень кирдемаснон коряс центрань панжемать коряс платтне.
04.02.2021  № 4
 

Артём Здунов: «Мордовияти гигантоманиясь аф зепс коре. И ломаттненди сон аф эряви!»

МР-нь Оцюнять аф лама пингс тевонзон тиендисна 28 январьста видеоконференциянь режимса ётафтсь строительнай отраслять виияфтоманц коряс совещания.
Ванондовсь тя кизонь строительнай программась, васендакиге корхтамась мольфтевсь строительствать, капитальнай ремонтть и национальнай проекттнень эряфс ётафтомань рамкаса социальнай инфраструктурань объекттнень капитальнайста петемаснон и реконструкцияснон колга.
Строительнай отраслять работанц колга азондсь МР-нь Правительствать Председателенц заместителец—строительствань, транспортонь и дорожнай хозяйствань министрсь Виктор Цыганов.  Строительнай работатнень объёмсна 2020 кизоня лувондови 109 процентса 2019 кизоть уровененцты, строяф 324,5 тёжянь квадратнай метра эряма васта. 2021 кизоня арьсекшневи строямс 340 тёжянь квадратнай метра эряма васта, а 2023 кизоня, сявомок мяльс нацпроектть целевой показателензон—400 тёжянь квадратнай метра.
Тяддень финансированиянь марнек объемсь, кона нолдави социальнай, инженернай инфраструктурань и эряма вастонь объекттненди, 5 миллиартта лама цалковай.
04.02.2021  № 4
 

Артём Здуновонь Старошайговскяй районца улеманц колга

МР-нь Оцюнять аф лама пингс тевонзон тиендисна Артём Здунов 30 январьста рабочай поездка мархта якась Старошайговскяй району. Республикань руководительсь васенда ульсь «Новотроицкая» агрофирмаса.
Кода азондозе республикань руководительти агрофирмать директороц Владимир Спирин, предприятиять велень хозяйствань угодиянь  площаденза кассть  3 тёжятть гектарста 8 тёжятть гектархненди молемс, сёрода урятцеви—1,5 тёжянь тоннаста сявомок 14,8 тёжянь тоннати молемс, урожайсь—фкя гектарста 12 центнерста сявомок 41 центнерти молемс. Животноводстваса марнек петьфт-одкстоптфт животноводческяй уликс помещениятне Новотроицкое и Сире Шайгав велетнень эса, строяфт ангархт и 400 траксонди потямань зал мархта карда. Жуватань марстонь лувкссь—3600 лама пря. Фкя траксста потьневи 8750 литра лофца кизоти. Тяниень пингть хозяйствась арась чёрно-пёстрай траксонь пляманди касфнемать коряс репродукторкс.
04.02.2021  № 4
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин