Поиск по сайту: 
 

Архив
 июль 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Рузаевский район: высокоскоростной интернет в каждую школу

КОВЫЛКИНСКЯЙ МУНИЦИПАЛЬНАЙ РАЙОНОНЬ ОЦЮНЯКС АРАСЬ Н.П.КОМУСОВ

Шинь повесткати лихтьфоль фкя кизефкс—Мордовия Республикань Ковылкинскяй муниципальнай районти оцюнянь кочкамать колга.

 

Конкурснай комиссияти ваномс лихтьфтольхть колма кандидатурат. Нят: Ковылкинскяй райононь оцюнять васенце заместителец Н.П.Комусов, райононь оцюнять заместителец и оцюнять аппаратонц вятиец Е.А.Гринин и «Сказка» идень садть директороц Ю.В.Бозов. Сессиять пингста депутаттне фкя мяльса кочказь Ковылкинскяй муниципальнай райононь оцюнякс Н.П.Комусовонь.

 

Николай Петрович Комусов шачсь 1959 кизоня тяка райононь Од Пшень велеса. Улихть высшай образованиянза педагогонь, юристонь и экономистонь специальносттнень коряс. Ниле кизот ульсь школань директоркс Саранскяйса, меле занцесь руководящай должностть велень хозяйствань продукциянь производствать и переработкать коряс предприятиятнень эса. Вейхкса кизот ульсь Ковылкинскяй райононь оцюняти васенце заместителькс.

 

Мордовиянь Оцюнять и эсь эздонза Н.П.Комусовонь од должностьс путоманц мархта поздравляндазе МР-нь Правительствать Председателец В.Ф.Сушков.

 

—Николай Петровичень содаса колмогемонь кизода ламос,—азозе сон.—Эсь трудовой кинц сон ушеткшнезе сельминголен комсомолонь обкомса. Эряфонц оцюшка пяльксонц лемдезе Ковылкинскяй районти. И коса сон афоль работа, сембе вастова няфнезе прянц афкуксонь профессионалкс. Надиян, аньцек цебярь ширде няфтьсы прянц од вастсовок. Меле В.Ф.Сушков шарфтсь мяль задачатнень лангс, конат путневихть од оцюнять инголи. Синь етксост заработнай платать касфнемац, од рабочай вастонь панчсемась, эряма вастонь и кинь строямась, жилищно-коммунальнай хозяйствать одкстопнемац. И сембе ня тефне, республиканскяй Правительствать Председателенц валонзон коряс, пяшкотькшнемат национальнай проекттнень рамкаса, конат примафт и етафневихть эряфс странань Президентть В.В.Путинонь мяленц коряс. В.Ф.Сушков стане жа  китькстазе, што башка мяль шарфтома избирательхнень наказснон пяшкодемаснонды.

 

Сонць Н.П.Комусов азозе, што васенце вастса теенза ащи райононь эряйхнень эряфснон цебярьгофнемац.

 

О.Евдокимова.

 


04.07.2019 №26
 
 
 

 
НОВОСТИ

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 
 
 
 
 
 
 
 

ЭРЯВИ ЭРЯСКОДОМС

Кельгома ялгат! Тага весть лятфтасаськ: стаки моли 2020 кизоть омбоце пяленцты минь тинь мархтонт «Мокшень правданьконди» сёрматфтомась. Кода няеви подпискань даннайхнень эзда, ламоц мокшетне нинге ашесть тяштьфте родной кяльса лисенди газета. Сембода кальдявста тянь пяльде ащи тевсь Торбеевскяй, Темниковскяй, Ельниковскяй, Зубово-Полянскяй райоттнень эса и Саранскяйса. А тя корхтай сянь колга, што тястонь ламоц эряйхне могут лядомс мокшень газетафтома. Тя пичефти и таколфты. Сяс эряви эряскодомс. Аф лама пинге нинге ули.

 

 
«Мокшень правда» можна сёрматфтомс и интернетть вельде. Тянкса эряви сувамс «Почта России» сайтти тяфтама адресс коре: PODPISKA POCНТA.RU. Сяльде кочкама «Мокшень правда» газетать лемоц. Тяда меле тиема инструкциять коряс.

 

Пяле кизонди сёрматфтомать питнец 340 цалковай, колма ковонди—170 цалковай. Газетать индексоц П4719. Эрьда ульхтяма марса!

 

25.05.2020
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин