ШАЧЕМА КРАЙНЯЙ

Разнай туфталс коре ламотне кадоськ эсь родной вастоняньконь, косот атяньконь-аляньконь  калмосна, кудъюрхтсна. Но мзяра пинге тяза ёта, сон мзярдонга аф юкстави, аф яви седистонк, фалу ускозь-уски эсонк эсь ширезонза.

Аф стак, мзярда земляконе кулезь, што Сарганьконь тядде юбилеец, теенза топодсь 250 киза (велеть шачема пингокс лувондови XVIII векть омбоце пялец), и тяса, Тройцянь шиня, етафтови тянди лемтьф ила, ламотне кадозь сембе тевснон и кепотьф мяльса срхкасть  кис.

…Велень ингольдень школать малас сайхть и сайхть ломатть. Тяса касы келунятнень алу, псить эзда эшкскяти пуромсть однек-сиренек. Ламотне эздост састь Сире Шайгавста, Саранскяйста, а кой-конат— Москуста, лия ичкоздень вастста. Мезсь васендакиге салсесь мяль, пцтай сембе аватне и стирьхне наряжафтольхть мокшень щамса. Синь пиндолдсть-вандолдсть.  Ванондат лангозост и дивандамацти певок аш. Семботь эзда няеви, што синь  тиисна-аноклайсна оцю асу мархта ломатть, конат аф азовомшка кельгсазь минценнеть, мокшеннеть.

Перьфпяльге кулевсть родной кяльса корхнемат, пеетькшнемат. Вдь ламотне фкя-фкянь содайхть шабакс пингстокиге и кунара ни ашесть няенде  и тяни етафнесазь лажатфснон. Седиень токазь кайгсть мокшень и рузонь  моротне.

Сяльде эсь землякснонды приветствиянь лямбе валхт азсть Сарга велень администрациять ингольдень председателец, тяни пенсионеркась Р.Г.Лебедина, «Мокшень правда» газетать главнай редактороц И.С.Лушкин, содаф поэтессась, «Мокша» журналть поэзиянь отделонц вятиец Р.К.Орлова, лиятне. Синь нинге весть лятфтазь, што Саргась канни пара слава мокшэрзянь крайсонк, содасазь сонь лама вастова. И тя сяс, мес тяса шачсь-кассь лама талантливай, тевонь содай и тевонь кельги ломаньда, конат тиезь и тиендьсазь эсь велеснон коль сяда содафокс и кельговиксокс. Пара мяльса, гордостень марязь лятфтафтольхть оцю рангонь ингольдень руководительхнень А.С.Чалдаевонь, И.П. Алямкинонь, С.В.Алямкинонь, ученайхнень Н.С.Алямкинонь, А.Ф.Алямкинать, М.П.Пьянзинонь, писательхнень Г.А. Пьянзинонь, Ф.Ф.Пьянзинонь, велень школань ингольдень директорхнень А.М.Якушкинонь, К.Л.Федотовонь, П.А. Мезякаевонь, ламоц учительхнень лемсна.

И, конешна жа, апак юкстактольхть велеряйхне, Великай Отечественнай войнань участникне, конат аралазь Родинаньконь фашистскяй Германиять эзда.

Марнек Тройцянь праздниксь и велеть юбилеец ётасть пяк лац, земляконенди кандсть оцю кенярдема. Велеряйхне эняльдсть мокшень газетать вельде азомс башка оцю спасиба Владимир Алямкинонди, кона лама тись тянкса.

Куватьс тя шиня изь сетьмосе Саргаса морось, инжиень примама машты земляконень ширеса.

И.Степанов.

Старошайговскяй районць.