Поиск по сайту: 
 

Архив
 март 
 2021 
пн вт ср чт пт сб вс
1234567
891011121314
15161718192021
22232425262728
293031    

 
 

 

Национальная тематика

В.И.ПРОНИНА: «РАБОТАЗЕНЬ КЕЛЬГСА, СЯС МЕС СОН СОТФ НАЦИОНАЛЬНАЙТЬ МАРХТА»

—Вера Ивановна, пара улель, кда азондолеть аф лама эсь колгат, коса шачеть-касоть, кодама семьяса, коса тонафнеть?

 

—Ёмла родиназе Старошайговскяй райононь Сире Теризморга велесь. Касонь простой рабочаень семьяса. Алязе  и тядязе трудендакшнесть колхозса.  Синь касфтсть ниле итть, конатнень еткса мон васенцесь. Сяс и «сатнесь» тейне лиятнень коряс сяда лама. Мон и емлатнень мельге ваныселень, и тядязти кудъетконь тевса-заботаса лездыселень. Велень школать шумордамда меле тонафнень      М.Е.Евсевьевонь лемса  МГПИ-нь филологическяй факультетса.

 

Мялезе аф лама азондомс эсь шачема-касома уженязень, седиень озафтома вастозень колга. Сире Теризморгась—мокшень оцю веле. Улема, аф эльбядян, кда азса, што республикасонк тя фкя инь содаф велесь. Содаф сон аф аньцек эсь ширесонк, но и странаньконь лия уженясонза. Туфталда тянди лама. 2007 кизоня Сире Теризморгаса ульсь сонць Россиянь Президентсь В.В.Путин. Владимир Владимирович шназень велеряйхнень, мес синь кородозь ванфнесазь эсь национальнай козяшиснон. Тя афкукс тяфта. Сире Теризморгаса панчф Национальнай культурань центра, коса ули кода  маласта содафтомс мокшэрзянь культурать мархта. Велеса келиста васьфневихть-етафневихть национальнай илатне, ванфневихть атянь-бабань койхне-обуцятне. Аватне миньцонк  тячивок якайхть мокшень щамса, аф аньцек праздникста, но  и стак шистовок. Мон марян оцю гордость эсь шачема велезень инкса!

 

—Вера Ивановна, тяни, эрямок ошса, сидеста улендят велеса?

 

—Мярьголень аф стама сидеста, кода мялезель. Эряфсь тя эряф, эсонза уленди лама прябалада, тапоркста, конат сидеста аф макссихть тейнек тиемс сянь, мезе мяленьке. Но мон фалу лажаткшнян Сире Теризморгати. Тяса эряй тядязе. Мзярда эвондакшни еткозе, эстокиге эряскодан вели.

 

—Кода лиссь стане, што эряфцень сотыть библиотекарень тевть мархта?

 

—Педагогическяй институтть шумордамда меле ниле кизот работань шабра велень школаса учителькс, а меле етань эряма Саранскяи, кармань вешендема работа. Весть, етамок национальнай библиотекать вакска (эста сон ульсь сире зданияса), арьсезевонь, што пара улель работамс тяса. А мес ба аф варжамс вийнень? Сувань директорти. Ся пингть библиотекать вятезе Л.Г.Меркушкина. Сон васендакиге кизефтемань ули-аш высшай образованиязе и содаса-аф мокшень кяльть. Азыне, што шумордайне пединститутть и пильгонек-прянек мокша ломанян. Вов тяфта примафолень национальнай и краеведческяй литературань отделу.

 

—Кода содаф, библиотекарень тевсь тя аф аньцек работама лувихнень мархта, эряви сафтомс-маштомс и творческяй ширеса.

 

—Тя афкукс тяфта. Библиотекаса етафневи лама аф фкя лацонь мероприятия. Тя и презентацият, и васедемат республикань содаф и од писательхнень, композиторхнень  мархта. Мярьктяма, етафтови республикаса кодамовок ила, а тейнек эстокиге пуроптома коряванза выставка. Уленттяма и лия региоттнень эса, коса стане жа  тиенттяма презентацият, азонкшнетяма библиотеканьконь колга, содафнесаськ тоса эряй мокшэрзятнень одс лисьф национальнай литературать мархта.  Маштома библиотекарти и сермадомань тевса, вдь сашендови тяшнемс информацият газетав.

 

Национальнай и краеведческяй отделса работась пяк мялезон. Васендакиге сяс, мес тевозе сотф сембе минценнеть, мокшэрзяннеть мархта.  Сотрудниконьке мокшет, эрзят, татархт и сембе минь корхтатама родной кяльсонк, шарьхкоттяма и  лезнетяма фкя-фкянди.

 

—Кода библиотекань работник, улема, лац содасак, тяниень пингть ули вешфкс национальнай литературати?

 

—Залоньке шава аф уленди. Лувиеньконь еткса школьникт и студентт, аспирантт и преподавательхть, пенсионерхт. Миньцонк лама мокшэрзянь литературада, конань аш кода мумс лия библиотекатнень эзда. Студенттне, кепотьксонди, сашендыхть ширезонк курсовой, дипломнай работань аноклама, пенсионерхне—газетань, журналонь лувома. Лувить библиотекать лангс мяленц шарфтоманкса старандатама аськолямс марса пингть мархта. Нолнесаськ тевс тяниень пингонь информационнай технологиятнень. Кепотьксонди, ули группаньке Контактса и Одноклассникса.

 

—Вера Ивановна, тяддень октябрь ковста Саранскяйса ётафтови Мокшэрзянь народть Всероссийскяй VII съездоц. Кодамот мяльхне-арьсематне тя пуромксть колга?

 

—Сисемцеда пуромихть марс масторть келес эряй мокшэрзятне. А марса, кода содаф, любой тевсь тиеви сяда теждяста, сяда лац. Арьсян, васендакиге улихть ванфт кизефксне, конат сотфт кяленьконь, культураньконь ванфтоманц мархта, кода аф солафтомс-олафтомс национальнай шамаликоньконь, ванфтомс ялгаксшить ряцок эряй нароттнень еткса. Монцьке сувафтфан съездонь делегаттнень лувксс и тянь лувондса оцю честекс.

 

—Вера Ивановна, азонтт нинге аф лама эсь семьяцень колга.

 

—Мирдезе строитель. Сон руз. Церазе тонафни М.Е.Евсевьевонь лемса МГПИ-нь физическяй культурань факультетса. 9 класста сявомок сон арась ялгакс легкай атлетикать мархта. Лисендсь сяськикс кода республиканскяй, стане и всероссийскяй пялькстоматнень эса.

 

—Етка пингста мезьса занцят пря?

 

—Кельгса морамазень. Ет шабакс тя тевсь арась тейне пяк малакс. И тя, улема, етась тейне шачфтынень-касфтынень эзда. Алязе морсекшнесь гармонияса, тядязе одста морсесь Сире Теризморгань народнай хорса. Гармонияса морама  маштыхть и сазорозе, и дуганне. Колма кизот кода морсян «Ламзурь» народнай фольклорно-этнографическяй ансамбльса.

 

О.Евдокимова.

 


11.07.2019 №27
 
 
 

 
НОВОСТИ
 

Республикаса коронавирусса сярядихнень лувкссна кири

Мордовиянь Оцюнять аф лама пингс тевонзон тиендисна Артём Здунов 18
февральста ётафтозе республикаса коронавируснай инфекциять инголдаманц и
келемоманц коряс оперативнай штабть заседаниянц. Ванондовсть уликс
эпидемиологическяй ситуациять, COVID-19 эзда вакцинациять, здравоохранениянь
региональнай системать тевонь мольфтеманц, санитарно-эпидемиологическяй
вешфкснень ванфтомаснон мельге контролень вятемать коряс кизефксне.
Примсеви мератнень инкса республикаса коронавирусса урмаськодыхнень лувкссна
кири. Тяниень пингть ковиднай госпитальхнень эса пчкси 1000-да кржа пациент
(стака пинкнень ульсь 2000 ломань), кири лувкссна и амбулаторнайста
пчксихнень. Пчкафтомань учреждениятне меки мртцихть работань плановай
режимти, латцевихть специализированнай медицинскяй лезксонь максомань
объемтне.
Но райоттнень эзга тефне ащихть лиякс. Коса урмаськодыхнень лувкссна кири, а
коса меколанкт—касы. МР-нь Оцюнять аф лама пингс тевонзон тиендисна шарфтсь
тянь лангс башка мяль и кошардсь ваномс ся райоттнень эса тефнень
мольфтемаснон, коса эпидемиологическяй обстановкась аф цебярьготкшни.
«Ардатовскяй, Ельниковскяй, Большеберезниковскяй, Большеигнатовскяй,
Старошайговскяй, Чамзинскяй, Рузаевскяй, Ковылкинскяй и Кадошкинскяй
райоттне—тиньцонт урмаськодыхнень лувкссна сяда оцю, кда сявомс целайнек
марнек республикать эзга,—кемоста азозе Артём Алексеевич муниципальнай
райононь оцюнятненди.—Эряви максомс анализ ситуацияти, ваномс, кодама мерат
примсевихть».
Нинге  фкя таколфты кизефкссь—сядонга лама урмаськодыхнень лувксса эряфкшу
ломаньда. Ня даннайхнень кемокснесыне Роспотребнадзорсь.
«Тиемок анализ тя недялять урмаськодыхнень лувксснонды, минь няйсаськ, што
коронавирусса сярядихнень лувксса 65 кизоса и сяда сире ломаньда арась сяда
лама—27,7 процент, а ётай недяляня ульсь 23 процент, лиякс азомс, моли
касома,—отмечазе МР-ть эзга главнай санитарнай врачсь Татьяна Харитонова.—
50-60 кизосотнень ёткса урмаськодомась лядсь сяка уровеньца».
«Урмаськодыхнень лувкссна кири, но эряфкшу ломаттнень заразиндавомань
талекасна касы, а Ардатовскяй районца тя показательсь и ёфсикс няфни 40
процент»,—мярьгсь Артём Здунов.
Тянкса оперативнай штабсь кирдезе 65 кизоса и сяда сире ломаттненди
самоизоляциянь режимть сяда тов кувалгофтомань пингонц коряс предложениять.
Нинге фкя важнай темась, кона ванфоль заседанияса,—коронавирусть эзда
вакцинациясь. Мордовияса сон ётай активнайста, региону пачфтьф 33 тёжяньда
лама вакцинань комплект, прививка тифтсь пцтай 26 тёжянь ломанць.
Ладявсь аптекатнень эса лекарстватнень улемаснон мархта тевсь. Кой-кона
позициятнень коряс, кода азфоль, республикань государственнай аптекатнень
эса тиф запас  аф колма ковонди, а нльне кафтошка кизонди.
Но улихть прябалат льготнай лекарстваса обеспечендамать мархта, мезть лангс
шарфтсь башка мяль МР-нь Оцюнять аф лама пингс тевонзон тиендисна, и кемоста
азозе республикань Здравоохранениянь министерствати курокста ладямс тянь
мархта сотф ситуациять и сяда тов кирдемс башка контроль ала.
Оперштабть заседаниянц песта республикань руководительсь мярьгсь: сембе
главнай кизефксне, конат сотфт здравоохранениянь системать работанц мархта
пандемиять пингста, ванфнесазь эсь эрявиксшиснон. Од коронавируснай
инфекцияса сярятькстыхнень лувксснон кирьфтаманкса и сяда тов ситуациять
цебярьгофтоманкса организациянь руководительхненди,      республикань
эряйхненди эряви и сяда тов кемоста ванфтомс эсь прянь араламань мератнень и
санитарнай врачнень вешфксснон.
25.02.2021  № 7
 
 

МР-нь Оцюнять аф лама пингс тевонзон тиендисна Артём Здунов Москуса васетькшнесь Россиянь культурань министрть Ольга Любимовать мархта

15 февральста Москуса ульсь РФ-нь культурань министрть Ольга Любимовать и
МР-нь Оцюнять аф лама пингс тевонзон тиендиснон Артём Здуновонь рабочай
васедемасна. Васедемаса главнай кизефксокс ульсть велень Культурань клубонь
строямась и уликснень петемасна, а стане жа региононь культурань
учреждениятнень эса кинозалхнень оборудованиясна.
«Велень Культурань клупне ломаттненди эрявихть. Минь фалу кирттяма соткст
региональнай власттнень мархта и ваттама ня объекттнень эса сяда тов тевонь
мольфтемать мельге. Тя тейнек эряви, сяс мес од площадкань панжемась и
уликснень петемасна панчсихть ки ломаттнень творческяй маштомошиснон
виияфтомаснонды и мушендомс асуфнень»,—мярьгсь Ольга Любимова.
Эсь ширденза Артём Здунов азсь благодарностень валхт Россиянь Культурань
министерствать лемс Культурань куттнень строямаса лезксонкса и отмечазе, што
Мордовияти велетнень эса Культурань кудонь строямась—тевонь вятемань важнай
направлениясь.
18.02.2021  № 6
 
 

Ванондовсь инвесторхнень мархта экотехнопаркть строяманц коряс кизефкссь

Мордовиянь Оцюнять аф лама пингс тевонзон тиендисна Артём Здунов 3 февральста васетькшнесь «Террикон» компаниянь, кона тиенди кархчнень-ляткснень обработкаснон коряс объектт,  группать руководстванц мархта. Компаниясь Мордовиянь руководительти макссь ваномс экотехнопарконь, конанди сувси единай межмуниципальнай полигон и кархчень сортировандамань комплекс, строямать коряс проект.
Лятфтасаськ, «Экология» национальнай проектть эряфс ётафтомань рамкаса путф задача кирьфтамс полиготтнень эса кархчнень калмамаснон лувксснон и кеподемс производственнай процесса вторичнай сырьять лувксонц тевс ноляманц. 2030 кизоти арьсекшневи пцтай сембе ляткснень кучсемс переработкас.
Артём Здунов педа-пес ванозе няфтьф проектть, конань эряфс ётафтомац арьсекшневи государственно-частнай партнерствань механизматнень вельде инвесторть эсь средстванзон лангс кредитнай ресурснень сувафтозь. Инвестициянь объёмсь лувондови 2,4 миллиард цалковайса, рабочай вастонь панжемась—250 ломаненди.
Артём Здунов шарфтсь башка мяль сянь лангс, штоба аф нолдамс тиф расчёттнень эса эльбятькст, проектть эряви няфтемс «Российский экологический оператор» компанияти, кона эряфс ётафнесы    ТКО-нень обработкаснон коряс государственнай программать.
11.02.2021  № 5
 

Тяфтама продукцияти ули вешфкс сембе вастова

Мордовия Республикань Оцюнять аф лама пингс тевонзон тиендисна Артём Здунов ульсь «Оптикэнерго» компаниятнень группаснон предприятиянзон эса, кона, 2020 кизонкса рейтинговай оценканзон результатонзон коряс, лувондови лидерхнень эзда фкясь республикань промышленнай предприятиятнень ёткса.
Сембоц компаниятнень группасост 22 предприятия, промышленнай направлениясь няфтьф «Сарансккабель-Оптика», «ЭМ-Кабель», «ЭМ-Кат», «ЭМ-Пласт», «Сармат» завоттнень мархта.
Мордовия Республикань Оцюнять аф лама пингс тевонзон тиендисна лац-ряц содафтсь предприятиятнень мощностьснон мархта, улемок компаниятнень группаснон производственнай сембе площадканзон лангса. Кода азондозе «Оптикэнерго»  ГК-ть директоронзон Советснон председателец Эвир Боксимер, предприятиятне обеспечендасазь потребительхненди кабельнай продукциять марнек производстванц комплексонц (катанка—пролоп—кабель—арматура подвесонди), тяка пингть 2020 кизоня инновационнай продукциять объёмоц ня предприятиятнень эса ульсь 80 процент ноляви изделиятнень марстонь объёмснон эзда. Холдингть кабельнай продукцияц пачфневи оцю госкорпорациятненди и ноляви тевс странань знаковай ламоц  объекттнень эса.
Республикать руководителенцты стане жа азондсь компаниятнень группаснон предприятиянзон эса корпоративнай культурать и работникненди дополнительнай социальнай гарантиятнень колга, конатненди сувафневихть работас и работаста служебнай транспортса питнефтома пачфнемась, пси ярхцамбяльса обеспечендамась, медосмотратне.
Сембоц компаниятнень группасост тяниень пингть работай 1700-та лама ломань, промышленнай направленностень предприятиятнень эса средняй заработнай платась 2020 кизоня ульсь 50 тёжянь цалковай.
Мордовия Республикань Оцюнять аф лама пингс тевонзон тиендисна стане жа ульсь «Оптикэнерго»  предприятиянь музейса, коса содафтсь компаниятнень группаснон историянц мархта и кадсь почётнай инжиень книгати тяштькс, арьсемок сяда тов лац-ряц работамс производственнай од платтнень ётафтомстост.
11.02.2021  № 5
 

Мордовияв рабочай визит мархта сашендсь Россиянь промышленностень и торговлянь министрсь Денис Мантуров

5 февральста Мордовияв рабочай поездка мархта сашендсь РФ-нь промышленностень и торговлянь министрсь Денис Мантуров. Ведомствань руководительсь, конань мархта сотрудничендамань сотксонь кирдемась пяк эряви республикати социально-экономическяй ширде виияфтоманкса, макссь питне республикать промышленнай потенциалонцты, панчсь од производственнай линия «Биохимик» заводса, содафтсь региононь инголи моли предприятиятнень продукцияснон мархта и ванозень МР-нь Оцюнять аф лама пингс тевонзон тиендиснон Артём Здуновонь мархта промышленностень и торговлянь сфераса марстонь  проекттнень эряфс ётафтомаснон коряс кизефкснень.
Мордовияса министрть рабочай программанц васенце пунктокс арась «ВКМ-Сталь» заводсь—Россиянь инголи моли металлургическяй комплексонзон  эзда фкясь, кона заняф машина кинь, автомобильнай и нефтегазовай отраслятненди, велень хозяйствати литьень нолдамаса. Предприятияса Денис Мантуров ванозень производственнай линиятнень.
Вагоннай литьянь производствать коряс «ВКМ-Стальсь» сувси Россияса инголи моли колмотнень ёткс. 2020 кизоня нолдаф 48 тёжянь тонна товарнай продукция, оцю вагоннай литьянь производствань объёмсь ульсь 10 тёжяньда лама вагонокомплект. Ноляви продукцияти лувкссь несколька кизоста кассь 30-ть эзда ушедомок 500-ти  молемс.
Холдингть Президентоц Константин Данилов азондсь литейнай производствать одкстоптомань васенце этапонц меля шумордаманц колга, нолдавсь тевс тяниень пингонь электродуговой сталеплавильнай пянакудсь, конань ёмкостец—16 тонна.
Азфоль, што модернизациянь программась сяда тов кармай мольфтевома мелкай и средняй литьянь нолямать коряс мощносттнень касфтоманкса. Тянь инкса  панжеви пцтай 500 рабочай од васта. Проектнай мощностьс лисемась арьсекшневи 2024 кизоня, инвестициянь объемсь—3,7 миллиард цалковай.
Тевс ноляви технологиятненди вийс коре цебярьгофтомс трудонь условиятнень, сяда касфтомс производствать экологическяй ширде  арукс улеманц. Кепотьксонди, 2020 кизоня путф 20 миллион питнеса кожфонь аруяфтомань системась аруяфнесы кожфть  тяфта лемневи «рдазу» металлургическяй производстваса.
Башка токсевсь производствать диверсификациянц и кадратнень коряс темась. Денис Мантуровонди азондозь, кле, профессиональнай металлургонь анокламань системась ладяф ни несколька киза и тяниень пингть вузса тонафнемать пингста кочксевихть асу цёратне  и аф аньцек минцень регионцтонк. 
«Ушеткшнеськ кадрань кочкамать несколька кизода инголе кафта профессиональнай металлургста, тяни ни анокламе 50 специалист, и нинге кемоттне аделасазь тонафнемаснон тядде»,—мярьгсь «ВКМ-Стальть» управляющай директороц Николай Чалов.
Предприятияса средняй зарплатась 42 тёжянь цалковай.  «ВКМ-Стальсь» сувси республиканскяй 10 предприятиятнень ёткс, коса пандови ломаттненди оцю зарплата.
11.02.2021  № 5
 

Евгений Алушкин: «ТЕЙНЕ АШ КОДА ЛЯДОМС ШИРЕСА»

Россияса коронавируснай инфекцияса васенце сярядись муфоль 2020 кизонь 31 январьста. Пцтай киза ни минь эрятама тя пелькс урмать мархта. Тяддень 20 январти ковидть мархта савсь васедемс Мордовиянь 15173 эряйти. Кода аф ужяль, 119 ломанць (стане жа 20 январти) ёткстост кулость урмать сюнеда.
Пандемиять пингста, шарьхкотьф, сембода стакаста сашендови медицинскяй работникненди. Ащемок, кода корхнихть, передовойса, синь шинек-венек эсь прянь аф ужяльдезь тюрихть урмать каршес. Сидеста врачне аф сатнихть, теест лездома сашендыхть    студенттне—сай пингонь докторхне. Фкясь синь ёткстост од цёрась, Н.П.Огаревонь лемса МГУ-нь Медицинскяй институтонь тонафнись Евгений Алушкин. Аф фкя ков ни сон работай 5№ Республиканскяй клиническяй больницяса, кона пандемиять ушетксста ётафтфоль ковиднай госпиталенди, лиякс мярьгомс, тяса тяни пчкафневихть коронавируснай инфекцияса сярядихне. Аф кунара Евгениень мархта удалась корхнемс минь корреспондентоньконди. Сон азондсь аф тёждя тевонц колга, кода ётни рабочай шиц, мезсь сембода стакась и кода вятьсазь пряснон сярядихне.
04.02.2021  № 4
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин