Поиск по сайту: 
 

Архив
 февраль 
 2021 
пн вт ср чт пт сб вс
1234567
891011121314
15161718192021
22232425262728

 
 

 

Культура

КАРЕНЬ КОДАМАСЬ АРАСЬ ТЕЕНЗА КЕЛЬГОМА ТЕВКС

Корреспонденттненди сашендови улендемс народнай творчествань  ламоц выставкатнень эса. Сидеста няфневи экспонаттнень еткса улендихть карьхть—оцюфт, емланят, сувенирнайхть и стак тов. Тя корхтай сянь колга, што карень кодай мастерхт улихть. Машты кядь ломаттне кородозь ванфтсазь тя тевть, вдь сон кемоста сотф историяньконь мархта.

 

Карень кодай фкя мастерть колга азонттама газетать тячиень номерсонза.

 

Сергей Сергеевич Глухов шачсь-кассь Рузаевкаса. Тонафнесь тя ошень 4№ лицейса математикань и биологиянь класснень эса, меле—Н.П.Огаревонь лемса Мордовскяй госуниверситетонь Машиностроениянь рузаевскяй институтса. Тяни эряй Рузаевкаса и Шочку велеса.

 

«Сюкпря атязти!»

 

Валонзон коряс, карень кодама тонадсь атянц Алексей Тимофеевич Глуховонь эзда, кона шачемас коре Еникеевкаста (Барановкаста)—ульсь тяфтама веле Рузаевскяй районца Кельме Пора велеть маласа.

 

С.С.Глухов азозе, што тянивок карьхненди вешфкс ули. Синь эрявкснихть фольклорнай народнай коллектифненди, сувенир лаца, казненди и стак тов. Конешна, эрь шиня тяни кивок аф якай карьса, но историясна ванфтомат.

 

Сергей Сергеевич котци ленгянь карьхть, куймот, кептерьхть, паргонят, кодапт котцесть атяц и лия велеряйхне. Шарфни мяль и лия карьхненди, кепотьксонди, мокшэрзяннетненди «атякшкя» мархта. Кода содаф, инголи карьхне аф фкатольхть няемас  и кодамас коре нльне фкя велеса. Кепотьксонди, велеть фкя песа карьхне лиятольхть омба петь коряс. Ваномок тяфтама карьсембяльхнень лангс, ульсь кода содамс, кодама родста-плямаста ломанць.

 

Лапотьбол налхкомась

 

Лапотьбол народнай налхкомать Сергей Сергеевич арьсезе футболть коряс Миронь чемпионатть  матчензон Мордовияса етафтомдост инголе. Карень кодамста сась прязонза тяфтама мяль: мес, шта, аф тиемс футбол лаца налхкома,  аньцек карьса, топтьке кодамс ленгяста.

 

Машты кядь алясь ерась ширезонк сай инжихненди—ламоц странатнень и Россиянь региоттнень эзда болельщикненди, а стане жа Мордовиянь эряйхненди няфтемс Лапотьбол налхкомать. Тянкса чемпионатонь шитнень Мокшэрзянь подворьяса тифоль интерактивнай развлекательнай этно-площадка. Сембонди, кинь мяльсноль, ульсь кода весяласта етафтомс пингснон: карьсемс карьхть и налхкомс топса. «Лапотьбол. Народные забавы» налхкомась меле ульсь и тяфтама праздникнень, кода «Кургонять», «Урожаень шить», «Велень шить» (Шочку велеса) пингста.

 

Карьхнень колга—интернетса

 

Социальнай сетьтнень эзда фкаса Сергей Сергеевич тись «Лапти из Мордовии» группа, конань эса пачфни ленгяста кодаф изделиянзон—карьхнень, куймонятнень, паргонятнень, а стане жа народнай налхкшть—ленгяста някать колга.

 

Семботь тиендьсы сонць: аноклакшнесы материалть, сяльде кярьмотькшни изделиять кодаманцты. Тевть ушеткшнесы цебярь мяльса-арьсемаса, кельгозь, ваймонь путозь.

 

 Сон кунара ни тонафнесыне атяньконь койснон-обуцяснон, эряфснон, ремесласнон, сяс «Лапти из Мордовии» группать пяшкотькшнесы мялень салай козя информацияса, творчестванц колга куляса, а стане жа декоративно-прикладной искусствать квалма материалса.

 

Мастер-классне

 

тушендыхть ламотнень мяльс

 

Сергей Сергеевич Глухов етафни мастер-класст, конатнень пингста ерай тонафтомс иттнень и оцюфнень карень, куймонянь, паргонь кодама. Тяфта, кле, удалай ванфтомс народнай козяшись. Кепотьксонди, голландскяй кломпне—нят шуфтста тиф кунардонь карьсембяльхть. Кломпне арасть Голландияти символкс тюльпаттнень мархта ряцок. Синь—сувенирнай продукциять колмоце пяльксоц, вельдест ванфтовихть народнай койхне-обуцятне, культурась. Пара улель, кда кодаф кареньке, куймоньке, няканьке аральхть сяда содафокс. Кой-мзярошкада тянь удалси сатомс мастер-класснень вельде, конат тушендыхть ламотнень мяльс.

 

Карень кодамась арась кельгома тевкс

 

С.С.Глухов ленгяста кодамать мархта заняф вете кизот. Тя арась теенза кельгома тевкс. Сон кенерсь примамс участия районнай, региональнай, международнай ламоц фестивальхнень и праздникнень эса. Эрь кизоня мастерть ули кода няемс «Шумбрат, Мордовия!», «Кургоня» фестивальхнень эса. Алясь оцю мяльса якай и лия регионга. Тянивок сонь тернесазь Зарайск, Липецк, Воронеж, Елец ошненди, Тамбовскяй области. Ужяль, кой-коста эвондакшнихть стакат-сталмот транспортть мархта, сяс аф фалу удалси молемс шири.

 

«Карень кодамась, улема, арась тейне кельгома тевкс. Ленгяста кодан, штоба ванфтомс коеньконь-обуцяньконь и атянь-атяньконь ремесласнон колга мялямть. Кой-коста саят кодамовок велес, коса  инголи якасть карьса, и аф няйсайть синь велень музейса. Сяс еран козякофтомс велень и школань музейхнень карьса, паргоняса, куймоса»,—мярьгсь С.С.Глухов.

 

Аф кунара Мордовияса етась Сокамать коряс Россиянь чемпионатсь, коза сашендсь лама участникта и инжида. Сергей Сергеевич Глухов примась участия эсонза, няфтемок ленгяста изделиянзон и етафтомок мастер-класс. Мордовияста карьхне арасть сядовок содафокс. И тя кепси мяль.

 

Т.Альшина.

 


11.07.2019 №27
 
 
 

 
НОВОСТИ

МР-нь Оцюнять аф лама пингс тевонзон тиендисна Артём Здунов Москуса васетькшнесь Россиянь культурань министрть Ольга Любимовать мархта

15 февральста Москуса ульсь РФ-нь культурань министрть Ольга Любимовать и
МР-нь Оцюнять аф лама пингс тевонзон тиендиснон Артём Здуновонь рабочай
васедемасна. Васедемаса главнай кизефксокс ульсть велень Культурань клубонь
строямась и уликснень петемасна, а стане жа региононь культурань
учреждениятнень эса кинозалхнень оборудованиясна.
«Велень Культурань клупне ломаттненди эрявихть. Минь фалу кирттяма соткст
региональнай власттнень мархта и ваттама ня объекттнень эса сяда тов тевонь
мольфтемать мельге. Тя тейнек эряви, сяс мес од площадкань панжемась и
уликснень петемасна панчсихть ки ломаттнень творческяй маштомошиснон
виияфтомаснонды и мушендомс асуфнень»,—мярьгсь Ольга Любимова.
Эсь ширденза Артём Здунов азсь благодарностень валхт Россиянь Культурань
министерствать лемс Культурань куттнень строямаса лезксонкса и отмечазе, што
Мордовияти велетнень эса Культурань кудонь строямась—тевонь вятемань важнай
направлениясь.
18.02.2021  № 6
 
 

Ванондовсь инвесторхнень мархта экотехнопаркть строяманц коряс кизефкссь

Мордовиянь Оцюнять аф лама пингс тевонзон тиендисна Артём Здунов 3 февральста васетькшнесь «Террикон» компаниянь, кона тиенди кархчнень-ляткснень обработкаснон коряс объектт,  группать руководстванц мархта. Компаниясь Мордовиянь руководительти макссь ваномс экотехнопарконь, конанди сувси единай межмуниципальнай полигон и кархчень сортировандамань комплекс, строямать коряс проект.
Лятфтасаськ, «Экология» национальнай проектть эряфс ётафтомань рамкаса путф задача кирьфтамс полиготтнень эса кархчнень калмамаснон лувксснон и кеподемс производственнай процесса вторичнай сырьять лувксонц тевс ноляманц. 2030 кизоти арьсекшневи пцтай сембе ляткснень кучсемс переработкас.
Артём Здунов педа-пес ванозе няфтьф проектть, конань эряфс ётафтомац арьсекшневи государственно-частнай партнерствань механизматнень вельде инвесторть эсь средстванзон лангс кредитнай ресурснень сувафтозь. Инвестициянь объёмсь лувондови 2,4 миллиард цалковайса, рабочай вастонь панжемась—250 ломаненди.
Артём Здунов шарфтсь башка мяль сянь лангс, штоба аф нолдамс тиф расчёттнень эса эльбятькст, проектть эряви няфтемс «Российский экологический оператор» компанияти, кона эряфс ётафнесы    ТКО-нень обработкаснон коряс государственнай программать.
11.02.2021  № 5
 

Тяфтама продукцияти ули вешфкс сембе вастова

Мордовия Республикань Оцюнять аф лама пингс тевонзон тиендисна Артём Здунов ульсь «Оптикэнерго» компаниятнень группаснон предприятиянзон эса, кона, 2020 кизонкса рейтинговай оценканзон результатонзон коряс, лувондови лидерхнень эзда фкясь республикань промышленнай предприятиятнень ёткса.
Сембоц компаниятнень группасост 22 предприятия, промышленнай направлениясь няфтьф «Сарансккабель-Оптика», «ЭМ-Кабель», «ЭМ-Кат», «ЭМ-Пласт», «Сармат» завоттнень мархта.
Мордовия Республикань Оцюнять аф лама пингс тевонзон тиендисна лац-ряц содафтсь предприятиятнень мощностьснон мархта, улемок компаниятнень группаснон производственнай сембе площадканзон лангса. Кода азондозе «Оптикэнерго»  ГК-ть директоронзон Советснон председателец Эвир Боксимер, предприятиятне обеспечендасазь потребительхненди кабельнай продукциять марнек производстванц комплексонц (катанка—пролоп—кабель—арматура подвесонди), тяка пингть 2020 кизоня инновационнай продукциять объёмоц ня предприятиятнень эса ульсь 80 процент ноляви изделиятнень марстонь объёмснон эзда. Холдингть кабельнай продукцияц пачфневи оцю госкорпорациятненди и ноляви тевс странань знаковай ламоц  объекттнень эса.
Республикать руководителенцты стане жа азондсь компаниятнень группаснон предприятиянзон эса корпоративнай культурать и работникненди дополнительнай социальнай гарантиятнень колга, конатненди сувафневихть работас и работаста служебнай транспортса питнефтома пачфнемась, пси ярхцамбяльса обеспечендамась, медосмотратне.
Сембоц компаниятнень группасост тяниень пингть работай 1700-та лама ломань, промышленнай направленностень предприятиятнень эса средняй заработнай платась 2020 кизоня ульсь 50 тёжянь цалковай.
Мордовия Республикань Оцюнять аф лама пингс тевонзон тиендисна стане жа ульсь «Оптикэнерго»  предприятиянь музейса, коса содафтсь компаниятнень группаснон историянц мархта и кадсь почётнай инжиень книгати тяштькс, арьсемок сяда тов лац-ряц работамс производственнай од платтнень ётафтомстост.
11.02.2021  № 5
 

Мордовияв рабочай визит мархта сашендсь Россиянь промышленностень и торговлянь министрсь Денис Мантуров

5 февральста Мордовияв рабочай поездка мархта сашендсь РФ-нь промышленностень и торговлянь министрсь Денис Мантуров. Ведомствань руководительсь, конань мархта сотрудничендамань сотксонь кирдемась пяк эряви республикати социально-экономическяй ширде виияфтоманкса, макссь питне республикать промышленнай потенциалонцты, панчсь од производственнай линия «Биохимик» заводса, содафтсь региононь инголи моли предприятиятнень продукцияснон мархта и ванозень МР-нь Оцюнять аф лама пингс тевонзон тиендиснон Артём Здуновонь мархта промышленностень и торговлянь сфераса марстонь  проекттнень эряфс ётафтомаснон коряс кизефкснень.
Мордовияса министрть рабочай программанц васенце пунктокс арась «ВКМ-Сталь» заводсь—Россиянь инголи моли металлургическяй комплексонзон  эзда фкясь, кона заняф машина кинь, автомобильнай и нефтегазовай отраслятненди, велень хозяйствати литьень нолдамаса. Предприятияса Денис Мантуров ванозень производственнай линиятнень.
Вагоннай литьянь производствать коряс «ВКМ-Стальсь» сувси Россияса инголи моли колмотнень ёткс. 2020 кизоня нолдаф 48 тёжянь тонна товарнай продукция, оцю вагоннай литьянь производствань объёмсь ульсь 10 тёжяньда лама вагонокомплект. Ноляви продукцияти лувкссь несколька кизоста кассь 30-ть эзда ушедомок 500-ти  молемс.
Холдингть Президентоц Константин Данилов азондсь литейнай производствать одкстоптомань васенце этапонц меля шумордаманц колга, нолдавсь тевс тяниень пингонь электродуговой сталеплавильнай пянакудсь, конань ёмкостец—16 тонна.
Азфоль, што модернизациянь программась сяда тов кармай мольфтевома мелкай и средняй литьянь нолямать коряс мощносттнень касфтоманкса. Тянь инкса  панжеви пцтай 500 рабочай од васта. Проектнай мощностьс лисемась арьсекшневи 2024 кизоня, инвестициянь объемсь—3,7 миллиард цалковай.
Тевс ноляви технологиятненди вийс коре цебярьгофтомс трудонь условиятнень, сяда касфтомс производствать экологическяй ширде  арукс улеманц. Кепотьксонди, 2020 кизоня путф 20 миллион питнеса кожфонь аруяфтомань системась аруяфнесы кожфть  тяфта лемневи «рдазу» металлургическяй производстваса.
Башка токсевсь производствать диверсификациянц и кадратнень коряс темась. Денис Мантуровонди азондозь, кле, профессиональнай металлургонь анокламань системась ладяф ни несколька киза и тяниень пингть вузса тонафнемать пингста кочксевихть асу цёратне  и аф аньцек минцень регионцтонк. 
«Ушеткшнеськ кадрань кочкамать несколька кизода инголе кафта профессиональнай металлургста, тяни ни анокламе 50 специалист, и нинге кемоттне аделасазь тонафнемаснон тядде»,—мярьгсь «ВКМ-Стальть» управляющай директороц Николай Чалов.
Предприятияса средняй зарплатась 42 тёжянь цалковай.  «ВКМ-Стальсь» сувси республиканскяй 10 предприятиятнень ёткс, коса пандови ломаттненди оцю зарплата.
11.02.2021  № 5
 

Евгений Алушкин: «ТЕЙНЕ АШ КОДА ЛЯДОМС ШИРЕСА»

Россияса коронавируснай инфекцияса васенце сярядись муфоль 2020 кизонь 31 январьста. Пцтай киза ни минь эрятама тя пелькс урмать мархта. Тяддень 20 январти ковидть мархта савсь васедемс Мордовиянь 15173 эряйти. Кода аф ужяль, 119 ломанць (стане жа 20 январти) ёткстост кулость урмать сюнеда.
Пандемиять пингста, шарьхкотьф, сембода стакаста сашендови медицинскяй работникненди. Ащемок, кода корхнихть, передовойса, синь шинек-венек эсь прянь аф ужяльдезь тюрихть урмать каршес. Сидеста врачне аф сатнихть, теест лездома сашендыхть    студенттне—сай пингонь докторхне. Фкясь синь ёткстост од цёрась, Н.П.Огаревонь лемса МГУ-нь Медицинскяй институтонь тонафнись Евгений Алушкин. Аф фкя ков ни сон работай 5№ Республиканскяй клиническяй больницяса, кона пандемиять ушетксста ётафтфоль ковиднай госпиталенди, лиякс мярьгомс, тяса тяни пчкафневихть коронавируснай инфекцияса сярядихне. Аф кунара Евгениень мархта удалась корхнемс минь корреспондентоньконди. Сон азондсь аф тёждя тевонц колга, кода ётни рабочай шиц, мезсь сембода стакась и кода вятьсазь пряснон сярядихне.
04.02.2021  № 4
 
 

Лезкс максови сембоса

Мордовия Республикань Оцюнять аф лама пингс тевонзон тиендисна 28 январьста васетькшнесь аф коммерческяй организациятнень—2021 кизонь президентскяй грантонь Фондть васенце этапонц сяськиензон мархта. Азомок васедемань участникненди приветствиянь валхт, республикань руководительсь мярьгсь, што марса, марстонь вийса ули кода решандамс важнай социальнай задачатнень.
«Мон ваныне аф коммерческяй организациятнень кодама работань направлениясна киртьфтольхть ширесна Президентть мархта: тя и культурась, и шумбра эряфонь койхне, религиознай ширде ладямась и ламоц лиясь. Сембе синь пяк важнайхть и вешихть ответственностень маряма, конань эряви тейнек кандомс марса»,—мярьгсь Артём Алексеевич.
Марнек президентскяй грантонь Фондонь конкурсть васенце этапонцты максфоль 100 заявка, 19 проектсь арась сяськикс. Ширень кирдемань марстонь суммась лувондови 20 миллион цалковайса.  Отмечафоль, што республикаса лувондови 1413 общественнай объединения, но аф сембе эздост тевснон мольфтьсазь эрязста. Но президентскяй грантонь конкурсса кизоста кизос примси участия коль сяда лама организация: кда 2017 кизоня максфоль 95 заявка, конатнень эзда 14 арась сяськикс, 2019 кизоня ни максфоль 215 заявка и сяськида ульсь 41. Ётай кизоня конкурсонь кафта этапнень итогснон коряс, сяськикс арась 43 проектсь, ширень кирдемань суммась лувондови 36,7 миллион цалковайса.
Васедемаса Артём Здунов мярьгсь, што анок кулхцондомс сембе предложениятнень, сяс мес властень оргаттненди и гражданскяй обществань институттненди эряви работамс марса. Общественнай организациятнень эзда кизефкста ульсь пяк лама, аф сяда кржаль социальнай эрявикс проектонь эряфс ётафтомать коряс мялень азомада. Тяконь лувксса кепсевсть помещениятнень льготнай арендаснон, микрокредитованиянь возможносттне, аф коммерческяй организациятнень ширень кирдемаснон коряс центрань панжемать коряс платтне.
04.02.2021  № 4
 

Артём Здунов: «Мордовияти гигантоманиясь аф зепс коре. И ломаттненди сон аф эряви!»

МР-нь Оцюнять аф лама пингс тевонзон тиендисна 28 январьста видеоконференциянь режимса ётафтсь строительнай отраслять виияфтоманц коряс совещания.
Ванондовсь тя кизонь строительнай программась, васендакиге корхтамась мольфтевсь строительствать, капитальнай ремонтть и национальнай проекттнень эряфс ётафтомань рамкаса социальнай инфраструктурань объекттнень капитальнайста петемаснон и реконструкцияснон колга.
Строительнай отраслять работанц колга азондсь МР-нь Правительствать Председателенц заместителец—строительствань, транспортонь и дорожнай хозяйствань министрсь Виктор Цыганов.  Строительнай работатнень объёмсна 2020 кизоня лувондови 109 процентса 2019 кизоть уровененцты, строяф 324,5 тёжянь квадратнай метра эряма васта. 2021 кизоня арьсекшневи строямс 340 тёжянь квадратнай метра эряма васта, а 2023 кизоня, сявомок мяльс нацпроектть целевой показателензон—400 тёжянь квадратнай метра.
Тяддень финансированиянь марнек объемсь, кона нолдави социальнай, инженернай инфраструктурань и эряма вастонь объекттненди, 5 миллиартта лама цалковай.
04.02.2021  № 4
 

Артём Здуновонь Старошайговскяй районца улеманц колга

МР-нь Оцюнять аф лама пингс тевонзон тиендисна Артём Здунов 30 январьста рабочай поездка мархта якась Старошайговскяй району. Республикань руководительсь васенда ульсь «Новотроицкая» агрофирмаса.
Кода азондозе республикань руководительти агрофирмать директороц Владимир Спирин, предприятиять велень хозяйствань угодиянь  площаденза кассть  3 тёжятть гектарста 8 тёжятть гектархненди молемс, сёрода урятцеви—1,5 тёжянь тоннаста сявомок 14,8 тёжянь тоннати молемс, урожайсь—фкя гектарста 12 центнерста сявомок 41 центнерти молемс. Животноводстваса марнек петьфт-одкстоптфт животноводческяй уликс помещениятне Новотроицкое и Сире Шайгав велетнень эса, строяфт ангархт и 400 траксонди потямань зал мархта карда. Жуватань марстонь лувкссь—3600 лама пря. Фкя траксста потьневи 8750 литра лофца кизоти. Тяниень пингть хозяйствась арась чёрно-пёстрай траксонь пляманди касфнемать коряс репродукторкс.
04.02.2021  № 4
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин