Поиск по сайту: 
 

Архив
 март 
 2021 
пн вт ср чт пт сб вс
1234567
891011121314
15161718192021
22232425262728
293031    

 
 

 

Юмор и сатира

АФ СОДАФ ПРАВИЛА

Дык вов. А тонафнень ошса. Тязк и кадомазь работама. Васта макссть, зарплата ладясть. Кода тевсь? Аф стака—киндивок аф шорсемс. И ашень шорсе. Тянкса зарплатавок пандсть. Квартираня макссть. Профкомсь лямбе шири ваймосема путевканди очередьс путомань. Ну, и мезе кда кемонь-кеветие кизода меле саты?! Пенсияв тумозон кизода—о-о!—нинге мзяра. Учса. Мес аф учемс, кда киндивок аф шорян. Тееньге аф шоряйхть. Кенженень касфтыне—кода карьхциганонь. Акшенят, мянтьфкат песна… Мяштьсон авань покольхть?.. Аф, стапт аф касыхть. Тюжя пона касы. Суркскакс мянцеви. Панарфтома пелян крьвястемс сигарета—сяконь ватт општадихть.

 

Дык вов. Кулезе кати-коста кунардонь ялгазе, бта лац маштан киндивок аф шорсема, васьфтемань. Тердемань работама ширезост—кати-кодама конструкторскяй бюров.

 

—Тят, тят атказа, тонь лац содатядязь, ламос ванондоме мельгат,—таколдомазень няемста кяляцямань ялгазе.—Тонь вельф оцю цебярь ширеце ули—маштат аф шоряма.

 

Эрь, ётань. Тяса контораньконь коряс ломаньда сяда лама. Тейневок уженяса макссть ёмла шраня, карандашт, каготт и мярьгсть киндивок аф шорямс. Штоба ёфси афолень шоря, макссть тевга: арьсемс-смекамс стама инзама, кона шароль уликсненди и эсонза кати-мезе эвондаль одня.

 

Озань, келептине кагоднень, кармань арьсема. И вдь повсь прязон валда мяль. Лездсь врачсь, кона аф кунара таргазе пеезень. «Кода,—кизефтине,—тяни карман эряма пейфтома?».—«Аш мезевок,—сетьмофтемань,—меленцяце сякокс кармай яжама. Вона нинге мзяра лядсь».

 

«А мезе,—арьсян,—кда монга инзамати фкя пей аф путан. Кучканнеть валхтса». Валхтыне, аноклайне чертёшнень-меснень, няфтине оцюнязти.

 

«Ванды архт командировкас,—мярьгсь сон.—Подшефнай колхозса ётафттада испытаният».

 

Тунь, пачкодень. Трактористть мархта ардоме паксяв. Сон тракторть мельге цилядезе инзамать.

 

—А мес кучкаса фкя пей аш?—кизефнесамань.

 

—Вов мес,—толкавайне.—Шарыть кучкасовок ули варя. Кда афоль уле, сон афоль шара. Тясовок кучкань пейсь аш мезенди, а кшнида странась ванфты—пефтома. Тейть од тракторга тиихть.

 

—Ёжу ученай народсь, ёжу окаяннайсь,—дивандась трактористсь.— Кинь пряс тяфтама мяль саль.—Инзамста сяка тев варжакснесь фталу, сядонга дивандась.—Инзай вдь, инзай.

 

Пара кулясь инголдазе самазень. Киоскста рамань газета и пряпоназе стясь. Тоса печатлаф ликозе. Статьятьке лемоц кайги: «Странать вельмофтиенза». Тоса сермадыхть: «Од конструкторсь Семен Нувайкин азсь од вал наукаса и практикаса. Сон тись инзама, кодама ашезь сотце мирсь. Тяка пингть странати ванфтсь миллиотт и миллиотт инзама пей. Ванфтф кшнись саты сядот тракторонь, автомобилень, электровозонь и нинге кой-мезень тиемс».

 

Бюросонк васьфтемазь кода героень. Люпшнезь кядезень, лапамазь лафтус, нльне панчфт казсть. А ялгазе, кона тердемань тяза работама, псиста ктмордамань, нльне сельмоведенза тусть: «Монга ашине сода, конашка талант эсот кяшф...»

 

Бюроньконь оцюнянцка седиец солась: сон азозе васенце пяденцять праздниконь шикс. Ва ни праздниколь. Сембе праздникненди праздниколь. Мекпяли оцюняньке сяшкава ляпомсь, мяк кармась уборщицать мархта палсема, кона сась шава сюлекатнень-меснень лихнема.

 

Понедельникста тага макссть од тев: арьсема, кода теждялгофтомс гусеница мархта тракторхнень ходовой пяльксснон петемаснон. Арьсек, кле, киндивок тят шоря, тоньге кивок аф токатанза.

 

Ламос якань ошева, мунь гусеница мархта трактор, рисавайне и мрдань. Озань, арьсян. И тага валда мяльсь сувась пряпотмозон. «Крандазть ниле шарыенза и арды—калдорфоц. А тракторть гусеницанзон еткс марасть шарыда и шарыняда—пефтома». И арьсень кафцьке ширде валхтомс тифтень шарыня. Аноклайне чертешнень, максыне. Корязост тисть тифтень шарыняфтома трактор. Ванозь тевса. Вельф удалафста лиссь. «Омбоце шабазень» лувозь цють аф гениальнайкс. Портретозень тага печатлазь газетаса. Ащан тракторть ваксса. Кода лувозь, ванфтф кшнись саты аф аньцек электровозонь, но и кораблянь строямска. Премия макссть—ярмакть куду портфельса кандыне.

 

Славась квалман срадсь келес и серес. Ульцяса ломаттне кармасть сотцемон, пряснон инголен штафнезь. Тядятне лангозон сурса няфнесть и корхнесть аф кулхцонды идьснонды: «Тонафнек лацкас, лацонза арат».

 

Кармасть содама квалман сяда вяревок. Курокста ётафтомазь покодема специальнай конструкторскяй бюров. Макссть башка кабинет, оцю шра, ваймамс уженявок ули.

 

—Работак, арьсек,—корхтай бюронь сембода оцюнясь,—кивок шорсема аф кармай.

 

Омбоце шиня оцюняньке тага сувась ширезон, эняльгодсь:

 

—Надияфнень аф шорсемс тейть, но мезе тият—эряфсь тяфтама,—таколдомати лакшторфтсыне суронзон.—Странань парашютистонь сборнайсь аноклай масторлангонь соревнованияс. Теест эрявихть од парашютт. Ну, стамот, штоба шарольхть ингольцетненди и улель эсост кати-мезе одня. Нюрьхкяняста азомс, улельхть нармонь паця лацот—коза мяльце, тоза шарфтсак.

 

—Тисаськ кода эряви,—кемоста надияфтонь. Оцюнясь кенярдсь, пеедезевсь и потазь лиссь кабинетстон.

 

А мон ушедонь арьсема. Кантфтонь журналхт, чертешт, келептине шразень лангс, кода портнойсь эсь выкройканзон. И тага валда ёндолня кфчядсь прясон. Содасасть, кие лездсь? Мзярдовок аф содави! Азса ни монць. Велеса эряй авозезе—вов кие! Кунара ни эняльди ускомс муськомонь повфнемс пикскя. Мзяроксть ласькондень магазинга—косовок аш. А парашютса пикскада—пефтома. Стропакс синь лемнесазь. Да аф кодамот-бди, а парьхциеннет. Мезенди тняроть повфнезь шава прятне—кивок аф азсы. Тапаряват вдь еткозост, кода калсь сетти. Вов и кирьфтамат синь лувкссна. Пикскада ванфтови—сембе странань муськопнень повфнемс сатыхть... А мзяра кадомс? Тя кизефкссь ламос, мянь прянь сярятькстомс арьсефтемань. Весть варжакстонь вальмава, нльне комотень кенярдемати. Автокранць кепси бетононь плитат. И тиендьсы тянь кшниста ниле троскя вельде. Кеподьсы плитать и эвондай бта алубрят шарфтф парашют. Кда ни тяшка сталмось кирдеви ниле пикскаса, то ломанти кафттневок сатыхть.

 

Арьсень-тиень, кадонь ниле. Природась кельгсы нилеть. Сонценьге ниле ширенза, кудтьке ниле стенанза. Корхтайхть, ломанцьке васенце шарыть тиендезе ниле ужеса.

 

Аноклайне чертешнень—лац лиссть. Максыне бюронь оцюняти, соньге мялезонза тусть.

 

Тячи шобдава сувась кабинетозон, муворуняста пееди:

 

—Ванды ошть маласа, аэродромса, тевса ванови од парашютце. Тернетядязь.

 

—Мезе, мле, мольхтяма, ванцаськ. Тонга аде мархтон,—шовайне фкя-фкас кядьлапшенень—нинге фкя удалаф идь «шачфтонь».

 

—Аф прокс ванома,—полафнесыне пильгонзон оцюняньке.—Эстейть эряви комотемс самолетста. Азозь, парашютисттнень ули фкя кеме правиласна: комотемда инголе кажнайсь сонць латцесы эсь парашютонц. Лиянди киндивок аф мярьгондеви.

 

Тя правилать мон ашине сода.

 

Г.ПИНЯСОВ.

 


11.07.2019 №27
 
 
 

 
НОВОСТИ
 

Республикаса коронавирусса сярядихнень лувкссна кири

Мордовиянь Оцюнять аф лама пингс тевонзон тиендисна Артём Здунов 18
февральста ётафтозе республикаса коронавируснай инфекциять инголдаманц и
келемоманц коряс оперативнай штабть заседаниянц. Ванондовсть уликс
эпидемиологическяй ситуациять, COVID-19 эзда вакцинациять, здравоохранениянь
региональнай системать тевонь мольфтеманц, санитарно-эпидемиологическяй
вешфкснень ванфтомаснон мельге контролень вятемать коряс кизефксне.
Примсеви мератнень инкса республикаса коронавирусса урмаськодыхнень лувкссна
кири. Тяниень пингть ковиднай госпитальхнень эса пчкси 1000-да кржа пациент
(стака пинкнень ульсь 2000 ломань), кири лувкссна и амбулаторнайста
пчксихнень. Пчкафтомань учреждениятне меки мртцихть работань плановай
режимти, латцевихть специализированнай медицинскяй лезксонь максомань
объемтне.
Но райоттнень эзга тефне ащихть лиякс. Коса урмаськодыхнень лувкссна кири, а
коса меколанкт—касы. МР-нь Оцюнять аф лама пингс тевонзон тиендисна шарфтсь
тянь лангс башка мяль и кошардсь ваномс ся райоттнень эса тефнень
мольфтемаснон, коса эпидемиологическяй обстановкась аф цебярьготкшни.
«Ардатовскяй, Ельниковскяй, Большеберезниковскяй, Большеигнатовскяй,
Старошайговскяй, Чамзинскяй, Рузаевскяй, Ковылкинскяй и Кадошкинскяй
райоттне—тиньцонт урмаськодыхнень лувкссна сяда оцю, кда сявомс целайнек
марнек республикать эзга,—кемоста азозе Артём Алексеевич муниципальнай
райононь оцюнятненди.—Эряви максомс анализ ситуацияти, ваномс, кодама мерат
примсевихть».
Нинге  фкя таколфты кизефкссь—сядонга лама урмаськодыхнень лувксса эряфкшу
ломаньда. Ня даннайхнень кемокснесыне Роспотребнадзорсь.
«Тиемок анализ тя недялять урмаськодыхнень лувксснонды, минь няйсаськ, што
коронавирусса сярядихнень лувксса 65 кизоса и сяда сире ломаньда арась сяда
лама—27,7 процент, а ётай недяляня ульсь 23 процент, лиякс азомс, моли
касома,—отмечазе МР-ть эзга главнай санитарнай врачсь Татьяна Харитонова.—
50-60 кизосотнень ёткса урмаськодомась лядсь сяка уровеньца».
«Урмаськодыхнень лувкссна кири, но эряфкшу ломаттнень заразиндавомань
талекасна касы, а Ардатовскяй районца тя показательсь и ёфсикс няфни 40
процент»,—мярьгсь Артём Здунов.
Тянкса оперативнай штабсь кирдезе 65 кизоса и сяда сире ломаттненди
самоизоляциянь режимть сяда тов кувалгофтомань пингонц коряс предложениять.
Нинге фкя важнай темась, кона ванфоль заседанияса,—коронавирусть эзда
вакцинациясь. Мордовияса сон ётай активнайста, региону пачфтьф 33 тёжяньда
лама вакцинань комплект, прививка тифтсь пцтай 26 тёжянь ломанць.
Ладявсь аптекатнень эса лекарстватнень улемаснон мархта тевсь. Кой-кона
позициятнень коряс, кода азфоль, республикань государственнай аптекатнень
эса тиф запас  аф колма ковонди, а нльне кафтошка кизонди.
Но улихть прябалат льготнай лекарстваса обеспечендамать мархта, мезть лангс
шарфтсь башка мяль МР-нь Оцюнять аф лама пингс тевонзон тиендисна, и кемоста
азозе республикань Здравоохранениянь министерствати курокста ладямс тянь
мархта сотф ситуациять и сяда тов кирдемс башка контроль ала.
Оперштабть заседаниянц песта республикань руководительсь мярьгсь: сембе
главнай кизефксне, конат сотфт здравоохранениянь системать работанц мархта
пандемиять пингста, ванфнесазь эсь эрявиксшиснон. Од коронавируснай
инфекцияса сярятькстыхнень лувксснон кирьфтаманкса и сяда тов ситуациять
цебярьгофтоманкса организациянь руководительхненди,      республикань
эряйхненди эряви и сяда тов кемоста ванфтомс эсь прянь араламань мератнень и
санитарнай врачнень вешфксснон.
25.02.2021  № 7
 
 

МР-нь Оцюнять аф лама пингс тевонзон тиендисна Артём Здунов Москуса васетькшнесь Россиянь культурань министрть Ольга Любимовать мархта

15 февральста Москуса ульсь РФ-нь культурань министрть Ольга Любимовать и
МР-нь Оцюнять аф лама пингс тевонзон тиендиснон Артём Здуновонь рабочай
васедемасна. Васедемаса главнай кизефксокс ульсть велень Культурань клубонь
строямась и уликснень петемасна, а стане жа региононь культурань
учреждениятнень эса кинозалхнень оборудованиясна.
«Велень Культурань клупне ломаттненди эрявихть. Минь фалу кирттяма соткст
региональнай власттнень мархта и ваттама ня объекттнень эса сяда тов тевонь
мольфтемать мельге. Тя тейнек эряви, сяс мес од площадкань панжемась и
уликснень петемасна панчсихть ки ломаттнень творческяй маштомошиснон
виияфтомаснонды и мушендомс асуфнень»,—мярьгсь Ольга Любимова.
Эсь ширденза Артём Здунов азсь благодарностень валхт Россиянь Культурань
министерствать лемс Культурань куттнень строямаса лезксонкса и отмечазе, што
Мордовияти велетнень эса Культурань кудонь строямась—тевонь вятемань важнай
направлениясь.
18.02.2021  № 6
 
 

Ванондовсь инвесторхнень мархта экотехнопаркть строяманц коряс кизефкссь

Мордовиянь Оцюнять аф лама пингс тевонзон тиендисна Артём Здунов 3 февральста васетькшнесь «Террикон» компаниянь, кона тиенди кархчнень-ляткснень обработкаснон коряс объектт,  группать руководстванц мархта. Компаниясь Мордовиянь руководительти макссь ваномс экотехнопарконь, конанди сувси единай межмуниципальнай полигон и кархчень сортировандамань комплекс, строямать коряс проект.
Лятфтасаськ, «Экология» национальнай проектть эряфс ётафтомань рамкаса путф задача кирьфтамс полиготтнень эса кархчнень калмамаснон лувксснон и кеподемс производственнай процесса вторичнай сырьять лувксонц тевс ноляманц. 2030 кизоти арьсекшневи пцтай сембе ляткснень кучсемс переработкас.
Артём Здунов педа-пес ванозе няфтьф проектть, конань эряфс ётафтомац арьсекшневи государственно-частнай партнерствань механизматнень вельде инвесторть эсь средстванзон лангс кредитнай ресурснень сувафтозь. Инвестициянь объёмсь лувондови 2,4 миллиард цалковайса, рабочай вастонь панжемась—250 ломаненди.
Артём Здунов шарфтсь башка мяль сянь лангс, штоба аф нолдамс тиф расчёттнень эса эльбятькст, проектть эряви няфтемс «Российский экологический оператор» компанияти, кона эряфс ётафнесы    ТКО-нень обработкаснон коряс государственнай программать.
11.02.2021  № 5
 

Тяфтама продукцияти ули вешфкс сембе вастова

Мордовия Республикань Оцюнять аф лама пингс тевонзон тиендисна Артём Здунов ульсь «Оптикэнерго» компаниятнень группаснон предприятиянзон эса, кона, 2020 кизонкса рейтинговай оценканзон результатонзон коряс, лувондови лидерхнень эзда фкясь республикань промышленнай предприятиятнень ёткса.
Сембоц компаниятнень группасост 22 предприятия, промышленнай направлениясь няфтьф «Сарансккабель-Оптика», «ЭМ-Кабель», «ЭМ-Кат», «ЭМ-Пласт», «Сармат» завоттнень мархта.
Мордовия Республикань Оцюнять аф лама пингс тевонзон тиендисна лац-ряц содафтсь предприятиятнень мощностьснон мархта, улемок компаниятнень группаснон производственнай сембе площадканзон лангса. Кода азондозе «Оптикэнерго»  ГК-ть директоронзон Советснон председателец Эвир Боксимер, предприятиятне обеспечендасазь потребительхненди кабельнай продукциять марнек производстванц комплексонц (катанка—пролоп—кабель—арматура подвесонди), тяка пингть 2020 кизоня инновационнай продукциять объёмоц ня предприятиятнень эса ульсь 80 процент ноляви изделиятнень марстонь объёмснон эзда. Холдингть кабельнай продукцияц пачфневи оцю госкорпорациятненди и ноляви тевс странань знаковай ламоц  объекттнень эса.
Республикать руководителенцты стане жа азондсь компаниятнень группаснон предприятиянзон эса корпоративнай культурать и работникненди дополнительнай социальнай гарантиятнень колга, конатненди сувафневихть работас и работаста служебнай транспортса питнефтома пачфнемась, пси ярхцамбяльса обеспечендамась, медосмотратне.
Сембоц компаниятнень группасост тяниень пингть работай 1700-та лама ломань, промышленнай направленностень предприятиятнень эса средняй заработнай платась 2020 кизоня ульсь 50 тёжянь цалковай.
Мордовия Республикань Оцюнять аф лама пингс тевонзон тиендисна стане жа ульсь «Оптикэнерго»  предприятиянь музейса, коса содафтсь компаниятнень группаснон историянц мархта и кадсь почётнай инжиень книгати тяштькс, арьсемок сяда тов лац-ряц работамс производственнай од платтнень ётафтомстост.
11.02.2021  № 5
 

Мордовияв рабочай визит мархта сашендсь Россиянь промышленностень и торговлянь министрсь Денис Мантуров

5 февральста Мордовияв рабочай поездка мархта сашендсь РФ-нь промышленностень и торговлянь министрсь Денис Мантуров. Ведомствань руководительсь, конань мархта сотрудничендамань сотксонь кирдемась пяк эряви республикати социально-экономическяй ширде виияфтоманкса, макссь питне республикать промышленнай потенциалонцты, панчсь од производственнай линия «Биохимик» заводса, содафтсь региононь инголи моли предприятиятнень продукцияснон мархта и ванозень МР-нь Оцюнять аф лама пингс тевонзон тиендиснон Артём Здуновонь мархта промышленностень и торговлянь сфераса марстонь  проекттнень эряфс ётафтомаснон коряс кизефкснень.
Мордовияса министрть рабочай программанц васенце пунктокс арась «ВКМ-Сталь» заводсь—Россиянь инголи моли металлургическяй комплексонзон  эзда фкясь, кона заняф машина кинь, автомобильнай и нефтегазовай отраслятненди, велень хозяйствати литьень нолдамаса. Предприятияса Денис Мантуров ванозень производственнай линиятнень.
Вагоннай литьянь производствать коряс «ВКМ-Стальсь» сувси Россияса инголи моли колмотнень ёткс. 2020 кизоня нолдаф 48 тёжянь тонна товарнай продукция, оцю вагоннай литьянь производствань объёмсь ульсь 10 тёжяньда лама вагонокомплект. Ноляви продукцияти лувкссь несколька кизоста кассь 30-ть эзда ушедомок 500-ти  молемс.
Холдингть Президентоц Константин Данилов азондсь литейнай производствать одкстоптомань васенце этапонц меля шумордаманц колга, нолдавсь тевс тяниень пингонь электродуговой сталеплавильнай пянакудсь, конань ёмкостец—16 тонна.
Азфоль, што модернизациянь программась сяда тов кармай мольфтевома мелкай и средняй литьянь нолямать коряс мощносттнень касфтоманкса. Тянь инкса  панжеви пцтай 500 рабочай од васта. Проектнай мощностьс лисемась арьсекшневи 2024 кизоня, инвестициянь объемсь—3,7 миллиард цалковай.
Тевс ноляви технологиятненди вийс коре цебярьгофтомс трудонь условиятнень, сяда касфтомс производствать экологическяй ширде  арукс улеманц. Кепотьксонди, 2020 кизоня путф 20 миллион питнеса кожфонь аруяфтомань системась аруяфнесы кожфть  тяфта лемневи «рдазу» металлургическяй производстваса.
Башка токсевсь производствать диверсификациянц и кадратнень коряс темась. Денис Мантуровонди азондозь, кле, профессиональнай металлургонь анокламань системась ладяф ни несколька киза и тяниень пингть вузса тонафнемать пингста кочксевихть асу цёратне  и аф аньцек минцень регионцтонк. 
«Ушеткшнеськ кадрань кочкамать несколька кизода инголе кафта профессиональнай металлургста, тяни ни анокламе 50 специалист, и нинге кемоттне аделасазь тонафнемаснон тядде»,—мярьгсь «ВКМ-Стальть» управляющай директороц Николай Чалов.
Предприятияса средняй зарплатась 42 тёжянь цалковай.  «ВКМ-Стальсь» сувси республиканскяй 10 предприятиятнень ёткс, коса пандови ломаттненди оцю зарплата.
11.02.2021  № 5
 

Евгений Алушкин: «ТЕЙНЕ АШ КОДА ЛЯДОМС ШИРЕСА»

Россияса коронавируснай инфекцияса васенце сярядись муфоль 2020 кизонь 31 январьста. Пцтай киза ни минь эрятама тя пелькс урмать мархта. Тяддень 20 январти ковидть мархта савсь васедемс Мордовиянь 15173 эряйти. Кода аф ужяль, 119 ломанць (стане жа 20 январти) ёткстост кулость урмать сюнеда.
Пандемиять пингста, шарьхкотьф, сембода стакаста сашендови медицинскяй работникненди. Ащемок, кода корхнихть, передовойса, синь шинек-венек эсь прянь аф ужяльдезь тюрихть урмать каршес. Сидеста врачне аф сатнихть, теест лездома сашендыхть    студенттне—сай пингонь докторхне. Фкясь синь ёткстост од цёрась, Н.П.Огаревонь лемса МГУ-нь Медицинскяй институтонь тонафнись Евгений Алушкин. Аф фкя ков ни сон работай 5№ Республиканскяй клиническяй больницяса, кона пандемиять ушетксста ётафтфоль ковиднай госпиталенди, лиякс мярьгомс, тяса тяни пчкафневихть коронавируснай инфекцияса сярядихне. Аф кунара Евгениень мархта удалась корхнемс минь корреспондентоньконди. Сон азондсь аф тёждя тевонц колга, кода ётни рабочай шиц, мезсь сембода стакась и кода вятьсазь пряснон сярядихне.
04.02.2021  № 4
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин