Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Рузаевский район: высокоскоростной интернет в каждую школу

ВЛАДИМИР ВОЛКОВ ВАСЕТЬКШНЕСЬ РФ-НЬ ПРОМЫШЛЕННОСТЕНЬ И ТОРГОВЛЯНЬ МИНИСТРТЬ ДЕНИС МАНТУРОВОНЬ МАРХТА

Тяконди, корхтамась мольфтевсь волоконно-оптическяй кабельхнень сувафтомаснон колга товархнень лувксс, конатнень коряс арьсекшневи 15 процентта государствать ширде рамамста питнень полафтома.

 

«Сявомок мяльс ня полафткснень, отечественнай оптоволокнань основаса кабельса эряви обеспечендамс государственнай и муниципальнай учреждениятнень марнек  вешфксснон, мезсь лезды кабельнай продукциять и оптоволокнать нолдаманц объемонзон сяда тов касфтомаснонды»,—мярьгсь Денис Мантуров.

 

Корхтамась стане жа токазе Саранскяйса оптическяй волокнань нолямать коряс заводть омбоце пусковой комплексонц строяманц. Комплекссь арьсеф оптоволокнань вытяжканди сонцень заготовканзон (преформанзон) ноляманди. Сонь нолдаманц коряс инвестиционнай проектть лангса тяниень пингть мольфтеви активнай работа. Мордовиянь Оцюнясь Владимир Волков эняльдсь кирдемс ширенц регионца эсь лацонь проектть виияфтоманц: «Тя проектсь эряви аф аньцек республикати, но и целайнек странати, сяс мес лезды валхтомс импортть эзда ащемать и ладямс Саранскяйса оптическяй волокнать ноляманц коряс замкнутай циклать. Омбоце очередть нолдамац максы возможность себестоимостть кирьфтаманцты и саранскяй ОВС продукциять конкурентнайкс улеманц касфтоманцты—тянди минь мольхтяма!»—мярьгсь республикань Оцюнясь.

 

«Сявондемок мяльс тяниень рыночнай ситуациять, преформань производствань строямань кизефксть сяда цебярь ванондомс государственнай ширень кирдемань дополнительнай мератнень мархта марса, сувафнемок таможенно-тарифнай и аф тарифнай регулированиянь мератнень»,—мярьгсь Россиянь Минпромторгонь оцюнясь.

 

Темать коряс сяда тов корхтамаса Денис Мантуров путсь пяк ару кварцевай материалонь тиемать коряс задача, мезсь мярьгонди валхтомс импортть эзда ащемать и обеспечендамс странаса оптическяй волокнань нолямать замкнутай цикланц.

 

Васедемаса примась участия МР-нь промышленностень, наукань и од технологиянь министрсь Александр Седов и «Технопарк-Мордовия» АУ-ть генеральнай директороц Виктор Якуба.

 


18.07.2019 №28
 
 
 

 
НОВОСТИ

Синь арьсесть народоньконь сай пингонц колга

13.08.2020  № 31
 

«Сурский рубеж» фестивалень конкурсс максф 250-да лама заявка

Шумордавсь «Сурский рубеж» патриотическяй моронь фестивалень конкурсс заявкатнень примамасна. Мордовиянь сембе райоттнень эзда и Чувашия Республикаста максф 250-да  лама заявка. Кеняртьфти ся, што конкурсанттнень ёткса улихть и вете кизоса шабат, и 80 кизода сире ветератт. Сембе моротнень эса, конатнень синь морасазь, шарьхкотькшневи странаньконь, сяськоманьконь инкса гордостень марямасна!
«Сурский рубеж» проектсь—гражданскяй обществать виияфнеманкса водендаф Президентскяй грантонь фондть 2020 кизонь васенце этапонц панжада конкурсонь сяськись. Тя военно-патриотическяй моронь фестиваль, кона ётафтови 1941-1945 кизотнень Великай Отечественнай войнаса советскяй народть Сяськоманц 75 кизонь топодеманц и 1939-1945 кизотнень омбоце мировой войнать шумордаманц праздновандамаснон мяльса кирдезь. Водендаф фестивальсь Мордовиянь ломаттнень оцю подвигснон колга историческяй мялямть ванфтоманкса.
13.08.2020  № 31
 

Е.С.Кирдяпина:«Мзярс ванфтови кяленьке, снярс кармай эряма нацияньке»

Ивановка велеса героиняньке шумордазе начальнай школать, а меле содамошит пуропнесь Морд-Полянаса. Школаса Ленась тонафнесь  лац. Пяк кельгозень мокшень кялень и литературань урокнень. «Литературань учителеньке най путнелезе Ленать тейнек примеркс,—лятфнесы Кирдяпинать фкя класса тонафни ялгац Е.И.Чекмарёва.—Урокнень пингста минь сембе старандаме лац-ряц азомс лувфть, максомс характеристика геройхненди, и сембоса кати-мезе ашезь сатне. Тяса терневсь доскати Ленась. Азы фкя вал, и марнек шарьхкотьф, сембось кода эряви. И эзк Нина Павловнаньке юватькшнель: «Молодецат, Лена!».
Нинге шабакс Е.С.Кирдяпинать салселезе мяленц учителень тевсь. Сяс школать шумордамда меле мялецоль тонафнемс тя профессияти. Но вов коса прябалась: сянкса, штоба тумс тонафнема Саранскяи, эрявсть ярмакт, а коста синь сявомс? Эста од стирсь, аньцек получазе аттестатть, лиссь работама. Киза покодсь Зубуса ламповай заводса, кочкась ярмаконя и сембе сяка пяшкодезе мяленц—поступась тонафнема Н.П.Огарёвонь лемса МГУ-нь филологическяй факультету.
13.08.2020  № 31
 

Аш стама тев, кона улель теенза аф вийс коре

Мзярда сань мяльс тяштемс Рузаевскяй райононь Мокшень Пишля велень эряйть, зрнянь кядь алять Фёдор Иванович Юдинонь колга, абондонь, сяс мес ашине сода мезьста ушедомс. Фёдор Иванович канневи стама ломаттненди, конат маштсазь семботь. Аш стама тев, кона улель теенза аф вийс коре. Нят аф шава валхт, а афкукс тяфта. И эрь тевсь, конанди  Мастерсь кярьмоди, кода корхнихть мокшень тя велеса, налхкозь налхки кядьсонза.
Аф кунара Мокшень Пишля велень клубть видеса панжевсь «Мастера и рукодельницы» творческяй мастерскойсь. Ламотнень эвондась мяльсна варжамс вийснон кядьтефнень, тяконь лувксса и кодамать (ткачествать) эса. Но тя ремеслась, аф ваномок рамаф од и кунардонь уликс кодамань статтнень лангс, аф эстокиге макссь пря, сяс мес пцтай юкстафоль и аф курокста мувсь ломань, кона шарьхкодель тя тевса.
Фкя шиня Фёдор Иванович Юдин сувась велень клубу, ванозе тостонь музейста кодамань кунардонь  станть, кона кунара ни ащесь пяльксонь пялькс. Тевонь содай мастерсь эстокиге азозе, кодама пялькст аф сатнихть, а кодама уликсне полафтомат ни, сяс мес таштомсть пингть сюнеда. И аф аньцек азозе, кодама пялькст аф сатнихть, а тиезень синь, кандозень клубу и кочказе станть! Тяфта и арась содафокс, што Фёдор Иванович машты кодамань станца работама. Коса и мзярда тонадсь тянди? Валонзон коряс, тя ремеслась ётась теенза бабанц Устиния Павловнань эзда.  А алянц, Иван Афанасьевичень, мархта лама кизода инголе сон кочксесь кодамань стан.
13.08.2020  № 31
 

АНОКЛАВИ памятник Михаил Девятаевонди

Торбеево посёлкать паркса путови бронзаста монумент легендарнай лётчикти, Советскяй Союзонь Геройти Михаил Петрович Девятаевонди.
Михаил Девятаевонди скульптурнай композициянь тиемать коряс 2019 кизонь мартста Мордовиянь Оцюнясь Владимир Волков пшкядсь Российскяй военно-историческяй обществати, кона, кода азондови РВИО-ть официальнай сайтсонза, кирдезе тя мяльть ширенц.
«Культура» национальнай проектть рамкаса РВИО-сь февральста макссь старт Советскяй Союзонь Геройти М.П.Девятаевонди памятниконь инь цебярь проектонь  арьсемать коряс международнай конкурсти. Коронавирусонь пандемиясь сувафтсь кой-кодама полафткст конкурсти итогонь тиемань пингти. Но аф кунара эксперт-тне ванозь максф творческяй заявкатнень и инь цебярькс лувфоль скульпторть Андрей Коробцовонь и архитекторть Константин Фоминонь проектсна.
13.08.2020  № 31
 
 

Торжественнай собраниясЬ лемтьфоль Строителень шити

13.08.2020  № 31
 

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин