Международнай XVIII экспедицияда-фестивальда ингольдень интервью

Тяда башка, Международнай экспедициянь-фестивалень делегациянь члеттне, конатнень ёткса Мордовиянь и Россиянь лия региононь государственнай властень, национальнай общественнай объединениянь представительхть, культурань и искусствань, наукань и литературань, народнай художественнай промыслань и ремеслань деятельхть, а стане жа газетань, телевидениянь и медиосферань лия журналистт, кармайхть работама Международнай форумонь лама лия мероприятияса, конат ётафтовихть теплоходса. Нят—«Мокшэрзянь народсь российскяй социумса: этническяй и гражданскяй эсь прянь марямац» Стратегическяй сессиясь; «Съездть эзда съезду» архивнай документонь выставкась, кона лемтьф Мокшэрзянь (мокшень и эрзянь) народонь Межрегиональнай общественнай организациять VII съездонцты; «Кода сатомс Российскяй Федерациянь Президентонь грант социально-значимай проектонди?» лем ала тренингсь-семинарсь; «Тядянь-алянь кяльсь политкультурнай образовательнай пространстваса» дискуссионнай площадкась; «Мордовия Республикаса «Культура» национальнай проектть эряфс ётафтомац: васенце сатфксне и регионть опытоц» лем ала «круглай шрась»; «Тядянь-алянь кяльса художественнай литературась и СМИ-тне: касомань векторхне» лем ала дискуссиясь и Международнай форумонь лия оцю и ёмла мероприятиятне.

Тяса, койсон, нинге эряви азомс: Международнай XVIII экспедициять-фестивальть делегацияс тядде сувась 90 профессиональнай ломань. И мон надиян: Международнай форумонь сембе тефнень синь тисазь цебярьста и педа-пес экспедициянь-фестивалень «Мокшэрзянь (мокшень и эрзянь) народсь лама национальностень Россиять марстонь культурнай кодса» девизть вешфксонзон коряс.

—Конешна, Международнай XVIII экспедициять-фестивальть цельдонза и задачадонза лама. Но сяка, Анатолий Михайлович, ётксост муви стама, конань квалма и перьфке кармайхть мольфтевома инь оцю корхтаматне Международнай форумса. Койсот, кона темась лиси васенце вастти?

—«Волгась—ялгаксшинь ляй. Волжскяй нароттнень культураснон диалогсна» Международнай XVIII этнокультурнай экспедициять-фестивальть целенза и задачанза, койсон, сатомшка оцюфт и няевикст.

Нят—Российскяй Федерациянь лама национальностень народть этнокультурнай эсь лацонь ширензон ванфтомасна; Российскяй Федерациянь народса гражданскяй марстоньшить и гражданскяй эсь прянь марямать кемокстамасна, этнокультурнай и кялень ламашить ванфтомасна; Россиянь национальнай безопасностень и территориальнай целостностень факторть—марстонь культурнай пространствать ванфтомац; Россиянь нароттнень духовно-нравственнай и культурнай козяшиснон ванфтоманкса и касфтоманкса государственнай властень, местнай самоуправлениянь оргаттнень и гражданскяй обществань институттнень ёткса диалогть виияфтомац; и межнациональнай соткснень гармонизацияснон коряс Мордовия Республикань позитивнай опытть няфтемац.

Кода няйсаськ, сембе ня цельхне и задачатне фкя-фкянди сатомшка малат и фкя-фкянь эса поладыхть. Сяс тяса тейне ули кода азомс: Международнай форумса васенце вастса кармай Россиять ванфтоманц и виияфтоманц квалма темась. Сон, койсон, тяфта жа васенце вастса кармай и Мокшэрзянь (мокшень и эрзянь) народонь Межрегиональнай общественнай организациять VII съездса, кона тяддень октябрьста арьсеви ётафтомс Мордовиять столицаса.

Тя съездть анокламанцты и лац-ряц ётафтоманцты Международнай этнокультурнай экспедицияса-фестивальса стане жа ули лемтьф аф фкя мероприятия. Койсон, съездсь эсь решениянзон вельде сядонга кемокстасыне и виияфнесыне российскяй нациянь нароттнень ёткса межнациональнай, межкультурнай и межрелигиознай соткснень кода Мордовия Республикаса, стане и Россиянь лия региоттнень эса, коса компактнайста эряй мокшетнень и эрзятнень ёткса вятихть работа Межрегиональнай общественнай организациять отделениянза.

—Тонць, Анатолий Михайлович, кодама работа арьсят ётафтомс «Волгась—ялгаксшинь ляй. Волжскяй нароттнень культураснон диалогсна» Международнай XVIII этнокультурнай экспедициять-фестивальть рамкаса?

—Мон анокан работамс Международнай форумонь эрь мероприятияса. Сембода пяк ёран кулемс ломаттнень ширде синь мяльснон-арьсемаснон Мордовия Республикань культурать и национальнай политикать тя пингонь уровеньцнон колга.

Тяда башка, пара улель кулемс ширдест, кода и конашкава, синь мяльснон коряс, Мордовия Республикань Культурань, национальнай политикань и архивнай тевонь министерствати удалась тя пингс ётафтомс эряфс республикаса Российскяй Федерациянь Государственнай культурнай политикань и Государственнай национальнай политикань Стратегиятнень и «Культура» федеральнай национальнай проектть вешфксснон.

Тяфта жа ёран кулемс синь мяльснон сянь колга, конашкава лездыхть тейнек «Акша келу», «Велень озкс» («Раськень озкс»), «Сабантуй», «Славянскяй письменностень и культурань ши», «Шумбрат» Мордовиянь национально-фольклорнай илатнень духовнай потенциалсна республикасонк межкультурнай, межнациональнай и межрелигиознай соткснень кемокстамаса.

Россиянь лия региононь государственнай властень и культурань представительхнень мархта васедемаса, конат кармайхть Международнай форумса, мон ёран шарьхкодемс, кодама вастса эсь потенциалснон коряс тячи ащихть Мордовия Республикань культурась и национальнай политикась Приволжскяй федеральнай округса и марнек Россияса!

И, тяда башка, Международнай форумса ётафтан «Событийнай мероприятиятнень вельде национальнай культурать касфтомац. Национальнай творческяй коллектифне: тиемасна, касфтомасна и виияфтомасна» лем ала «круглай шра». Надиян: пингстонза мон тяфта жа кулян сатомшка лама од мяльда-арьсемада, конат тейнек лездыхть кеподемс Мордовиянь культурать и национальнай политикать од и няевикс уровеньц.

—«Удалаза сембе арьсефонте, Анатолий Михайлович.

—Сюкпря!

                                                                                                     В.НЕСТЕРОВ.