Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Юмор и сатира

СЯПИ КУЯРХТ

Содаса: эрь илядня сон срхкси ялганзон мархта перетнень ланга. Весть шоподемшовор Атаманць эсь кудснон инголе цёра шабатнень кучкаса кевс шовсезе эсь пееленц. Мон шаштонь теенза, а эсь пачкан арьсян: кода тямань эвфне, кода тямань пикса—аф аварьгодан. Пади, эста шарьхкодьсы: монга аф прокс ни ёмланян и, пади, тисамань ялгакс.

 

Тетькине сельмонень Атаманть лангс. Сон тянь няезе, яфодезень фталу вестьке апак сеентть шяярензон, кеподезе прянц:

 

—Местема сать, очка пеке?

 

—Сявомак куяронь салама.

 

—Ха-ха-ха!—рангстасть ялганза.

 

—Мезе, мезе?—Атаманць стясь, и мон маряйне, кода шапаксокс ляпе пекоц токась мяштезон.

 

—Куяронь... салама,—трнатозь мторгодонь мон, но эстокиге фатянь, што пелемати пря максомс аф эряви. И кеме вайгяльса поладыне:

 

—Мон кодамовок пиненди аф сатован.

 

—Ха-ха-ха!—рангстадсть лядыхне.

 

Атаманць уфазе пееленц лангста пульть, и мон маряйне, кода кядьлапшец токась сивозон, кемоста курмоштась. Эстокиге мон кеподень вяри и кожфса либорьфтине пильгонень.

 

—Молят куяронь салама?!—Атаманць токафтозе пееленц улозти.

 

—Молян.

 

Сяльде валомне нолдамань. Мзярда пильгоне токасть модати, шарфтсь ялганзонды и мярьгсь:

 

—Ну, кода, сявсаськ мархтонк?

 

Тонат мезевок ашесть аза—учсть, улема, мезе мярьги сонць Атаманць.

 

И вов сась весь. Шобда-шобда. Менельсь туцяв. Аш тяштть, аш ков. Минь салаване мольхтяма модамарень уматнень туркс. Косот ина  куяронь паньттне? И вдруг...—ав-ав!—увазевсь ёфси вакссонк пине.

 

—Тят пеле!—кяжиста тошкась Атаманць.—Тя аф видексонь пине. Физикань учительть Матвей Ивановичень кошкасонза магнитофон. Сон и «увай».

 

Ванонь Атаманть лангс и дивандань: ули асувоц саламань тевти, тяфтамть мархта аф юмат.

 

А сон стаки вятемазь инголи. Ётнеме кумбарав, палакс потмова... И... вагот синь—паньт-тне. Сембе эряскодозь ушедоме вешендема куярхт. Ялгане повснон, зепснон пяшкодезь ни, а мон мунь фкя кичкор куярня, сусконь эздонза—сяпи-сяпи.

 

—Тон кеворезь вешентть, варсиень курга,—пшкядсь тейне Атаманць, и сонць мадсь пандть туркс. Ряцок ащи пандть туркс мадонь монга и ну кеворемс. Оп! Копорезень ала калгода поколь. Навайне кядезень—куяр! Да конашка! Сяльде муйне омбоцеть, колмоцеть...

 

—Тяни сязендьсаськ сембе кодоркснень,—кулевсь Атаманть кжнамац.

 

Курок пересь арась тингокс. Сяльде фкя-фкянь мельге полгонякс туме сяка киганк. Атаманць сюдерязе прязень, шнась эсон: «Молодецат! Фалу карман сявондемот мархтон». Тейне сяда оцю казне афи эрявсь.

 

Куду мрдань пяле веда меле. Салаване ётань мргав, муйне койказень и кеняртьф седихть мадонь.

 

Шобдава сргозьфтемань щавазень сюцемань-сюдыень вайгялец.

 

—Вай, прахсь сяволезень! Кодама шяйтатт вень-вень бралгихть перетнень ланга! Куяр панденяньконди кодоркстка ашесть када.

 

Мон комотень вастстон. Шарьхкодень: Атаманць сявондемазь эсь перезонк. И лядьсь мялезон валмуворкссь: «Тят шува лотка лиятненди, тонць эзонза ваят».

 

 

                                                                                             Михаил Моисеев.

 


18.07.2019 №28
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин