Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Рузаевский район: высокоскоростной интернет в каждую школу

МОРДОВИЯНЬ ТЕХНОПАРКТь юбилеец

Кода азозе Мордовиянь Оцюнясь В.Д.Волков, решениясь панжемс Мордовияса технопарк примафоль РФ-нь Президентть В.В.Путинонь мархта, кона ся пингть ульсь Российскяй Правительствати Председателькс. Тячи, 10 кизонь ётазь, ули кода азомс, што технопарксь занци оцю васта региональнай экономикать вииякшнемань инновационнай ки лангс лисемасонза. Вете кизода инголе шумордавсь сонь базовай инфраструктуранц пуроптомац. Тя пингста колмонь-крда кассь компаниятнень-резиденттнень лувкссна. Тячи тя 128 компания, конат ётафнихть эряфс 350-да лама проект. Вете кизоста синь мисть 12 миллиардта лама цалковаень питнеса продукция. Аньцек меля технопарконь резиденттне нолдасть тевс 2,5 миллиардта лама цалковаень лувксса инвестицият. Ня средстватнень пцтай нилецекс пялькссна нолдафт научнай исследованиянь ётафтоманкса и разработкань тиеманкса.

Россиянь технопаркнень Национальнай IV рейтингснон итогонзон коряс, 150-да лама участникть ёткста Мордовиянь Технопарксь сувась колма инь виихнень ёткс.

Республикань Оцюнять валонзон коряс, «Технопарк Мордовии» АУ-ть работаса башка мяль шарфтф волоконнай оптикати и оптоэлектроникати. В.Д.Волков лятфтазе, што ниле кизода инголе Саранскяйса панчфоль оптическяй волокнать производстванц коряс Россияса васенце заводсь. Строяви заводть омбоце очередец, коса кармайхть нолявома преформат. Мордовиянь Технопарксь ведущай научнай центратнень мархта сотрудничендазь работай высокочистай кварцевай материалонь производствань технологиять лангса. Мзярс синь эсост вешфкссь пяшкотькшневи аньцек импортть вельде.

Стане жа технопаркть территорияса тифт сембе условиятне, штоба аноклакшнемс проектт, конат нолявихть тевс электроннай приборостроениянь, светотехникань, биотехнологиянь и информационнай материалонь отраслятнень эса.

Кода азозе региононь вятись, мекольдень вете кизотнень Мордовиянь Технопаркса панчф пцтай тёжянь рабочай васта, а сембоц компаниятнень-резиденттнень эса трудендай 2 тёжяньда лама ломань. Ламошкасна стирьхть-цёрат.

—Афоль уле технопарксь, сембе синь кунара ни тульхть Москуву,—мярьгсь В.Д.Волков.—Но тяни минь няйсаськ, кода асу од ломаненьке, аделамок тонафнемаснон странань ведущай вуснень эса, мртцихть работама технопарку. Минь сяда товга карматама панчсема од рабочай вастт.

Тяда меле Мордовиянь Оцюнясь государственнай оцю казнеса казезень технопарконь инь цебярь сотрудникнень и сембонь сятнень, кие эрь шинь трудонц мархта путни оцю путкс технопаркть виияфнеманцты и лезни Мордовияти арамс конкуренциянь кирди инновационнай регионкс.

О.ЕВДОКИМОВА.


05.09.2019 №35
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин