Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Закон и порядок

Сон цебярь пример лиятненди

Седиень ацергофты случайсь лиссь Саранскяйса 19 августста. Обедта меле дежурнай частти гайфтсть Севостопольскяй ульцяста и пачфтезь, што фкя квартирань эряйсь гразяй ердамс вальмава атнай шабанянц. Правоохранительнай органонь и МЧС-нь сотрудникне эстокиге срхкасть ЧП-нь вастти.

Пачкодемок кудть малас, няезь панжада вальмаса ащи алять. Сон ульсь верботмоса, фкя кядьсонза кирдсь пеель, а омбоцеса—вете ковняса стирнянц. «Ердаса алу!»—гразясь афтерькссь.

Полицейскяйхне эстокиге примасть решения аф юмафнемс пингть шавос, мезеньге лангс апак ватт повомс квартирать потмос и араламс шабанять. Сафоль мяльс тиемс тянь шабратнень балконцнон эзга.

Васенцекс эцесь участковайсь В.А.Мартынов. Тя ульсь пелькстонга пелькс аськолкс. Колмоце этажень сереса карнизть лангса пильгосур вельде ащезь полициянь сотрудниксь тяряфнесь сетьмофтемс пяляскотф алять, но тонац аньцек сядонга пяк кяжиякшнесь. Алясь яфиесь полицейскяйть инголе пеельса, меле латцезе оржанц шабанять кргас, а тоса тага тяряфнесь керомс участковайть. Но полициянь од сотрудниксь, аф пелемок эсь эряфонц инкса, ашезь пота фталу. Мзярда алять кядьста апак учентт прась пеельсь, участковайсь толхмадезе сонь квартирать потмос и эцесь мельганза. Преступниксь киртьфоль.

Саранскяйста полицейскяйть героень тевонц колга курокста содафоль аф аньцек ошса и марнек республикаса, но и странать келес и нльне омба масторсовок. Тяфта, АВС World News американскяй телеканалсь няфтсь участковайть Василий Мартыновонь колга сюжет. Телеканалть официальнай группасонза США-нь эряйхне тяштсть: «Рузонь афкуксонь герой! Спасиба, тейть!», «Слава спасательхненди!» и стак тов.

Мордовия Республикань Оцюнясь В.Д.Волков, содамок полициянь сотрудникть героическяй подвигонц колга, эстокиге примась решения каземс сонь государственнай оцю казнеса. Служебнай и гражданскяй долгть пяшкодемста мужествань няфтеманкса и сембе виень путоманкса В.А.Мартынов казьф Славань III степенень орденца.

Сонць Василий Александрович прянц геройкс аф лувондсы. Мон, кле, тиине эсь работазень и сембе.

Арамс полицейскяйкс В.А.Мартынов арьсекшнесь ет шабакс. Кода азозе сонць, мялецоль фалу лезнемс ломаттненди, тиендемс пара тефт.

Шачсь-кассь сай пингонь геройсь Саранскяйса, простой рабочаень семьяса. Аляц, Александр Дмитриевич, покоди газоэлектросварщикокс, тядяц, Любовь Васильевна, тяниень пингть кудазорава. Василиень ули сазороц. Кода лятфнесазь родителенза, Василий шабакс мзярдовок ашезь сувсе тюрибокшнень лувксс, ульсь сетьме, ялгаксшинь кельги церанякс, аралакшнезень корязонза емлатнень, кда сятнень кивок обжакшнезень. Тяфтамкс сон лядсь тячемс, кельгсы видешить и мезьдовок аф пели.

Саранск ошень 2№ школать аделамда меле Василий Мартынов поступась тонафнема Н.П.Огаревонь лемса Мордовскяй госуниверситетонь Механикань и энергетикань институту «Защита в чрезвычайных ситуациях» направленияс коре.

—Церась сон пяк ответственнай,—азозе тонафтыец доцентсь Н.А.Миньков.—Васенце курста меле ни тусь армияв, а меле поладозе тонафнеманц сяда тов. Тонафни ялганзон еткса фалу шарфтсь эсь лангозонза мяль кеме характеронц мархта. Василий фалу сатнезе сянь, мезень колга арьсекшнесь.

Университетть В.Мартынов аделазе аньцек ветес. 2016 кизоста сявомок работай полициянь уполномоченнай участковайкс, МР-ть эзга МВД-нь Управлениянь 1№ отделенияса. Октябрьскяй райононь ламоц эряйхненди сон лац содаф, колганза азонкшнихть аньцек пара валхт.

Эсь подвигонц колга (а лиякс тянь аф лемдьсак) участковайсь В.А.Мартынов азонкшнемс аф кельгсы и, кода ни азоськ, геройкс прянц аф лувондсы. «Тейне ашель кода тиемс лиякс. Монь и сазорозень тяфта воспитандамазь родителеньке»,—мярьгсь сон.

Сонцень Мартыновонь иденза мзярс аш. Но инголенди содаф, мзярда синь шачихть, алясна теест арай примеронь сявома вастокс.

О.Евдокимова.


Саранскяень участковайсь В.А.Мартынов няфтсь оцю героизма атнай шабанять араламста
05.09.2019 №35
 
 
 

 
НОВОСТИ

Синь арьсесть народоньконь сай пингонц колга

13.08.2020  № 31
 

«Сурский рубеж» фестивалень конкурсс максф 250-да лама заявка

Шумордавсь «Сурский рубеж» патриотическяй моронь фестивалень конкурсс заявкатнень примамасна. Мордовиянь сембе райоттнень эзда и Чувашия Республикаста максф 250-да  лама заявка. Кеняртьфти ся, што конкурсанттнень ёткса улихть и вете кизоса шабат, и 80 кизода сире ветератт. Сембе моротнень эса, конатнень синь морасазь, шарьхкотькшневи странаньконь, сяськоманьконь инкса гордостень марямасна!
«Сурский рубеж» проектсь—гражданскяй обществать виияфнеманкса водендаф Президентскяй грантонь фондть 2020 кизонь васенце этапонц панжада конкурсонь сяськись. Тя военно-патриотическяй моронь фестиваль, кона ётафтови 1941-1945 кизотнень Великай Отечественнай войнаса советскяй народть Сяськоманц 75 кизонь топодеманц и 1939-1945 кизотнень омбоце мировой войнать шумордаманц праздновандамаснон мяльса кирдезь. Водендаф фестивальсь Мордовиянь ломаттнень оцю подвигснон колга историческяй мялямть ванфтоманкса.
13.08.2020  № 31
 

Е.С.Кирдяпина:«Мзярс ванфтови кяленьке, снярс кармай эряма нацияньке»

Ивановка велеса героиняньке шумордазе начальнай школать, а меле содамошит пуропнесь Морд-Полянаса. Школаса Ленась тонафнесь  лац. Пяк кельгозень мокшень кялень и литературань урокнень. «Литературань учителеньке най путнелезе Ленать тейнек примеркс,—лятфнесы Кирдяпинать фкя класса тонафни ялгац Е.И.Чекмарёва.—Урокнень пингста минь сембе старандаме лац-ряц азомс лувфть, максомс характеристика геройхненди, и сембоса кати-мезе ашезь сатне. Тяса терневсь доскати Ленась. Азы фкя вал, и марнек шарьхкотьф, сембось кода эряви. И эзк Нина Павловнаньке юватькшнель: «Молодецат, Лена!».
Нинге шабакс Е.С.Кирдяпинать салселезе мяленц учителень тевсь. Сяс школать шумордамда меле мялецоль тонафнемс тя профессияти. Но вов коса прябалась: сянкса, штоба тумс тонафнема Саранскяи, эрявсть ярмакт, а коста синь сявомс? Эста од стирсь, аньцек получазе аттестатть, лиссь работама. Киза покодсь Зубуса ламповай заводса, кочкась ярмаконя и сембе сяка пяшкодезе мяленц—поступась тонафнема Н.П.Огарёвонь лемса МГУ-нь филологическяй факультету.
13.08.2020  № 31
 

Аш стама тев, кона улель теенза аф вийс коре

Мзярда сань мяльс тяштемс Рузаевскяй райононь Мокшень Пишля велень эряйть, зрнянь кядь алять Фёдор Иванович Юдинонь колга, абондонь, сяс мес ашине сода мезьста ушедомс. Фёдор Иванович канневи стама ломаттненди, конат маштсазь семботь. Аш стама тев, кона улель теенза аф вийс коре. Нят аф шава валхт, а афкукс тяфта. И эрь тевсь, конанди  Мастерсь кярьмоди, кода корхнихть мокшень тя велеса, налхкозь налхки кядьсонза.
Аф кунара Мокшень Пишля велень клубть видеса панжевсь «Мастера и рукодельницы» творческяй мастерскойсь. Ламотнень эвондась мяльсна варжамс вийснон кядьтефнень, тяконь лувксса и кодамать (ткачествать) эса. Но тя ремеслась, аф ваномок рамаф од и кунардонь уликс кодамань статтнень лангс, аф эстокиге макссь пря, сяс мес пцтай юкстафоль и аф курокста мувсь ломань, кона шарьхкодель тя тевса.
Фкя шиня Фёдор Иванович Юдин сувась велень клубу, ванозе тостонь музейста кодамань кунардонь  станть, кона кунара ни ащесь пяльксонь пялькс. Тевонь содай мастерсь эстокиге азозе, кодама пялькст аф сатнихть, а кодама уликсне полафтомат ни, сяс мес таштомсть пингть сюнеда. И аф аньцек азозе, кодама пялькст аф сатнихть, а тиезень синь, кандозень клубу и кочказе станть! Тяфта и арась содафокс, што Фёдор Иванович машты кодамань станца работама. Коса и мзярда тонадсь тянди? Валонзон коряс, тя ремеслась ётась теенза бабанц Устиния Павловнань эзда.  А алянц, Иван Афанасьевичень, мархта лама кизода инголе сон кочксесь кодамань стан.
13.08.2020  № 31
 

АНОКЛАВИ памятник Михаил Девятаевонди

Торбеево посёлкать паркса путови бронзаста монумент легендарнай лётчикти, Советскяй Союзонь Геройти Михаил Петрович Девятаевонди.
Михаил Девятаевонди скульптурнай композициянь тиемать коряс 2019 кизонь мартста Мордовиянь Оцюнясь Владимир Волков пшкядсь Российскяй военно-историческяй обществати, кона, кода азондови РВИО-ть официальнай сайтсонза, кирдезе тя мяльть ширенц.
«Культура» национальнай проектть рамкаса РВИО-сь февральста макссь старт Советскяй Союзонь Геройти М.П.Девятаевонди памятниконь инь цебярь проектонь  арьсемать коряс международнай конкурсти. Коронавирусонь пандемиясь сувафтсь кой-кодама полафткст конкурсти итогонь тиемань пингти. Но аф кунара эксперт-тне ванозь максф творческяй заявкатнень и инь цебярькс лувфоль скульпторть Андрей Коробцовонь и архитекторть Константин Фоминонь проектсна.
13.08.2020  № 31
 
 

Торжественнай собраниясЬ лемтьфоль Строителень шити

13.08.2020  № 31
 

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин