Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Мокшень щамса и илас, и работама

Мордовияса эряйхне тонадсть тя мазышити и лияста бта афи приметнесазь сонь. Аф сидеста тяни аватнень гардеробса васьфтят мокшень щам. Ужяль, мес ламонцне ёткстонк тяниень пингть лувондсазь сембе национальнайть велень культуракс, эряфкшу ломанень койкс.

Мезе, шта, арьсихть ошеряйхне, кда няихть ошень ульцяса мокшень щамса наряжаф ломань? Сонь, улема, лувсазь артистокс, кона кодама-бди туфталонкса лядсь эсь ансамбленц эзда или, шять, сон срхкась мокшэрзянь кодама-бди мероприятияс, илас. Но киндинге мяльс аф сай, што тя ломанць тяфта срхкась, кепотьксонди, парку ваймама, кинос или работама васту. Тяниень пингонь ломаттненди национальнай костюмсь шарьхкодеви кода щамбяль, кона щашендови аньцек илас, сцена лангс, или ёфси кода сувенир—тядянь-бабань колга лятфнембяль.

И тя шарьхкотьф мес. Ингольдень пинкнень ломаттнень ульсть илань и эрь шинь национальнай щамсна. Эрь шинь щамса ульсь тёждя тиендемс кудъётконь тефнень. Панархне, сарафаттне сташендовсть келиста, сяс ладяльхть эрь кодама ронгонди, а стане жа пеки аватненди.

Тяни эряфсь ламода полафтсь. Лавкатне пяшксет эрь кодама щамса, коса шоряфт масторлангонь сембе культуратне. Ломаттне вешихть сембе ширде удалаф щапт. Тяка пингть, кода минь афолеме ёра, щамонь кочкамаса оцю васта занци модать мельге панемась.

Лятфтаса, мзярда улендень Финляндияса, Эстонияса, Швецияса ошень ульцятнень эса ламоксть васьфнень тоса эряй стирьхть-ават, конатнень пряс, кргас сотфт Россиянь павловопосадскяй панчфу руцят. Синь тяфта якасть аф сяс, мес палсть кельгомаса минь мастороньконди, а сяс, мес тя мазы, а васендакиге модна.

Ули тяфтама художественнай стиль, лемоц сонь этника, мзярда щамса, мазоптомбяльса, кудботмоса, музыкаса нолявихть тевс кодама-бди народонь мотифне, элементтне. Тя направлениясь сембе пинкнень ульсь мялень салайкс.

Аф кунара содафтонь мокшень стирь мархта, кона стакшни мокшэрзянь национальнай стильса эрь шинь щапт, тиенди мазоптомбяльхть

Екатерина Обайкинась шачсь-кассь Москуса, теенза 20 киза. Тядянза-алянза шачемас коре Ковылкинскяй райононь Сире Сазан велеста. Стирсь аделазе В.Г.Плехановонь лемса РЭУ-ть видеса Московскяй промышленно-экономическяй колледжть. Специальностьс коре сон дизайнер. Дипломнай работакс Екатерина кочказе эстеенза этника стильть, стамок мокшэрзянь орнамент мархта спортивнай костюм. Тяда меле ушедсь сташендома платьят, костюпт, футболкат, конатнень мазоптоманкса нолязе тевс мокшэрзянь сёрматфксть.

Тядде Екатерина Обайкинась примась участия «Шумбрат» мокшэрзянь национальнай иласа, кона ётась июньцта Москуса. Тоса сон няфнезень-мишендезень ня щапнень. Тянкса получась «Мордовское землячество» Межрегиональнай общественнай организациять эзда благодарность. Стане жа сон примась участия «Эрзянь Лисьмапря» мокшэрзянь национальнай культурань IX Межрегиональнай фестивальса и «Раськень Озкс» национально-фольклорнай праздникса. Екатеринать валонзон коряс, самай ня мероприятиятнень эса васенцеда кемокставсь практикаса мялец стакшнемс и мишендемс стак шинь щапт мокшэрзянь мотивса.

Вов кода сонць Екатерина Обайкинась азонды эсь тевонц колга.

—Мон пяк кельгсайне мокшень щапнень. Лувонь колгаст лама литературада, улендень музейхнень эса, ванондыне кунардонь пингонь щапнень. Мокшень велеса содафнень тяниень пингонь национальнай костюмть мархта. Тя темась тейне пяк мала. Национальнай щамсь—тя народть культурац, историяц, эсь лацонь ширец, козяшиц. Тянь вельде кирдеви атянь-атяньконь мархта соткссь, вельденза няфтеви эрь кодама народностти кандовомась. Пичедян, мес тяниень пингть масторлангста юмсихть ламоц нароттне. Мон эрян оцю ошса, коса марс шоряфт лама национальностень культуратне и штоба аф «юмамс» ётксост, аф юкстамс эсь юрнень и кода-бди няфтемс эсь лацонь ширезень, мон каннян монць и сташендан лиятненди щапт, конатненди сувафнян мокшэрзянь культураста элементт.

Сидеста оцю ошса и омба масторса улемста, работама и ваймама вастса, спортса и стак тов ломаттнень ули мяльсна китькстамс эсь национальностьснон, но национальнай щамса тяни кивок аф якай. Сяс мон партнернень мархта арьсеме «ЭТНЕТИКА» бренд, коса стак шинь щапне (футболкатне, толстовкатне, бейсболкатне) стафт мокшэрзянь сёрматфксть тевс нолдазь. Национальнай мероприятияса участвовандамда меле шарьхкодевсь, конашкава эрек интерессь этническяй стильти. Койсон, тя направлениять ули сай пингоц. Сяс мялезе лац шумордамс университетть, панжемс Саранскяйса и Москуса «ЭТНЕТИКА» щамонь лавкат, арамс содаф дизайнеркс, примсемс участия щамонь няфтематнень эса.

Удалаза кице, Екатерина, ётафтовост эряфс сембе пара мяльхне-арьсематне.
Т.ПЕТРОВА.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022