Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Национальная тематика

Панжеви театральнай од сезонць

—Светлана Ивановна, а мес именна тя спектакльса театрась панчсы Театральнай од сезононц?

 

—«Стакшинь история» спектакльсь, конань драматургть М.Ладонь лирическяй притчанц коряс путозе Россиянь содаф режиссёрсь Юрий Хвостиков, азонды эряфть колга. Ся эряфть квалма, конаса эряйхть велеса простой ломаттне. И конат, кажнайсь эсь лацонза, шарьхкодьсазь, мезе стамсь павазсь, и синць кочксесазь пялонза вяти китнень.

 

Эсь ширденк минь тиеськ семботь зрительти театральнай афкуксонь илань тиеманкса и няфтеманкса. Надиян: ломаттне, кит рамазь тя спектакльс сембе билеттнень, ваномок сонь, пади, аф васенцеда ни, муйхть ответт эряфонь од кизефкснень лангс.

 

Тяфта жа надиян, што зрительть мяльс туй «Ромео и Джульетта» трагедиясь, конань премьерац национальнай театраса ётай 26 октябрьста. Сонь путозе У.Шекспиронь произведениянц коряс Санкт-Петербургонь содаф режиссёрсь Алексей Истомин, конанди лездсть сценографсь Елисей Шепелев и хореографсь Максим Похомов. Спектакльса заняфт национальнай театрань сембе актёрхне. Главнай рольхнень налхксазь Евгения Панькина (Джульеттась) и Александр Батыров (Ромеось).

 

Спектакльти аноклафт мазы декорацият, стафт итальянскяй кунардонь пингонь костюпт, сёрматф-ладяф музыкальнай цебярь оформления.

 

Лиякс мярьгомс, национальнай драматическяй театрань коллективсь тиезе семботь Театральнай од сезонть мазыста панжеманкса. Надиян, минь спектакляньке туйхть зрительть мяльс, и сон фалу кармай сашендома театразонк.

 

—Кодама од спектакльса кеняртьфтьсы эсь зрителенц Театральнай тяддень сезонцта Мордовиянь национальнай драматическяй театрась?

 

—Аф кунара театраньке сатсь Российскяй Федерациянь Культурань министерствань грант—3600000 цалковай. Ня ярмакнень эзда республикань содаф драматургть В.Мишанинать «Куйгорож» пьесанц коряс национальнай театрать сценанц лангса путови од спектакль. Постановкать путсы Российскяй Федерациянь искусствань Заслуженнай деятельсь Борис Манджиев. Тя режиссёрсь минь зрителеньконди содаф «Шумбрат, Сганарель» и лия спектакльхнень коряс, конатнень сон путозень национальнай театрать сценанц лангса.

 

«Куйгорож» спектакльсь арьсеви няфтемс зрительти тяддень 7-8 ноябрьста. Надиян, сон туй зрительть мяльс аф аньцек сяс, мес «Куйгорожсь» сёрматф и путф мокшэрзянь мифологиянь обраснень коряс, но и мес эсонза азондови тя пингонь прябалатнень квалма. Спектакльса кармайхть налхкома театрань сембе актёрхне и актрисатне, конат улихть  щафт  мокшэрзянь кунардонь пингонь щамбяльса. Тяда башка, спектакльти тифт мазы декорацият, миллионда лама цалковайда театрань сценати рамави специальнай техника, кона эсь эффектонзон вельде аф аньцек мазоптьсы спектакльть, но и тёждяста сувафтсы зрительть фольклорнай и тячиень пингть крхкалмос.

 

Но мекольце валть «Куйгорож» спектакльть и сонь премьеранц колга, конешна, азсы зрительсь.

 

—Светлана Ивановна, театральнай тяддень сезонцта коза ёратада молемс гастрольс? И кодама фестивальса арьсетяда няфтемс национальнай театрань спектакльхнень мазышиснон?

 

—Тяддень ноябрьста минь мольхтяма гастрольс Самарскяй области. Кода содаф, тя областьса компактнайста эряйхть мокшэрзят, конат фалу учсихть национальнай театрать эса. Теест минь няфтьсаськ «Стакшинь история», «Курмай» и лия спектакльхнень, конатнень кельгсазь республикань зрительхне. Надиян, синь туйхть Самарскяй областень, а тяда меле—Ивановскяй областень зрительхнень мяльс, коза минь тяфта жа мольхтяма гастрольс ноябрь ковста.

 

Тяни фестивальхнень колга. 10 ноябрьста Москуса Мордовиянь национальнай драматическяй театрась Этническяй театрань Всероссийскяй фестивальса няфтьсы «Ташта койса» спектакльть, конань мокшэрзянь драматургть Ксения Петровать пьесанц коряс путозе Россиянь содаф режиссёрсь Андрей Ермолин.

 

Сяльде 13 ноябрьста минь карматама работама «Балтийский дом» фестивальса, кона ётафтови Крым Республикань Ялта ошса. Тоса минь няфтьсаськ «Тундань шадоветть» спектакльть.

 

17 ноябрьста Чувашия Республикать столицаса ётафтови Национальнай театрань фестиваль. Тоса минь няфтьсаськ «Курмай» музыкальнай ёфксть. Тяфтамот тя фестивальть вешфксонза.

 

Но васенце вастти ня фестивальхнень ёткста минь, конешна, путнесаськ «Штатол» Всероссийскяй фестивальть, кона ётай Мордовиять столицаса 16-20 октябрьста Мордовиянь национальнай драматическяй театрать сценанц лангса.

 

—Удалаза сембе арьсефонте.

 

—Сюкпря!

 

В.НЕСТЕРОВ.

 


26.09.2019 №38
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин