Съездта ингольдень интервью

14 сентябрьста Мордовиять столицаса келиста и мазыста ётась «Шумбрат» Республиканскяй национально-фольклорнай илась. Эсонза, республикань эряйда башка, тяфта жа ульсть инжихть Россиянь лия региоттнень эзда, коса компактнайста эряйхть мокшет и эрзят.

Синь эздост фкясь—Саратовскяй областень «Шумбрат» мокшэрзянь национально-культурнай центрать председателец В.И.Кривошеева макссь отвечась корреспондентоньконь кизефксонзон лангс.

—Валентина Ивановна, кодама кизефкст ёрат кеподемс Мордовскяй (мокшень и эрзянь) Межрегиональнай общественнай организациять Всероссийскяй VII съездса?

—Васенцекс, конешна, съездса мон карман корхтама мокшэрзянь национальнай культурать и кяльхнень ванфтомаснон-виияфтомаснон квалма Российскяй Федерациянь ся региоттнень эса, коса компактнайста эряйхть мокшет и эрзят. Кода содаф: эрь тяфтама регионца улихть мокшэрзянь региональнай, ошень или районнай общественнай организацият, конат эсь вийснон коряс тиендьсазь ня тефнень. Но синь руководительснонды, конат эсь профессияснон коряс аф фалу филолокт или культурань работникт, Мокшэрзянь Межрегиональнай общественнай организацияти эряви макссемс методическяй лезкс.

Лиякс мярьгомс, кизоти весть-кафксть Мордовиять столицаса Россиянь лия региононь мокшэрзянь общественнай организациянь руководительхненди эряви ётафнемс семинархт или конференцият. Пингстост республикань национальнай культурань и образованиянь представительхне азондольхть тейнек, кода сяда цебярьста ладямс тефнень минь регионцонк мокшэрзянь национальнай культурать и кяльхнень ванфтомаса и виияфтомаса. Тяда башка, ня тефнень вятемаснон коряс, койсон, тейнек тяфта жа эрявихть методическяй рекомендацият и лия эрявикс пособият и литература.

Тяда башка, тейнек, конат вятьсазь мокшетнень и эрзятнень ёткса национальнай работать Россиянь лия региоттнень эса, эряви содамс, кода и кодама тефт тиихть мокшэрзянь общественнай организациятне странань тя или тона субъектса. Тянь тейнек ули кода тиемс аньцек мокшэрзянь национальнай газетатнень, журналхнень и телевидениять вельде.

Кепотьксонди, Саратовскяй областень Мокшэрзянь «Шумбрат» национально-культурнай центрать тяфтама работамань опытоц ули ни. Мярьктяма, сатомшка кунара ни «Мокшень правда» газетать и Саратовскяй областень «Шумбрат» центрать ёткса ладявсть цебярь соткст. Минь кучсетяма газетав работаньконь колга информацият, конат тяда меле лисендихть «Мокшень правдаса». Сяс тейне ули кода азомс: «Шумбрат» центрать тевонзон колга тячи цебярьста содайхть сембе мокшетне, кода Мордовияса, стане и Россиянь лия региоттнень эса, коза пачкотькшни «Мокшень правда» газетась.

Лиякс мярьгомс, сась пинге, мзярда мокшэрзянь национальнай общественнай организациятненди, конат мольфтьсазь тевснон Россиянь лия региоттнень эса, эряви сяда келиста нолямс тевс Мордовиянь национальнай газетатнень, журналхнень и телевидениять оцюдонга оцю потенциалснон. И, конешна, национальнай общественнай организациятненди тяфта жа сяда сидеста эрявихть нолямс тевс интернетть ресурсонза.

—Валентина Ивановна, кода Россиянь лия регионца эряй мокшаванди, мезсь тушенды мялезт «Мокшень правда» газетать лопанянзон лангса?

—Саратовскяй областень Мокшэрзянь «Шумбрат» национально-культурнай центрась аф фкя киза ни сёрматфнесы «Мокшень правда» газетать, кона тейнек арась инь кельговикс изданиякс. Сонь материалонзон эзда минь содасаськ, кода эряйхть Мордовиясь и мокшэрзянь народсь, кода республикаса, стане и Россиянь лия региоттнень эса, коса компактнайста эряйхть мокшэрзянь народонь оцю анклафт.

Тяда башка, фалу шарфнесазь минь ванфоньконь эсь лангозост статьятне, конатнень эса азондови национальнай илатнень, фестивальхнень, экспедициятнень и национальнай культурань лия оцю и ёмла мероприятиятнень квалма. Мянь анекдоттневок, конат печатлакшневихть газетать мекольце лопанянц лангса, аф азовомшка тушендыхть мялезонк. Ламотне эздонк синь лувомстост рахайхть мянь сельмоведьс.

Сяс съездса мон ёран серьгядемс сембе мокшетнень, аф ваномок сянь лангс, Росссиянь кодама регионца синь эряйхть, сёрматфтомс эстеест «Мокшень правда» газета. Сяс мес, васенцекс, самай  «Мокшень правдать» оцю путксоц мокшень кяльть ванфтомаса-виияфтомаса, пачфни-азонды лувиензонды мокшэрзянь кунардонь и тяниень пингонь культурать, литературать, наукать сатфксснон колга. И, конешна, пуропты марс мокшэрзянь народть эса, тонафтомок эсонза эрямс российскяй нациянь лия нароттнень мархта ялгаксшинь койхнень коряс марстонь эряфса!

—Мезсь тусь мялезт, Валентина Ивановна, «Шумбрат» Республиканскяй национально-фольклорнай иласа?

—Илась ётафтовсь келиста и мазыста. Эсонза маштозь няфтьфт минь мокшэрзянь национальнай культураньконь сембе мазышинза. Эсонза ламоль ломаньда, конат састь илас Мордовиять столицаста, райононзон эзда и Россиянь лия лама регионцта, коса компактнайста эряйхть мокшэрзят.

Тяда инголе тейне сашендовсь няендемс тяка лем ала мокшэрзянь национально-фольклорнай илат Ульяновскяйса, Чувашия Республикаса, Москуса и лия вастса. Но тяфтама афкуксонь мокшэрзянь национально-фольклорнай «Шумбрат» ила мон няень васенцеда!

Тяда башка, койсон, Мордовияса ётафтф илась арась цебярь казнекс Россиянь сембе мокшэрзятненди Мордовскяй (мокшень и эрзянь) Межрегиональнай общественнай организациять Всероссийскяй VII съездтонза инголе. Сон няфтезе тейнек, сембода пяк Россиянь лия региоттнень эса эряй мокшэрзятненди, кода эряви ванфнемс и виияфнемс мокшэрзянь национальнай культурать, койхнень и кяльхнень.

Сяс Саратову мрдамдон меле мон сяда келиста азондан тостонь мокшэрзятненди, конатнень лувкссна областьса 10000-да лама, Мордовиянь «Шумбрат» илать квалма. А тяда меле ни минь карматама аноклама Саратовскяй областень мокшэрзятнень «Шумбрат» иласнонды.

Минь тердьсаськ Россиянь сембе мокшетнень и эрзятнень. Надиян: сай кизонь июньцта-августста минь ётафтсаськ Саратовскяй областень «Шумбрат» мокшэрзянь национально-фольклорнай илать!

—Удалаза, Валентина Ивановна, арьсефонте.

—Сюкпря. Минь карматама старандама!

В.НЕСТЕРОВ.