Поиск по сайту: 
 

Архив
 март 
 2020 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Наши мокшанские сыновья и дочери

ВАЛОЦ ТОКАЙ СЕДИ И ЭЖДИ ВАЙМЕ

Николай Петрович Циликин шачсь 1954 кизоня Краснослободскяй райононь Зайця велеса. Тядянза-алянза—колхозниктольхть. Тядяц, Татьяна Ивановна Циликина,  шачфтсь-касфтсь вете итть: кафта стирьхть и колма цёрат. Идень ваннемада башка, кода велень сембе аватне, якась колхозонь тевонь тиема. Пенсияс тумдонза мелевок нинге лама киза покодсь колхозса, теенза максфоль трудонь ветеран почётнай лем.  Аляц, Пётр Петрович Циликин, покодемань тевса  ломанць асуволь: ульсь и конюхокс, и плотникокс, и каменщикокс, и мельникокс, нльне варчсезень виензон валенцянь кевордемань тевса. Ужяленди, рана тусь эряфста—38-це кизонц лангса. Николай ся кизоня тонафнесь 9-це класса, ульсь сембода оцюкс семьясост.  Шарьхкотьф, сембе алянь тефне эсток лаподсть цёранять лафтувонзон лангс.

 

Эсь велень 8 классонь школать аделамда меле Николай поладозе тонафнеманц Ковылкинскяй райононь Рыбкина велень школаса, конань лац шумордазе 1972 кизоня. Тяка кизонь сёксеня серьгядезь райононь военкомату—сась пинге служамс Советскяй Армияса. Фкя ширде сонь мялецоль ялганзон мархта тумс армияв служама, но омбоце ширде—эрявсь лездомс тядянцты идень кеподемаса-касфтомаса. Эняльгодсь военкоматонь офицеронди, штоба сонь кадолезь мзярошка пингс велеса работама—тядянцты лездома. Ваномок велень Советса «о семейном положении» кантф справканц, военкоматонь покодихне пяшкодезь сонь эняльксонц: макссть кизонди отсрочка армияса служамать эзда. Николай кармась покодема эсь колхозсост фермаса скотникокс. Но тяса сонь тага серьгядезь военкомату и кизефтезь, ули-аш мялец тонафнемс шофёркс ДОСААФ-са. Николай атказась. Но, самок куду, азондозе тядянцты, мезенкса серьгятькшнезь району. Эста тядяц и лятфтазень цёранцты сонь шабань мялензон-арьсеманзон. Кле, идькс пингстот пянакудлангса ащекшнезь коль корхнеть: «Вов, тядяй, касан—аран шофёркс, ускан тейть уштомбяленди торф и пенгат, ускса кукуразать ёткста тракскяньконь лемс сязентьф тишеняцень».
 
 

Шумордамок ДОСААФ-са шоферонь ниле ковонь курснень, церати макссть машинань вятиень прават. Но теенза изь сав покодемс шофёркс. Сонь ульсь идькс пингонь нинге фкя мялец, тонадомс учителень профессиять. 1973 кизоня кизонь кучкать шумордась Н.П.Огарёвонь лемса МГУ-са подготовительнай курст, а тяка кизонь сёксенда сон ни филологическяй факультетонь студентоль. Кенярдеманцты ашель пе. Омбоце курсса тонафнемста кармась якама литературнай кружоку, конань вятезе филологическяй факультетонь преподавательсь М.Г.Имяреков. Сон и приметазе Николаень стихонь-азксонь сёрмадомань асувонц. Эряви азомс, васенда студентсь варчсезень виензон стихонь сёрмадомаса рузонь кяльса. Но литературнай кружокть вятиец кошардозе сёрматкшнемс мокшекс, вдь шачема кяльса сяда шарьхкодевиста азовихть эсь мяльхне-арьсематне, сяда келиста панжеви поэтонь ваймось. И сай пингонь поэтсь кулхцондозе эсь тонафтыенц. Нюрьхкяня пингонь ётазь мокшень кяльса васенце стихонза лиссть университетскяй газетаса. Тяда меле литературнай кружоку якай ялганзон мархта сон лувозень эсь стихонзон мокшэрзянь радиоса. Стихонь васенце  сялдыенц-шнаенц  васьфтезе ки лангса. Кода-бди Саранскяйге ардомста троллейбусонь вятись серьгядезе Николаень кабинать малас. Тя ульсь велестост мокшалясь Н.Н.Петряков. Николай кенярдсь содаф ломань мархта васедемати, а тона ушедсь шнамонза, кле, кулине радиоса, кода стихнень лувить—мялезон тусть. Тя шнамась кошардозе церать сяда товга варчсемс виензон стихонь сёрмадомань тевса. Стихонза кармасть лисендема «Мокша» журналса, «Мокшень правда» газетаса. Кармасть серьгятькшнемонза од писателень семинарс. Ушеткшни поэтсь арась ялгакс радиоть и «Сияжар» национальнай передачать мархта.

 

Н.П.Циликинонь «Седись таколфтсы седить» лем ала стихонь васенце сборникоц лиссь 1996 кизоня. Тя сборникть лисеманц колга лятфни сонць авторсь:

 

 —Стихонь васенце сборникозе, пади, нинге ламос афоль лисе, кда аф Григорий Ильич Пинясов. Весть, Саранск ошу служебнай тев мельге якамстон, сувань  ширезонза серматф стихонень мархта. Эста Г.И.Пинясов ульсь редакторкс «Мокша»  журналти. Сон ванозень-тиезень синь и мярьгсь: «Тейть, Николай, пинге ни нолдамс стихнень башка сборникса. Сувак Мордовиянь печатень и информациянь министрти Анатолий Фёдорович Ежовонди и эняльтть лездомс тя тевса. Мон отвечань: тейне, велень учительти, визькс и пелькс эсь эняльксозень мархта машнефнемс министрть. А Г.И.Пинясов, цють аф копорьда ряфцодемань эсь ширденза, азомок, кона этажста мумс А.Ф.Ежовонь кабинетонц. Кулхцондыне, сувань министрти. Улема, мзярс мон вешендине министрть кабинетонц, Григорий Ильич телефон вельде гайфнесь ни А.Ф.Ежовонди. Сяс, аньцек сувань кабинетозонза, сон тейне  корхтась ни книгазень нолдаманц колга, кле, кантк рукописцень книжнай издательствав, тоса лувсазь стихнень и примайхть эрявикс решения. И тязк эсь ингольден гайфтсь книжнай издательствать директоронцты. Нюрьхкяня пингта меле  книгазе лиссь,  пяшкодсть кунардонь мяльне-арьсемане.

 

Николай Циликинонь васенце сборникоц ушеды  тяфтама строчкаса:

 

«Катк морне аф

 

сяшкава эрьгафт и виихть,

 

Но гайняй струнакс эсост седиень валсь.

 

Синь саворне ваймостон локстинякс лиихть

 

И серьгядихть эсон мор латциень тналс».

 

 Тя стихотворениясь арась ингольце валкс аф аньцек васенце сборниконцты, но и поэтть марнек творчестванцты. Сембоц поэтть перанц алда лиссть стихонь вете сборникт: «Седись таколфтсы седить» (1996), «Ару ваймонь эрьхке» (2004), «Эняльдезь виденцямат» (2004), «Ваймонь серьгятькс» (2016), «Ялгаксшинь меквайгяль» (2017). Тяни аноклави «Чивгонь таньф» лем ала котоце сборникоц. Поэтть стихсонза панчсевихть лувити эряфонь таколфты тематне—шачема крайти кельгомась,  велеть тяниень  эряфоц, перьфпялень мазышись, одкс пингсь и кельгомась, ялгаксшись, Шкайти кемамась, а сембода няеви вастса творчествасонза ащи  сиретьф тядять-мокшавать образоц, сонь ваймопожфоц, идензон колга таколдоманза, а стане жа велень эряйсь, сонь мяленза-арьсеманза, ризфонза.

 

 Университетть шумордамда меле, 1978 кизоня, Н.П.Циликин сась покодема эсь шачема велень школазонза. Васенце шинякиге сон путфоль аф класснай работать коряс организаторкс, а кизода меле— школань директорти учебнай тевть коряс завучекс. Покодемок вете кизот тя должностьса, сон путфоль  школань директоркс. Николай Петрович няфтезе прянц смузю руководителькс. Аф стак, вете кизонь ётазь, 1989 кизоня кочкафоль велень Советонь председателькс и покодсь тя вастса 2000 кизоти самс. А тоса меки мрдась школав учителькс покодема. Велень школать сёлгомда меле тусь пенсияс. Тяни сон заняф кудъётконь тевса, касфты перень серот, жуватат, и, кода корхтай  сонць: «Тяни афкукс эвондась пингозе стихонь сёрмадомс».

 

Николай Петрович эсь прянц лувондсы павазу ломанькс. Тячемс эряй шачема велесонза рьванц Анна Павловнань мархта.  Анна Павловна Зубово-Полянскяй райононь Кужа  велень мокшава, пенсияс тумозонза работась школаса мокшень и немецкяй кялень учителькс. Синь колма идьсна, сембонь высшай образованиясна. Касыхть ниле уноксна. Эряви азомс,    мирттне-рьвяттне афкуксонь патриотт. Эсь примерснон вельде тонафтозь идьснон кельгома шачема крайть, кяльть, мокшень койхнень-обуцятнень, а тяни путнихть вийхть кельгомань тя толнять унокснонды максоманкса.

 

Т.Петрова.

 

 


10.10.2019 №40
 
 
 

 
НОВОСТИ

ПЕРЯМС КИТЬ КОРОНАВИРУСНАЙ ИНФЕКЦИЯТИ

20.03.2020
 
 

МОРДОВИЯНЬ ГОССОБРАНИЯНЬ ДЕПУТАТТНЕ ШНАЗЬ РФ-нь КОНСТИТУЦИЯТИ ПЕТЬКСНЕНЬ

12 мартста Саранскяйса ётась Мордовия Республикань Государственнай Собраниять 44-це сессияц.  Сонь шинь повесткасонза фкя инь важнай кизефксокс ульсь РФ-нь Конституцияти петькснень колга законть ванондомац. Законти основакс арасть тезисне, конат азфтольхть РФ-нь Президентть Владимир Путинонь мархта Федеральнай Собранияти эсь Посланиясонза. Президентскяй ушетксне сяда тов ульсть келептьфт предложениятнень мяльс сявозь, конат састь рабочай группати, кона пуроптф государстваньконь вятиенц мархта.
 

 

Кода азозе шинь повесткати лихтьф тя кизефксть коряс дискуссиять ушедомстонза МР-нь Госсобраниять Председателец, «Единая Россия» партиянь политсоветть Секретарец Владимир Чибиркин, РФ-нь Конституцияти полафтксне водендафт странаньконь суверенитетонц обеспечендаманцты, граждаттнень социальнай гарантияснон кемокстамаснонды, политическяй системать виияфтоманцты, вешфкснень  касфтомаснонды ломаттненди, конат занцихть государственнай пяк эрявикс должностть.

 

20.03.2020
 

МОРДОВИЯСА 7750 СЕМЬЯТИ МАКСФ РЕСПУБЛИКАНСКЯЙ ТЯДЯНЬ КАПИТАЛСЬ

Тяниень пингть, кода марнек странаса, стане и минь республикасонк оржаста ащихть демографиянь кизефксне. Мордовиянь Оцюнясь В.Д.Волков Государственнай Собранияти Посланиянц эса азозе: «Маластонь кота кизотнень тейнек эряви пяшкодемс афкукс историческяй задача—касфтомс республикань населениять одс шачфнень лувксснон касфтоманц вельде, мезсь  апак сатнеколь комсь ветие кизода ламос». Эряви азомс, мекольдень пингть Мордовияса аф кржа тиендеви од, лама идень семьятнень ширеснон кирдеманкса. Эряфс ётафневи программатне, примсеви мератне каннихть результатт. Тяфта, вете кизоста лама идень семьятнень лувкссна Мордовияса кассь 1,5 тёжяньда. Тяниень пингть республикаса эряй 6685 семья, коса касфтовихть колма и сяда лама шаба. Оцю лезксокс ащи семьятненди тядянь капиталсь, кона тя кизоста сявомок Россиянь Президентть В.В.Путинонь мярьгоманц коряс, кармай      макссевома васенце идень шачфтыхнендивок. Минь республикасонк 2012 кизоста сявомок тевс сувафтф республиканскяй тядянь капиталсь. Кинди сон максови, кодама лувксоц и мезень лангс ули кода карьхцямс сонь? Тянь колга корреспондентоньконь мархта корхнемста азондсь Мордовия Республикань социальнай защитань, трудть и населениять занятостенц коряс министрть заместителец С.И.Шувалова.
 

19.03.2020  № 10
 
 
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин