Поиск по сайту: 
 

Архив
 декабрь 
 2019 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Тема дня

ШУМБРАТ,«ШУМБРАТ, МОРДОВИЯ!»

Народнай творчествань илась ушедсь ни Культурань республиканскяй Дворецть фойесонза. Тяса Старошайговскяй и Атюрьевскяй             райононь                артисттне—самай теест максфоль почётнай правась панжемс «Шумбрат, Мордовия!» народнай творчествань XXIII Республиканскяй фестивальть-конкурсть—васьфнезь-кеняртьфнезь сайхнень кштимаснон, весяла сиде мороняснон мархта. Кой-кит ваныхнень эзда кштисть-морасть фестивалень участникнень мархта ряцок.

 

Тя пингть РДК-ть омбоце этажсонза ушедозе работанц декоративно-прикладной творчествань и ремеслань выставкась, коса эсь работаснон няфтезь машты кядь аватне-алятне. Тарадста кодаф кептерьхне, шуфтста керсеф скульптуратне, сёвоньцта тиф кядьготне, налхкшне, мокшень щамса щаф-каряф някатне—сембось салась сельмованф, дивандафтсь. Атюрьевскяй райононь мокшаватне нльне няфтсть мастер-класс мокшень позать тиеманц коряс.

 

Народнай умелецнень тифксснон ваномда меле пуромфне ётасть Культурань дворецть залозонза. Тяса сценать лангста фестивалень участникнень и ваныхнень Мордовиянь Оцюнять В.Д.Волковонь лемста поздравляндазень МР-нь культурань, национальнай политикань и архивнай тевонь министрсь А.М.Чушкин. Анатолий Михайлович азозе, што тядде «Шумбрат, Мордовия!» фестивальсь «Культура» нацпроектть рамкаса получазе РФ-нь Культурань министерствать 3 миллиотт цалковаень лувксса грантонц. Грантовай средстватне нолдавихть тевс фестивальть-конкурсть ётафтоманкса.

 

Сяда тов сценась максфоль Старошайговскяй райононь самодеятельнай артисттненди. Отчётнай концертть программанц панжезе МР-нь культурань Заслуженнай работниксь В.Капров. А меле ваныхнень кядень цяпамаснон коряс лиссь аф аньцек Старошайговскяй районть, а марнек республикать оцю гордостец—Сире Теризморгань народнай хорсь. Нльне сятнень, кие аф содасы мокшень кяльть, токасы седи куцюняснон мокшаватнень лама вайгяльса морамасна. Тусь мяльс Лемдяй велень «Синельга» народнай ансамбльть выступленияц, кона моразе «Лешмань Аннанясь» мокшень мороть. Пара мяльса ломатть васьфтезь «Восторг» кштимань коллективть номеронц. Старошайговскяй районть отчетнай концертонц программазонза сувафтфтольхть и сиде моронят, конат сядонга кеподезь залу озсефнень мяльснон. А «Жить, так жить» финальнай мороть кулхцондомста ваныхне цяпасть стяда ащезь.

 

Сяльде част пяле мархта пингс сценать лангса ульсть Атюрьевскяй райононь артисттне. Фкя ваймоса ванфоль-кулхцонтфоль концертсь. Мокшень, рузонь народнай моротнень мархта программаса маштозь ладяфтольхть кштиматне, авторскяй моротне, театрализованнай постановкатне. Лямбоста васьфтьфоль сценать лангс эрь лисись, а кой-кона номерхнень ваномда меле залть келес кайгсь «Браво!» ювадемась. Инь пяк, улема, мяльс тусь «Гайней вайгель» фольклорнай ансамбльть «Стирень ладяма» инсценировкац. Мокшаватне стане лац няфтезь свадьбада ингольдень тя обрядть, мярьгат, профессиональнай артистт ульсть сценать лангса. Лац примафтольхть мокшень моротне, кепотьксонди, «Келу» народнай морось, конань моразе Кяшал велень «Лихтибря» фольклорнай ансамбльсь.

 

Атюрьевскяй районть концертнай программасонза примась участия лама од ломань, шаба. Аф васенцеда ни республиканскяй сценать лангс лисенди Атерень од «тяштенясь» Диана Тумпарова, лац няфтезь номерснон «Карамельки» и «Созвездие» кштимань коллектифне, «Юность» идень ансамбльсь. Мекольцетнень литературно-музыкальнай композицияснон, улема, сембе ванозь сельмоведень пачк. Сон лемтьфоль Великай Победать 75 кизонь топодеманцты.

 

Эсь райононц, земляконзон ширеснон кирдема фестивальс сашендсь Атерень содаф гармонистсь-виртуозсь Владислав Шумкин, кона тяниень пингть тонафни Гнеситтнень лемса Музыкальнай академияса. Сон маштозь моразе «Гуляй, Россия!» пьесать.

 

Фестивальсь стаки моли. 26 октябрьста сценав лисихть Ельниковскяй и Атяшевскяй райоттне.

 

О.ЕВДОКИМОВА.

 

 


24.10.2019 №42
 
 
 

 
НОВОСТИ
 
 
 
 
 
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин