МОКШЕНЬ И ЭРЗЯНЬ КЯЛЬХНЕНЬ КОРЯС ВАСЕНЦЕ ГРАММАТИКАТНЕ

Мокшень и эрзянь корхтамань аф литературнай письменнай аф оцю пялькскянь башка сёрматфкст кармасть лисендема XVII векть песта. Революцияда ингольдень рукописнай мокшэрзянь литературась ащесть аф оцю валкскянь, грамматикань, устно-поэтическяй творчествань произведениянь текстста (1917 кизоть самс мокшень и эрзянь кяльса нолявсь конфессиональнай литературась). Тя статьяса корхтамась сяда тов туй мокшень кялень и эрзянь кялень васенце грамматикатнень колга.

Меля топодсь 180 киза мокшень кялень васенце грамматикать лисема шистонза, тядде топоди 180 киза эрзянь кялень васенце грамматикать нолдамста. Ётамок васенце грамматикатнень колга азондомати, васенда эряви лоткамс сонцень «грамматика» лемть (терминть) лангс.

Грамматикась (греч. grammatikе—1) языкознаниять пяльксоц, кона тонафнесы валть тиевоманц и полафтовоманц, а стане жа валзюлмоса и валрисьмоса валхнень сотовомаснон; 2) книга, коса максовихть правилатне тя тонафтомать коряс; 3) кяльть строенц, кялень категориятнень ёткса сюлмавомань сотксне.

Мокшень и эрзянь кялень грамматикатне няфнесазь национальнай письменностть касоманц-виияманц, литературнай кяльхнень нормаснон кемокстамаснон.

Грамматикась, кода наука, няфневи эрь кодама ширде, ваномок сянь лангс, кодама задачат и цельхть путневихть инголенза. Кепотьксонди, научнай грамматикась сяда крхкаста тонафнесы башка кяльть грамматическяй строенц тяниень пингонь сатфксонь лангс нежедезь. Ули эсонза: тяниень пингонь научнай грамматика, кона тонафнесы кяльть грамматическяй строенц тяниень пингть; историческяй грамматика—тонафнесы кяльть грамматическяй строенц молеманц; сравнительно-историческяй грамматика—тонафнесыне мала кяльхнень грамматическяй стройснон карань-каршек молемаснон и башка кодамовок молемань пяльксонц; сопоставительнай грамматика—тонафнесы мала и аф мала кяльхнень грамматическяй системаснон эса фкаксшить и аф фкаксшить.

Васенце мокшень грамматикась—«Мордовская грамматика, составленная на наречии мордвы-мокши» («Мокшень кортафксста тиф мокшэрзянь грамматика»), нолдафоль 1838 кизоня Москувонь Синодальнай типографияса. Аноклаец ульсь Тамбовскяй духовнай семинариянь профессорсь, магистрсь Павел Петрович Орнатов (шачсь 1808 к., Тамбовскяй епархиянь Елатомскяй округонь Катрава велеса, кулось 1840 к., кулома вастсь аф содаф). Тя ульсь васенце тяряфтомась няфтемс-ваномс мокшень кяльть башка эсь лацонь ширензон.

Тя грамматикать лисемац   сотфоль Тамбовскяй духовнай семинариянь тонафнихнень мокшень велева священникокс служамати анокламать мархта. Семинарияса мокшень кяльть вятезе профессорсь П.Орнатов. Грамматикань анокламаса теенза пяк лездсь мокшень кяльть содаец учительсь Евстафий Нечаев. Грамматикась аноклафоль рузонь грамматикать лангс нежедезь, сяс графикась и сембе мокшень валхнень, форматнень сёрмадомасна сувафтфт рузонь кяльста.

Ингольдень валса Орнатов корхтай мокшэрзятнень колга кода народонь: «Мордва разделяется на два племени, из коих одно называется Мокша, а другое Ерьзя… наречия Мордвы разнятся между собою; одно называется Мокшанское, а другое—Ерьзянское. Впрочем, и при разности наречий одно племя удобно понимает другое».

Орнатовонь грамматикац ащи ниле пяльксста, эсонза 106 лопаня. Графикань и орфографиянь кизефксне ванондовихть васенце пяльксса «О числе, начертании и разделении букв» («Числась, сёрмадомась и буквань явфтомась») лем ала. Профессорсь сёрмады: мокшэрзянь кяльть сонцень литеранза (букванза) аш, тевс нолдавихть рузонь литератне. Синь эздост ванови кяльса—31. Сембе букватне явовихть тяфта: оцюфт и ёмланят; гласнайхть (а, е, и, i, о, у, ю, я), согласнайхть (б, в, г, д, ж, з, к, л, м, н, п, р, с, т, ф, х, ц, ч, ш, щ), двугласнайхть (ащихть кафта гласнайста, а азомстост маряви фкя вайгялькс) и безгласнайхть (ъ, ь). Гласнай буквась ськамонза или лия согласнай мархта тии валбялькс (слог), сяс сембе валхне явовихть: фкя валбяльксонь, кафта валбяльксонь и лама валбяльксонь.

Омбоце пялькссь «О разных видах слов и их изменениях» («Эрь-кодама видонь валонь колга и синь полафнемасна») ащи 13 аф оцю пяльксста: «Об общих принадлежностях слов» («Валхнень марстонь кандовомаснон колга»), «Об имени вообще» («Сембось лемть колга»), «Об имени существительном» («Существительнайть колга»), «Об имени прилагательном» («Прилагательнайть колга»), «Об именах числительных» («Числительнайхнень колга»), «О местоимениях» («Местоимениятнень колга»), «О глаголах» («Глаголхнень колга»), «О наречии» («Наречиять колга»), «О предлоге» («Предлокнень колга»), «О союзе» («Союснень колга»), «О междометии» («Междометиять колга»), «О частицах» («Частицатнень колга»).

Орнатов явфни тяфтама корхтама пялькст: существительнай, местоимения, глагол, причастия, наречия, предлог, союз, междометия и частицат. Кда тяниень пингонь мокшень кяльса прилагательнайсь аф полафневи падежень коряс, то Орнатов сёрмады: прилагательнайсь полафневи падежень коряс кода и существительнайсь. И максы кепотькс акша прилагательнайть коряс, конань полафнесы 6 падежга кода существительнаень. Валмельгакснень эземс ноляй предлокт. Глаголть эса максы ниле наклоненият: изъявительнай, желательнай, аф определеннай, повелительнай (тяниень пингонь мокшень кяльса глаголть 7 наклонениянза). Глаголть эса П.Орнатов явфни 11 пинге: тяниень простой, тяниень лама крдань (многократнай), ётай аф определённай простой, ётай аф определённай лама-крдань, ётай совершеннай простой, ётай совершеннай лама-крдань, кунардонь ётай, сай аф определённай простой, сай аф определённай лама-крдань, сай определённай простой, сай определённай лама-крдань. Ванондови и залогонь категориясь: действительнай, страдательнай, возвратнай. Мезевок апак аст понудительнай залогть колга. Валмельгакснень лемдьсыне предлогокс.

Грамматикать колмоце пялькссонза П.Орнатов ванондсыне валрисьмотнень, явондсы предикативонь пяльксть—подлежащайть и сказуемайть, няфнесыне валхнень сюлмавомаснон валзюлмоса и валрисьмоса.

Мекольдень нилеце пяльксса «Об употреблении букв в письме» и «Об употреблении знаков в письме» ванондови сёрмаса букватнень (оцю и ёмла) и тяштькснень (вачкотьксть (ударениять), серьгядемань (!), кизефтемань (?), точкать (.), кафта точкатнень (:), запятойть (,), (^) и лия тяштькснень) нолямасна. Орнатов васенцесь, кие шарфтсь мяль мокшень ударениять лангс: ударениясь мокшень кяльса пцтай фалу прашенды васенце слогть лангс.

Тя пяльксса максови кепотьксне кандовихть мокшень кялень западнай диалектти. Тя кемокстави тяниень пингонь западнай диалектса васьфневи валхнень мархта.

П.Орнатовонь мокшень кялень грамматиканц путфксоц мокшень письменностть историяса оцю и питни, сяс мес сяда товолдонь сембе пособиятне сёрматфт сонь грамматиканц лангс нежедезь.

Эрзянь кялень васенце грамматикать сёрмадыкс лувондови Дамаскин (Д.Семёнов-Руднев; 1737-1795). Сон аноклафоль, мзярда Дамаскин ульсь Нижегородскяй епархиянь оцюнякс (1783-1794). Ужяленди, тя грамматикась кодамовок архивса тячемс аф мушендови.

Документальна кемокстаф эрзянь кялень грамматикань сёрмадомань  тяряфтомась кандови 1823 кизоти. Тянь колга корхтайхть Пензань семинариянь ректорть И.Симилейскяй и Я. Рождественскяй протоиерейхнень фкя-фкянди сёрмань кучсемань архивнай материалхне, конатненди мярькфоль анокламс грамматикань сёрмадомась. Ужяленди, тя ушеткссь лядсь апак шумордак, сяс мес сёрмадыхне ашезь сода лац-ряц эрзянь кяльть (ГАПО, ф. 21, оп.1, д. 41, л. 1-2).

Сяс васенце эрзянь кялень грамматикакс лувондови немецонь языковедть Ганс Конон Габеленцонь (13.12.1807, Альтенбург ошсь–3.10.1874, Лемниц ошсь, Германия) «Versuch einer mordwinischen Grammatik» («Опыт создания одной мордовской грамматики») книгац.

Сон тонафнезень ламоц  Азиянь, Африкань и Американь апак панчт кяльхнень, сяльде ушедсь тонафнемост финнонь юронь кяльхнень и васенцесь Германияса, кие синь ванозень наукань ширде. Эрзянь кялень грамматикась  нолдафоль 1839 кизоня, эсь мархтонза панчф журналса «Zeitschrift fur die Kundedes Morgenlandes» («Журнал для востоковедов»). Тяса жа сон печатлазе черемисонь кафта корхтафксонь (наречиянь) сравнительнай очеркть и зырянонь корхтафксть колга статьять.

Эрзянь кяльть грамматическяй строенц тонафнема лувс Г.Габеленц путозе Од сотксть (Новый завет), кона ётафтфоль эрзянь кяльс 1821 кизоня.

Грамматикась ащи 4   пяльксста: 1—Lautlehre «Фонетикась», 2—Formenlehre «Морфологиясь», 3—Wortbildung «Валонь тиевомась», 4—Wortfugung «Валонь сюлмавомась».

Васенце пяльксса сёрмадысь шарфты мяль фонетикань кизефксненди: макссы мокшэрзянь алфавитть (а, a, b, ch, d, e, g, i, j, k, l, m, n, o, p, r, s, sh, sch, t, ts, tsch, u, u, v, y, z), конань эса 7 гласнай и 20 согласнай вайгялькст, сёрмады согласнайхнень нолямаснон колга кой-кона валонь форматнень эса, кепотьксонди: kudos in das Haus «в дом» но kudozonzo in sein Haus «в его дом» (с вайгялькссь ётась з вайгяльксокс—тя лиссь фонетикань тяфтама процессть коряс, кода кайгомошинь фкакс аравомась).

Омбоце, инь оцю пяльксса вановихть корхтама пяльксне: существительнайсь, прилагательнайсь, числительнайсь, местоимениясь, наречиясь и глаголсь. Тяштькстави: существительнайть (Substantivum) мокшэрзянь кяльса аш  родонь грамматическяй няфтемань тяштьксоц, улихть кафта лувксонза (числанза)—фкя числань (Singularis) и лама числань (Pluralis), 12 падеженза (Nominativ, Genitiv, Dativ, Allativ, Adessiv, Illativ, Inessiv, Ablativ, Elativ, Praedicativ, Caritiv, Temporalis), нюрьхкяняста максови  падешнень грамматическяй смузьсна; максовихть 1 сявомок 20 молемс числительнайхне, сяда тов кемоттне, сядотне, тёжяттне, кепотьксонди: 2–kavto, 3–kolmo, 4–nile, 20–koms, 40– nilengamen, 100–sado, 200– kavtosad, 1000–tushom; местоимениятнень ёткста явфневихть личнай (mon, ton, son, min, tin, syn), указательнай (se, te, tona), вопросительнай (ki, maze) местоимениятне; глаголса явфневи тяфтама грамматическяй категориясь, кода пингонь категориясь, синь эздост  2: тяниень, ётай—Praesens, Praeteritum, сай пингсь няфневи тяниень пингонь форматнень вельде,  ётай пингса явфневсь имперфектсь и перфектсь; глаголть эса Габеленц ванондсы тяфтама грамматическяй категориять, кода наклонениясь: индикатив, кона фкя тяниень пингонь изъявительнай наклонениять мархта, конъюнктив—сослагательнай наклонения, 1-це и 2-це кондиционалхне—условно-сослагательнай, императив—повелительнай и оптатив—желательнай наклонениясь.

Колмоце «Валонь тиевомась» пяльксса авторсь сёрмады валхнень тиевомаснон колга, корхтави субстантивациять (лия корхтамань пялькснень существительнайкс ётамаснон колга), лепнень эзда глаголхнень тиевомаснон колга, башка абзацс лихтевихть сложнай валхне–zusammensetzung (kudazoro, inazorava). Тяза жа кандовихть кати-мес и тяфтама валхне, кода калгодо седей, паро превень, паро максмо (паронь максома).

Нилеце пяльксса Wortfugung («Валонь сюлмавомась») Габеленц сёрмады существительнайть эрь-кодама падежга нолявоманц колга, ванондсыне прилагательнайть мархта конструкциятнень, лоткси глагольнай форматнень лангс.

Учёнайхнень мяльснон коряс, Г.Габеленцень книгац ашезь кондясте сяда тов нолямс тевс, васендакиге сяс, мес сёрматфоль немецонь кяльса (кржа кие сонь эста содазе), кона стакалгофнезе тевть, омбоцесь—XIX веконь лия кяльста ётафтфсь пяк кальдявста шарьхкодевсь, колмоцесь—грамматикаса пяк лама ульсь эльбятькста (грамматика, с самого начала не имевшая никакого практического значения, была «полна ужасных неправильностей» (цитатась сявф: Феоктистов А.П. Очерки по истории формирования мордовских письменно-литературных языков книгаста М., 1976 г. С.84) «грамматика, конань лисемстонзокиге ашель практическяй смузец, ульсь «пяшксе лама аф видешида»).

Мекольцеда эряви азомс, васенце грамматикатнень ваномасна-тонафнемасна, синь содамасна канды оцю лезкс историческяй диалектологиянь и лексикологиянь кизефкснень тонафнемста.      

Статьять аноклаенза: Мордовия Республикань Правительствать видеса Гуманитарнай наукань научно-исследовательскяй институтонь кялень отделонь работникне Л.А.Гурьянова, А.Н.Келина,

 О.Ю.Цыплякова.