Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Тема дня

МОКШЭРЗЯНЬ МАСТОРУ САШЕНДСТЬ ИНЖИХТЬ РОССИЯНЬ 33 СУБЪЕКТСТА

Съездти анокламась ушетфоль кунара, башка мяль пингстонза шарфтфоль делегаттнень кочкамаснонды. Тифоль сембось, штоба Мордовияв пуромольхть кяльснон, нацияснон, культураснон инкса пичеди ломатть. Сят, кит виень аф ужяльдезь, маштозь, оцю ответственностень марязь, лиянь лангс аф надиязь тиендьсазь национальнайть ванфтоманц мархта сотф тевснон.

 

24 октябрьста, Саранскяйса, мокшэрзянь Государственнай филармонияса—Культурань республиканскяй Дворецса кайгсть мокшень и эрзянь морот. Сембе весялатольхть, шумбракснесть фкя-фкянь мархта тядянь-алянь кяльса. Кой-кит васьфтезь ялгаснон, конатнень мекольцеда няезь Мокшэрзянь народть VI cъездонц пингста. Работась лама выставка—книгань, аудио- и видеодисконь, национальнай изданиянь, декоративно-прикладной творчествань, ульсть мастер-класст.

 

Пленарнай заседаниять ушедомста няфтьфоль фильма, конань эса пачфневсь мокшэрзянь масторть образованияса, строительстваса, велень хозяйстваса, промышленностьса, инновационнай ширеса, лама лия тевса мекольдень кизонь сатфксонзон квалма.

 

Мордовскяй (мокшень и эрзянь) народть Межрегиональнай общественнай организациянц председателец Ю.А.Мишанин азсь приветствия сембе пуромфненди. Валонзон коряс, съездти анокламста ётась 300 лама собрания и конференция. Кочкафоль 380 делегат, 77 наблюдатель. Сембоц работасонза примасть участия представительхть Российскяй Федерациянь 33 субъектста.

 

Сяда тов Ю.А.Мишанин тердезень сценати Мордовия Республикань Оцюнять В.Д.Волковонь и съездть президиумонц членонзон. Вайгялень максомда меле съездсь ушедозе эсь работанц. Кайгсь Российскяй Федерациянь Гимнась.

 

Съездонь рабочай оргаттнень пуроптомдост меле корхтась Мордовия Республикань Оцюнясь В.Д.Волков. Кода сон азозе, республиказонк съездти мокшетне и эрзятне састь марнек странаста: Приморскяй крайста сявомок Калининградскяй областти молемс и Мурманск ошста сявомок Крымти молемс.

 

—Минь благодарнайхтяма теенть историческяй ушетксоньконди и национальнай койхненди вернайкс улеманкса. Спасиба сянкса, што мархтонк таколттада мокшэрзянь крайть судьбанц инкса, явондсасть мархтонк кенярдеманьконь и надияманьконь, пичефксоньконь и сяськоманьконь. Арьсян, няесть кода полафтсь Саранскяйсь мекольдень съездта меле. Тянди ламода лездсь футболть коряс Миронь чемпионатти анокламась. Эряви азомс, эздонт ламотнень мархта васьфнеме мундиалень матчнень и Россиянь Сборнайть налхкоманц пингста, кона тядде ульсь Саранскяйса. Чемпионатсь арась од аськолксокс Мордовиять касомаса-вииямаса.

 

В.Д.Волков лятфтась уникальнай ся объекттнень колга, конат строяфтольхть чемпионатть вельде и сянь квалма, што Мордовиясь странань региоттнень эзда лувфоль инь инжиень примай и аф пелькс регионкс.

 

Республикань Оцюнясь содафтозень инжихнень регионца экономическяй тефнень мархта:
 
 

—Экономиканьке касы стабильнайста и тевонь содазь. Мекольдень вете кизотнень  валовай региональнай продуктсь и промышленнай производствань объёмсь кассть пцтай нилецекс пялькста. Эряфс ётафтф 100 малава инвестиционнай оцю проект, панчфт од завотт и кемотть тёжятть рабочай од васта. И тядде, аф ваномок финансовай кой-кона стакатнень-сталмотнень лангс, тага ули касома экономикаса. Промышленностьса учтама 10 процентта лама касома, велень  хозяйстваса—5 процентта лама, строительствась сай ся объёмтненди, кодапт ульсть футболть коряс Миронь чемпионатти анокламста. Хозяйствань сембе отраслятнень учсыне динамическяй касома.

 

Съездса В.Д.Волков лама корхтась культурнай и национальнай ширетнень колга.

 

—Российскяй опытсь лама ширде уникальнай,—китькстазе Владимир Дмитриевич.—Минь лама нациянь обществатама, но марстонь нароттама. Ломаненьке сюлмафт культурнай, цивилизационнай кодса, конань юрса—народть эсь лацонь коензон кельгомасна. Странаньконь тя эсь лацонь шиц лезни тейнек лац кирдемс ширде эвфнематнень  и мирса глобализациянь вииякшни процесснень каршес. Странань Президентсь Владимир Путин Государственнай национальнай политикань Стратегияса лац-ряц няфтезень российскяй нациять единстванц и этнокультурнай лама ширденненц ванфтомаснон коряс аськолкснень.

 

Вете кизоста, конат ётасть vi-це съездта меле, лама тиф мокшэрзянь народть историческяй наследиянц тонафнеманц и пропаганданц коряс. Башка васта тяса занясь Мордовскяй (мокшень и эрзянь) народть Межрегиональнай общественнай организацияц, кона заняф мокшэрзянь диаспорать и финно-угорскяй сообществать мархта соткснень виияфтомаса.

 

Республикань Оцюнясь азозе, што тячи башка мяль шарфневи мокшень и эрзянь кяльхнень тонафнемаснонды. Тяса пяк ламось ащи школать эзда. 73 школаса 1-11 клас-снень эса тядятнень-алятнень заявленияснон коряс мокшень и эрзянь кяльхне тонафневихть кода родной,  лядыкс 218 эса—кода государственнай кяль. 5 класста сявомок 9 классти молемс сувафневи «История и культура мордовского края» дисциплинась.

 

Владимир Дмитриевич азсь мяль эряфс ётафнемс «Открой Мордовию» условнай лем ала проект, конанди участникокс аральхть лия региоттнень эса эряй мокшетне и эрзятне. Вельденза эрь мокшети или эрзяти ули кода повомс историческяй родиназонза. Тяфта касы Мордовияв сай     турист-тнень лувкссна, виияй землячествась, кемокстайхть межрегиональнай сотксне.

 

Тя шиня республикань Оцюнять кядьста ламотне получасть оцю казнет. Тяфта, Славань III степенень орденца казьфоль Мордовскяй (мокшень и эрзянь) народть Межрегиональнай общественнай организациянц председателец, Мордовия Республикань Правительствать видеса Гуманитарнай наукань Научно-исследовательскяй институтть директоронц заместителец Ю.А.Мишанин, «Мордовия Республикать инголе заслуганкса» медальса казьфтольхть «Мокша» журналть поэзиянь отделонц редактороц, содаф поэтсь Р.К.Орлова, Мордовскяй (мокшень и эрзянь) народть Межрегиональнай общественнай организациянц членоц Н.М.Кадерова, «Умарина» моронь и кштимань мокшэрзянь Государственнай ансамбльть художественнай руководителец  В.И.Четыркин, лиятне. Мордовия Республикань  Народнай художниконь Почётнай лемть сатозе содаф художниксь А.Н.Баргов, Мордовия Республикань Заслуженнай художниконь лемть—П.В.Рябов.

 

Содаф мокшавась, Г.И.Сураевонь-Королёвонь лемса «Келу» ансамблень солисткась-вокалисткась Г.Н.Макшева арась Мордовия Республикань Оцюнять Премиянц лауреатокс. Казьфтольхть Мордовия Республикань Почётнай грамотат.

 

Меле Российскяй Федерациянь Президентть  Приволжскяй федеральнай округса Полномочнай представителенц И.А.Комаровонь приветствиянц морафтозе Мордовия Республикать эзга Главнай федеральнай инспекторсь М.С.Сезганов.

 

Российскяй Федерациянь Федеральнай Собраниянь Федерациянь Советть эзда корхтась Федерациянь Советонь членць В.В.Литюшкин. Тяда башка, сон лувозе Российскяй Федерациянь Федеральнай Собраниянь Федерациянь Советть Председателенц В.И. Матвиенкоть приветствиянц.

 

Приветствиянь валхт азсть Национальносттнень тевснон коряс Федеральнай агентствать руководителенц заместителец М.Н.Мишин, Саранскяй и Мордовскяй Митрополитсь Зиновий.

 

Кирдемок мяльса съездть регламентонц, съездти сяда тов вятикс азфоль Мордовскяй (мокшень и эрзянь) народть Межрегиональнай общественнай организациянц Исполкомонц членоц, съездонь делегатсь П.Н.Тултаев.

 

Мордовскяй (мокшень и эрзянь) народть Межрегиональнай общественнай организациянц  работанц колга отчётнай доклад тись тя организациять председателец Ю.А.Мишанин. Юрий Александрович тись итокт вете кизонь работати и азозе, мезе сатома маластонь вете кизотнень. 

 

Тяда ингольдень шить ётась организациять Исполкомонц заседанияц, конань эса сембе фкя мяльса азозь Ю.А.Мишанинонь кандидатуранц, штоба тага кочкамс сонь Мордовскяй (мокшень и эрзянь) народть Межрегиональнай общественнай организациянцты председателькс.  VII съездса сембе кирдезь тя мяльть ширенц и максозь вайгяльснон Ю.А.Мишанинонь кандидатуранц инкса.

 

Выступления тись Саранск ошень округонь оцюнясь, Россиянь Финно-угорскяй нароттнень Ассоциацияснон председателец П.Н.Тултаев. Пётр Николаевич шарфтсь мяль сянди, што мокшетненди и эрзятненди кельгомат эсь кяльсна. Содамат, корхтама вельдест. И аф аньцек съезттнень пингста, а эрь шиня. Ванфтомаснон мархта сотф кизефксне, кле, ламода ащихть эсь эздонк.

 

Тя шиня тифоль пяк лама выступления. И сембонь эса кепсевсть тячиень инь таколфты кизефксне.

 

Т.АЛЬШИНА.

 

Снимкатнень эса: съездть работама

 

                                                                                                          пингстонза.

 


31.10.2019 №43
 
 
 

 
НОВОСТИ

Синь арьсесть народоньконь сай пингонц колга

13.08.2020  № 31
 

«Сурский рубеж» фестивалень конкурсс максф 250-да лама заявка

Шумордавсь «Сурский рубеж» патриотическяй моронь фестивалень конкурсс заявкатнень примамасна. Мордовиянь сембе райоттнень эзда и Чувашия Республикаста максф 250-да  лама заявка. Кеняртьфти ся, што конкурсанттнень ёткса улихть и вете кизоса шабат, и 80 кизода сире ветератт. Сембе моротнень эса, конатнень синь морасазь, шарьхкотькшневи странаньконь, сяськоманьконь инкса гордостень марямасна!
«Сурский рубеж» проектсь—гражданскяй обществать виияфнеманкса водендаф Президентскяй грантонь фондть 2020 кизонь васенце этапонц панжада конкурсонь сяськись. Тя военно-патриотическяй моронь фестиваль, кона ётафтови 1941-1945 кизотнень Великай Отечественнай войнаса советскяй народть Сяськоманц 75 кизонь топодеманц и 1939-1945 кизотнень омбоце мировой войнать шумордаманц праздновандамаснон мяльса кирдезь. Водендаф фестивальсь Мордовиянь ломаттнень оцю подвигснон колга историческяй мялямть ванфтоманкса.
13.08.2020  № 31
 

Е.С.Кирдяпина:«Мзярс ванфтови кяленьке, снярс кармай эряма нацияньке»

Ивановка велеса героиняньке шумордазе начальнай школать, а меле содамошит пуропнесь Морд-Полянаса. Школаса Ленась тонафнесь  лац. Пяк кельгозень мокшень кялень и литературань урокнень. «Литературань учителеньке най путнелезе Ленать тейнек примеркс,—лятфнесы Кирдяпинать фкя класса тонафни ялгац Е.И.Чекмарёва.—Урокнень пингста минь сембе старандаме лац-ряц азомс лувфть, максомс характеристика геройхненди, и сембоса кати-мезе ашезь сатне. Тяса терневсь доскати Ленась. Азы фкя вал, и марнек шарьхкотьф, сембось кода эряви. И эзк Нина Павловнаньке юватькшнель: «Молодецат, Лена!».
Нинге шабакс Е.С.Кирдяпинать салселезе мяленц учителень тевсь. Сяс школать шумордамда меле мялецоль тонафнемс тя профессияти. Но вов коса прябалась: сянкса, штоба тумс тонафнема Саранскяи, эрявсть ярмакт, а коста синь сявомс? Эста од стирсь, аньцек получазе аттестатть, лиссь работама. Киза покодсь Зубуса ламповай заводса, кочкась ярмаконя и сембе сяка пяшкодезе мяленц—поступась тонафнема Н.П.Огарёвонь лемса МГУ-нь филологическяй факультету.
13.08.2020  № 31
 

Аш стама тев, кона улель теенза аф вийс коре

Мзярда сань мяльс тяштемс Рузаевскяй райононь Мокшень Пишля велень эряйть, зрнянь кядь алять Фёдор Иванович Юдинонь колга, абондонь, сяс мес ашине сода мезьста ушедомс. Фёдор Иванович канневи стама ломаттненди, конат маштсазь семботь. Аш стама тев, кона улель теенза аф вийс коре. Нят аф шава валхт, а афкукс тяфта. И эрь тевсь, конанди  Мастерсь кярьмоди, кода корхнихть мокшень тя велеса, налхкозь налхки кядьсонза.
Аф кунара Мокшень Пишля велень клубть видеса панжевсь «Мастера и рукодельницы» творческяй мастерскойсь. Ламотнень эвондась мяльсна варжамс вийснон кядьтефнень, тяконь лувксса и кодамать (ткачествать) эса. Но тя ремеслась, аф ваномок рамаф од и кунардонь уликс кодамань статтнень лангс, аф эстокиге макссь пря, сяс мес пцтай юкстафоль и аф курокста мувсь ломань, кона шарьхкодель тя тевса.
Фкя шиня Фёдор Иванович Юдин сувась велень клубу, ванозе тостонь музейста кодамань кунардонь  станть, кона кунара ни ащесь пяльксонь пялькс. Тевонь содай мастерсь эстокиге азозе, кодама пялькст аф сатнихть, а кодама уликсне полафтомат ни, сяс мес таштомсть пингть сюнеда. И аф аньцек азозе, кодама пялькст аф сатнихть, а тиезень синь, кандозень клубу и кочказе станть! Тяфта и арась содафокс, што Фёдор Иванович машты кодамань станца работама. Коса и мзярда тонадсь тянди? Валонзон коряс, тя ремеслась ётась теенза бабанц Устиния Павловнань эзда.  А алянц, Иван Афанасьевичень, мархта лама кизода инголе сон кочксесь кодамань стан.
13.08.2020  № 31
 

АНОКЛАВИ памятник Михаил Девятаевонди

Торбеево посёлкать паркса путови бронзаста монумент легендарнай лётчикти, Советскяй Союзонь Геройти Михаил Петрович Девятаевонди.
Михаил Девятаевонди скульптурнай композициянь тиемать коряс 2019 кизонь мартста Мордовиянь Оцюнясь Владимир Волков пшкядсь Российскяй военно-историческяй обществати, кона, кода азондови РВИО-ть официальнай сайтсонза, кирдезе тя мяльть ширенц.
«Культура» национальнай проектть рамкаса РВИО-сь февральста макссь старт Советскяй Союзонь Геройти М.П.Девятаевонди памятниконь инь цебярь проектонь  арьсемать коряс международнай конкурсти. Коронавирусонь пандемиясь сувафтсь кой-кодама полафткст конкурсти итогонь тиемань пингти. Но аф кунара эксперт-тне ванозь максф творческяй заявкатнень и инь цебярькс лувфоль скульпторть Андрей Коробцовонь и архитекторть Константин Фоминонь проектсна.
13.08.2020  № 31
 
 

Торжественнай собраниясЬ лемтьфоль Строителень шити

13.08.2020  № 31
 

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин