Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

ВЛАДИМИР ВОЛКОВ ВАНОЗЕ ШУФТСТА КЕРСЕМАТЬ КОРЯС ВОЛЖСКЯЙ МАСТЕРТЬ ВЛАДИМИР КШНЯКИНОНЬ ВЫСТАВКАНЦ

Волгоградскяй областень Волжскяй ошста мастерть Владимир Шнякинонь выставкац панжевсь Саранскяйса мордовскяй народть Межрегиональнай общественнай организациянц VII съездонц панжемда инголе. Владимир Шнякин шачемас коре Атюрьевскяй райононь. Владимиронь работанзон оцю  пялькссна, а сон шуфтста керси 30 кизода лама ни, нят картинатненди, портреттненди, шкайликонятненди, шамаваноматненди эсь лацонь рисункас и формас коре рамат. Тяда башка, мастерсь аноклакшни шуфтста изразецт, дивандафты вазат, статуэткат, разнай породань шуфтста скульптурат. Эсь кудонц, конань машты кядь алясь строязе марнек сонць—фундаментть эзда сявомок наличникненди молемс, тиезе шуфтста керсемать коряс музейкс. И вов тяни тифонзон эзда пяльксть сон ускозе историческяй родиназонза.

 

Владимир Волков ванозе республикаса шачф асу мастерть мастерстванц, и отмечазе главнайть—Владимир Кшнякинонь работанза няфнесазь мордовскяй крайть эряензон ваймоснон, синь эсь лацоньшиснон и марнек мирть няеманц тяфтама природнай материалть вельде, кода шуфтсь. Эряви отмечамс,   съездонь делегаттне, конат ульсть содаф резчикть выставкасонза, стане жа пяк дивандасть и макссесть сонь эсь лацонь работанзонды оцю оценка.

 

Мордовиянь Оцюнясь азсь благодарностень валхт волжскяй зрнянь кядь мастерти сонь работанзон мархта содафтоманкса, инжихненди и республикань эряйхненди няфтеманкса. Декоративно-прикладной искусстваса заслугатнень инкса Владимир Кшнякин ульсь казьф «За личный вклад в развитие Республики Мордовия» Мордовия Республикань Оцюнять Почетнай знакса.

 

Сяка жа шиня Мордовиянь Оцюнясь Владимир Волков ванозе И.Д.Воронинонь лемса Мордовскяй республиканскяй объединеннай краеведческяй музейса экспозициять, кона лемтьф 2018 кизонь футболть коряс Миронь чемпионатти. Региононь руководительсь, ваномок выставкать, мярьгсь: «Ужяленди, сембось, мезе ули экспозицияса, аф няфнесы тя событиять масштабонц и значимостенц республикати». Сон азозе: «Сембе минь мяляфтсаськ шитнень, мзярда футболть коряс Миронь чемпионатонь матчне ётнесть Мордовиять столицаса. Кодама ульсь эста кенярдемась, разнай национальностень и верань тёжятть ломанень ёткса марстонь сотксонь кирдемась, Саранскяйть ульцянзон эса ялгаксшинь хороводонь ётафнемась, мзяра ульсь инжида, историяда, красочнай мероприятияда—мезське тянь эзда штоба афоль ёта минь мялямстонк!»

 

Владимир Волков мярьгсь Мордовия Республикань Культурань, национальнай политикань и архивнай тевонь министерствати марса музеень специалисттнень мархта кочкамс Мордовияса ётафтф 2018 кизоня футболть коряс Миронь чемпионатть коряс сембе материалхнень. «Тяса эрявихть вешемс фото- и видео- материалхт ломаттнень личнай архивстост и сятнень, кие заняфоль Мордовияса чемпионатть ётафтоманц мархта, символхне и 2018 кизонь МЧ-онь историятне—кочкамс эряви сембе цебярть и значимайть!»

 

Примаф решения, што экспозицияда кармай кафта—И.Д.Воронинонь лемса Краеведческяй музейса и «Мордовия Арена» стадионть территорияса.

 

Эряви азомс, што экспонаттнень мзярошка талекаснон уликс выставкати максозень музейти республикань Оцюнясь. Синь лувкссост—сувенирхт, конатнень максозь ошнень-организаторхнень посолсна и оцю инжихне, конат сашендсть Саранскяи мундиалень ётафтома шитнень, а тяфта жа, кепотьксонди, Владимир Волковонь личнай ID-фаноц. Васедемать шумордамста, региононь руководительсь максозень музейти кизонь Миронь чемпионатста сембе матчнень, конат ётафтовсть Саранскяйса мундиалень шитнень, игрокснон автографснон мархта ниле футбольнай топнень, тяконь лувксса—Криштиану Роналдонь автографонц мархта.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022