Поиск по сайту: 
 

Архив
 март 
 2020 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Наши мокшанские сыновья и дочери

САРАНСКЯЙСА ПАНЖЕВСЬ МОКШЕНЬ АСУ СКУЛЬПТОРТЬ В.П.КШНЯКИНОНЬ ВЫСТАВКАЦ

Владимир Павлович эряй Волгоградскяй областень Волжский ошса, но унксонза сонь Мордовияннет. Тядяц шачемас-касомас коре Атюрьевскяй райононь Арга велеста, аляц—тяка райононь Красновкаста. Сонць Владимир Павлович хуш шачсь аф Мордовияса, тядянзон-алянзон шачема уженясна теенза пяк питни. Скульпторсь лац содасы родной кяленц, пара мяльса корхтай мокшекс. Творческяй псевдонимоц сонь—«Мокша».

 

В.П.Кшнякин колмогемонь кизода ламос заняф мялень салай тевса—шуфтста керси эрь кодама рамат, статуэткат, вазат-месть. Тянди сон тонадсь атянц эзда, кона ульсь цебярь плотникокс. Волжский ошса эсь кудонц Владимир Павлович тиезе афкуксонь музеенди. И вов тяни мзярошка работанц скульпторсь пачфтезе Мордовияв.

 

«Эрьзянь койса» лем ала выставкать панжема пуромкшнесь лама ломань. Синь ётксост В.П.Кшнякинонь земляконза, ялганза, радня ломаненза, а стане жа сят, кит васенцеда кульсть-содасть скульпторть колга и оцюволь мяльсна содафтомс сонь творчестванц мархта. Тясоль Мордовия Республикань культурань, национальнай политикань и архивнай тевонь министрсь А.М.Чушкин. Кода мярьгсь Анатолий Михайлович, пуроптф экспозициясь эсь лацонне. Эсонза крхкаста няфтьф Россиянь нароттнень культурасна.

 

—Эрь тифксть эса няеви авторть аф аньцек машты кядец, но и ваймоц, эрь экспонатть эзда моли седиень лямбоня,—мярьгсь министрсь.

 

Сяда тов вал максфоль Мордовскяй (мокшень и эрзянь) народть Межрегиональнай общественнай организациянц председателенцты Ю.А.Мишанинонди и организациять Исполкомонц председателенцты А.С.Лузгинонди. Юрий Александрович и Александр Степанович Мордовияста, улема, васенцекс содасть мокшень асу скульпторть В.П.Кшнякинонь колга. Синь эстокиге састь мяльс молемс машты кядь мокшалять шири. Мзярда Волжскяйса няезь Владимир Павловичень кудонц-музеенц, марнек сонь тифксонзон, аф азовомшка дивандасть.

 

—Ламонцне ёткстонк, улема, арьсекшнихть, што мокшэрзянь талантливай ломаттне эряйхть тязк—Мордовияса. Афкукс синь сратфт оцю странаньконь келес. И минь путнетяма инголенк задача вешендемс синь, мушендомс и содафнемс маштомошиснон мархта республикань эряйхнень. Мзярда няеськ В.П.Кшнякинонь работанзон, сафоль мяльс тиемс семботь, штоба пачфтемс синь Мордовияв,—азозе Ю.А.Мишанин.

 

Кода азозе А.С.Лузгин, выставкать пуроптомаса оцю лезкс макссь «Октябрьская» агрофирмать генеральнай директороц И.С.Андин, кона шачемас-касомас коре стане жа Атюрьевскяй райононне.

 

Меколи выставкань ваныхнень инголе корхтась сонць скульпторсь.

 

—Кельгома землякт! Хуш мон и эрян ичкозе тяста, седиса-ваймоса фалу мархтонтан,—лямбоста пшкядсь Владимир Павлович пуромфненди.—Тячи мон маряса прязень афкукс павазу ломанькс и тя пингс аф верондаван сянди, што выставказе няфтеви тядянь-алянь родной масторсон.

 

В.П.Кшнякин азондсь кода, мезьста и мзяра пинге тиенди эсь скульптуранзон эса, кие теенза лезни и стак тов. А пуромфне тя пингть оцю мяльса ванондозь эрь экспонатть.

 

Выставкась кармай молема 2 ноябрти самс.

 

В.П.Кшнякинонь творчестванц и эряфонь кинц колга сяда келиста лувода газетаньконь сай номерсонза.

 

 

О.КОЛЕДИНОВА.

 


31.10.2019 №43
 
 
 

 
НОВОСТИ

ПЕРЯМС КИТЬ КОРОНАВИРУСНАЙ ИНФЕКЦИЯТИ

20.03.2020
 
 

МОРДОВИЯНЬ ГОССОБРАНИЯНЬ ДЕПУТАТТНЕ ШНАЗЬ РФ-нь КОНСТИТУЦИЯТИ ПЕТЬКСНЕНЬ

12 мартста Саранскяйса ётась Мордовия Республикань Государственнай Собраниять 44-це сессияц.  Сонь шинь повесткасонза фкя инь важнай кизефксокс ульсь РФ-нь Конституцияти петькснень колга законть ванондомац. Законти основакс арасть тезисне, конат азфтольхть РФ-нь Президентть Владимир Путинонь мархта Федеральнай Собранияти эсь Посланиясонза. Президентскяй ушетксне сяда тов ульсть келептьфт предложениятнень мяльс сявозь, конат састь рабочай группати, кона пуроптф государстваньконь вятиенц мархта.
 

 

Кода азозе шинь повесткати лихтьф тя кизефксть коряс дискуссиять ушедомстонза МР-нь Госсобраниять Председателец, «Единая Россия» партиянь политсоветть Секретарец Владимир Чибиркин, РФ-нь Конституцияти полафтксне водендафт странаньконь суверенитетонц обеспечендаманцты, граждаттнень социальнай гарантияснон кемокстамаснонды, политическяй системать виияфтоманцты, вешфкснень  касфтомаснонды ломаттненди, конат занцихть государственнай пяк эрявикс должностть.

 

20.03.2020
 

МОРДОВИЯСА 7750 СЕМЬЯТИ МАКСФ РЕСПУБЛИКАНСКЯЙ ТЯДЯНЬ КАПИТАЛСЬ

Тяниень пингть, кода марнек странаса, стане и минь республикасонк оржаста ащихть демографиянь кизефксне. Мордовиянь Оцюнясь В.Д.Волков Государственнай Собранияти Посланиянц эса азозе: «Маластонь кота кизотнень тейнек эряви пяшкодемс афкукс историческяй задача—касфтомс республикань населениять одс шачфнень лувксснон касфтоманц вельде, мезсь  апак сатнеколь комсь ветие кизода ламос». Эряви азомс, мекольдень пингть Мордовияса аф кржа тиендеви од, лама идень семьятнень ширеснон кирдеманкса. Эряфс ётафневи программатне, примсеви мератне каннихть результатт. Тяфта, вете кизоста лама идень семьятнень лувкссна Мордовияса кассь 1,5 тёжяньда. Тяниень пингть республикаса эряй 6685 семья, коса касфтовихть колма и сяда лама шаба. Оцю лезксокс ащи семьятненди тядянь капиталсь, кона тя кизоста сявомок Россиянь Президентть В.В.Путинонь мярьгоманц коряс, кармай      макссевома васенце идень шачфтыхнендивок. Минь республикасонк 2012 кизоста сявомок тевс сувафтф республиканскяй тядянь капиталсь. Кинди сон максови, кодама лувксоц и мезень лангс ули кода карьхцямс сонь? Тянь колга корреспондентоньконь мархта корхнемста азондсь Мордовия Республикань социальнай защитань, трудть и населениять занятостенц коряс министрть заместителец С.И.Шувалова.
 

19.03.2020  № 10
 
 
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин