Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

В.П.Кшнякин: «ТОНАФНЕНЬ С.Д.ЭРЗЯНЬ РАБОТАНЗОН ЭЗДА»

Кода ни пачфнеськ газетаньконь ётай номерсонза, Мордовскяй (мокшень и эрзянь) народть Межрегиональнай общественнай  организациянц Всероссийскяй VII съездонц карша Саранскяйса пуроптфоль-няфтьфоль машты кядь мокшалять В.П.Кшнякинонь выставкац. Владимир Павлович шуфтста керси вазат, скульптурат, статуэткат. Но инь мялень шарфтыхть мастерть кядялда лисьф раматне, конат ладяйхть портретонди, картинанди, ваноманди и нльне шкаень ликонянди. Эсь кудонц, конань фундаментста сявомок наличникненди молемс мокшалясь строязе эсь кядьсонза, тиезе шуфтста керсемать коряс афкуксонь музейкс.
И.Д.Воронинонь лемса Мордовскяй республиканскяй объединеннай краеведческяй музейса пуроптф экспозициять ванома сашендсь лама ломань. Скульпторть работанзон мархта содафтсь и Мордовия Республикань Оцюнясь В.Д.Волков. Владимир Дмитриевич макссь оцю оценка В.П.Кшнякинонь маштомошинцты, азозе, што Владимир Павловичень сембе тифксонза крхкаста няфнесазь мокшэрзянь народть эсь лацоньшинц, козя культуранц. Декоративно-прикладной искусстваса заслуганкса В.П.Кшнякин казьф «Мордовия Республикать виияфнеманцты личнай путксонкса» Мордовия Республикань Оцюнять Почетнай знаконц мархта.
В.П.Кшнякин эряй Волгоградскяй областень Волжский ошса, но унксонза сонь Мордовияннет. Владимир Павлович фалу мяляфты историческяй родинанц колга, маряй гордость национальностенц инкса. И хуш пцтай сембе эряфоц етась руз ёткса, сон аф кальдявста и пара  мяльса корхтай мокшекс.
Выставкать пингста асу скульпторть мархта удалась корхнемс минь корреспондентоньконди. Владимир Павлович оцю мяльса отвечась сонь кизефксонзон лангс.
—Владимир Павлович, пароль содамс тядятнень-алятнень колга, костоннет синь шачемас-касомас коре, коса белай свету эвондать тонць?
—Тряйне-касфтыне Атюрьевскяй райононнет. Тядязе, Анна Степановна, шачсь-кассь Арга велеса, алязе, Павел Григорьевич—Красновкаста. Мзярда рьвяясть, аф лама пинге эрясть алязень ширеса, а меле направленияс коре прважафтольхть мянь Пермскяй области. Тоса мон и шачень.
Тядязе-алязе простой рабочайхтельхть. Тядязе эряфоньберьф покодсь дояркакс. Алязе кярьмотькшнесь разнай тевс, ульсь трактористокс, сторожкс. Мондедон башка семьясонк кассть нинге колма шабат. Тейне ульсь ветешка-котошка киза, мзярда етаме эряма Волгоградскяй области. Тоса мон эрян тячемс.
—Тядяцень-аляцень шачема уженясост сашендовсь улендемс?
—Васенцеда Аргаса улень школьникокс. Тядязень брадоц сашендсь ширезонк инжикс, а прважамстонза автобусти юпадень монга. Пцтай киза эрянь Аргаса. Якань тястонь школав. Ся пингста сявомок мялямозон лядсть велень мокшаватнень мазы щамсна, седиень токай моросна и сиде моронясна, конат кайгсть ульцятнень келес илатнень пингста.  Мяляфтса Очижить, мзярда велеть кучкаса  стяфневсь оцю нюрям, мархтонза нюрьсесть и шабатне, и оцюфне.
Тяда меле Аргаса улень аньцек 2008 кизоня. Велесь, конешна, ламода полафтсь. Тяса-тоса няень катф кутт, сор тишеса касф кит. Тяза пцтай ашесть ляда од ломатть, аньцек эряфкшуфт.
—Атюрьевскяй районца улихть радня ломаттне?
—Аргаса эряй родной аказе, Чудинка велеса—троюроднай сазорозе. Кой-кит раднянень эзда тяни эряйхть Саранскяйса. Тя, кепотьксонди,  «Октябрьская» агрофирмать генеральнай директороц И.С.Андин. Иван Семеновичень тядяц и монь бабазе—родной акат-сазорхтольхть. Тияк мялезе азомс И.С.Андинонди сюконямань валхт, мес макссь оцю лезкс Мордовияса выставказень пуроптомаса и фалу кирнесы ширезень. Иван Семенович содафтомань цебярь ялганц, ингольдень прокурорть, мокшень пара ломанть П.Е. Сенькинонь мархта, сон стане жа Атюрьевскяй районцта. Тяни, надиян, Павел Ефимович и монь цебярь ялгазе.
—Коста сявовсь-эвондась эсот шуфтста керсемать коряс асушись, ульсть родсонт-плямасонт тонь лацот мастерхт?
—Тядязе тейне азонкшнезе, што атязе сафтозе плотниконь тевса, цють ни аф инь цебярь плотникокс лувондовсь марнек Атюрьевскяй районца. Шапондсь срупт, стройсесь кутт, банят. Шуфтть мархта работама маштсь алязевок, тиендсь стулнят, шрат, тумбочкат. Улема, синь эздост етась тейне тя маштомошись. Виде, алязе мзярдовок ашемань тонафне шуфтста керсемати. Мон ванондонь ширде, кода сон работай, и тя тевсь коль сяда пяк салсезе мялезень. Весть ульцяса няине, кода церашабась тись моргу шуфта пакшста кинжал. Монь сяшкава дивандафтомань ся, што сельмос аф пови мокорь пеняста ули кода тиемс тяфтама мялень салай инструмент, монценьге эвондась оцю мялезе тиемс мезевок эсь кядьсон. Но шуфтть сявине кядезон аньцек лама кизонь етазь, а ся пингс аф кальдявста работань севонть мархта, тиендень эрь кодама налхкшкат.
—Кода ина сать шуфтста керсемати?
—Тя лиссь Сибирьса. Одста мон кельгине путешествовандамазень, тянкса нльне поступань тонафнема речной училищав, штоба ведьге уендезь ваномс марнек белай светть. И вов кельме ширеса улемстон, лядьсть мялямозон Арга велень мокшаватне, мазы щамсна. Эвондась мялезе кандомс тя мазышить шуфтть лангс. Тифозе тусь мялезон. Меле тиень тага фкя статуэтка, а тоса колмоцеть, нилецеть… Тонафтыезе ашель, монць тонаткшнень. Лувондонь лама книга, ванондыне содаф мастерхнень работаснон. Цебярь примеркс тейне ащесь мокшэрзянь скульпторсь С.Д.Эрьзя, тонафнень сонь работанзон эзда.
—Тонь пяк мазыхть шуфтста керсеф раматне, синь бта ёфксоннет.
—Мзярда шуфтста керсень сатомшка статуэтка-мезе, кармань няфнемост аф фкя лацонь конкурснень, выставкатнень эса. Фкя тяфтама конкурсса содафтонь художникть Б.И.Маховонь мархта. Сон и кошардомань тиендемс картинанзонды рамат. Лиссь аф эстокиге, меле тевозе саворне тусь.
—Лама пингта эрявксни рамать или вазать анокламанкса?
—Кой-конатнень лангса сашендови работамс киза и сяда лама. Васенда кочкама эрявикс материалсь, меле сон косьфтама, лаксемат моргу вастонза. Аньцек тяда меле ули кода кярьмодемс керсемати. Мзярда вазась или рамась анок, сон архтови лакса и тага косьфтави.
—Кодама шуфттнень ноляйсайть тевс?
—Сяда ладяйхть керсеманди тумось, топольсь, поюсь. Старандан нолямс тевс аф касы шуфтонятнень, а сятнень, конатнень веляфтозень вармась. Тянь мархта мон бта макссян теест од эряф.
—Тяниень пингть мезень лангса работат?
—Мялезе тиемс шуфтста Советскяй Союзонь Геройть М.П.Девятаевонь скульптуранц и кярьмодень ни тевс. Арьсян няфтемс геройть подвигса.
—Владимир Павлович, шуфтста керсемаса заняфат колмогемоньда лама киза, мзярошка работа тиеть тя пингста?
—Сембе аф мяляфтовихть. Тяниень пингть кудсон-музейсон ванфтови кафта сятта лама скульптура-мезе. Ламоц тифксонень казендине ялганенди, содафоненди.
—Керсемада башка кельгома тевце ули?
—Оцю мяльса лувондан книгат. Ульсь пинге, мзярда ерань пуроптомс  кудонь библиотека.
—Спасиба, Владимир Павлович, корхнеманкса! Од сатфкст тейть творчестваса!
О.Евдокимова.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022