«МОКШЕНЬ КЯЛЬСА КОРХТАМАТЬ УЛИ СОНЦЕНЬ ТАНЬФОЦ, КОНА МЕЗЬСОВОК ЛИЯСА АФ ПОЛАФТОВИ»

Газетаньконь тячиень номерсонза мяленьке содафтомс лувиеньконь  мокшень асу цёрать Николай Лёвинонь мархта. Сон тонафни Н.П.Огарёвонь лемса Мордовскяй госуниверситетонь филологическяй факультетса. Аделазе бакалавриатть «Журналистика» специальностьс коре. Тяни пуропни содамошит магистратураса.
—Николай, азонтт аф лама эсь колгат.
—Тейне 22 киза, шачень и касонь Саранск ошса. Школаса тонафнемста эвондась мялезе арамс журналистокс. Поступань тонафнема Н.П.Огаревонь лемса Мордовскяй госуниверситету. Нинге тонафнемста ушедонь работама «Вайгель» национальнай радиостанцияса корреспондентокс. Вятень радиопередачат мокшень кяльса. Журналистонь профессиясь коль сяда пяк салсесы мялезень. Тя стама тев, коса аш кода ащекшнемс фкя вастса, эряви  лама содамс, мезе лиссь одня и маштозь тянь пачфтемс ломаттненди. Ули оцю мялезе поладомс сяда тов тонафнемазень Москувонь вуснень эзда фкаса.
—Николай, тон, аф ваномок сянь лангс, што шачеть и эрят ошса, пяк лац корхтат мокшекс. Кие тонафтонзе мокшень кяльти?
—Сюкпря шнаманкса. Шачема кялень содамошинень инкса мон сюконян тядязти и алязти. Семьясонк минь фалу корхнетяма мокшекс. А школаса тонафнемстон сембе каникулатнень ётафнине щавазень и щятязень ширеса, Атюрьевскяй райононь Од Велеса.
Щятязе, Захар Иванович Путяйкин, лама вий путсь уноконзон шачема кялень содайкс касфтоманкса. Сон вестьке ашезь машне лангозонк, фалу виде ваймот корхнесь мархтонк аньцек мокшень кяльса. Сидеста лятфнеса, кода сявондемазь велень ляи калонь кунцема. Улема, сяс тячемс пяк кельгса тя тевть. Ужяль, тяни щятязе аш шиса, но сонь кельгомац эсь шачема народонцты эряй монь эсон.
—кода арьсят, мезе эряви тиемс, штоба ванфтоволь, афоль юма кяленьке? Тяни шуроста васьфтят ошса эряй од ломатть, конат лац корхтайхть мокшекс.
—Сембось, койсон, моли семьяста. Кда кяльсь кармай кайгома семьяса, сон мзярдовок аф юмай.
Тевсь нинге сянь эса, што тяни од ломаттне лама пинге ётафнихть интернетса, кирдихть фкя-фкянь мархта соткст социальнай сетьтнень, мессенджерхнень вельде. Ломаттне полафтсть, кармасть кржа васетькшнема фкя-фкянь мархта, эрек корхнемась арась шуростонь тевкс. А телефон вельде сёрматкшневи сообщениятне сидеста тяшневихть рузонь кяльса, сяс мес тя тёждя и курокста. А кда мяльце сёрмадомс мокшекс, улеза кирдемшкаце, сяс мес телефононь программась аф шарьхкодьсы тя кяльть и сонць полафнесыне валхнень рузкс. Сяс пара улель, кда арьсемок од ломаттнень колга, а тянь вельде кяленьконь сай пингонц квалма, кочкавольхть-тиевольхть электроннай мокшень валкст, конат нолдавольхть тевс клавиатуранди приложениякс. И тя приложениять вельде улель кода вишкста сёрматкшнемс мокшекс сообщеният. Вдь шачема кяльса мялень пачфтемать ули сонцень таньфоц, кона мезьсовок лияса аф полафтови.
—Журналистикада башка, мезсь нинге салсесы мяльцень?
—Мон ялгафтан шумбра эряфонь койхнень мархта. Кода тонафты народнай смузьшись, шумбрашить эряви ванфнемс одстокиге. Кельгса спортть, нинге ёмланяста ушедонь якама греко-римскяй бароцямать коряс секцияв. Лисендень сяськикс республиканскяй пялькстоматнень эса.
—Кода арьсят, мезсь од ломаттнень эряфса инь васенцесь?
—Васенцесь, ломанти эряви мумс эряфса эсь вастонц. Фалу касфнемс содамошитнень, аф лотксемс сатфть лангс. Тяка пингть, аф юкснема ваймоть колга, ломанень цебярь качестватне улест васенце вастса, штоба ярмаконь добувамать мельге панемста аф арамс «Куйгорожкс». Тя образсь лац няфтьфоль В.И.Мишанинать пьесанц коряс путф спектакльса, конань премьерац ульсь аф кунара Мордовиянь национальнай драматическяй театраса. Кода  аф ужяль, койсон, тяниень пингонь ламоц од ломаттне пяк шарфтыхть тя образть лангс.
—Спасиба корхнеманкса.
Т.ПЕТРОВА.