Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Валерий Алексеевич Кечкин

Шачсь В.А.Кечкин 1939 кизоня Инсарскяй райононь Кочетовка мокшень велеса учителень семьяса. Аляц шавовсь Великай Отечественнай войнаса, сяс шабакс пингоц ётась стакаста. Но, аф ваномок тянь лангс, сон пяк лац тонафнесь школаса, лувондовсь фкя инь цебярь, инь способнай ученикокс. Тячемс Кочетовкань школаса маряйхть гордость сембонди содаф выпускникснон инкса.

 

Сяс аф случайна школать аделамда меле мокшень цёрась тёждяста поступай Пензань велень хозяйствань институту, конань шумордазе 1961 кизоня и получась инженер-механиконь специальность.

 

1961 кизоста сявомок 1965 кизоти молемс работай Инсарскяй райононь Желябовонь лемса совхозонь старшай, а сяльде главнай инженеркс. Сяльде вете кизот ульсь сяка жа районца «Верхнелухменский» совхозонь директоркс, тяда меле 1970-1972 кизотнень вятьсы велень хозяйствань Инсарскяй райуправлениять.

 

Ня васттнень эса лац  няфтевсь управленецонь асувоц, ломаттнень мархта маштомац, фалу вешендемань киса ащемац.

 

Тяда меле Валерий   Алексеевич тонафни Москуса         КПСС-нь ЦК-ть видеса высшай партийнай школаса. Сонь шумордамдонза меле колма кизот работай КПСС-нь Мордовскяй обкомть аппаратса. 1977 кизоста сявомок 1983 кизоти молемс ульсь «Сельхозхимия» республиканскяй объединениянь председателькс.

 

1983 кизоня В.А.Кечкин кочкави КПСС-нь Инсарскяй райкомонь васенце секретарькс, покоди тя вастса кота кизот. Сонь руководстванц пингста Инсарскяй районць арась республикаса фкя инь передовойкс.

 

1989 кизоста сявомок 1992 кизоти молемс работай Мордовскяй ССР-нь Министронь Советонь  Председательти васенце заместителькс, Государственнай агропромышленнай комитетонь Председателькс. 1992 кизоня арась республикань Имуществань фондонь Председателень заместителькс, а 1995 кизонь январьста—теенза Председателькс. Тяка кизонь октябрьста кочкаф Мордовия республикань Государственнай Собраниянь Председателькс.

 

Валерий Алексеевичень работань козя опытоц, организаторонь оцю асувоц, тевть содамац, эряфонь активнай позицияц лездсть теенза путомс достойнай вклад республикань властень высшай представительнай и законодательнай процессти.

 

Сон маштсь кемокстамс Госсобранияса творчествань и фкя-фкянь шарьхкодемань обстановка, ладямс депутаттнень ёткса конструктивнай, созидательнай работа, мумс марстонь кяль исполнительнай властть мархта.

 

Тячи, улема, аф кармай лишнайкс лятфтамс сянь, кодама стака условияса 1995 кизоня В.А.Кечкинонди савсь ушедомс эсь деятельностенц спикеронь вастса. Республикась крхка кризиссоль. Сон кеворсь и кеворсь алу, народнай хозяйствать лангса управлениясь прокс юмафтфоль. Ломаттне ляткшнесть работафтома и зарплатафтома, пенсионерхне—пенсияфтома. Коль кассь преступностсь.

 

Аф шумбраль и общественно-политическяй обстановкась. Ламоль политическяй карань-каршек ащемада, личнай амбицияда, каршек ащевсть и российскяй власттненди.

 

Вов мес основной задачакс республикань руководствати, законодательнай и исполнительнай оргаттненди ульсь ся, кода мрдафтомс Мордовиять пара лемонц, касфтомс сонь авторитетонц. Сявфоль курс общественно-политическяй обстановкать кемокстаманцты и экономикать лангса управлениять ладяманцты. Лиякс мярьгомс, кярьмотьфоль пяк важнай и эрявикс тевс. И тя работать сатфксонза содафт. Миньцонк цебярьгофтовсь общественно-политическяй климатсь. Мокшэрзянь крайсонк эряйхнень ваймоса-ёньца кемокстасть республикать главнай козяшинза: согласиясь, порядкась, созиданиясь и стабильностсь. Сембось тя и  вярдень властть, васендакиге, конешна, Президентоньконь В.В.Путинонь ширде оцю лезксонь максомась, панчсть Мордовияти ки фталу ляткшнихнень эзда лисемс инголи молихнень ёткс.

 

Мялень кеподи сатфкст кармаме сатнема и промышленностьса, и велень хозяйстваса. Башка мяль шарфтфоль социальнай ширети. Вдь тячи пцтай марнек мокшэрзянь крайсь ушты, пиди-пани природнай газса. Велень куттненди водендакшневи водопровод. Эрь велеса—цифровой телевидения, мобильнай связь, интернет. Эрекста строявихть республикаса социальнай объекттне, тячиень вешфксненди отвечай школатне, больницятне, культурань учреждениятне, спортивнай сооружениятне.

 

Ня результаттне афольхть уле тяфтама оцюкс, кда республикаса афоль уле согласия, фкя-фкянь мархта сотксонь кирдема. Миньцонк Госсобраниясь фалу эсь тевонц мольфтьсы республикань Оцюнять и исполнительнай оргаттнень мархта кеме сотксонь кирдезь, марстонь кялень мушендозь. И тяса оцю заслугац В.А.Кечкинонь.

 

Валерий Алексеевичень эряфонь девизоцоль—вестевок аф лотксемс сатфть лангс, фалу ваномс и молемс инголи. Сон эряскодсь тиемс кода можна сяда лама цебярьда эсь республиканцты, эсь народонцты. Сон няфнесь ломанти, Родинати, родной крайти кельгомань, стакатнень-сталмотнень инголе аф потамань пяк цебярь пример. Сон лац шарьхкодезе эсь оцю роленц и ответственностенц Мордовиянь эряйхнень инголе, ответственностенц эсь масторонц сай пингонц инкса.

 

Меколи азсаськ, Валерий Алексеевич Кечкин Родинать инголе оцю заслуганзон инкса казьфоль «Знак Почёта», Дружбань ордеттнень мархта, медальса, республикань Славань II и III степенень орденца. Теенза максфоль «Мордовия Республикань велень хозяйствань Заслуженнай работник» почётнай лем. Сон казьфоль Рузонь православнай церькавонь фкя инь оцю казнеса—Благовернай Князть Даниил Московскяень II степенень орденца.

 

И.Саргин.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022