МЕЗЕ АНЬЦЕК АШЕЗЬ ЁТА ЛАНГАНЗА…

Анастасия Ильиничнань эряфонь киц, кода няйсаськ, кувака, но пяк стакаль и пяшксель нужада. Сонь сонцень ашель семьяц, аеркс войнась пяк обжазе—ашезь ляда теенза мирде-пола, сяс сембе эряфонц ётафтозе ськамонза—идьфтома. Шачсь сон Ёжка велеса 1931 кизоня крестьянонь-середняконь семьяса. Сяс мес аляц ашезь сува колхозу, семьясна раскулачендафоль. Нельгозь кядьстост сембе жуватаснон, пирьфснон, нльне баняснонга, кадозь аньцек шава кудть.

1939 кизоня велесост ульсь оцю пожар. Палсь мянь 12 куд, синь ётксост и Наста бабань алянц кудоцка.

Мзярда теенза ульсь 8 кизот, апак учсек кулось тядяц. Алянцты, кода «лишенецонди», кивок ашезь лезда строямс куд. Мувсть аньцек пара вайме ломатть, конат нолдазь синь семьяснон квартирас.

А мзярда ушедсь Великай Отечественнай войнась, алянц Илья Николаевичень, эстокиге сявозь войнав и декабрьста ни сась эздонза похоронка.

Кемонь кизоняса Наста баба Марина аканц мархта лядсть урозкс. Ашель синь аф аньцек тядясна-алясна, но и синцень эряма вастсновок и кодамовок паршисна.

19 киза синь эрясть ломань пяльге-квартирава, раднянь и пара вайме ломанень ширеса.

Аньцек 1958 кизоня синць аканц мархта рамасть ёмла кудня и сембе эряфснон ётафтозь шачема велесост. Школав якась Наста баба аньцек 7 кофт васенце классу. Но лувома и сёрмадома меле сонць тонадсь. Мялец тонафнемс оцюволь, а нужась школав ашезе ноля: ашель мезьса якамс ломань ёткс и рамамс ручкат-месть.

Сембода стакаль синь эряфсна войнань пингть. Няйсть акатне-сазорхне лама вачаши, ашельхть лангсост вестевок цебярь щапт-каряпт, кизонек-тялонек якасть карьса. Пряснон трязь анцезь шабра велева и ломань пяльге работазь кши суском лангс.

Уроскятнень велеса ужяльнезь  пара вайме ломаттне—макссесть теест ташта щапт-каряпт, пильгозост карьхть-пракстат, венепнесть праздник шитнень кой-кит и танцти сускомнят. Тячи тянь Наста баба семботь лятфнесы сельмоведеньбачк. Пара валса и озондозь лятфнесыне сон сембе ся пара вайме ломаттнень, конат синь ужяльнезь и ашезь када вачеда кулома.

Эсь эряфонц азондомста сонь фалу шудесть сельмоведенза. И вов мезе сон лятфтась тейне:

—Аф аньцек ломань пяльге, но и колхозсовок мон работакшнень шабакскиге. Колхозса сембода сидеста тоса, коса ульсь общественнай питания. Мзярда шувондоме колхознай паксяса кшни каймоса и пяшкотькшнелеськ нормать (шувомс эрявсь 70 сажень кувалмоц и фкя сажень келец) минь аннемазь кафксть шити—обедста и работать аделамда меле. Макссесть 2 кши кочамнят, кружка лофца, шаваня ям и сивольфтома лям.

Шить работаме колхозса, а работада меле пялевес эсь умасонк-пересонк. Якань ламоксть аказень мархта «батрачендама» козялянь пяли. «Зарплата» макссесь азорсь ярхцамбяльса, ташта щамняса-мезьса.

Работакшнень фалу коса повсь, коза кучсемань колхознай бригадирсь. Сашендовсь работакшнемс и веньгучкать. Мяляфтса тячемс: веть дежурселеме пакся кучкаса сокай тракторть маласа. Тракторсь сокамста пяк эжендсь, эрявсь мельганза каннемс ведь паксять келес, коза лотксесь тракторсь.

Колхозсь кучсемань мянь Кировскяй области войнань пингть лесоразработкас, вербовкас коре якань Ярославскяй области торфонь таргама. Колхозса пеелемса лядендень сёра, кочкондонь паксят, сотнекшнень пулфт, веньгучкать тяльсеме молотилкаса.

Алашаса усксеме сёра Ковылкинань элеватору, а мзярда сявондезь сембе алашатнень войнав, тунда видьмотнень паксяв  и урожаень урядама пингть паксяста сёроть ускселеськ крандаскаса эсь лангсонк.

Мон кизонек-тялонек фалу якалень карьса, лия пильксщамане ашельхть.

Войнада меле 12 киза работань свинаркакс, тувот аннень-пурхцозафнень, а 1961 кизоня, мзярда минь «Валда ян» колхозоньконь шовордазь Троцянь «Гигант» колхозть ёткс, савсь работамс тейне разнай тевса: тишень урядамста, тинголангса, шужярень капань марамста, модамарень и якстеряпсонь таргамста, каньфонь урядамста, снавонь таргамста и лия вастса. Сембось афи мяляфтови, кодама колхознай тевса аньцек ашень работакшне.

Но куломозон аф юкстави вов мезсь:

—Кочксеме аказень мархта колхознай паксяса сёрапрянят. И минь кундамазь полевойсь, вятемазь правленияв. Колхозонь «баярсь» тя «преступлениять» инкса валхтозень сембе работаф трудошинень, хуш мон колхозса работакшнень. Монь нинге аф сяшкава пяк наказамазь, а кой-кона велеряеньконь 2-3 фунтт сёронь «саламанкса», конатнень мушендозь зепстост или повстост, нльне озафнезь тюрьмав. Цебярсь эряфса юксневи, а вов тяфтамсь—вестевок аф нардави мялямста. Тянь мархта Анастасия Ильинична Тремаскинась аделазе мархтон корхтаманц. Лац трудендаманкса сонь улихть колхозонь и правительственнай лама казнедонза. Кепотьксонди, казьф «За доблестный труд в ВОВ 1941-45 гг.», «За трудовое отличие» и лия медальса.

Тячи фронтонь и тылонь труженицась эсь эряфонц лангс аф пеняцяй. Кода мярьгсь сонць: «Эрь шиня сюконякшнян Шкайти кувака эряфонь максоманкса и Мария Николаевнанди тейне оцю честень путоманкса».

А тейнек, луви ялгат, вестевок аф эрявихть юкснемс тяфтама ломаненьке, конат няйсть лама нужада. Вдь синь шинек-венек трудснон вельде ульсь сатф Великай Победась, аралаф странаньке оцю зиянда, максф тейнек мирнай эряфсь.

А.ТРЕМАСКИН,

«Мокшень правдать» аф штатнай корреспондентоц.

Ковылкинскяй районць.