Поиск по сайту: 
 

Архив
 март 
 2020 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Национальная тематика

Литературно-музыкальнай иласта

Литературно-музыкальнай илать, коза пуромкшнесть Г.Н.Макшевать творчестванц кельгиенза, лямбе валса панжезе П.С.Кирилловонь лемса краеведческяй библиотекать  руководителец Н.М.Бояркина. Нина Михайловна пачфтезень илас сафненди, конатнень ёткса ульсть садику якай и школаса тонафни шабат, студентт, эряфкшу ломатть, национальнай культурань, образованиянь, литературань, общественнай организациянь, Саранск ошень Администрациянь представительхть, эсь мялензон мокшэрзянь модать асу ломанензон квалма. И фкясь синь эздост—Г.И.Сураев-Королёвонь лемса «Келу» ансамблень солисткась Мордовия Республикань Заслуженнай артисткась Г.Н.Макшевась. Сон ансамблень лия исполнительхнень мархта эсь творчестванц  вельде путни путкс Мордовия Республикаса морамань национальнай культурать аф аньцек ванфтоманцты и   виияфтоманцты, но и келепти эсонза Россиянь лия регионга, коса компактнайста эряйхть мокшэрзят. Сяс, мзярс «Келу» ансамбльса кармайхть улема тяфтама творческяй ломатть, кода Г.Н.Макшева, мокшэрзянь морамань национальнай культурась фалу кармай касома-виияма ки лангса.

 

Сяда тов литературно-музыкальнай илать мороса поладозе Г.Н.Макшева. Сон моразень моротнень, конатнень сёрмадозь Нина Кошелева, Василий Радионов и Мордовиянь лия содаф композиторхне Республикань Народнай поэттнень Илья Девинонь, Сергей Кинякинонь, Заслуженнай поэтть Рая Орловать  и мокшень и эрзянь лия поэттнень стихснон лангс.

 

Тяда меле Г.Н.Макшева, илас сафнень эняльдемаснон коряс, азондсь эряфонь и творческяй кинц колга. Мокшэрзянь содаф певицась шачсь Старошайговскяй райононь Краснай Уржа посёлкаса. А творческяй киц ушедсь 1979 кизоня, мзярда сон васедсь мокшэрзянь содаф композиторть, Мордовиянь и Россиянь искусствань Заслуженнай деятельть Г.И.Сураев-Королёвонь мархта. Самай эста Георгий Иванович пуроптозе «Келу» ансамбльть, конань творчестванц пингта меле лихтезе аф аньцек Россиянь, но и международнай уровеньц. Тяда башка, сон касфтозень ламонц Мордовиянь содаф композиторхнень, певецнень и певицатнень, конатнень ёткса Г.Н.Макшевась тячи ащи няевикс вастса.

 

Оцю питне Г.Н.Макшевать творчестванцты эсь выступлениясонза литературно-музыкальнай илас сафнень инголе макссь Мордовскяй (мокшень и эрзянь) народонь Межрегиональнай организациянц Исполкомонц председателец, историческяй наукань докторсь, профессорсь А.С.Лузгин. Александр Степановичень мяленц коряс, Г.А.Макшевать творчествац—мокшэрзянь и республикань лия нароттнень национальнай достояниясна. Сяс тяниень литературно-музыкальнай илась, коса келиста няфтьфт мокшэрзянь морамань национальнай культурась и поэзиясь, арась няевикс событиякс аф аньцек Саранск ошть, но и Мордовиять общественнай и культурнай эряфсонза. Тянкса нинге эряви азомс оцю сюкпря П.С.Кирилловонь лемса краеведческяй библиотекань сотрудникненди, конат аноклазь тя мазы илать, кирдемок мяльса Мордовскяй народть (мокшень и эрзянь) Межрегиональнай общественнай организациянц VII съездонц решениянзон и сонь Резолюциянц вешфксонзон.

 

Сяда тов, корхтамок Г.Н.Макшевать творчестванц эсь лацонь ширензон квалма, А.С.Лузгин мярьгсь: кле, «Келу» ансамбльти  сидеста сашендови макссемс концертт мероприятиятнень эса, конатнень межнациональнай и межкультурнай сотксонь кемокстаманкса ётафнесыне  Россиянь лия региоттнень эса  мокшэрзянь общественнай организациясь. Пингстост лац няеви, конашкава лямбоста тостонь ломаттне васьфнесазь и ансамбльть, и Г.Н.Макшевать выступленияснон. Сяс, аф ваномок сянь лангс, што Г.Н.Макшевась нинге Заслуженнай, тячи ули кода азомс: сон эсь уровененц коряс арась ни Народнай афкуксонь артисткакс!

 

Саранск ошень образованиянь Управленияса этнокультурнай образованиянь отделть руководителец М.М.Вельмяйкина, лямбоста поздравляндамок Г.Н.Макшевать творческяй сатфксонзон мархта, тяфта жа макссь оцю питне сонь творческяй путксонцты Саранск ошень школаса тонафнихнень этнокультурнай воспитаниянкса. И тя, и лия творческяй тевса сон арьсесь Г.Н.Макшевати сатомс од и няевикс сатфкст.

 

Сяльде литературно-музыкальнай иласа лямбе валхт азсть Г.Н.Макшевати республикань национальнай и общественнай организациянь и творческяй интеллигенциянь представительхне. Нят—Мордовскяй (мокшень и эрзянь) народть Межрегиональнай общественнай организациянц секретарец О.В.Дулкин, Организациять Саранск ошень Октябрьскяй (местнай) отделениянц председателец, мокшень кялень и литературань учительницась В.М.Никонова, Финно-угорскяй народонь культурань  Поволжскяй центрать  координатороц Т.Т.Чекушова, Мордовиянь Народнай и Заслуженнай артисткатне А.Атласова, Л.Князькова, Мордовиянь Заслуженнай поэтсь Р.Орлова, П.С.Кирилловонь лемса краеведческяй библиотекань научнай сотрудницась Н.В.Тураева, Г.Н.Макшевать педагогоц В.А.Миронова и лиятне.

 

Аделавсь «Сембе монь эряфозе—Морось!» литературно-музыкальнай илась стихса и мороса. Саранск ошть колга стихть лувозе Настя Киселёва, «Тядя» мороть моразе Г.Н. Макшевать унокоц Катя, а мокшэрзянь содаф моротнень коряс попуррить моразе эстетическяй воспитаниянь Центрань воспитанницась, Саранск ошень 28№ школаса тонафнись Кристина Бурмистрова.

 

В.Нестеров.

 


12.12.2019 №49
 
 
 

 
НОВОСТИ

ПЕРЯМС КИТЬ КОРОНАВИРУСНАЙ ИНФЕКЦИЯТИ

20.03.2020
 
 

МОРДОВИЯНЬ ГОССОБРАНИЯНЬ ДЕПУТАТТНЕ ШНАЗЬ РФ-нь КОНСТИТУЦИЯТИ ПЕТЬКСНЕНЬ

12 мартста Саранскяйса ётась Мордовия Республикань Государственнай Собраниять 44-це сессияц.  Сонь шинь повесткасонза фкя инь важнай кизефксокс ульсь РФ-нь Конституцияти петькснень колга законть ванондомац. Законти основакс арасть тезисне, конат азфтольхть РФ-нь Президентть Владимир Путинонь мархта Федеральнай Собранияти эсь Посланиясонза. Президентскяй ушетксне сяда тов ульсть келептьфт предложениятнень мяльс сявозь, конат састь рабочай группати, кона пуроптф государстваньконь вятиенц мархта.
 

 

Кода азозе шинь повесткати лихтьф тя кизефксть коряс дискуссиять ушедомстонза МР-нь Госсобраниять Председателец, «Единая Россия» партиянь политсоветть Секретарец Владимир Чибиркин, РФ-нь Конституцияти полафтксне водендафт странаньконь суверенитетонц обеспечендаманцты, граждаттнень социальнай гарантияснон кемокстамаснонды, политическяй системать виияфтоманцты, вешфкснень  касфтомаснонды ломаттненди, конат занцихть государственнай пяк эрявикс должностть.

 

20.03.2020
 

МОРДОВИЯСА 7750 СЕМЬЯТИ МАКСФ РЕСПУБЛИКАНСКЯЙ ТЯДЯНЬ КАПИТАЛСЬ

Тяниень пингть, кода марнек странаса, стане и минь республикасонк оржаста ащихть демографиянь кизефксне. Мордовиянь Оцюнясь В.Д.Волков Государственнай Собранияти Посланиянц эса азозе: «Маластонь кота кизотнень тейнек эряви пяшкодемс афкукс историческяй задача—касфтомс республикань населениять одс шачфнень лувксснон касфтоманц вельде, мезсь  апак сатнеколь комсь ветие кизода ламос». Эряви азомс, мекольдень пингть Мордовияса аф кржа тиендеви од, лама идень семьятнень ширеснон кирдеманкса. Эряфс ётафневи программатне, примсеви мератне каннихть результатт. Тяфта, вете кизоста лама идень семьятнень лувкссна Мордовияса кассь 1,5 тёжяньда. Тяниень пингть республикаса эряй 6685 семья, коса касфтовихть колма и сяда лама шаба. Оцю лезксокс ащи семьятненди тядянь капиталсь, кона тя кизоста сявомок Россиянь Президентть В.В.Путинонь мярьгоманц коряс, кармай      макссевома васенце идень шачфтыхнендивок. Минь республикасонк 2012 кизоста сявомок тевс сувафтф республиканскяй тядянь капиталсь. Кинди сон максови, кодама лувксоц и мезень лангс ули кода карьхцямс сонь? Тянь колга корреспондентоньконь мархта корхнемста азондсь Мордовия Республикань социальнай защитань, трудть и населениять занятостенц коряс министрть заместителец С.И.Шувалова.
 

19.03.2020  № 10
 
 
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин