Поиск по сайту: 
 

Архив
 март 
 2020 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Наша семья

КУДСОСТ АЗОРОНДАЙ КЕЛЬГОМАСЬ, ФКЯ-ФКЯНЬ ШАРЬХКОДЕМАСЬ

Кода ни азоськ, Елена Алексеевна Атеренне, а мирдец, Иван Васильевич, тяка райононь Кяшал велеста. Рьвяясть кемонь кизода инголе, а меле фкя-фкянь мельге шачсть иднясна. Васенцесь, Кристинась,      якай  4 классу. Сон Елена Алексеевнань надияма вастоц. Кристина и ёмла сазорнянзон-дуганнянзон ваннесыне, мзярс тядяц заняф лия тевса, и кядьгонят штай, кда эрявксты. Школаса стирнясь тонафни аньцек «ветес», кельгсы кштиманц-мораманц, фалу няфнесы прянц школаса, ётафневи илатнень пингста.

 

2012 кизоня Чепайкиттнень семьяса лиссь кафтонь-крдань кенярдема—шачсть кафтаськасна. Тячи Кириллонди и Анжеликати сисем кизот. Синь стане жа, кода Кристина акаснон, ули творческяй асусна. Кирилл, кепотьксонди, тяни ни машты гармонияса морама. Народнай тя инструментть сон тонаткшнесы      МР-нь культурань Заслуженнай работникть Н.Ф.Турусовонь видеса. Николай Фёдорович шнашендсы од гармонистть, сонь, кле, лац лисенди, и кда кармай старандама, эздонза касы цебярь артист. Анжелика якай кштимань-морамань кружокс. А нинге сон шарфни мяль спортти, варчсесыне виензон дзюдоса.

 

Кафта кизода инголе Чепайкиттнень тага шачсть кафтаськасна—стирня и цёраня. Тядятне-алятне макссть теест мазы лепт—София и Данила. Синь нинге ёмланят, сотцесазь-тонафнесазь перьфпяльть. Эрь шобдаваня София и Данила сельмонь каязь ванондыхть, кода оцюфне кочксесазь школав портфельснон, мяльсна сяда куроконе арамс синь лацост. А мзярс пара мяльса налхксихть налхкшса, весялготкшнихть, кеняртьфнесазь тядяснон.

 

Эрь идть сонцень характероц, эсь лацонь прянь вятемац. Но сембонь инкса фкя лаца пичеди тядянь седись. Ков сяда лама шабада, тов сяда лама таколдамада синь инксост. И козовок ня таколдоматнень эзда аф кяшат, вдь аш кода мзярошка пинге аф улемс тядякс. Тядяксшись—тя стака работа, кона аф содай ваймама шит, отпуск. Скучендакшнемс Елена Алексеевнанди аш мзярда. Шиньберьф сашендови тиемс пефтома тев: штамс-урядамс, муськомс, пидемс мезе-мезе танцтиня, сембонь каванямс. Но сталмокс тянь мокшавась аф лувондсы. Меколанкт, шабатнень перьфке возсемась канни теенза кенярдема, идензон ёткса сон марясы прянц афкукс павазукс. Питнидонга питнихть ся пинкне, мзярда шабатне ктморясазь сонь ёмла кядняснон мархта, кельгозь палсесазь.

 

Шабатнень колга заботендамада башка, Елена Алексеевна кенерькшни и куд пирьфонь тевса. Чепайкиттнень лама жуватадост, кирдихть тувот, куднумолхт, сяват. Оцю пересна. Тяфта лиссь, што семьянь азорти сашендови якамс ярмаконь добувама Москуву. Атерьса аф тёждя мумс цебярь, ярмаку работа, а вдь вете иттнень трямс-касфтомс эряви аф кржа. Аф тёждя аляти кадондомс семьянц, тушендомс идензон ваксста сядот вайгяльбень вастс, но тяка пингть оцю мялец, штоба шабанзон афоль уле мезьсовок вешфкссна. Кудонь, куд пирьфонь тевса, идень ваннемаса Елена Алексеевнанди лезнихть сазоронза, конат стане жа эряйхть Атерьса, сашенды Кяшалста авозец.

 

Чепайкиттне эряйхть кафта этажса эсь кудсост, коса кажнайть ули сонцень уженяц. Модань участкань рамаманкса, кудонь строяманкса семьяти савсь сявомс кредит, а меле, мзярда Чепайкинати омбоце идень шачфтоманкса максфоль тядянь капитал, а колмоце идть инкса республиканскяй бюджетста семьясь получась 100 тёжянь цалковаень лувксса лезкс, сявф ярмакне мрдафтфтольхть. Кода мярьгсь Елена Алексеевна, пяк пара, мес государствась шарфни мяль лама идень семьятнень лангс, максси теест лезкс.

 

Чепайкиттнень семьяса фалу азорондай кельгомась, фкя-фкянь шарьхкодемась. Тяса аф марят кяжда азф оржа валхт, сюцемат-сялондомат. Елена Алексеевна и Иван Васильевич лувондсазь пряснон павазукс. Вете иденьке, кле, вете павазоньке.

 

 

О.ЕВДОКИМОВА.

 

 


12.12.2019 №49
 
 
 

 
НОВОСТИ

ПЕРЯМС КИТЬ КОРОНАВИРУСНАЙ ИНФЕКЦИЯТИ

20.03.2020
 
 

МОРДОВИЯНЬ ГОССОБРАНИЯНЬ ДЕПУТАТТНЕ ШНАЗЬ РФ-нь КОНСТИТУЦИЯТИ ПЕТЬКСНЕНЬ

12 мартста Саранскяйса ётась Мордовия Республикань Государственнай Собраниять 44-це сессияц.  Сонь шинь повесткасонза фкя инь важнай кизефксокс ульсь РФ-нь Конституцияти петькснень колга законть ванондомац. Законти основакс арасть тезисне, конат азфтольхть РФ-нь Президентть Владимир Путинонь мархта Федеральнай Собранияти эсь Посланиясонза. Президентскяй ушетксне сяда тов ульсть келептьфт предложениятнень мяльс сявозь, конат састь рабочай группати, кона пуроптф государстваньконь вятиенц мархта.
 

 

Кода азозе шинь повесткати лихтьф тя кизефксть коряс дискуссиять ушедомстонза МР-нь Госсобраниять Председателец, «Единая Россия» партиянь политсоветть Секретарец Владимир Чибиркин, РФ-нь Конституцияти полафтксне водендафт странаньконь суверенитетонц обеспечендаманцты, граждаттнень социальнай гарантияснон кемокстамаснонды, политическяй системать виияфтоманцты, вешфкснень  касфтомаснонды ломаттненди, конат занцихть государственнай пяк эрявикс должностть.

 

20.03.2020
 

МОРДОВИЯСА 7750 СЕМЬЯТИ МАКСФ РЕСПУБЛИКАНСКЯЙ ТЯДЯНЬ КАПИТАЛСЬ

Тяниень пингть, кода марнек странаса, стане и минь республикасонк оржаста ащихть демографиянь кизефксне. Мордовиянь Оцюнясь В.Д.Волков Государственнай Собранияти Посланиянц эса азозе: «Маластонь кота кизотнень тейнек эряви пяшкодемс афкукс историческяй задача—касфтомс республикань населениять одс шачфнень лувксснон касфтоманц вельде, мезсь  апак сатнеколь комсь ветие кизода ламос». Эряви азомс, мекольдень пингть Мордовияса аф кржа тиендеви од, лама идень семьятнень ширеснон кирдеманкса. Эряфс ётафневи программатне, примсеви мератне каннихть результатт. Тяфта, вете кизоста лама идень семьятнень лувкссна Мордовияса кассь 1,5 тёжяньда. Тяниень пингть республикаса эряй 6685 семья, коса касфтовихть колма и сяда лама шаба. Оцю лезксокс ащи семьятненди тядянь капиталсь, кона тя кизоста сявомок Россиянь Президентть В.В.Путинонь мярьгоманц коряс, кармай      макссевома васенце идень шачфтыхнендивок. Минь республикасонк 2012 кизоста сявомок тевс сувафтф республиканскяй тядянь капиталсь. Кинди сон максови, кодама лувксоц и мезень лангс ули кода карьхцямс сонь? Тянь колга корреспондентоньконь мархта корхнемста азондсь Мордовия Республикань социальнай защитань, трудть и населениять занятостенц коряс министрть заместителец С.И.Шувалова.
 

19.03.2020  № 10
 
 
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин