Лемоц и тевонза содафт АФ АНЬЦЕК МОКШЭРЗЯНЬ КРАЙСОНК

Валентина Петровна Ямашкина Мордовия Республикань культурань Заслуженнай работник. Лемоц лац содаф Мордовия Республикаса, лия региоттнень эса, сембода пяк сятнень ёткса, кит заняфт культурать мархта сотф тефнень эса. Шачсь сон 1957 кизонь 15 апрельста Мордовия Республикань Старошайговскяй райононь Сире Теризморга велеса Куданкиттнень лама идень семьяса. Тяниень пингть Валентина Петровна—руководитель Сире Теризморгань народнай хорти. Тя коллективсь—Мордовия Республикань Государственнай Премиянь лауреат, Мордовия Республикань Оцюнять премиянц лауреатоц, сон гордостень марязь каннесы «Самодеятельнай художественнай творчествань народнай коллектив» почётнай лемть. В.П.Ямашкина тевонь содай, асу хормейстер-народник, лац содасыне мокшень крайть эсь лацонь культурнай козя коензон. Хорса морси полифоническяйста кайги мокшень народнай морот.
Валентина Петровнань родинац—Старошайговскяй райононь Сире Теризморга велесь, мокшень инь сире велетнень эзда фкясь Мордовияса, коса тянемс ванфтовсть семьянь-родонь кеме, национальнай, моронь народнай койхне.
Кда сявомс мяльс тячиень шить, велесь аф ёмла, тяса эряй тёжянть малава ломань. Синь корхтайхть мокшень кяльса, эрь шиня якайхть мокшень щамса, водендакшнемок тя тевти иттнень и подросткатнень.
Валентина Петровна  Куданкина, кода и кизос коре ялганза, нинге шабакс содазень крестьянскяй эряфть, семьяса соткснень и, конешна, сянь, кода велеса ётафтомс ётка пингть. Семьянь иляттнень пингста ламос кулхцонкшнезень лама вайгялень народнай моротнень. Меле, оцюфнень мархта, ушедсь морама сонць.
Куданкиттнень семьяса морасть сембе. Но башка васта занясь Валентина Петровнань  народнай исполнительницакс араманцты сонь альнякац Анатолий, тевонь содай исполнительсь и мокшень эсь лацонь народнай моротнень содафокс тиендисна. Тя сонь руководстванц ала 1957 кизоня велеса пуроптфоль и кочкась вийхть фольклорнай ансамбльсь.
Васенда хорти сувасть Анатолиень мала раднянза: Анна и Татьяна Куданкинатне, конат тердезь коллективти ялгаснон: Марфа Чевтайкинать, Наталья Суминать, Анастасия Виляйкинать, Лидия Норкинать, Анна Милкинать. Анатолий Куданкинонь тевоц тусь и велень школань учительхнень мяльс. Кивок ашезь аще озадонь седихть марс пуропты тевти! Ансамблень участникне оцю мяльса эряскодсть репетицияс. Синь аноклакшнесть фольклорнай оцю программат, конат тиендевсть Сире Теризморга велень народнай моротнень и койхнень коряс.
Пингсь мольсь… Валя шумордазе школать. Марямок пефтома кельгома народнай мороти, эряфонь кить кочкаманц колга кизефкссь школань шумордайть инголе ашезь аще—сон поступась Ардатовскяй республиканскяй культурно-просветительскяй училищав народнай хоровой дирижированиянь отделенияв. Тонафнемать шумордамдонза меле Валентина кучфоль работама родной вели и путфоль директоркс Сире Теризморгань Культурань кудти. Сон тага ушедсь морсема народнай хорса.
1977 кизоня Сире Теризморгань народнай хорсь арась самодеятельнай художественнай творчествань Всесоюзнай фестивалень лауреатокс (Моску ошсь). Валентинати хорть составса тя арась васенце выступлениякс оцю сценаса.
1977 кизось кандсь коллективти нинге фкя казне—национальнай моронь искусствать пропаганданц инкса Сире Теризморгань народнай хорти максфоль МАССР-нь Верховнай Советть Президиумонц Почётнай грамотац.
Коллективть творческяй эряфса оцю васта занясь хоронь сембе пингонь участницась, Российскяй Федерациянь и Мордовия Республикань культурань Заслуженнай работниксь,  Славань III степенень Орденонь кавалерсь Н.М.Кадерова. Мзярда сон арась хорти руководителькс, участникне ушедсть тяшнема фольклор сятнень эзда, кит сонь содазь. Аватне  блокнот, ручка, магнитофон мархта якасть велень эряйхнень ланга, ёрасть вешемс коль сяда лама народнай мора, конатнень кивок ашезень сода. Ашезь лядонда сембонь эзда и Валентина Петровна Ямашкина. Сон кочкась и тяшнезень альбомс 150 мокшень народнай мороть. Кочкась и рузонь  самобытнай морот.
1987 кизоня Валентина Петровна Ямашкина арась самодеятельнай художественнай творчествань Всесоюзнай колмоце фестивалень лауреатокс. Тя пингста сявомок сон хоронь солистка и моронь ушеды.
1990 кизоня мокшавась арась Сире Теризморгань народнай хоронь руководителькс.
1992 кизоня Сире Теризморга велень Культурань кудть видеса (тя ульсь февральста) панчфоль Мокшень национальнай культурань центра. Хоронь участникне од вийса ушедозь мокшень национальнай культурать ванфтоманц и тонафнеманц коряс тевть.
1997 кизонь 17 февральста исполнительскяй оцю мастерстванкса, национальнай искусствать виияфтомаса и пропагандаса оцю путксонкса Мордовия Республикань Правительствать постановлениянц коряс Сире Теризморгань народнай хорти максфоль Мордовия Республикань Государственнай премиясь.
Тяни хорса 18 ломань: 14 ава и 4 алят.  Валентина Петровна, кода тевонь содай руководитель, машты участникнень асушиснон няема, максси эрти эздост няфтемс сонь.
Коллективть репертуарса кафта сядода лама мокшень кунардонь народнай мора, кой-конатне эздост канневихть XVI-XVII векненди: «Сянгяря луга», «Вирьса акша келуня», «Сёмань Анюнясь», «Дикай яксярга» и лиятне.
Сире Теризморгань народнай хорть видеса вов ни 20 киза работай «Лаймоня» идень фольклорнай ансамбльсь, конань руководителец хоронь аккомпаниаторсь, Мордовия Республикань культурань Заслуженнай работниксь В.И.Пивкин. Виктор Иванович вяти оцю тев традиционнай морамати тонафтомать коряс.
2017 кизонь октябрьста Сире Теризморгань народнай хорсь келиста васьфтезе 60 кизонь юбилеенц. Тяка кизоня В.П.Ямашкинати максфоль Мордовия Республикань Оцюнять В.Д.Волковонь Благодарностец.
2018 кизонь 5, 6, 7 октябрьста Сире Теризморга велень Национальнай культурань центраса «Мир» телекомпаниясь ётафтсь «Мордовская свадьба» самобытнай национальнай обрядонь съёмкат. Эсонза примасть участия мокшень коллектифне: Сире Теризморгань народнай хорсь, «Лаймоня» идень фольклорнай ансамбльсь, «Ару лихтибря» народнай фольклорнай ансамбльсь, конань руководителец Л.Г.Канаева—Российскяй Федерациянь Правительствать «Душа России» премиянц лауреатоц (2015 кизось),  Рузаевскяй райононь Левжа велень «Поюня» идень фольклорнай образцовай ансамбльсь.
Аф кунара Москуса П.И.Чайковскяень лемса Концертнай залса В.П.Ямашкинати максфоль Российскяй Федерациянь Правительствать «Душа России» премияц. Сонь Валентина Петровна сатозе народнай творчествать виияфтоманцты путксонкса.
Л.Марченкова,
Народнай творчествань Республиканскяй Кудть отделонц заведующаец, Санкт-Петербургскяй международнай культурнай форумть А.В.Луначарскяень лемса премиянц лауреатоц.