Поиск по сайту: 
 

Архив
 март 
 2020 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Наши мокшанские сыновья и дочери

Н.И.Учватовонь шачема шиста 85 кизонь топодемати

…Шачсь Н.И.Учватов 1935 кизонь 1 январьста Рузаевскяй райононь Левжа мокшень велеса, машина кинь рабочаень семьяса. Идькс пингоц ётась войнань стакадонга стака кизотнень. Тонафнесь шачема велесонза, сяльде—Рузаевка ошень школаса. 1953 кизоня ушедсь тонафнема Мордовскяй пединститутонь физико-математическяй факультетса. Нинге школаса тонафнемста ульсь оцю мялец варжамс эсь творческяй виензон. Кармась тяшнема заметкат, корреспонденцият «Советская Мордовия», «Молодой ленинец» рузонь газетатненди. Пингонь ётазь, няемок сонь сёрмадомань асувонц, тертьфоль работама «Мокшень правдав». Тя ульсь 1957 кизоня. Эстоньбере пцтай сембе лядыкс эряфоц сотфоль мокшень газетаньконь мархта. Тяса покодемста, эряви азомс, сатсь лама. Тевса палозь-паломась, фалу вешендемань киса ащемась вятезь сатфксста сатфксс. Сонь лемоц, кода журналистонь, арась лац содафокс республикасонк. Аф лама пингонь ётазь васенда путови ответственнай секретарькс, а сяльде—главнай редакторти заместителькс, коста кучсазь 2 кизос тонафнема Москуву  КПСС-нь ЦК-ть видеса высшай партийнай школав.

 

Тонафнемада и работада башка, Николай Учватов оцю мяльса тяшнесь стихт, расскаст, повестть.

 

Васенце стихонза печатлакшневсть «Мокша» журналса, «Мокшень правдаса», рузонь кяльса лисендсть «Люблю жизнь» марстонь од поэтонь сборникса. 1960 кизотнень кучкаста Мордкизса лиссь «Павазонь тяште» (1969) повестец медпрепаратонь заводса работайхнень колга. А нинге кемонь кизода меле нолдави «Алят» повестец.

 

1975 кизонь декабрьста Николай Иванович Учватовонь КПСС-нь обкомсь кемокстасы «Мокшень правда» газетати главнай редакторкс.

 

Тя ответственнай вастса работамста Николай Иванович планёркатнень, редколлегиянь заседаниятнень эса фалу вешсь журналисттнень эзда нолямс интереснай и содержанияс коре козя газета, штоба «Мокшень правдать» улель сонцень шамаликоц, сонцень мазышиц.

 

Башка мяль шарфнесь национальнай кизефксненди. Сон най эсь сельминголенза кирдезе сянь, кода родной кяльсь и литературась тонафневихть школаса, мес тя тевса лама нинге афсатыкста, мес эсь кяльсонк лисенди книгатне аф пачкотькшнихть лувити и стак тов. Мокшень газетать вельде старандась сяда касфтомс мокшэрзятнень самосознанияснон и гордостьснон, козякофтомс ваймонь козяшиснон.

 

Аф ваномок вельф заняфшинц лангс, Н.И.Учватов аф юкснесы и литературнай тевть. Сон тяшти «Сргозема» роман, кона лиси 1979 кизоня, а нинге кафта кизода меле (1981) романць мокшеннеста ётафтови рузонь кяльс и нолдави «Пробуждение» лем ала.

 

Николай Иванович мокшень кяльса васенцетнень эздось, кие кярьмотькшнесь фантастикань жанраса тяштемати. Сёрмадозе «Сюра мархта шяйтан» повестть, кона васенда лисендсь полатксонь-полатксонь мокшень газетасонк, а 1973 кизоня Мордкизса нолдавсь книгакс. 1988 кизоня «Взорванный остров» лем ала лисендсь рузкс.

 

1986 кизоня Н.И.Учватов главнай редакторонь вастста ётафтови работама начальникокс Обллитов, косоль пенсияс тумозонза. Ся кизотнень нолдафоль «Маркуз и Лундан» историческяй повестец.

 

Сембоц сон сёрмадсь ниле повестть, кафта роматт. Ашезе юксне поэзиятьке, нолдась стихонь аф фкя сборник. Стихонзон эса васень тематне—трудоннесь, нравственнай воспитаниясь, шачема-касома крайть, Родинать кельгомасна.

 

Н.И.Учватовонь эряфоц сязевсь 1990 кизонь 11 октябрьста. Тусь эряфста, но лемоц ашезь кадов ётай пингти. Сон эряй произведениянзон эса. Сембе синь пачкотькшнихть ломаттнень седис, арьсефтихть и таколфтыхть.

 

Меколи азсаськ, што Н.И.Учватовонь—мокшэрзянь народть пяк цебярь цёранц, национальнай печатень афкуксонь патриотть, перань оцю мастерть минь мзярдонга аф юкснесаськ и сон сембе пингс ляды  седисонк.

 

«Мокшень правдань» журналисттне.

 

Снимкаса: «Мокшень правдать» коллективоц  (1978 к.). Газетать главнай редактороц Н.И.Учватов омбоце рядса (кержи ширде)

 

колмоцесь.

 

Фотось А.ЛияскинОНь.

 


16.01.2020 №1
 
 
 

 
НОВОСТИ

ПЕРЯМС КИТЬ КОРОНАВИРУСНАЙ ИНФЕКЦИЯТИ

20.03.2020
 
 

МОРДОВИЯНЬ ГОССОБРАНИЯНЬ ДЕПУТАТТНЕ ШНАЗЬ РФ-нь КОНСТИТУЦИЯТИ ПЕТЬКСНЕНЬ

12 мартста Саранскяйса ётась Мордовия Республикань Государственнай Собраниять 44-це сессияц.  Сонь шинь повесткасонза фкя инь важнай кизефксокс ульсь РФ-нь Конституцияти петькснень колга законть ванондомац. Законти основакс арасть тезисне, конат азфтольхть РФ-нь Президентть Владимир Путинонь мархта Федеральнай Собранияти эсь Посланиясонза. Президентскяй ушетксне сяда тов ульсть келептьфт предложениятнень мяльс сявозь, конат састь рабочай группати, кона пуроптф государстваньконь вятиенц мархта.
 

 

Кода азозе шинь повесткати лихтьф тя кизефксть коряс дискуссиять ушедомстонза МР-нь Госсобраниять Председателец, «Единая Россия» партиянь политсоветть Секретарец Владимир Чибиркин, РФ-нь Конституцияти полафтксне водендафт странаньконь суверенитетонц обеспечендаманцты, граждаттнень социальнай гарантияснон кемокстамаснонды, политическяй системать виияфтоманцты, вешфкснень  касфтомаснонды ломаттненди, конат занцихть государственнай пяк эрявикс должностть.

 

20.03.2020
 

МОРДОВИЯСА 7750 СЕМЬЯТИ МАКСФ РЕСПУБЛИКАНСКЯЙ ТЯДЯНЬ КАПИТАЛСЬ

Тяниень пингть, кода марнек странаса, стане и минь республикасонк оржаста ащихть демографиянь кизефксне. Мордовиянь Оцюнясь В.Д.Волков Государственнай Собранияти Посланиянц эса азозе: «Маластонь кота кизотнень тейнек эряви пяшкодемс афкукс историческяй задача—касфтомс республикань населениять одс шачфнень лувксснон касфтоманц вельде, мезсь  апак сатнеколь комсь ветие кизода ламос». Эряви азомс, мекольдень пингть Мордовияса аф кржа тиендеви од, лама идень семьятнень ширеснон кирдеманкса. Эряфс ётафневи программатне, примсеви мератне каннихть результатт. Тяфта, вете кизоста лама идень семьятнень лувкссна Мордовияса кассь 1,5 тёжяньда. Тяниень пингть республикаса эряй 6685 семья, коса касфтовихть колма и сяда лама шаба. Оцю лезксокс ащи семьятненди тядянь капиталсь, кона тя кизоста сявомок Россиянь Президентть В.В.Путинонь мярьгоманц коряс, кармай      макссевома васенце идень шачфтыхнендивок. Минь республикасонк 2012 кизоста сявомок тевс сувафтф республиканскяй тядянь капиталсь. Кинди сон максови, кодама лувксоц и мезень лангс ули кода карьхцямс сонь? Тянь колга корреспондентоньконь мархта корхнемста азондсь Мордовия Республикань социальнай защитань, трудть и населениять занятостенц коряс министрть заместителец С.И.Шувалова.
 

19.03.2020  № 10
 
 
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин