Поиск по сайту: 
 

Архив
 март 
 2020 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Тема дня

ВЛАДИМИР ВОЛКОВ ЁТАФТСЬ ПРЕЗИДЕНТТЬ ПОСЛАНИЯНЦ ЭРЯФС ЁТАФТОМАНЦ КОРЯС СОВЕЩАНИЯ

Владимир Волков отмечазе Посланиять социальнай ширети водендафшинц и Президентть мархта азф ашушить каршес тюремань мератнень, демографическяй ситуациять цебярьгофтоманц, граждаттнень и идень мархта семьятнень доходснон касфтомаснон лангс башка мялень шарфтомать. Кода мярьгсь Мордовиянь Оцюнясь, эряви сяда лац и педа-пес пачфнемс одс ушеткснень коряс информациять республикань сембе эряйхненди, инь пяк социальнай ширде ширень кирдемань дополнительнай мератнень колга. Примаф решения ушедомс региональнай СМИ-тнень эса Посланиять сембе аспектонзон колга ломаттненди азондомать-пачфнемать коряс кампания, сувафнемок тяза жилищнай и ипотечнай программатнень, велень ипотекать, тядянь капиталть лувксонц и максоманц коряс полафткснень, 7 кизоти молемс иттненди пособиянь максомать, социальнай контракттнень тевс нолямаснон, малай бизнесть ширенц кирдемань мератнень.

 

Тяконь мархта, кода отмечазе республикань Оцюнясь, аф юмафнесы эсь виенц майскяй укаснень пяшкодемаснон коряс работась.

 

«Президентсь китькстазе: минь путнетяма од задачат, но аф эряви юкснемс, што майскяй укасне стаки мольфтемат и ётафнемат эряфс сяда тов, и бюджетникнень зарплатаснон уровеньцнон коряс сембе параметратне, конат азфт майскяй укаснень эса нинге 2012 кизоня, эрявихть пяшкотькшнемс кемоста»,—лятфтазе Владимир Волков.

 

Совещанияса лац-ряц ванонтфтольхть идень образовательнай учреждениятнень эса ёмла шабатнень вастса обеспечендамаснон коряс кизефксне, од школань строямась, 1 класста сявомок 4 классти молемс школаса тонафнихнень  питнефтома пси ярхцамбяльса обеспечендамась, здравоохранениянь первичнай звенать цебярьгофтомац.

 

«Тейнек эряви тага весть ётафтомс сембе первичнай звенать инвентаризациянц: мзяра минь объекттонк, кодама синь состояниясна, кодама оборудования аф сатни, кода обеспечендафт транспортса и кадраса. Минь ни ушедоськ тянь коряс работать, и Президентсь башка лоткась тя направлениять коряс важнайшить лангс»,—мярьгсь Владимир Волков.

 

Владимир Путин мярьгсь тонафнемань од кизоня ни полафтомс медицинскяй специальносттненди примамань порядкать. «Лечебное дело» специальностть коряс бюджетнай васттнень 70 процентсна арайхть целевойкс, «Педиатрия» специальностть коряс—75 процентсь.

 

«Аноктама ли минь ня полафтксненди?—оржаста кизефтезе республикань Оцюнясь.—Тейнек эряви ваномс коза эрявихть врачне, кодама велес. Штоба абитуриентонь од наборхне улельхть сотфт территориятненди, коса ня специалисттне эрявихть».

 

Тяфта жа совещаниять пингста педа-пес ванондовсть задачатне, конатнень путозень  государствань Оцюнясь эряма вастонь строямать, од китнень, ЖКХ-нь системать одкстоптоманц, инвестиционнай климатть цебярьгофтоманц коряс.

 

Республикань Оцюнясь вешсь министронь кабинетть эзда пингонь апак тарксек ушедомс ноляма тевс Президентть Посланиянц эряфс ётафтомань механизматнень.

 


23.01.2020 №2
 
 
 

 
НОВОСТИ

ПЕРЯМС КИТЬ КОРОНАВИРУСНАЙ ИНФЕКЦИЯТИ

20.03.2020
 
 

МОРДОВИЯНЬ ГОССОБРАНИЯНЬ ДЕПУТАТТНЕ ШНАЗЬ РФ-нь КОНСТИТУЦИЯТИ ПЕТЬКСНЕНЬ

12 мартста Саранскяйса ётась Мордовия Республикань Государственнай Собраниять 44-це сессияц.  Сонь шинь повесткасонза фкя инь важнай кизефксокс ульсь РФ-нь Конституцияти петькснень колга законть ванондомац. Законти основакс арасть тезисне, конат азфтольхть РФ-нь Президентть Владимир Путинонь мархта Федеральнай Собранияти эсь Посланиясонза. Президентскяй ушетксне сяда тов ульсть келептьфт предложениятнень мяльс сявозь, конат састь рабочай группати, кона пуроптф государстваньконь вятиенц мархта.
 

 

Кода азозе шинь повесткати лихтьф тя кизефксть коряс дискуссиять ушедомстонза МР-нь Госсобраниять Председателец, «Единая Россия» партиянь политсоветть Секретарец Владимир Чибиркин, РФ-нь Конституцияти полафтксне водендафт странаньконь суверенитетонц обеспечендаманцты, граждаттнень социальнай гарантияснон кемокстамаснонды, политическяй системать виияфтоманцты, вешфкснень  касфтомаснонды ломаттненди, конат занцихть государственнай пяк эрявикс должностть.

 

20.03.2020
 

МОРДОВИЯСА 7750 СЕМЬЯТИ МАКСФ РЕСПУБЛИКАНСКЯЙ ТЯДЯНЬ КАПИТАЛСЬ

Тяниень пингть, кода марнек странаса, стане и минь республикасонк оржаста ащихть демографиянь кизефксне. Мордовиянь Оцюнясь В.Д.Волков Государственнай Собранияти Посланиянц эса азозе: «Маластонь кота кизотнень тейнек эряви пяшкодемс афкукс историческяй задача—касфтомс республикань населениять одс шачфнень лувксснон касфтоманц вельде, мезсь  апак сатнеколь комсь ветие кизода ламос». Эряви азомс, мекольдень пингть Мордовияса аф кржа тиендеви од, лама идень семьятнень ширеснон кирдеманкса. Эряфс ётафневи программатне, примсеви мератне каннихть результатт. Тяфта, вете кизоста лама идень семьятнень лувкссна Мордовияса кассь 1,5 тёжяньда. Тяниень пингть республикаса эряй 6685 семья, коса касфтовихть колма и сяда лама шаба. Оцю лезксокс ащи семьятненди тядянь капиталсь, кона тя кизоста сявомок Россиянь Президентть В.В.Путинонь мярьгоманц коряс, кармай      макссевома васенце идень шачфтыхнендивок. Минь республикасонк 2012 кизоста сявомок тевс сувафтф республиканскяй тядянь капиталсь. Кинди сон максови, кодама лувксоц и мезень лангс ули кода карьхцямс сонь? Тянь колга корреспондентоньконь мархта корхнемста азондсь Мордовия Республикань социальнай защитань, трудть и населениять занятостенц коряс министрть заместителец С.И.Шувалова.
 

19.03.2020  № 10
 
 
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин