ПРЯВИЙ АЛЯ

—Ну и сипть. Аре, тусь...

Кенкшсь келес панжевсь, и сувась Филянь Стёпа.

—Кафонент лопаттяда? А минь Аксютань Ванькань мархта учсетяма, мзярда Боранць вина канды. А синь тяса брат-братинькат копоряйхть ни.

—Учселеть тозк, а тяза местема, мле, сать?

—Сяда курок сдохнясак, а тон аф учеват. Мон ни фатянь: аф саят, ули тяфтама усолняце. Ванька аф содасы, кржа мархтот копорясь, а мон кода ватксеф модамарень содате.

—А местема тоза молян? Дуракан, што ли? Эсь кудозе сяда маласа. Да и кямоневок кить лац содасазь, коза молема.

—Ярмаксь вдь Ванькань, учи эсот.

—Монга тяфта корхтань,—мярьгсь Юра.

—Тон корхтать... А винадонза сякокс лопадят. А ярмаконц мезьса пандсак?—Стёпа кизефтезе Вовань.—Тон вдь косовок аф работат, тити-митихть курок кядезт аф повихть?

—А месть карман паннема? Дуракан, што ли? Мезевок афи пандан. Пикссамань, што ли? Виец аф саты. Шять, мзярдовок сяван сюлека, симдьса, и пандови.

—Тонць четверть сявоть, а Ванькань аньцек весть симдьсак?—рахазевсь Стёпа.—Эрь ина тейневок каяк, што ли. Мон вдь аф мархтот корхнема сань, а прянь петема.

—А мес, мле, ськамот сать? Вятелить Ваньканьге, эста шумукска теенза афолень ляда.

—А коста содайне: сать куду или туть велева лтама?

—Дуракан, што ли, тняра винать мархта туян лтама.

—А Ванька коль учси эсот. Тейть тоза молемаль.

—Молемаль, молемаль...—полаксазе Вова.—Матнек нява и панде указовать, мезе тейне тиендемс.

Стёпа копордазе стопкаста винать, ширептезе кургонц, кизефтезень азорхнень:

—Кшинтевок аш, што ли?

—А коста? Минцьке ни таньфонц юкстаськ. Тейть хуш шабра бабась максси, а минь маласонк эряйхтьке аш.

—Рамаледе почф да цюкорнят панеледе.

—Лиянь тонафтомась пара, а мес тонць аф рамат? Копшада, нать, ярхцсят?

—Кой-коста праздникста копшанявок повонды.

—Моли тевняце,—пшкядсь Юра и шарфтсь брадонцты:—Кайсек ни, ато пряуйне кодавок аф заводявихть. Ладняс вадемат.

—Эрьда полафтсаськ кядьготь,—арьсефтезе оцю брадсь.—Винада лама, а тя стопканяста симозь прязт аф куци.

—А тага пикскя аф эрявксты?—цяфазевсь Стёпа.

—Мезенди?—ашезь шарьхкоде Вова.

—Оцю кядьгоняста симозь тага килькшс пряцень эцесак.

— Во-орьть! Дуракан, што ли?—кяжиясь Вова.—Иредеть ни? Тейть оцю кядьгос аш месть кайсемс.

Копордасть тага тифтень.

—А тяни, эрьда, моратама,—сась Вовань пряс.

—Ладняс иредемска ашеть кенере, а морамаце ни сась?—рахазевсь Стёпа.

Вова ашезь кулхцонда ширезонза. Сон путозень шрать лангс  кенерьбакарензон, пакарьс конезень сельмонзон, и ушедсь валфтома пинекс уркодома. Ялганзон морамасна ашезь учев, сяс панжезень сельмонзон, пшкядсь повонды кяльса:

—Мес? Кржа? Юра, кайсек тага тифтень.

—Винать азороцат тон, тонць и кайсек.

—Монь сельмоне аф лац няихть—вакска каяса. Эрь тон.

Эка мон!—шоворсь Стёпа, сявозе кядьготь, эстеенза и Юранди каясь пяшксень стопка, а Вованнети пялева.

—А тейне мес аньцек тняра?!—рангозевсь Вова.

—Тон вдь мярьготь: сельмотне аф лац няихть. Сембонди фкакс каянь.

—Тянь мон лац няйса и тяйть шоря кунара шоряф пряуйнень, мон вдь аф дуракан. Мон прявиян. А кяльготнеманкса пяшкотьк стопказень вельф... Вов тяфта.

Симсть тага тифтень, а меле пяярсть, кие коза мусь васта: браттне—фкясь диванть, омбоцесь— кроватть лангс, а Стёпа комафтозе прянц шрать лангс и станяк крназевсь...

                                                                                                   ёдор ПЬЯНЗИН.