РЕСПУБЛИКАНЬКЕ АСЬКОЛЯЙ КАСОМАНЬ-ВИИЯМАНЬ КИГЕ

Залу пуромфнень и республикань сембе эряйхнень поздравляндамста В.Д.Волков мярьгсь, што Мордовскяй автономиять пуроптомац—мокшэрзянь народть эряфса фкя инь оцю событиясь. Владимир Дмитриевичень валонзон коряс, пингсь, кона ётась 1930 кизонь январьста сявомок, няфтезе, што автономиять пуроптомац нинге сядонга кемоста пуроптозень марс ломаттнень, панчсь од кит-ятт культураньконь, коеньконь-обуцяньконь ванфтомаса. Республикань Оцюнясь лятфтазень сятнень лемснон, кие ащесь Мордовиять пуроптоманц ушетксса, кие лама тись регионть промышленностенц виияфтомаса, ся пингонь оцю хозяйственнай руководительхнень, республикань Почётнай граждаттнень.

Благодарностень башка валхт региононь вятись азсь Великай Отечественнай войнань ветераттненди, войнань иттненди, старшай поколениянь представительхненди. В.Д.Волков китькстазе, што республиканьконь 90 кизонь топодемац праздновандави фкя кизоня Великай Победать 75 кизонь топодеманц мархта. Войнась арась од республикати оцюдонга оцю сталмокс. 100 тёжяньда лама земляконьке казьфт боевой орденца и медальса, Мордовиянь 109 эряйти максф Советскяй Союзонь Героень лем, 25 ломанць арасть Славань орденонь полнай кавалеркс.

—Тячи Мордовиясь—странань касонды-вииякшни регион. Касома сатневи экономикаса, промышленностьса, велень хозяйстваса. Мекольдень 5 кизоста валовай региональнай продуктась кассь пцтай 25 процентта. Эряфс ётафтф  100-да лама инвестиционнай проект, панчфт од завотт, эвондась 10 тёжянть малава рабочай васта,—азозе В.Д.Волков.

Региононь вятись стане жа китькстазе, што республикаса ноляви промышленнай продукциять пцтай колмоцекс пяльксоц—инновационнай. И тя показательть коряс Мордовиясь ащи васенце вастса странаса. Саранскяйса работай оптическяй волокнать производстванц коряс Россияса фкя и тяка заводсь. Тячи предприятиясь пяшкотькшнесы российскяй рынкаса оптоволокнаса вешфксть пяледа ламонц. Лац работай Технопарксь, кона омбоце кизось мельцек занцесы 2 вастть Россиянь инь цебярь технопаркнень рейтингсост. Улихть аф кальдяв результатт фармацевтикаса. Кемокснесазь российскяй и международнай рынкаса эсь вастснон вагоностроениянь, светотехникань, стройматериалонь предприятиятне. Вииякшни приборостроениясь, силовой электроникась и солнечнай энергетикась. 5 кизоста республикаса 4,5-крда кассь экспортсь. Тячи Мордовиянь предприятиятнень продукциясна пачфневи масторлангонь 66 странав.

—Мялезе азомс благодарностень валхт властень федеральнай оргаттненди, мес фалу мушенттама ширень кирдема. Тейнек пяк питни Россиянь Правительствать, Федерациянь Советть и Государственнай Думать мархта сотрудничендамась,—мярьгсь В.Д.Волков.—Спасиба Россиянь Президентти В.В.Путинонди республиканьконь лангс башка мялень шарфнеманкса.

Региононь вятить валонзон коряс, башка васта Мордовиять историяса занци 2018 кизонь футболть коряс Миронь чемпионатсь. Строяфт эсь лацонь объектт—стадиотт, международнай аэропорт, вокзалхт, гостиницат, од эряма микрорайотт, тяниень пингонь кит.

Тячи, кода мярьгсь В.Д.Волков, лама вий-эрьгя водендаф национальнай проекттнень, Россиянь Президентть В.В.Путинонь Федеральнай Собранияти Посланиясонза азф инициативатнень эряфс ётафтоманкса.

Мордовскяй автономиять 90 кизонцты лемтьф пуромксса В.Д.Волков макссь государственнай казнет.

Эсь тевсост сатфксонь сатнеманкса и лама киза совестьс коре трудендаманкса ламонцне казьфт Российскяй Федерациянь Президентть Почетнай грамотанц и Благодарностенц мархта. Пара мяльса азсаськ, што казьфнень ёткса «Мокшень правда» газетать главнай редактороц И.С.Лушкин.

Торжественнай собраниять пингста республикань эряйхнень поздравляндазь государственнай властень органонь представительхне, почётнай инжихне. Шумордавсь мероприятиясь мялень салай концертса.

О.ЕВДОКИМОВА.