Поиск по сайту: 
 

Архив
 март 
 2020 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Наши мокшанские сыновья и дочери

«Поволжьянь этнографиянь королева»—

Шачень-касонь Темниковскяй райононь Польское Цибаево велеса, мокшекс ёмла родиназти мярьгихть Пакся Пораня,—мярьгсь Надежда Фёдоровна.—Тяни, ужяль, тя велесь пцтай шамсь, эсонза сембоц эряй 25 ломань, но сон фалу седисон. Ваймостон аф тушенды Пакся Пораняти лажадомась, тя уженять колга лятфнематне мзярдовок аф нардавихть мялямстон».
Дорожкиттнень семьяса колма идьтольхть: фкя стирь и кафта цёрат. Оцюсь, Надя, ульсь васенце лездыкс тядянцты Анастасия Петровнанди, кона работась учительницакс велень школаса. Сон сявондезе стирнянц мархтонза. Надя тонадсь школати сяшкава, што ашель мялец явондомс мархтонза фкявок шис. Вов и школавга тусь рана. Сисем кизоса ни содазе колмоце классонь программать, сяс сон эстокиге арась колмоце класса тонафникс.
Пакся Пораняса семилеткать шумордамдонза меле кемголмува кизоса Надежда Дорожкина поступась Зубово-Полянскяй педагогическяй училищав и ушедсь кемокснема содамошинзон «начальнай классонь учитель» специальностьс коре.
Надежда Фёдоровнань валонзон коряс, педагогическяй училищаса тонафнемась пяк мялезонзоль, но стирти савсь васьфтемс тяфтама стака сталма мархта: сон аф пяк лац содазе рузонь кяльть. Дорожкиттне эсь ётковаст корхнесть мокшень кяльса, Пакся Поранянь школасовок пцтай сембе предметтне вятевсть родной кяльса. Башка мяль шарфневсь национальнай щамоньконди. Оцюнек-ёмланек мокшень тя велеса якасть мокшавакс или мокшалякс наряжафста. Надежда Дорожкина мокшень панарса сась тонафнема Зубово-Полянскяй педагогическяй училищав. Хуш мархтонза, занятияс якамс, усксь школьнай форма, конань рамазе тядяц.
Педагогическяй училищада меле мокшень стирсь направленияс коре кучфоль работама мокшень кялень и мокшэрзянь литературань учительницакс Пакся Пораняв. Савсь вятемс и математикань урокт. Ся пингть тя велеса школань директоркс ульсь республикаса содаф учёнайсь, археологсь Иван Митрофанович Петербургский. Сон и кошардозе стирть поступамс университету историческяй факультету. Надежда тяфта и тись,  максозень документонзон Н.П.Огарёвонь лемса Мордовскяй государственнай университетть историко-филологическяй факультетозонза, кочкамок историянь и обществоведениянь преподавателень специальностть. Вузса тонафнемс теенза пяк лездсть педагогическяй училищаса получаф кеме и крхка содамошитне. Университетть Надежда Фёдоровна шумордазе 1972 кизоня. И сатфть лангс ашезь лотка. Сяльде ульсть Мордовия Республикань Правительствать видеса кялень, литературань, историянь и экономикань научно-исследовательскяй Мордовскяй институтть аспирантурац (этнографиять коряс) и кандидатскяй диссертациять араламац.
Аспирантурав поступась мирдецка—историксь Атюрьевскяй райононь Бораж велеса шачф мокшалясь Яков Васильевич Беляев.
1990 кизоня Надежда Фёдоровна Беляева арась старшай преподавателькс М.Е.Евсевьевонь лемса МГПИ-нь мировой и национальнай культурань, историянь, политологиянь и правань кафедрань, кона пуроптфоль оду, старшай преподавателькс. 2002 кизоня аралазе докторскяй диссертациять, а 2004 кизоня мокшавати максфоль всемирнай историянь и правань кафедрань профессоронь лем. 2012 кизоть самс ульсь всеобщай историянь кафедрань заведующайкс. Надежда Фёдоровна Беляева—этнография, этнология и антропология специальностть коряс аспирантурать ушедыец и руководителец. Сон—100-да лама научнай и учебно-методическяй работань автор. Инь оцю статьянза, тонафнемань пособиянза, книганза, конференциянь материалонза лемтьфт мокшэрзятнень духовнай культураснонды. Сонь руководстванц ала кандидатскяй диссертация аралась 16 аспирант.
Мокшавась Надежда Фёдоровна Беляева образованияса оцю сатфксонкса казьф государственнай казнеса. 2005 кизоня теенза максфоль Российскяй Федерациянь высшай профессиональнай образованиянь Почётнай работниконь лем. Тяда башка, сон—Мордовия Республикань наукань Заслуженнай деятель, 2012 кизоня Мордовия Республикань Оцюнять Указонц мархта казьфоль «За заслуги. В ознаменование 1000-летия единения мордовского народа с народами Российского государства» медальса.
Учёнайсь лятфнесы ся пингть (ётай веконь 90-це кизотнень), мзярда ушедсь национальнай культуратнень вельмофневомасна, «эреклафневомасна», одукс кеподемасна-касфнемасна. Тянкса панчфтольхть общественнай ламоц организациятне, ётась Мокшэрзянь народть васенце съездоц. Оцю тя пуромксса путфоль эрявикс кизефкс—родной кяльхнень ванфтомасна. Национальнай интеллигенциять мяленц лангс башка мяль шарфтсь М.Т.Бибин (педагогическяй институтть эстонь ректороц). 1991 кизоня тя вузса панчфоль республикаса васенце кафедрась, кона каннесь национальнай (мокшэрзянь) культурань межфакультетскяй кафедрань лем. Учёнай Советсь кирдезе тя од тевть ширенц и сембе факультетонь студенттне ушедсть тонафнемост мокшень и эрзянь кяльхнень. Тяда башка, сувафтфоль мокшэрзянь культурать историянц коряс дисциплина.
Национальнай (мокшэрзянь) культурань межфакультетскяй кафедрать васенце составсонза ульсь и тячиень героиняньке.
Кода этнограф Н.Ф.Беляевась примсесь участия этнографонь Всесоюзнай конференциятнень эса, конат ётафневсть этнографическяй экспедициятнень итогснон коряс. «Ётайне марнек Советскяй Союзть. Коса аньцек ашелень: Кавказса, Грузияса, ламоц ошнень эса. Эрь кизоня конференциясь кочксезень участниконзон лия вастса. Ульсь кода полафтомс лия этнографнень мархта пуроптф опытса»,—азозе Надежда Фёдоровна.
Н.Ф.Беляевать марнек эряфоц сотф национальнайть—мокшэрзяннеть ванфтоманц мархта. Сон примась участия Мокшэрзянь народть сембе съездонзон эса (тяни оцю тя пуромкссь канни Мордовскяй (мокшень и эрзянь) народть Межрегиональнай общественнай организациянц съездоц лем). Тя организациять мархта мокшавать сотксонза пяк и пяк кемот. Кеме соткст мокшавась кирди и Мордовиянь Атюрьевскяй, лия райононь школатнень, тостонь директорхнень, учительхнень, тонафнихнень мархта. Ваны, мезе тиендеви национальнайть ванфтоманц инкса, кодама пуромкст ётафневихть и стак тов.
Лама киза Надежда Фёдоровна заняф кельгома тевонц мархта. Сон работай Мордовскяй государственнай педагогическяй институтонь историянь и правань факультетса. Интервьють мархтонза тиине тя факультетть видеса Археологиянь и этнографиянь музейса. Мокшавась кельгозь малаткшнесь тя или тона экспонатти, азондсь колганза. Тяза, кле, экскурсияс сашендыхть студентт сембе факультеттнень эзда, инжихть.
Тевонь кельги мокшава, афкуксонь патриот, родной кялень кельги и ванфты, пара вайме ломань—тянь семботь ули кода азомс учёнайть Надежда Фёдоровна Беляевать колга. Седиста моли лама вал азфоль теенза и лемозонза выставкать панжемста. Профессорть Н.Ф.Беляевать юбилеенцты козя выставка аноклафоль историянь и правань факультетса. Официальнайста  панжемстонза Надежда Фёдоровнань поздравляндазь Мордовскяй (мокшень и эрзянь) народть Межрегиональнай общественнай организациять Исполкомонц председателец, историческяй наукань докторсь А.С.Лузгин, педагогическяй институтонь родной кялень и литературань кафедрань профессорсь Л.П.Водясова, историянь и правань факультетста работас коре ялганза, аспирантонза.
Выставкась лемтьфоль учёнайть, конань ламотне лемнесазь Поволжьянь этнографиянь королевакс, юбилеенцты. А шачсь Н.Ф.Беляева 1950 кизонь 2 январьста.
Сембе цебярть тейть, Надежда Фёдоровна!
Т.АЛЬШИНА.

06.02.2020 №4
 
 
 

 
НОВОСТИ

ПЕРЯМС КИТЬ КОРОНАВИРУСНАЙ ИНФЕКЦИЯТИ

20.03.2020
 
 

МОРДОВИЯНЬ ГОССОБРАНИЯНЬ ДЕПУТАТТНЕ ШНАЗЬ РФ-нь КОНСТИТУЦИЯТИ ПЕТЬКСНЕНЬ

12 мартста Саранскяйса ётась Мордовия Республикань Государственнай Собраниять 44-це сессияц.  Сонь шинь повесткасонза фкя инь важнай кизефксокс ульсь РФ-нь Конституцияти петькснень колга законть ванондомац. Законти основакс арасть тезисне, конат азфтольхть РФ-нь Президентть Владимир Путинонь мархта Федеральнай Собранияти эсь Посланиясонза. Президентскяй ушетксне сяда тов ульсть келептьфт предложениятнень мяльс сявозь, конат састь рабочай группати, кона пуроптф государстваньконь вятиенц мархта.
 

 

Кода азозе шинь повесткати лихтьф тя кизефксть коряс дискуссиять ушедомстонза МР-нь Госсобраниять Председателец, «Единая Россия» партиянь политсоветть Секретарец Владимир Чибиркин, РФ-нь Конституцияти полафтксне водендафт странаньконь суверенитетонц обеспечендаманцты, граждаттнень социальнай гарантияснон кемокстамаснонды, политическяй системать виияфтоманцты, вешфкснень  касфтомаснонды ломаттненди, конат занцихть государственнай пяк эрявикс должностть.

 

20.03.2020
 

МОРДОВИЯСА 7750 СЕМЬЯТИ МАКСФ РЕСПУБЛИКАНСКЯЙ ТЯДЯНЬ КАПИТАЛСЬ

Тяниень пингть, кода марнек странаса, стане и минь республикасонк оржаста ащихть демографиянь кизефксне. Мордовиянь Оцюнясь В.Д.Волков Государственнай Собранияти Посланиянц эса азозе: «Маластонь кота кизотнень тейнек эряви пяшкодемс афкукс историческяй задача—касфтомс республикань населениять одс шачфнень лувксснон касфтоманц вельде, мезсь  апак сатнеколь комсь ветие кизода ламос». Эряви азомс, мекольдень пингть Мордовияса аф кржа тиендеви од, лама идень семьятнень ширеснон кирдеманкса. Эряфс ётафневи программатне, примсеви мератне каннихть результатт. Тяфта, вете кизоста лама идень семьятнень лувкссна Мордовияса кассь 1,5 тёжяньда. Тяниень пингть республикаса эряй 6685 семья, коса касфтовихть колма и сяда лама шаба. Оцю лезксокс ащи семьятненди тядянь капиталсь, кона тя кизоста сявомок Россиянь Президентть В.В.Путинонь мярьгоманц коряс, кармай      макссевома васенце идень шачфтыхнендивок. Минь республикасонк 2012 кизоста сявомок тевс сувафтф республиканскяй тядянь капиталсь. Кинди сон максови, кодама лувксоц и мезень лангс ули кода карьхцямс сонь? Тянь колга корреспондентоньконь мархта корхнемста азондсь Мордовия Республикань социальнай защитань, трудть и населениять занятостенц коряс министрть заместителец С.И.Шувалова.
 

19.03.2020  № 10
 
 
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин