И.Г.Барнашов: «ТЕЙНЕК, ВЕТЕРАТТНЕНДИ, СЯСЬКОМАНЬ ШИСЬ—СЕМБОДА ОЦЮ ПРАЗДНИКСЬ!»

Саранскяень эряйсь, Великай Отечественнай войнань ветеранць Иван Гаврилович Барнашов кельгсыне ванондомс ташта фотографиязон. Таргасы шра потмоста альбомть, варжаксты пингть эзда тюжалготф снимкатнень лангс и кувака сюре кесакокс орадыхть сонь мяленза-арьсеманза, кандсазь мянь одонь кизонзонды. Эстокиге тихтедихть инголенза ялганза, сят, кинь мархта ётась оцю ки службас коре, мала ломаненза. Ня лятфнематне теенза фкя пингть и седиень эждихть, и мялень колайхть—ламотне вдь снимкастотнень эзда ашет ни шиса…
Ётафть колга лятфнемста ветеранць сидеста мртци эсь ёмла родиназонза—Ромодановскяй райононь Коченова вели, коса шачсь 1927 кизонь 21 январьста простой крестьянонь семьяса. Алянц Иван Гаврилович аф мяляфтсы, сон рана тусь эряфста. Тядяц работцесь колхозса дояркакс. «Эряме шуфтонь аф оцю кудняса сисемнек. Алязень куломдонза меле тядязе лиссь рьвакс лиянди. Од аляньконь, кона тядязень лаца рана лядсь полафтома, колма иттензольхть, а монь ульсь ёмла дуганозе. Сембе шабатнень ёткста инь оцюселень, а сяс рана тонадонь велень тефненди. Кота кизоса ни якань колхозонь тинголангу сёронь понжафтома, модань сокама, шужярень скирдовандама. Мзярда аляньконь ётафтозь работама Саранскяи, мельганза туме семьянек».
Школаса Иван Барнашов ульсь фкя инь цебярь ученикокс, венемсь содамошитненди и пяк мялецоль арамс военнайкс.
Аф юкстави шикс лядсь Иван Гавриловичень мялямса Великай Отечественнай войнать ушедомац. Эста теенза ульсь кемнилие киза. «Мзярда радиоса азозь, што странаньконь лангс врьгятсь фашистскяй Германиясь, аф эстокиге шарьхкотьфоль, кодама пелькс учендомазь, вдь войнать тяда инголе ашеськ сотце. Тяфта ульсь минь, шабатнень мархта, а вов оцюфне—тядяньке-аляньке, атяньке-бабаньке тя кулять эзда полафтсть эстокиге. Ломаттне якасть комадонь прят, шамастост юмась весяла мзолфсь. Алятне, од цёратне эряскодсть военкомату, штоба эсь мяльс коре тумс фронту. Ламонц рьвятне лядондсть мирдьфтома, иттне—аляфтома. Но ризносемс-пичетькшнемс ашель мзярда, куду катфне сембе вийса старандасть лездомс фронтти маласькофтомс сяськомать. Аватненди савсь тонадомс «алянь» профессиятнень, илядьста шобдавас трудендамс заводса, фабрикаса, паксяса. Эряфсь пяк стакаль. Аф мярьган, што савсь кирдемс оцю вачаши, но модамарьда и равжа кшида башка шра лангстонк мезевок апак няенттель».
Школанц И.Г.Барнашов аделазе 1944 кизоня, и эстокиге тусь военнай комиссариату. 18 кизонц топодемс ашезь сатне кафта кофт, но сон сембе сяка примафоль курсантокс Советскяй Союзонь Геройть Марина Расковать лемса пилотонь военнай авиационнай школав, кона ащесь Саратовскяй областень Энгельс ошса. «Кис прважаезе ашель. Минь озафтомазь товарнай вагонц и кемонь шит ардоме Саратову, нолямок каршек арды эшелоттнень, конат эряскодсть фронту… Сашендовсь лама пинге макссемс боевой техникать—«СБ», «ТУ-2» и «Пе-2» самолеттнень тонафнемаснонды. Стажировка ётань Бобруйск ошса «ТУ-4» ниле метрань кувалмоса самолетса, конань немецне лемнезь «лиенди крепостекс».
Весть тренировкатнень пингста курсантсь Иван Барнашов токазе пильгонц и сонь ётафтозь Даугавпилсскяй военнай авиационнай техническяй училищав. Военнай службась, Иван Гавриловичень валонзон коряс, макссевсь аф тёждяста. Сяськондемс сталмотнень теенза фалу лезнесь патриотизмась, Родинати кельгомась. «Минь, курсанттнень, водендакшнемазь фронтста ворьготьф дезертирхнень, бандиттнень кирдемаснонды, конат кяшендсть Прибалтикань вирьхнень эса. А весть савсь улемс Даугавпилсть оцю шадода аралайхнень ёткса. Эрявикс материалхне ашесть сатне и ведти кить перяманкса шинеленьконь потмос ашкоткшнеме шувар».
«ТУ-4» самолетонь экипажть лувксса И.Г.Барнашов ульсь Берлинскяй операциянь участникокс. Эста войнась шумордама лангсоль ни. Лия самолеттнень мархта менельста ляцендезь Берлинть и сонь маластонза Зееловскяй панттнень.
Училищать аделамда меле Иван Гаврилович прважафоль Дальняй Востоку—65-це Воздушнай Армияв. Полксна ащесь тайга кучкаса. Арьсекшневсь, што тяса улихть кочкафт офицерхт, конат прважавихть Ригав политработниконди тонафнема. Комиссиять ётазе  аньцек И.Г.Барнашов.
Ригаса Иван Гаврилович и шумордазе службанц. 1953 кизоня сон мрдась Мордовияв. Саранскяйса Барнашов 27 кизода ламос работась внутренняй тевонь оргаттнень эса, ётась служебнай лама куцеманя. Ульсь кадрань отделонь начальникти заместителькс, партийнай комитетонь секретарькс, республикань ОВД-нь штабонь начальникокс. Службанц аделазе полковник званияса. Сембе эряфоц ётась погонца. И мзярдовок сон ашезь вешенде тёждя кит, мирнай пингстовок фалу ульсь «передовойса». Пенсияс лисемдонза мелевок И.Г.Барнашов ашезь карма ащекшнема тевфтома: вятсь общественнай работа васенда МВД-нь аппаратса, меле—МВД-нь ветеранонь Советса, республикань ветеранскяй комитетса.
Иван Гаврилович казьф лама медальса, конатнень кородозь ванфтсыне параднай кителенц лангса.
—Эряфонь кизенди аф весть ульсь кода пувордамс лия шири,—азонды ветеранць.—Но мон аф каендан, мес сембось ладявсь тяфта, а аф лиякс. Лац мяляфтса ся пингть, мзярда гайфтсть штабста и трубкать тона пестонза кулевсь: «Победа!» Кенярдемать тя кулять эзда нльне азомска стака. Виденцян, ашень арьсекшне, што сатса Великай Победать 75 кизонц. Тя шить, кода фалу, васьфтьса кепотьф мяльса. Сяськомась—тя святой тев! Минь, ветераттне, лувондсаськ Победань шить сембодонга оцю праздникокс».
И.Г.Барнашовонь кудса тя пингс питнидонга питни парши лаца ванфтови «Комсомольская правда» газетать ся номероц, конань эса пачфневи кеняртьфти кулясь—германскяй войскатне тапафт.
Тядде Иван Гавриловиченди топодсь 93 киза, но сон тя пингс эрьгав. Сидеста васетькшни од ломаттнень, подросткатнень мархта. Ветеранць фалу учендови инжи 12№ гимназияса, коса мзярда-бди пуропнесь содамошит сонць. Азонкшни тонафнихненди войнань кизотнень, советскяй народть кемошинц, мужестванц колга, кошярясыне од ломаттнень кельгомс эсь шачема масторснон, улемс анококс араламс сонь.
—Аф весть корхнень оттненди, што лангозост ули кода каямс сельме,—азонкшнесыне эсь мялензон-арьсеманзон ветеранць. Сявомс хуш физкультурань урокнень. Тячи шабатнень ули сембосна занятиянь ётафтоманкса. Минь, мяляфтса, ульсь аньцек волейбольнай топоньке, но нльне сеткать ашель коса ускомс. Оцю класса тонафнемста кяденьконь пуворемс лядендеме школьнай алашаньконди пинем, аноклакшнеме вирьса пенгат, штоба тялонда класснень эса улель лямбе. Войнать пингста школаньке тифоль госпиталенди, а минь ётафтомазь лия помещенияв. Тонафни ялганень мархта сидеста яксеме госпитали и лезнеме, мезьса маштоме, медсестратненди. Тяда башка, лувондоме ранендаф солдаттненди книгат, газетат, корхнеме мархтост, штоба кеподемс мяльснон.
Аф ваномок кизотнень лангс, И.Г. Барнашов нинге эрьгав, ёнец оржа, а мялямоц кеме. Диван лангса ащекшнеманц аф кельгсы, эрь шиня, хуш пиземста, хуш ловста, лисенди ульцяв якама-шяяма. Пара мяльса ванондсыне кулятнень и кеняртькшни тячиень сетьме эряфти.
Ветеранть мархта корхнезь ваноськ марнек фотоальбомонц, лядсь мекольце лопанясь, конань лангста весяласта мзолдозь ванць лангозонк удалаф ава.
—Тя рьвязе, Нина Георгиевна,—башка лямбоста азозе Иван Гаврилович.—Марса эряме 60 кизода ламос. Ётксонк ульсь оцюдонга оцю кельгома. Тячемс мяляфтса, кода васенцеда няине сонь, кода каннине урокта меле портфеленц и аноколень няфтемс «алянь» мокшендазень сембонди, кие тяряфтоль обжамс сонь. Мзярда улень армияса, цють ни аф эрь шиня тяшнеме фкя-фкянди сёрмат. Мон синь ванфнесайне тя пингс. Вейхкса кизот ни, кода аш мархтон кельгома рьвязе, а мон тячемс тянди аф тонадован, сяс мес оцюдонга оцю юмафксозе юмась…
Иван Гаврилович и Нина Георгиевна касфтсть кафта стирьхть. Ирина Ивановна сембе эряфонц лемдезе М.Е.Евсевьевонь лемса МГПИ-ти, Маргарита Ивановна—Н.П.Огарёвонь лемса   МГУ-нь правовой управлениянь начальник. Иван Гавриловичень кафта уноктонза и идень кафта уноктонза.
—Ня шитнень идень унокозти—Катеринати топоди 18 киза,—азозе ветеранць.—Аф верондаван, што сон арай ни совершеннолетняйкс. Идень омбоце унокозти 12 киза, а шачсь сон 9 майста—Победань шиня!
Газетаньконь коллективонц эзда мяленьке арьсемс Иван Гавриловиченди кемодонга кеме шумбраши, паваз, эряфонь кельгозь эрямс нинге лама киза.

О.ЕВДОКИМОВА.