Поиск по сайту: 
 

Архив
 март 
 2020 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Национальная тематика

В.Д.Алемайкина: «МОКШЕНЬ КЯЛЬСЬ фкя ИНЬ МАЗЫСЬ МАРНЕК МАСТОРСА»

Кижеватова мокшень велесь ащи Пензенскяй областень Бессоновскяй районца. Тя аймакса сон фкя инь сире населеннай пунктсь. Кда варжакстомс историянь каготтненди, содави, што васенце эряйхне састь тяза нинге XVII веконь 80-це кизотнень. Од велесь, конань синь пуроптозь, лемтьфоль Селиксакс—языческяй геройть Селиконь лемс. Кунардонь пингста сявомок тяса эрясть мокшень ломатть, касфнесть перень серот, жуватат, занцесть пря вирень промыслатнень мархта. 1877 кизоти велеса строяфтольхть кафта церькафт, школа, почтовай станция. Сембоц Селиксаса ся пингть ульсь вете сядода лама куд. 1955 кизоти велесь тифоль центральнай усадьбакс Шверниконь лемса колхозти.
аф ломаньда. Синь лувкссост Советскяй Союзонь Геройсь, Брестскяй крепостть аралаензон ёткста фкясь, мокшалясь Андрей Митрофанович Кижеватов. 1963 кизоня шачема веленцты максфоль сонь лемоц. Кижеватоваса няеви вастса ащи Геройть бюстоц, а школаса лемозонза панчф музей.
Кода ни азоськ, кунардонь пинкнень эзда сявомок, тя аймакса эрясть мокшет. Тяни велесь ушедсь рузыяма. Ламотне туфталкс тянди азонкшнесазь Кижеватоваса «Заречная» птицефабрикать панжеманц, коза работама састь разнай национальностень ломатть. Велеса, штоба шарьхкодемс фкя-фкянь, сяда сидеста ушедсь кайгома рузонь кяльсь. Тяни Кижеватоваса фкявок шаба, улема, аф корхтай мокшекс, аньцек эряфкшу ломаттнень ёткса ули кода кулемс родной валть. Тя, шарьхкотьф, ацергофты седи. Тяка пингть, кепси мяль ся, мес улихть нинге ломатть, конат сембе вийса старандайхть ванфтомс инь питнить, мезсь максовсь тядянь лофцть мархта—кяльть. Тяфтамотнень эзда тячиень героиняньке, мокшавась В.Д.Алемайкина. Пара мяльса азонттама сонь колганза.
Валентина Дмитриевнань мархта содафтонь аф кунара, мзярда сон сашендсь инжикс минь редакциязонк. Шачемас коре сон Кижеватоваста, тяса   ётась идькс пингоц. Валентина Дмитриевна афкуксонь мокшень патриотка. Пяк кельгсы родной кяленц и марнек минценнеть. Эсь кельгоманц мокшавась няфнесы аф аньцек валса, но и кемокснесы сонь тевса. Эряфонц оцюшка пяльксонц лемдезе мокшень фольклорть кочксеманцты. Валентина Дмитриевна нолдась «Материалы по языку и фольклору села Кижеватово Пензенской области» лем ала книга, коза сувасть сонь исследовательскяй авторскяй работанза. Изданиясь нолдаф колма пяльксса. Тяста ули кода содамс Кижеватова велеть историянц, коензон-обуцянзон, иланзон, ломанензон колга. Азондови кодамотольхть сядынголе мокшэрзятнень ярхцамбяльсна, кода синь лемнезь тишетнень, панчфнень, жувататнень, нармоттнень, мезьса и кода пчкафнелезь тя или тона урматнень. Башка васта книгатнень эса Валентина Дмитриевна макссь идькс пингонц колга лятфнематненди, азонды эсь родонц-пляманц колга, лятфнесыне ся пингонь велеряйхнень. Мезсь шарфты мяль, велень ломаттнень колга азондомста авторсь лемнесыне синь аф фамилияса, лемса, а стане, кода корхневсь велеса эсь ёткова—«ульцянь прозвищаса»: Крезонь Степка, Тюжмай Катю, Цигай Алёй, Гаркнай Васек, Торап Манька, Циколь Валя, Юрхтай Нюта, Пленнай Проса, Ванчур, Буртюк, Алькай Коле и стак тов.
Материалхнень кочкаманкса В.Д.Алемайкинати эрявкстсь аф фкя киза. Сон нинге одста пара мяльса кулхцонкшнезень эряфкшу ломаттнень корхнемаснон. Мзярда кулендсь кодамовок аф содаф вал, кона тяни корхтамста ашезь ноляв ни тевс, эстокиге сёрматкшнезе сонь блокнотозонза.Кижеватовань эряйхнень сядынгольдень эряфснон колга Валентина Дмитриевна лама содась тядянц, Варвара Семеновнань эзда. Тяфта серматфонзон ёткса эвондасть мокшень сире морот, ёфкст, юкстаф илатнень колга лятфнемат-азондомат. Лама пинге В.Д.Алемайкинась ётафтсь Пензенскяй архивса, краеведческяй музейса и Российскяй национальнай библиотекаса. Материалхнень кочкамаса теенза стане жа лездсть Бессоновскяй райононь Сосновка, Степановка, Чемодановка велень эряфкшу ломаттне.
Книганзон Валентина Дмитриевна нолдазень эсь ярмаконзон, пенсиянц лангс. Лиссть синь аф оцю тиражса—сядошка экземплярса. И фкявок книга мокшавась ашезь ми ярмакта, фкяняньбес явондозень-казендезень синь содафонзонды, ялганзонды, земляконзонды. Тейне, кле, васенце вастса ащи ся, штоба книгатне тульхть ломаттнень мяльс, эрявольхть теест, улян павазу, кда изданиятне хуш аф ламода лездыхть ванфтомс историяньконь, родной кяленьконь.
В.Д.Алемайкинати ламотне спасибайхть пяк эрявикс тевонц инкса, но улихть и стамот, конат арьсихть, што авась заняф шава тевса, кинди, кле, эрявихть ня «клятне-млятне». Ня ломаттнень Валентина Дмитриевна аф шарьхкотькшнесыне, кода аф шарьхкотькшнесыне ся тядятнень-алятнень, конат нуланя потмос ашкотфста ни тонафнесазь идьснон рузонь кяльти, а синцень родной кяльснон сёпондсазь.

«Кда родной кяльса аф корхтайхть семьяса, сон мзярдовок аф кармай кайгома ульцяса, школаса, транспортса, шабатненди сон аф кельгови, ули аф эрявикс, кяльсь юмай»,—тяфта арьси В.Д.Алемайкина. А меле полаткшнесы: «Тейне-арам, мокшень кяльсь—инь мазысь марнек масторса, сон минь оцю козяшиньке».
Профессияс коре Валентина Дмитриевна учитель. Лама киза тонафтсь шабатненди рузонь кяль, вятезе «История родного края» предметть. Тяни сон пенсияса, но тевфтома аф ащекшни. Пара мяльса якай библиотекав, музеи, кирди кеме соткст Санкт-Петербургонь и Москувонь мокшэрзянь землячестватнень мархта, сидеста уленди ширесост. В.Д.Алемайкина примась участия мокшэрзянь народть пцтай сембе съездонзон эса, а стане жа и ламоц лия пуромкснень эса, коса ваномс кепсевихть кяльть ванфтоманц коряс кизефксне, сонга азонкшнесыне эсь мялензон-арьсеманзон тянь коряс.
Тяни Валентина Дмитриевна эряй Степановка шабрань велеса, но Кижеватоваса уленди пяк сидеста. Аньцек шачема велесон, кле, прязень маряса афкуксонь павазу ломанькс. Тяса кожфське теенза маряви сяда арукс, а перьфпяльсь няеви лия васттнень коряс мазыкс. Сай вели, ётай Артыж ульцява, коса ванфтовсь шачема-касома кудоц, и седиец пяшкотькшни кенярдемада, эвондакшнихть виенза-эрьганза, оцю мялец тиендемс пара тефт.
О.ЕВДОКИМОВА.

13.02.2020 №5
 
 
 

 
НОВОСТИ

ПЕРЯМС КИТЬ КОРОНАВИРУСНАЙ ИНФЕКЦИЯТИ

20.03.2020
 
 

МОРДОВИЯНЬ ГОССОБРАНИЯНЬ ДЕПУТАТТНЕ ШНАЗЬ РФ-нь КОНСТИТУЦИЯТИ ПЕТЬКСНЕНЬ

12 мартста Саранскяйса ётась Мордовия Республикань Государственнай Собраниять 44-це сессияц.  Сонь шинь повесткасонза фкя инь важнай кизефксокс ульсь РФ-нь Конституцияти петькснень колга законть ванондомац. Законти основакс арасть тезисне, конат азфтольхть РФ-нь Президентть Владимир Путинонь мархта Федеральнай Собранияти эсь Посланиясонза. Президентскяй ушетксне сяда тов ульсть келептьфт предложениятнень мяльс сявозь, конат састь рабочай группати, кона пуроптф государстваньконь вятиенц мархта.
 

 

Кода азозе шинь повесткати лихтьф тя кизефксть коряс дискуссиять ушедомстонза МР-нь Госсобраниять Председателец, «Единая Россия» партиянь политсоветть Секретарец Владимир Чибиркин, РФ-нь Конституцияти полафтксне водендафт странаньконь суверенитетонц обеспечендаманцты, граждаттнень социальнай гарантияснон кемокстамаснонды, политическяй системать виияфтоманцты, вешфкснень  касфтомаснонды ломаттненди, конат занцихть государственнай пяк эрявикс должностть.

 

20.03.2020
 

МОРДОВИЯСА 7750 СЕМЬЯТИ МАКСФ РЕСПУБЛИКАНСКЯЙ ТЯДЯНЬ КАПИТАЛСЬ

Тяниень пингть, кода марнек странаса, стане и минь республикасонк оржаста ащихть демографиянь кизефксне. Мордовиянь Оцюнясь В.Д.Волков Государственнай Собранияти Посланиянц эса азозе: «Маластонь кота кизотнень тейнек эряви пяшкодемс афкукс историческяй задача—касфтомс республикань населениять одс шачфнень лувксснон касфтоманц вельде, мезсь  апак сатнеколь комсь ветие кизода ламос». Эряви азомс, мекольдень пингть Мордовияса аф кржа тиендеви од, лама идень семьятнень ширеснон кирдеманкса. Эряфс ётафневи программатне, примсеви мератне каннихть результатт. Тяфта, вете кизоста лама идень семьятнень лувкссна Мордовияса кассь 1,5 тёжяньда. Тяниень пингть республикаса эряй 6685 семья, коса касфтовихть колма и сяда лама шаба. Оцю лезксокс ащи семьятненди тядянь капиталсь, кона тя кизоста сявомок Россиянь Президентть В.В.Путинонь мярьгоманц коряс, кармай      макссевома васенце идень шачфтыхнендивок. Минь республикасонк 2012 кизоста сявомок тевс сувафтф республиканскяй тядянь капиталсь. Кинди сон максови, кодама лувксоц и мезень лангс ули кода карьхцямс сонь? Тянь колга корреспондентоньконь мархта корхнемста азондсь Мордовия Республикань социальнай защитань, трудть и населениять занятостенц коряс министрть заместителец С.И.Шувалова.
 

19.03.2020  № 10
 
 
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин