—Виктория, Москувонь содаф вузса тонафнемда меле тон кочкайть минь университетоньконь, ушедоть мокшень кяльть тонафнема. Мес?
—Эсь вузонь магистратурав ашень моле тонафнема сяс, мес тоса максыхть содамошит аньцек культурать, историять, политологиять, религиять коряс. Тя, конешна, сембось эряви «Востоковед» монь специальностезти. Но тейне сяда мала кяльсь и тонафтомань тевсь. Мон работан английскяй и арабскяй кялень репетиторкс. Сяс мялезе сяда крхкаста содафтомс педагогикать мархта. Тяда башка, мялезе тонафнемс мокшень кяльть. Сяс мес тядязень ширде мон мокшан. Ламоть шарьхкодьса, но монць мзярс аф корхтан мокшекс.
Мон кельгса эсь лацонь ширеть сембоса, лувса тянь козяшикс, сяс пара мялезон, што санган шуди финно-угрань вер. Тяка пингть, пичефтьсамань ся, мес тяни ламоц культуратне, кяльхне юмсихть мастор лангста. Тя лац няеви монь эряфсонга. Мяляфтса, кода ётнесть каникулане щавазень, Татьяна Алексеевна Петряковать ширеса Краснослободскяй райононь Зайця велеса. Сембе корхтасть шачема кяльсост, велень аватне щафтольхть национальнай щамса, илатнень пингста кулендевсть мокшень морот. Эста нинге шарьхкодень, што национальнай культурась ванфневи ломаттнень ёткса, эрь шинь эряфса. Но тушендыхть эряфста эряфкшу ломаттне и синь мархтост, ужяленди, культурась, кяльсь и стак тов. Кда щавазе корхтась  ару мокшень кяльса, содазень эсь народонц коензон-обуцянзон, моронзон, ёфксонзон, маштсь пидема-панема мокшень ярхцамбяльхть и стак тов, то монь тядязе, щакане, щеняне, конат эряйхть ошса, семботь тянь аф содасазь ни, аф маштсазь. И ёфси аш месть корхтамс минь, унокнень, колга. Вов тяфта мастор лангста тушендыхть козядонга козя культуратне. Тянь шарьхкодемда меле монь эряфсон эвондась нинге фкя туфтал, мес мон сань Саранскяи тонафнема.
—Пароль содамс, мес кочкайть «Востоковед» профессиять?
—Школаса тонафнемста пяк кельгине кяльхнень и литературать. 12 кизоста сявомок ушедонь крхкаста тонафнема английскяй кяльть репетитор мархта. Школать аделамда меле ни лац корхтань тя кяльса. Варчсине тонафнемс французскяй и немецкяй кяльхнень. Европейскяй кяльхнень тонафнемасна тейне макссевсь тёждяста, но монь мялезель варжамс эсь вийнень масторлангонь инь стака кяльхнень тонафнемаса, сяс кочкайне арабскяй кяльть. Тяда башка, шабакс ванондыне «Клон» бразильскяй сериалть, коса лац няфтьфтольхть западнай и восточнай культуратнень эса аф фкя лацонь ширетне. Востоконь культурась и религиясь салазь мялезень. Сяс и кочкайне «Востоковед» профессиять.
—Мезьса аф фкя лацонне Саранскяйса и Москуса тонафнемась?
—Васендакиге азса, Саранскяйсь ульсь и ляткшни тейне кельгома ошекс. Сон мазы, ару. Сашендомась тяза тейне кенярдема. Мон фалу шнакшнеса сонь Москувонь ялганенди.
Университетсь стане жа тусь мялезон. Сон тяниень пингонь, сембось тиф студенттнень колга арьсезь. Тяда башка, мезсь сембода дивандафтомань, тястонь преподавательхне фалу анокт лездомс, синь мархтост ули кода корхтамс, васедемс. Москувонь вузса тя аш. Эряви «кувака ки» ётамс, штоба максомс кизефкс, кепотьксонди, факультетонь деканти или кафедрань вятити. Тяса жа кафедрань вятись васенце шинякиге сонць нажядсь тейнек, содафтсь мархтонк, кизефтемазь кода тевоньке, улихть-аш кизефксоньке. Седиге примамась—тя, улема, васенцесь мезьса аф фкя лацонне мокшэрзянь университетсь лия университеттнень ёткста.
Пара мялезон, мес сань Саранскяи тонафнема и сянь, мезьса мялезе касфтомс содамошинень, тяса ули кода сатомс.
—Виктория, сюкпря корхнеманкса. Арьсетяма тейть оцю сатфкст мокшень кялень тонафнемаса и касома преподавателень тевса.
Т.ПЕТРОВА.