Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Пензенскяй областень мокшэрзянь региональнай национально-культурнай автономиять председателец, Пензенскяй областень Правительствать видеса национально-культурнай автономиянь тефнень коряс Советонь членць Е.Г.ПЕРВУШКИНА: «ТИЕМС СЕМБОТЬ, МЕЗСЬ АЩИ ЭЗДОНК»

Кепотьксонди, «Мокшень-Эрзянь кялень ши» иласа, «Вастома» мокшэрзянь культурань областной фестивальса, «Од кизось—мокшэрзянь койхнень коряс», «Масланцясь—мокшекс и эрзякс» иласа, мокшэрзянь национальнай ремеслань выставкаса и лия мероприятиясонк улендихть российскяй нациянь сембе нароттнень представительсна. няемок национальнай культураньконь мазышинзон, синь ламода сяда лац ушеткшнихть шарьхкодема минь, мокшэрзятнень, кода ломанень.

 

Оцю работа меля Автономиясь ётафтсь межрегиональнай соткснень кемокстаманкса. «Этнокультурные ландшафты в традициях народов Среднего Поволжья» Россиянь образованиянь и наукань министерствать проектонц эряфс ётафтомста минь делегацияньке работась Пензенскяй областень Старая Яксарка и  Мордовиянь Сире Теризморга велеса и Саранск ошса. Эрь вастса минь ваноськ, кода ванфневихть и виияфневихть мокшень и эрзянь кяльхне, национальнай культураньке и коеньке. Работать квалма  ульсь снимандаф-тиф научнай кинофильма, конань ули кода ваномс Автономиять сайтса. Тянкса мон азондан оцю сюкпря Автономиянь  Правлениять председателенцты, историческяй наукань докторти В.И.Первушкинонди и сонь студентонзонды, конат  примасть участия тя экспедицияса и тиезь кинофильмать.

 

Межрегиональнай соткснень кемокстамаснонды тяфта жа цебярьста лездсь работась, конань Автономиянь активсь ётафтозе Мордовиянь «Шумбрат», «Кургоня» Межрегиональнай фестивальса, «Волгась—ялгаксшинь ляй. Волжскяй нароттнень культураснон  диалогсна» Международнай этнокультурнай экспедицияса-фестивальса, мордовскяй (мокшень и эрзянь) народонь Межрегиональнай общественнай организациять VII съездсонза.

 

Кирдемок мяльса ётай кизонь рабочай опытть, латцевихть-вятевихть Автономиять тяддень тевонзовок, конат, койсон, тиевомдост меле, кандыхть лама цебярьда мокшэрзянь и Россиянь лия нароттненди, конатнень мархта минь эрятама фкя семьяса.

 

—Тядде кодама инь няевикс мероприятият арьси ётафтомс Автономиясь? И лия региононь кодама мероприятияса примай участия Автономиянь активсь?

 

—Мероприятияда Автономиясь аноклась лама. И сембе синь, и оцюфне, и ёмлатне, тейнек  питнихть и няевикст. Нят—Мордовия Республикань Культурань шись, кона ётафтови Пензенскяй областьса 11 апрельста, «Вастома» мокшэрзянь культурань областной фестивальсь, кона тядде лемтьф Великай Победать 75 кизонь юбилеенцты, Лидия Руслановать шачема шиста 120 кизонь топодемати лемтьф Межрегиональнай илась, Тядянь-алянь кялень шись, «Эрзянь, мокшень мора», «Эрзянь покш чи», «Эряк, веле, эряк!» областной фестивальхне.

 

Автономиясь тяфта жа кармай работама «Этнографическяй оцю диктант» Международнай просветительскяй акцияса, Пензенскяй областень Народонь Единениянь шись, Россиянь Шись, Пенза ошень шись илатнень эса, Населениянь Всероссийскяй переписьса.

 

Автономиянь активсь арьси ётафтомс эрявикс работа лия региононь мероприятиясовок. Мордовия Республикань «Шумбрат», «Кургоня» Межрегиональнай фестивальса, Самарскяй областень «Паронь пандома» финно-угорскяй народонь Межрегиональнай фестивальса и, конешна, «Волгась—ялгаксшинь ляй. Волжскяй нароттнень культураснон диалогсна» Международнай экспедицияса-фестивальса.

 

—Тяддесь—Мялямонь и Славань киза. Сяс, Елена Григорьевна, пара улель кулемс сяда лама Автономиять работанц квалма, конань сон мольфтьсы Великай Победать лемс.

 

—Тяфтама работа минь вяттяма ни. Автономияньке арьсесь-азсь «Фашизмать лангса Победати мокшэрзянь народть путксоц» лем ала патриотическяй региональнай акция. Сонь рамкасонза Пензенскяй областень мокшетне и эрзятне кучсихть тейнек документт, коса азондови мокшэрзятнень подвигснон колга, конатнень синь тиезь фронтса и тылса. Сембе синь путневихть Автономиять сайтс «Победати 75 киза» рубрика ала.

 

Ня материалхне тяфта жа печатлавихть «Пензенское краеведение» журналса, конань нолясы Пензенскяй областень краеведонь Региональнай организациясь.

 

Февральста Автономиясь тяфта жа ётафтсь патриотическяй региональнай акция Советскяй Союзонь Геройть, легендарнай лётчикть М.П.Девятаевонь лемс. Сонь рамкасонза Пензенскяй областень школаса няфтьфоль «Догнать и уничтожить» кинофильмась, коса азондови М.П.Девятаевонь и сонь ялганзон подвигснон колга. Кинофильмать ваномда меле Подвигть квалма эсь мяльснон азозь сембе участникне.

 

Патриотическяй тяфтама акцият, конат лемтьфт мокшэрзянь и лия народонь Геройхненди, Автономиясь кармай         ётафнема тя кизоть  аделавомс. И, конешна, минь активоньке ётай «Бессмертный полк» шествияса.

 

—Кодама работа вяти Автономиясь Всероссийскяй переписть ётафтоманц коряс?

 

—Январь ковста сявомок, Пензенскяй областень образованиянь и культурань учреждениятнень эса  эрь мероприятиянь ётафтомста минь пачфнесаськ мокшэрзятненди: переписть пингста эсь национальностеньконь эряви сёрматфтомс «мордвин или мордвин-мокша, мордвин-эрзя» валса. Тянь эряви тиемс  народоньконь марстонь лувксонц аф кирьфтаманкса.

 

Лиякс мярьгомс, эрь мероприятияса минь тиендьсаськ семботь мокшэрзянь народть национальнай самосознаниянц кеподеманкса-касфтоманкса.

 

—Российскяй нациянь нароттнень ёткса межнациональнай, межкультурнай и межрелигиознай сотксонь кемокстамста, кодама мероприятият ётафни Автономиянь активсь?

 

—Эрь кизоня Автономиянь активсь, тя работать коряс  мокшэрзянь мероприятиянь анокламда-ётафтомда башка, фалу примси участия Пензенскяй областень лия народонь национально-культурнай автономиянь мероприятиятнень эса.

 

Кепотьксонди, «Тядянь и мазышинь ши» лем ала  армянонь иласа, «Акатуй» чувашень модань и сокань праздникса, «Сабантуй» татаронь иласа и лия региональнай мероприятияса.

 

Сяс тейне ули кода азомс: Автономияньке сувафни сатомшка оцю путкс ялгаксшити и ладямати, конатнень коряс  эряйхть Пензенскяй областьса российскяй нациянь сембе нароттнень представительсна.

 

—Елена Григорьевна, кода тон ванат тя мяльть лангс: тиемс-панжемс мокшэрзянь народонь Всероссийскяй национально-культурнай автономия?

 

—Минь ули мордовскяй (мокшень и эрзянь) народонь Межрегиональнай общественнай организацияньке, коса лама киза руководителькс профессорсь Ю.А.Мишанин. Организациясь работай Российскяй Федерациянь эрь регионца, коса компактнайста эряйхть мокшэрзят. Сяс  лемонь-вывескань полафтоманкса аш месть тиендемс Всероссийскяй автономия. Вийхнень эряви нолямс конкретнай тевс!

 

—Удалаза сембе арьсефонте.

 

—Сюкпря.

 

В.Нестеров.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022