Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

ФРОНТОВИКСЬ— ФРОНТОВИКТЬ КОЛГА

«Мокшень правдать» лувиенза, сембода пяк эряфкшуфне, лац содазь мокшень журналистть и писательть Михаил Николаевич Бычковонь. Лама киза мельцек сон работась газетасонк эсь корреспондентокс.
А шачсь Михаил Николаевич 1921 кизонь 21 ноябрьста Рузаевскяй райононь Куликовка велеса сокаень-видиень семьяса. 1940 кизоня аделазе школать и ушедсь покодема Кадошкинскяй районнай газетаса литературнай сотрудникокс, сяс мес содафоль ни мокшень цёрать сёрмадомань оцю асувоц. Сяка кизонь ноябрьста сявфоль Якстерь Армияв, служась Литваса. Тоса жа васьфтезе Великай Отечественнай войнать. Ульсь артиллеристокс, пулемётчикокс, санинструкторкс. Войнада меле работась дивизионнай газетаса.
—Куду мрдань 1946 кизоня. Сёрмадомань промозозень ашине када,—лятфнесь Михаил Николаевич, улень Болдунь, Инсаронь, Кадошкинань райгазетатнень эса ответственнай секретарькс, а Сире Шайгавоннеса—редакторкс. Но сембода лац маряйне прязень кельгома «Мокшень правдасонк», коза 1957 кизоня сявомазь эсь корреспондентокс.
Эряви лятфтамс сяньге, што М.Н.Бычков сёрмадсь аф аньцек статьят и корреспонденцият, сонь перанц алда лиссь лама пяк цебярь рассказ, стихотворения, сяда оцю художественнай произведения. Сонь лиссть книганза, мокшень и рузонь кяльса произведениянза сувафтфт ламоц марстонь сборникненди.
Кода Великай Отечественнай войнань участник, Михаил Николаевич эсь творчествасонза башка оцю мяль шарфнесь военнай тематикати. Тячи минь кирьфтафста лувиеньконди макссаськ сонь азксонц мокшень алять, генералть, Советскяй Союзонь Геройть Д.П.Волковонь колга.
МОКШЕНЬ Генералсь Д.П.Волков
1940 кизоня Зубово-Полянскяй райононь Анаю велеста мокшень цёрати Дмитрий Волковонди топодсь 20 киза. И тяка кизоня сон шумордазе Челябинскяй штурманонь авиационнай училищать и лейтенантонь званияса кармась лиендема боевой самолётса. Практикаса кемокснезень теориянь содамошитнень.
Омбоце кизоня, мзярда Гитлеронь армияц врьгятсь странаньконь лангс, Волков, войнань колмоце шиня ни, ёрясь бомбат врагть войсканзон лангс, конат пуромсть Минск ошть видеса. Васенце боец удалась. Волков шумбраста мрдась эсь аэродромозонза.
Бомбардировщикть экипажец ульсь афкукс интернациональнайкс: колма руст, фкя украинец и фкя мокша. И сембе пяк ладясть фкя-фкянь мархта и надиясть, што кивок аф кадсы палас повф ялганц.
Пцтай ниле кизот шиста шис, веста вес лиендсь Дмитрий Петрович тя стака самолетса—васенда штурманкс, сяльде—командиркс. Тёжятть тонна бомба ёрдась гитлеровецнень лангс, машфтсь тёжятть солдат и офицер, тапась сядот военнай объект, машфтсь танкат и лия техника. Эрь бойть колга можна сёрмадомс башка очерк.
Весть экипаженцты максфоль задания Ростов-на-Дону ошть маласа мумс немецнень аэродромснон, штоба сяльде машфтомс тоса ащи машинатнень. Заданияс тусть веть. Мзярда расчеттнень коряс пачкодсть аэродромть вельхксс, нолдасть валдопты ракета. И няйсть алува лама самолёт. Эстокиге несколька бомба лийкстась алу. Фкя бомбась повсь фашистонь бомбардировщикти, кона срхксесь кеподемс кожфти. Советскяй бомбать эзда сязевсть немецоннетне, сяс аф азовомшка оцю взрывть эзда крьвязсть и тапавсть маластонь самолёттне. Лувфоль, што тя операцияса машфтфоль немецонь комозьшка самолёт. И сембе содазь,  тяса оцю заслугац Волковонь.
Ламоксть лисендсь сонь экипажец тяфтама целень вешендема. Весть, минь разведканьке пачфтсь, што гитлеровецне ёрайхть ёрдамс лама бомба Москуть лангс. Командованияньконь инголи путфоль задача шорямс тянди. Сятнень ёткса, кинди эряволь срафтомс фашисттнень планцнон, ульсь Волковонь экипажецка. 1941 кизонь 27 сентябрьста, поздна веть, самолетоц кеподсь менельти. Пяк вярьге лиезь ётась фронтонь линиять туркс и сявсь курс гитлеровецнень оцю аэродромснонды, конань аралазь кемотть зенитнай орудия. Кода и тяда инголе, мзярда Волковонь бомбардировщикоц маласькодсь ся вастти, крьвязсть кемотть прожектор и ушедсть ляцендема зениткат. Сяконь учт, конацка сязеви самолётть ваксса, а то и пови эзонза. Уленди тяфтавок. Противниксь ёрай васендакиге машфтомс инголи лии самолетть. Сяс машинати савсь тиендемс кодама повсь маневрат—то кеподемс вяри, то кевкс прамс алу, то шаркстомс шири, штоба мянемс прожекторхнень эзда. Бомбардировщиксь вишкста тусь алу, модати, коса ащихть крез мархта кшнинь кранчне. Фкя-фкянь мельге лиихть бомбатне. И вов взрыв, крьвязькшнихть немецонь самолёттне. Волковонь экипаженц мельге стане жа тисть и лия бомбардировщикне.
Тя операцияське удалась. Немецонь аф фкя самолет палсь или срадсь-каладсь тозк модать лангса. Синь аф лийкстайхть Москуть вельхксс.
Волковонь экипажец шумбраста мрдась эсь аэродромозонк. Но самолётть марнек «ронгоц» снарядонь осколкатнень эзда тифоль сифтемкс.
Но войнаса, кода содаф, осколкатне и пулятне повондыхть аф аньцек машинатненди. Фкя заданияс лиемста Дмитрий Петровичень самолетонц лангс врьгятсть немецонь истребительхть. Бомбардировщиксь аралась пря кода маштсь. Но сон пяк пелькс мода лангса объекттненди. Истребительть мархта тюремс теенза пяк стака. Вов и эста экипажть эзда колма ломаттне шавовсть, а Волков ранендафоль.
Мзярошка пингта меле Дмитрий Петрович кадозе госпитальть и тага озась бомбардировщикти и ёрясь бомбат гитлеровецонь танкатнень и машинатнень лангс, тапсезень дотснон и дзотснон, машфнезе пехотаснон.
Войнань ниле кизотнень пингста савсь теенза ёрямс бомбат сонцень Германиять лангска. Тя пяк стака тевсель. Тоза и меки лиемста сашендовсь ламос улендемс кожфса. Но кода улендсь пара мялезонза, мзярда няезе зиянть, конань тиендезе сятненди, кит састь страназонк, штоба машфтомс народоньконь.
Войнаса ломаттне шавондовихть. Пулясь и снарядсь киньге аф ужяльди. Но шиса, кода правила, ляткшнихть инь цебярьста аноклафне, инь лац тевонь содайхне. Тяфтапне, кода Д.П.Волков. Сон лисендсь сяськикс инь стака вастста.
Войнать Дмитрий Петрович аделазе майоронь званияса, Советскяй Союзонь Герой, казьфоль боевой лама орденца и медальса, ульсь правац кадомс военнай службать и арамс гражданскяй инженеркс. Но войнада меле масторлангса обстановкась пельксоль. Исяконь союзникне гразясть каршезонк войнаса, анокласть тянди. Сяс Волковонди савсь лядомс военнай авиацияв. 1948 кизоня командованиясь азсь мяль кучемс сонь тонафнема Военно-Воздушнай академияв. Согласиндась. И, кода эрь вастса, тонафнесь тоса оцю мяльса, старандазь. А 1961 кизоня сон аделазе Вооруженнай Виень Генеральнай штабонь академиять. Лама киза тяда меле сон ульсь оцю вастса Генеральнай штабса, каннесь генералонь звания. Тоста и тусь пенсияс.
Михаил БЫЧКОВ.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022