Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Письма из села

ШНАМА ЛОМАНЬ

2015 кизоня «Поволжье» нижегородскяй издательстваса лиссь 568 страницаста ащи «Ковылкино» книга-альбом. Эсонза МР-нь пищевой промышленностень Заслуженнай работникть Н.И.Скворцовонь фотографияц максф «Ломаттне, конат тисть оцю путкст Ковылкинскяй муниципальнай районть социально-экономическяй касоманцты-виияманцты» страницаса.

 

Николай Ивановичень биографияц—тя аф вяри комотнема, мзярда героень тевсь или подвигсь пачфтезе ломанть сери тёкшненди. Сонь эряфсонза сембось мольсь сяда стакаста и, сяс, улема, сяда шарьхкодевиста и няевиста.

 

—Николай Иванович,—апак учсек кизефтине,—а тон содат кодамовок пацяв валхт кшить колга?

 

—Мзяра мяльце,—отвечась сон и ушедсь азондома: «Шачт, ломань, а кши кочам муви», «Аф алашась уски, а кшись», «Аньцек ангелхне менельста кши аф анайхть», «Мзярс ули кши—сембось аф зиян».

 

Н.И.Скворцовонь кулхцондолить и кулхцондолить. Сон арьси смузюста, цебярь азоркс: «Крестьянскяй семьятнень эса кшить фалу уважандазь. Сон сидеста ащесь якстерь ужеса и вельхтяфоль нардаматнень, конатнень лангса ульсть сюреса сёрматф атякшт, или лама тюсонь скатертть мархта. Аф шуроста сонь путнезь шкайнятнень алу. Народсь содазе, мзяра салу ливозь эряви валомс, штоба касфтомс питни тозерть или розть. Аф стак рузонь содаф писательсь А.И.Солженицын «Бодался телёнок с дубом» повестьсонза тяштсь: «Шачемс и лисендемс нацияти эряви модать лангса, конань лангса кши и шуфтт касыхть».

 

Н.И.Скворцов—пара вайме ломань. Улема, сяс шранц лангса ащи инокть Дорофеень «Цветник» книгац, кона нолдаф нинге XVII векста. Книгаса азоронь кядьса  китькстафт валхне: «Тейть вийс коре тячи тиемс цебярь тев: тяк кадонда сонь вандыень шити».

 

Н.И.Скворцов кельгсы Ковылкино родной ошенц, Мокша ляйть. Уленди, сай седнять лангс и ламос кулхцондсыне кельгома ляйть моронзон. Меле моли ляйть  беряконц лангс и тага ламос арьсезеви. Улема, седиенц таколфтсы мезсь-бди…

 

А нинге Н.И.Скворцов кельгсыне марлювонь саттнень. Сембода пяк тунда, мзярда кожфса шаронды акша порф.

 

…Н.И.Скворцовонь рабочай шиц ушеткшни пяк рана. Но сон тянди аньцек кеняртькшни, сяс мес кунара шарьхкодезе, што аньцек трудендамати вийс коре вяри кеподемс ломанть, тиемс сонь эряфонц мазыкс и пяшкодемс кенярдемада. Мялезе арьсемс теенза аньцек цебярь.

 

Анатолий ДЮКОВ,

 

Гуменскяй средняй школань ингольдень учитель, Россиянь Писателень союзонь член.

 

Снимкаса: МР-нь пищевой промышленностень Заслуженнай работниксь Н.И.Скворцов.

 


14.05.2020 №18
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин